الاستثمار .. تجارب حياتية مختلفة و دروس معتبرة

[hOuSsAm]

السلام عليكم ورحمة الله وبركاته

ياسر باشا موضوع نضيف جدا ومحترم وفعلا فى وقته

هقولك تجربتى وخبراتى الطويلة فى الاستثمار والبزنس :)

------------------

ساعتها كنت فى الكلية بس مش فاكر فى انهو سنة بس اكيد تانية او تالتة

ونفضت دماغى من ليلة المحاسبة دى ووجع دماغها وقولت انا هطلع تاجر (وزى مقال تيمور كان نفسى اوى ادخل ليلة البورصة بس لقلة الامكانيات والخبرات مكنتش عارف)

قولت ابدا فى حاجة عالاد واعمل مراحل وكل مرحلة او مشروع يسلم لمرحلة تانية (والبورصة بالنسبة لى هتبقى نتشات)

دى الاستراتيجية اللى كنت ناوى اشتغل عليها

----------------------------

اول حاجة بدات بيها المشروم (او عيش الغراب)

جيبت كتب وقرات دراسة الجدوى بتاعتها (اللى عجبنى فيه انه مش محتاج راس مال كبير وبالذات انى كنت طالب ومكنش عندى امكانيات)

واتعرفت على واحد دايس فى الموضوع ده عنده زى مكتب تسويق بيجيبلك كل التجهيزات اللازمة للمشروع وبياخد الانتاج منك يسوقه ويبيعه (يعنى انت عليك الانتاج)

وكل المطلوب منى شقة تكون فيه مواصفات نضافة ورطوبة معينة

لاقيت الشقة واجرتها والراجل جابلى الحاجة وبدانا نزرع المشروم

(اللى ميعرفوش هو بيتزرع فى صوب بلاستيك سلك فتحاته كبيرة وبتبقى التربة بتاعته عبارة عن تبن معقم وبذور)

بيحتاج نضافة يوميا مرتين فى اليوم

وترشه بالمية الصبح وبالليل وتهويه

المفروض ايامها على حسب دراسة الجدوى مكسبه كويس اوى وانتاجه عالى

بس غلطت غلطتين ساعتها

اول غلطة ان الراجل بتاع مكتب التسويق ده ضحك عليا وقالى ان المشروع محتاج نص ساعة الصبح ونص ساعة بالليل تروح ترش المية وتهوى عليه وخلصت القصة لكن الواقع ان باقل كمية اقتصادية عرفت ادخل بيها كنت بقضى حوالى 4 سعات الصبح و4 بالليل غير الطريق فكان ده خارج حسابات الجدوى وله اثر فى فشل المشروع (وللاسف ده كان المصدر الوحيد للمعلومة ومكنتش عارف اتواصل مع جهات اخرى)

الغلطة التانية انى مدتش العيش لخبازه - المشروع يعتبر بالدرجة الاولى عايز عناية فائقة وعايزة عمال وده اللى اكتشفته بعد فوات الاوان وانا مكنتش الشخص المناسب للحاجة دى)

وللاسف بعد اول دورة زراعة (شهرين) خسرت كل ما حلتى بالاضافة انى نزلت تقريبا 20 كيلو من وزنى بسبب الاجهاد

وقولت لاء ياعم الحاج انت ملكش فى الزراعة والانتاج والحجات دى انت تدخل فى التجارة

--------------------------------------

لو حد ليه اى اسئلة او تفاصيل مقولتهاش يسال وانا هرد عليه باذن الله بالاجابة المستفيضة

ومتاسف لو فيه تفاصيل مقولتهاش لان الموضوع يعتبر قديم

[الغريب]

ربنا يسلم أيدك يا بشمهندس ياسر على الموضوع الحلو ده

بعد أزنك عاوزك تتكلم شوية في موضوع العقارات ، يعني توضح كيفية إختيار العقار سواء قطة أرض أو شقة أوعمارة أوخلافه والمراحل التالية .. طبعا كلام للمبتدئين وتكون مداخلة مرجعية وصاية

على فكرة يا حسام من واقع تجارب كتير قدامي في موضوع الفطر ده ، يبدو أن هو أصلا عبارة عن نصباية ، يعني الراجل اللي بيوردلك بيستفيد منك بس في التوريد وهو عارف أنك مش هتقدر تطلع إنتاج

عندي كام واحد صحبي حصل معاه نفس التفاصيل اللي أنت حكيتها دي

[hOuSsAm]

على فكرة يا حسام من واقع تجارب كتير قدامي في موضوع الفطر ده ، يبدو أن هو أصلا عبارة عن نصباية ، يعني الراجل اللي بيوردلك بيستفيد منك بس في التوريد وهو عارف أنك مش هتقدر تطلع إنتاج

عندي كام واحد صحبي حصل معاه نفس التفاصيل اللي أنت حكيتها دي

منقدرش نقول نصابية لان فيه انتاج موجود فى السوق واكيد اللى بينتج بيكسب

طبعا هو مستفيد كتير جدا من التوريد لان الفلوس اللى دفعتها متساويش شوية البلاستك والتبن اللى جابهم وهو اصلا فى الاخر بيقولى انا عارف ان هيئتك وشكلك متنفعش فى الحجات دى (اه ينصاب يبن التيت)

ولو حد عايز يعمل الموضوع من تانى ميعملوش الا بعد ميروح لكذا مزرعة ويشوف ادارتها ماشية ازاى ومواصفات النضافة والجودة

ويجيب عمال مؤهلين لكدة

متشكر ليك يا غريب وصاحب الموضوع ياسر

[سكر]

كلامي عن البورصة بشكل عام يا موعود وشرح تعريفها و آليتها ,,

انما البورصة المصرية تحديدا تسال عنها س هو اللي دايس فيها او مدام مغتربة ,,

انا تخصصي FOREX

تقبل التحية

طيب ليه بقى الهجوم على صاحب الموضوع

ومحاوله حشر البورصه المصريه على انها استثمار

[marselia]

انا حتكلم عن تجربة ليا تجربة بس مكملتش الا و هي مشروع ملابس ان احنا نجيب ملابس من الصين و تركبا و نفتح محل و نبيع و مكسبها 400%ر...... و صاحبي قاعد يتحايل عليا و انا مرضتش و هو قام بالمغامرة و دلوقتي ما شاء الله بيدوق طعم الكريز :) ... الي انا عايز لاقوله لاقبالل متخوش اي مشروع لازم تكون دارس و عندك المفقدرة المالية و متسخنش علي الموضوع من غير دراسة و تفشل و تيجي نندم ..... بس كان ليا رجاء للاستاذ اركيتيكت انو يكمل استراتيجية الطوارق لانو مكملهاش:)

[الباشمهندس ياسر]

ربنا يوفقك في مشروعك

حاول تصبر علي شوية العوائق ... و افتكر دائما انه لا راحة ف الدنيا

شكرا جدا ع المساهمة الفعالة و عقبال ما نشوف اعلانك

لا تتعب ولا تحتار احمد انور جابلك الحل الجبار

الفكرة بضاعة بتتقلب بسرعة و مع هامش ربح بسيط الارباح تتراكم ،،،

مش بالسهولة دي يا احمد

فيه حاجة اسمها المخاطرة

كلما ازدادت المخاطرة ... ازدادت الارباح

[الباشمهندس ياسر]

موضوع رائع يا باشمهندس

و فعلا الفترة دي محتاجين مواضيع زي دي

احنا في مرحلة البداية

و نفسي نبتدي على نظافة

و طبعا الأفضل ناخد من الخبرات و نساعد بعض عشان ما نبدأش من الصفر

لأن عامل الوقت مهم جدا

حضور حضرتك هو الاروع و تحت امرك في اي تساؤل رغم اني مبعتبرش نفسي م الخبراء اطلاقا

السلام عليكم ورحمة الله وبركاته

ياسر باشا موضوع نضيف جدا ومحترم وفعلا فى وقته

يا حسحس

بتعمل عيش غراب ...؟

النصيب غلاب

انت دور علي اي حوار تاني و احنا معاك يا حبيب

ربنا يسلم أيدك يا بشمهندس ياسر على الموضوع الحلو ده

بعد أزنك عاوزك تتكلم شوية في موضوع العقارات ، يعني توضح كيفية إختيار العقار سواء قطة أرض أو شقة أوعمارة أوخلافه والمراحل التالية .. طبعا كلام للمبتدئين وتكون مداخلة مرجعية وصاية

فهمني ايه اللي ف دماغك و ان شاء الله اظبطلك الاداء

انت قولي ع المطلوب بالظبط و انا فورييييرة ... وش سعيد صالح

[masrymasry]

السلام عليكم

ياجماعه بلاش موضوع البورصه دي لأني خسران فيها مبلغ كبير ومش عاوز حد يدوق الخساره زي إللي أنا خسرتها

ياريت نشوف مواضيع عن التجاره أو الصناعه

المهم يكون فيها إنتاج لأن مصر دلوقتي محتاجه لزيادة الإنتاج وزي مبتقول شاديه (الكلام مش وقته خالص دا العمل هو المفيد)

ياريت إللي عنده تجربه يكتبها حتى لو فاشله علشان كلنا نتعلم ونستفيد من أخطاء الغير والكل يستفيد

بارك الله فيكم

[abdulmuttaleb]

جزاكم الله خيرا على مشاركاتكم جميعا فردا فردا:)

أحب أشير لموقع رائع يتضمن إرشادات للأعمال الصغيرة وربما دراسات جدوى لبعض المشروعات البسيطة، اسمه موقع كنانة أونلاين من مشاريع وزارة الاتصالات:

http://kenanaonline.com/aboutus

كمان فيه طبعا الصندوق الاجتماعي للتنمية (يا ريت لو حد له تجربة معاه يشاركنا بيها لأن شايف إنه واخد سمعة جامدة جدا ومش عارف كام مائة ألف مشروع سنويا وحاجات جامدة كده ولسة بما أني شغال في شركة نظم معلومات كانوا عاملين مؤخرا قروض بمائة وخمسين مليون جنيه للشركات العاملة):

http://www.sfdegypt.org

على جانب آخر، كنت زمان كتبت مقالة جايز تنفع أكثر لو حد عنده شركة قائمة فعلا، وهي تتحدث عن أهمية مراجعة ومتابعة وتحليل آلية التسويق والمبيعات داخل الشركة أو المؤسسة، وأن هذه المراجعة تجعل صاحب الشركة أو متخذ القرار أمام رؤية كاملة المعالم لكافة المشكلات الموجودة داخل الشركة (تمويلية، بشرية، توظيف، ... إلخ).

رابط المقال من مدونة البيزنس والتكنولوجيا في مصر:

http://biztecheg.blogspot.com/2011/01/blog-post_9460.html

وبالنسبة للتسويق ودور مواقع الانترنت للشركات في لعب دور مهم للدعاية للأنشطة التجارية المختلفة، في اللنك التالي بالإنجليزي (إنجليزي من بتاع مرسي) خمسة معايير تساعد الملاك ومدراء المبيعات لقياس مدى نجاح أي موقع انترنت لأية شركة:

http://biztecheg.blogspot.com/2011/04/5-website-measures-for-marketing.html

جايز لو حبيت أضيف حاجة صغنططة في موضوع الاستثمار فهي نقطتين من واقع تجربة شخصية:

1-ضرورة وجود تخطيط للسيناريو الأسوأ: فشل المشروع تماما.

وأنا قلت الأسوأ تجاوزا، لأن في الحقيقة البدء في مشروع حتى لو تجن ثماره ماليا، فهذه تجربة ناجحة في حد ذاتها لأنّ الفوائد اللي واحد بيستفيد منها جراء فشل أو لنقل عدم اكتمال تجربة تجارية، هي أكثر من أن تحصى، وتكون دافعا أكبر وأقوى لتلافيه مستقبلا، وكذلك تتيح التعرف على جوانب مختلفة من الحياة والبشر خصوصا وأن معايشة التعاملات المالية مع الناس هي في الحقيقة المفتاح الأدق لشخصياتهم.

2-الحرص على التشاور والاستعانة بالآراء، والحمد لله الانترنت والمنتديات مخلتش حاجة، فضلا عن سؤال الأشخاص ذوي العلاقة والمختصين وأهل الخبرة ومن تحبهم أو تثق فيهم.

نقطة أخيرة، البلد دي مش ح تتقدم إلا لما فكرة ان صاحبك لا تجاوره ولا تشاركه دي تتنسي من الذاكرة الشعبية والثقافية للمجتمع المصري، ياما ناس معاهم سيولة مالية (موظفين، مغتربين، إلخ) ولا يجدون آلية للاستثمار توفر لهم دخلا، وتتيح لأولادهم مستقبلا فرصا للتدريب أو العمل، وعلى الجانب الآخر، ياما ناس معاهم الفكرة، أو دراسة الجدوى أو الصنعة المهنية ولكن ينقصهم رأس المال، والطرفين ممكن يكونوا جيران، أو أقرباء، ورغم ذلك لا يلتقيان لأسباب كثيرة (عدم الوعي القانوني، بطء إجراءات التقاضي لو حدث خلاف، .... إلخ).

تم تعديل 22 أبريل 2011 بواسطة abdulmuttaleb

[masraweya]

السلام عليكم

جزاكم الله خيرا جميعا

لقيت قناة اسمها الشباب ترددها 10758 عمودي على النايل سات

فيها برامج لمشاريع صغيرة و سمعت فيها عن حملة تصنيع مصر

الدكتور كان مركز في الحلقة -من تجارب شخصية- على الاستفادة من المخلفات

اتكلم عن الخشب السائل -دقيق خشب مخلوط ببلاستيك سهل التشكيل و له مواصفات مقاومة للحريق او الكيماويات حسب الاضافات

و لان المكن غالي فبيحاولوا يعملوه في مصر

و فكرة تانية ان بدل ما جزء كبير من رأس المال ينفق على انشاءات المصنع .. تتم تجزئة العملية الصناعية الى عمليات صغيرة يمكن القيام بها في وحدات صغيرة قائمة بالفعل نستغلها

انا فاكرة اني قريت من فترة عن الربحية العالية لمشاريع تدوير المخلفات المختلفة

خصوصا ان اكثر من 60% من مخلفات مصر غير مستغلة

و شفتها بنفسي في ناس اشتغلت فيها

[masraweya]

المشاركتين دول ذوي صلة

السلام عليكم

طيب ياجماعة الخير ، يامن تعملون بالسعودية ودول الخليج ، وأخص منكم الشباب من هم دون الخامسة والأربعين

ايه رأيكم فى ظل الحركات اللى كل يوم والتانى بنسمع عنها والتهديد ولوي الذراع وتخفيضات المرتبات ،

ايه رأيكم بدل وجع القلب ده كله ، وبدل الخوف والرعب على قطع العيش ، ايه رأيكوا تشتغلوا لحساب نفسكوا وتبقوا انتوا رؤساء مجالس إدارة اشغالكم.

ايه رأيكم بدلا من وضع تحويشة العمر فى الخرسانات ، تعملوا مشروعات مشتركة وكل مجموعة حسب تخصصاتها ويكون معاهم حد متخصص فى عمل دراسات الجدوى وتعملوا مشروعات داخل الوظن ، منها تكفيكم قلق الاشاعات ، ومنها يبقى كل مجموعة منكم رؤساء انفسهم ، ومنها تشغيل بعض الأيدي العاملة.

مش عايز حد يستغرب من كلامي ، كون انك تكون صاحب عمل دى ميزة كبيرة ميعرفهاش إلا اللى مارسها ، بس المهم تشتغل صح وبعد عمل دراسة للمشروع ، وكلما كان مشروعك متفردا كلما ازدادت فرص النجاح والصعود.

وأعتقد انها قد تكون فرصة لن تعوض ان تبحثوا عن فرص الإستثمار فى الوقت الحالي فقد تكون هناك تيسيرات جيدة.

فكروا فى الموضوع ومش حاتخسروا.

فكره ممتازه كان واحد قريبى اقترحها على مجموعه من الشباب كانوا مسافرين الخليج وكل واحد فيهم

دافع يجى تلاتين الف ورايحين على فيز حره يعنى رايح للمجهول لصابت لاتنين عور زى لما بيقولوا

وقالهم احنا دلوقتى معانا حوالى 500 الف نفتح بيهم مشروع هنا وقالهم على المشروع

وقريبى ده ولله الحمد راجل اعمال ناجح الحمد لله بس للاسف معسموش كلامه بس

تخيل لو سمعوا كلامه كان زمانهم دلوقتى اصحاب شغل ودى لوحدها تفرق كتير

السفر لو مجاش ببلاش وبعد دراسه ومقارنات الف مره يبقى مالوش لازمه

تحياتى وان شاء الله الفكره محل الدراسه

عنبو

[Mr MAGED]

شكر يا باشمهندس ياسر

بالتأكيد موضوع أكثر من هام .. واسمحولي أن اشارك بتجربتي الشخصية

مع ان الموضوع مكنش خاص بيا .. بس انا اللي نفذته من الالف للياء

في مجال عملي كنا بنشتري هدايا ولعب أطفال كتيرة .. وكل لما نفتح فرع جديد

كانت بتزيد كمية الهدايا المستهلكة .. وكلها كانت بيتم شرائها من السوق المحلي

بالرغم من كبر حجم الشركة .. لكن كان عندهم تجارب سلبية من موضوع الاستيراد فلغوا التفكير في الموضوع تماما

الحجم الكبير من الهدايا اللي كنا بنشتريه دفعني للتفكير للسفر للصين .. لان اكيد الاسعار والجودة هتكون مختلفة كتير

وبعد محاولات مكثفة استطعت اقناع رئيس ومالك الشركة بالسماح لي للممحاولة مع اعطائه الدراسات اللازمة

طبعا كنت راسلت اكتر من شركة ودرست الموضوع كويس .. وبالقدر كان موعد المعرض الدائم (كانتون) بمدينة (جوانزو) قرب

وسافرت المعرض الحمد لله ... وطبعا هناك عالم اخر تماما من كل النواحي

أولا عدد الشركات والمصانع الصينية التي تعمل في مجال هدايا ولعب الاطفال لا يمكن تخيله ... ومستويات الجودة كلها متوفرة

اللي اكتشفته ان السعر في الصين مع اختيار افضل جودة ممكنة .. كان تقريبا بيمثل حوال من 20 الي 25% من السعر المحلي

مع اننا كنا بنشتري بسعر الجملة من السوق المحلي .. فما بالكم بسعر التجزئة

خلال المعرض قدرت اختار حوالي عشر مصانع شعرت انها متميزة بعض الشيء .. واخدت منهم مواعيد بعد انتهاء المعرض

وقمت بزيارتهم بالفعل بعد المعرض .. معظمهم بيتواجدوا في مدينة قريبة من (جوانزوا) اسمها (شانتو)

وقمت بالفعل بطلب اول كمية مع طلب بعض الاضافات الخاصة علي الالعاب .. وبعد ان كنا مستهلكين للالعاب والهدايا

أصبحنا نبيعها .. وتكررت زيارتي للصين بعد ذلك خمس مرات بس الزيارات دي كانت بطلب من رئيس الشركة مش بطلب مني

الشاهد في الامر التالي :

- الامر لا يحتاج ميزانيات كبيرة ، فيمكن لاي شخص ان يبدأ بكونتينر واحد.

- بذل بعض المجهود في زيارة المحلات التي تبيع الالعاب في منطقتك والاستفسار عن مصادر شرائهم ومحاولة معرفة الاسعار.

- زيارة معرض كانتون الخاص بالهدايا هو يقام ثلاث مرات في السنة، ولكن الخاص بالهدايا يكون في ابريل ونوفمبر.

- اختيار مستوي الجودة المناسب لمستوي السوق الذي ستتعامل معه.

- مراعة ان اضافة اي طلبات خاصة علي المنتج، سيتطلب ذلك حد ادني للكمية المراد شرائها.

- منحاولش نعمل ناصحين كتير في الفصال، لان نفس المنتج اللي بيتباع مثلا بعشرين ريال، نفس المصنع ممكن يعملهولك بخمسة ريال، طبعا مع الفرق في المستوي.

عل جنب بقي ... أي حد يروح جوانزوا، فيه مطعم تركي في الداون تاون اسمه البوسفور... لازم تزوروه وتاكله منه وتدعولي

عذرا للاطالة .. تمنياتي للجميع بالتوفيق ... والي اللقاء في تجربة اخري ان شاء الله

[masraweya]

اللي اكتشفته ان السعر في الصين مع اختيار افضل جودة ممكنة .. كان تقريبا بيمثل حوال من 20 الي 25% من السعر المحلي

مع اننا كنا بنشتري بسعر الجملة من السوق المحلي .. فما بالكم بسعر التجزئة

ايه السبب يا ترى ؟

هل المنتِج المحلي بيبالغ في السعر

أم انه لا يستطيع الانتاج بسعر الصين فعلا؟

بصورة أخرى.. كيف يتمكنون في الصين من الانتاج باسعار شديدة التنافسية على مستويات جودة مختلفة؟

و هل ممكن نعمل ده في مصر؟

[الباشمهندس ياسر]

ان شاء الله غدا نناقش مداخلات الاخوة الكرام

تحياتي

[Mr MAGED]

اللي اكتشفته ان السعر في الصين مع اختيار افضل جودة ممكنة .. كان تقريبا بيمثل حوال من 20 الي 25% من السعر المحلي

مع اننا كنا بنشتري بسعر الجملة من السوق المحلي .. فما بالكم بسعر التجزئة

ايه السبب يا ترى ؟

هل المنتِج المحلي بيبالغ في السعر

أم انه لا يستطيع الانتاج بسعر الصين فعلا؟

بصورة أخرى.. كيف يتمكنون في الصين من الانتاج باسعار شديدة التنافسية على مستويات جودة مختلفة؟

و هل ممكن نعمل ده في مصر؟

بداية احب اوضح ان التجربة دي تمت في السعودية مش في مصر ... اكيد هيكون فيه شوية اختلافات واعتبارات

لكن بالتأكيد مش هتكون كتيرة بس يمكن يكون اهمها الجمارك .. لان السعودية مش بتفرض جمارك

النقطة الاهم ان مافيش حد بينتج في السعودية ... وغالبا في مصر ... اه فيه مصانع لعب اطفال في مصر

بس مش منتشرة كتير .. كله حاليا بيعتمد علي الشراء واعادة البيع .. يا اما من الصين او من دبي

يبقي احنا مش هنتكلم عن تكلفة التصنيع لان التكلفة واحدة لان كله بيشتري وبعدها يبيع

بعد اضافة مصاريف الشحن والنقل والتعبئة والمصاريف الادارية بالاضافة لهامش الربح المطلوب تحقيقه

فيه ناس بيكفيها 100% وناس عايزة 300%، الامر بيعتمد علي قدرتك علي تسويق وبيع المنتج

اكيد كله هيتباع ان شاء الله، بس الفكرة هيا فين هيتباع وبكام واد ايه هامش الربح

[الغريب]

ربنا يسلم أيدك يا بشمهندس ياسر على الموضوع الحلو ده

بعد أزنك عاوزك تتكلم شوية في موضوع العقارات ، يعني توضح كيفية إختيار العقار سواء قطة أرض أو شقة أوعمارة أوخلافه والمراحل التالية .. طبعا كلام للمبتدئين وتكون مداخلة مرجعية وصاية

فهمني ايه اللي ف دماغك و ان شاء الله اظبطلك الاداء

انت قولي ع المطلوب بالظبط و انا فورييييرة ... وش سعيد صالح

أول هام شكرا على الرسالة يا هندسة

ثاني هام ، أنا بسأل بصفة عامة عن موضوع الإستثمار في العقار على أي مستوى سواء قطعة أرض أو منزل أو شقق تمليك ، أعتقد أن النشاط ده بيكون مناسب جدا للمغتربين الذين لم يستقروا في مصر بعد ، يعني مثلا أنا لو عندي مبلغ بسيط ومش كبير ومحتفظ بيه في بنك مثلا ، فالأفضل من وجهة نظري أني أشتري بيه شقة تمليك وأقوم بتأجيرها ، وهيحصل عدة منافع :

1- هأجرها بمبلغ مناسب ويسير بنية مساعدة شاب على الجواز فيها.

2- المبلغ اللي هيتحصل من الإيجار بيتهيألي أفضل من فوائد البنوك المشكوك فيها.

3- ده مثال لمشروع لا يحتاج تواجد صاحبه ولكن يمكنه السفر ، ويوكل أحد ثقة قريب أو محامي لإستلام الإيجار بدلا منه.

وهكذا أنا بحس أن المشروعات العقارية لا تحتاج إلى متابعة دائمة مثل المشروعات التجارية ، وبالتالي هي الأنسب لمن لم يستقر في مصر بعد ، طبعا مقومات المشروعات العقارية كتيير ، فمثلا لو هختار قطعة أرض فدي محتاجة شوية توصيات والبناء عليها وشكل المنطقة المختارة وهكذا

[بحار الغربة]

انا حتكلم عن تجربة ليا تجربة بس مكملتش الا و هي مشروع ملابس ان احنا نجيب ملابس من الصين و تركبا و نفتح محل و نبيع و مكسبها 400%ر...... و صاحبي قاعد يتحايل عليا و انا مرضتش و هو قام بالمغامرة و دلوقتي ما شاء الله بيدوق طعم الكريز :) ... الي انا عايز لاقوله لاقبالل متخوش اي مشروع لازم تكون دارس و عندك المفقدرة المالية و متسخنش علي الموضوع من غير دراسة و تفشل و تيجي نندم ..... بس كان ليا رجاء للاستاذ اركيتيكت انو يكمل استراتيجية الطوارق لانو مكملهاش:)

سؤال ياباشا اذا سمحت : هو اطعم الكريز اللى صاحبك بيدوقه ده حلو ولا وحش ؟؟؟ اصل انا معرفش الكريز ..... يعنى انت تقصد انه نجح ولا فشل ؟؟؟؟ :)

سؤال تانى : هو لو الواحد عاوز يجيب حاجة ( مش شرط ملابس يعنى ) من الصين او تركيا .... سهل يحصل على الفيزا ويسافر ؟؟؟؟ وهل فيه مكاتب معينة بتقوم معاك بدور المرشد فى الرحلة دى ؟؟؟؟ ولو فيه مكاتب كده ما مدى نسبة النصب فيها ؟؟؟؟؟

[marselia]

طعم الكريز ده دليل علي النجاح الكبير للموضوع و فعلااا كان عايز مامرة و كدة بس هنقول ليه الفقري الي زييي.... حوارات اللبس ديه لازم يكون واحد متمرس معاكي عيكون عارف الاماكن الي بتشتري نمنها عشا متخسرش جامد انا مش عايز اقول لحضرتك تجارب حصلت لناس عملت فيها نصحة و راحت من غير متغيب حد معايا و لاضحك عليهم جامد اوي .. بص لحضرتك بالنسبة لتركيا سهل اوي تسافرلها ... بس الصين الله اعلم

[Ahmed Anwer]

السفر للصين اسهل ما يمكن

و تأشيرتها عبيطة ، و أي حد بياخدها بتتكلف 250 جنية باين

و المكاتب المصرية في الصين ،، أكتر من الهم علي القلب

دورهم ،

دليل ليك في الصين ، المسئولية عن تجهيز الأوراق ، تجميع البضاعة و استلامها بعد سفرك و تعبئتها في الكونتينر

ده مقابل عمولة بتتفقوا عليها غالبا من 3 ل 5%

حسب الحجم

بس طبعا بيكسبوا من حاجات تانية كتير

عموما في الفترة الأخيرة الإستيراد من الصين أصبح مهنة من لا مهنة له

لذلك مأنصحشي بخوضه غير لصاحب الخبرة في مجال معين و اسواق معينة

الإستيراد اسهل حاجة في الدنيا و ليه سكته و الناس اللي بتساعدك في كل حاجة

المشكلة في التسويق

[الباشمهندس ياسر]

أول هام شكرا على الرسالة يا هندسة

ثاني هام ، أنا بسأل بصفة عامة عن موضوع الإستثمار في العقار على أي مستوى سواء قطعة أرض أو منزل أو شقق تمليك ، أعتقد أن النشاط ده بيكون مناسب جدا للمغتربين الذين لم يستقروا في مصر بعد ، يعني مثلا أنا لو عندي مبلغ بسيط ومش كبير ومحتفظ بيه في بنك مثلا ، فالأفضل من وجهة نظري أني أشتري بيه شقة تمليك وأقوم بتأجيرها ، وهيحصل عدة منافع :

1- هأجرها بمبلغ مناسب ويسير بنية مساعدة شاب على الجواز فيها.

2- المبلغ اللي هيتحصل من الإيجار بيتهيألي أفضل من فوائد البنوك المشكوك فيها.

3- ده مثال لمشروع لا يحتاج تواجد صاحبه ولكن يمكنه السفر ، ويوكل أحد ثقة قريب أو محامي لإستلام الإيجار بدلا منه.

وهكذا أنا بحس أن المشروعات العقارية لا تحتاج إلى متابعة دائمة مثل المشروعات التجارية ، وبالتالي هي الأنسب لمن لم يستقر في مصر بعد ، طبعا مقومات المشروعات العقارية كتيير ، فمثلا لو هختار قطعة أرض فدي محتاجة شوية توصيات والبناء عليها وشكل المنطقة المختارة وهكذا

بص يا سيدي

م الاخر. صدق السعوديين ف مثلهم القائل

العقار هو الابن البار

العقار في المستوي المتوسط (( انت تخاطب قطاع عريييييييييييييييض من الشعب يعني من المستهلكين) عمره ما هيزعلك ابدا ابدا

مهما كان دخلك و المقدم اللي معاك هتعرف تاخد شقة تمليك و بشوية تشطيبات بسيطة هتعرف تاجرها و تعملك دخل

نقطة ان الدخل ده افضل من البنك ... فهي قطعا احسن م البنك و اكتر (( يا تري الفائدة نسبتها وصلت كام )) فضلا عن انها حلال صافي مصفي و خد المفأجاة بقي

تمن الشقة بيزيد يوم عن يوم بخلاف فلوسك ف البنك قيمتها الشرائية بتقل يوم عن يوم

يا عمنا بنك مين و بتاع مين ... و يمحق الله الربي .. قضية خلصانة من بدري اوي

نرجع للخلاصة

انا احييك علي اختيارك لفكرة العقارات اللي من غير ما نشعر بتعمل دورة اقتصادية رهيبة في المجتمع

بالمناسبة .. لما بنلاقي ان العقارات اتحركت بنعرف ان السوق عموما ابتدي يمشي و ان المايه بتجري مش واقفة

و اخيرا

ربنا يوفقنا جميعا لما فيه الخير و مصلحة البلاد و العباد