أول بوسة في حياتي

[الباشمهندس ياسر]

كان عمري 34 سنة ..لألألأ.. دماغكم ما تروحش بعيد، ده مش عمري مع أول بوسة في حياتي، ده كان عمري لما أمي جت زارتني في مكتبي، أومال يعني ولادي دول جم عن طريق الماسنجر؟ واتلمت عليها شلة الزملاء في المكتب، ويا أهلاً يا طنط ونورتي يا طنط، ده الاستاذ أحمد شبهك تمام يا طنط.

وابتسامة أمي قاربت ما بين السماء والأرض .. وضبطتت نفسها في الكرسي، وأخدت نفس عميق بعمق الذكريات، وأدتني احساس الملكة اللي قاعدة وحواليها العبيد والجواري.

أدوني كوباية مية ساقعة .. ده طلب من أمي تم تنفذه في التو من إحدى الزميلات .. وفكرتني أمي بشريفة فاضل وهي تحاول أن تقول: طبعاً ما أنا أم البطل .. والبطل ده اللي هو حضرتي طبعاً .. علشان انا ابنها مش علشان أي حاجة تخصني.

وقالت: تصدقوا يا ولاد لما ولدت احمد كان قبل العيد الكبير بكام يوم (بحسبة بسيطة اتضح أنني مواليد 6 ذو الحجة 1386هـ ) وولدته باليل بس الساعة كم بالضبط مش فاكرة؟!

فاكر يا احمد أنت اتولدت الساعة كام.. وزي الأفلام العربي رفعت رأسي وقلت: بشرفي يا هانم مش فاكر .. والبنات والشباب حوالية قالوا يا طنط يفتكر ازاي ده كان لسة مولود.. و بطريقة من يسخر من عقول البنات والشباب الساذجة والتي لا تستطيع ان تسوعب عبقرية إنسان مثل ابنها منذ اليوم الأول قالت: لأ إزاي بقى ده اسم النبي حارسه وصاينه ذكي ونبيه وناصح من يومه.. واضطر الزملاء والزميلات أنهم يصدقوا عبقريتي بناء على نصائح وتوجيهات الست كوندانفيسة اللي هي أمي ...بس اللي حصل بعد كده لا يتحكي ولا يتكتب ولا يتقال .. أمي بصت على وقالتالي بعيون كلها خبث ولؤم: وفاكر لما بوست زميلتك وبعتوا جابوني وقالولي إنك بوست زميلتك..

[الباشمهندس ياسر]

.. بهذه الصيغة أمام خمسة من البنات العذارى .. وعن واحد بيثقوا فيه .. يا نهار اسود .. بوست زميلتك .. وبعتوا لأمك .. يا نهار مجازر واحنا اللي فاكرينك خضرة الشريفة .. بوست زميلتك وبعتوا لأمك .. واحنا اللي كل شوية رايح فين يا أستاذ أحمد، رايح أصلي .. جاي منين يا أستاذ أحمد .. كنت في الجامع.. بوست زميلتك وبعته لأمك .. دلوقتي بقى ورينا جمال خطوتك .. رايح فين يا كازانوفا .. رايح أجيب أومو ..جاي منين يا كازانوفا .. كنت باجيب اومو .. ليه يا كازانوفا .. علشان نطهر المؤسسة من أمثالك ..

طبعا لم تستطع واحدة من البنات أن تنطق بأي كلمة مما سبق.. بس ده كان حالهم .. وواحدة منهم فضلت تبص علي من فوق لتحت ومن تحت لفوق لما اتحرقت في مكاني .. وتحول وجوههم من اللون الوردي المرحب بالست كوندانفيسة الى اللون الأصفر المخضوض، ومن اللون الأصفر إلى اللون الأسود المنتقم .. وأنا طبعا صرخت في أمي: انت بتقولي ايه يا حاجة .. زميلتي مين؟ يا نهار اسود!!

[الباشمهندس ياسر]

وقالت: ما تكسفش ما تكسفش دول زي أخواتك، والله يا بنات كان شقي شقاوة، هئ هئ لأ ولسة شقى .. مع نصف ضحكة اعرفها من أمي لما تمسك علي ذلة.

شقي أوي هو باس زميلته من هنا وراحو بعتلي على طول

بس بس بس .. طبعاً بس هنا ليست بس التوقف ولكنها بس الاستعطاف والرحمة .. زميلتي مين يا أمة .. أبوس ايديكي .. ولا بلاش أبوس ايديكي .. أقولك بلاش ابوس خالص .. بس و النبي ورحمة ستي وجدي مين زميلتي دي.

قالتلي فاكر لما كنت بتروح الحضانة اللي في حارة اليهود وانت عندك اربع سنين وبوست البنت اللي جنبك في الفصل والمدرسة بعتت وقالتللي ابنك باس زميلته .. اربع سنين .. يا جماعة اربع سنين .. إحياة النبي اربع سنين .. اربع وسنين احمدك يارب .. اربع سنين يا امة وعملتيها غنوة وحدوتة .. ويا جرادل المية الساقعة انهمري .. ويا شلالات نياجرا أهدري .. بتقولك اربع سنين .. بحب الدنيا كلها .. الحمد لله كان عندي اربع سنين .. يعني عيل .. كنت عيل .. يعيش العيال وعمايل العيال .. بوستها لما كان عندي اربع سنين .. وبعدين تبت من بعدها وعملت عمرة .. وبطلت بوس خالص.. وكمان خليت أمي تبطل تحكي ذكريات عني بالطريقة دي .. وفكرتني باغنية: ياماما ستو احكلنا حكاية بس اوعي تطلع قصيرة .. والتي تنتهي بفعل فاضح من الجدة .. حين تأمر أحفادها بهذا الطلب الفاحش: طب حزموني وسدو الشيش واتفرجوا على رقص زمان آه يا ترللي يا يللي آه يا ترللي يا يللي يا عين

[محمد حامد الغنام]

ههههههههههههههههههههههههههههههههههههههههه

ههههههههههههههههههههههههههههههههههههههههههههههههههههههههه

جميل الكلام دة

ههههههههههههههههههههه

اضحك الله سنك

[الباشمهندس ياسر]

ههههههههههههههههههههههههههههههههههههههههه

ههههههههههههههههههههههههههههههههههههههههههههههههههههههههه

جميل الكلام دة

ههههههههههههههههههههه

اضحك الله سنك

و سنك يا محمد

[الباشمهندس ياسر]

والحكاية ببساطة، إني كنت دخلت الحضانة وأنا عندي اربع سنوات، ولما كبرت اكتشفت إن الحضانة على بعد 5 كيلو من بيتنا يتخللها تعدية شوارع الأزهر وبورسعيد والموسكي ومكسر الخشب وعم أرتين الأرمني بتاع سندوتيشات البسطرمة.

ولما دخلت الحضانة كنت قاعد على الدكة لوحدي .. أوم جت "أبلة سعاد" قبل اختراع مصطلح ميس .. وجايبها في ايديها بنت سبحان من صور .. وجه ولا القمر ولا كل الكواكب .. وعيون زرقا .. لم استمع إلى نصيحة محرم فؤاد : أوعى تكون ام عيون زرقا ماحنش اد النار والفرقة .. وكعادتي في عدم سماعي لأحد.. لم استمع إل تلك النصيحة الجوهرية .. وظلت عيوني متعلقة بذات العيون الزرقاء ويخرب بيت عيونك يا عالية شو حلوين .. وقالتالي ابلة سعاد اتاخر يا أحمد علشان البنت تقعد جنبك .. ويا صباحو اللي زي الفل .. جنبي دي لو مشلتهاش الأرض تشيلها عيوني .. وقمت فزيت من على الدكة ..وقعدت البنت جنبي .. وهي ساكتة خالص .. ونزلنا الفسحة .. بس هي كانت خايفة من زحمة الولاد .. وانا طلعت فوق نخلة كانت في المدرسة ..( شقاوة أدت إلى كسر ظهري في الكبر) .. والبنت كانت واقفة تحت بتعيط وهي بتقولي : انسل انسل هتقع .. ونزلت .. وعرفت انها خايفة من زحمة المدرسة .. قلتها انت اسمك ايه قالت: منى .

قالتلي تيجي نلعب سوا .. وادتني سندوتش طعمه كان غريب جدا .. قلتلها ايه ده يا منى .. قالتالي: هاي زعتر بالزيت .. وأنا ولا فاهم حاجة .. المهم لقيت سندوتش لأن عم أرتين الأرمني بتاع البسطرمة كان قافل في اليوم ده .. تاني يوم قلتها خدي مني سندوتش بسطرمة .. قالتلي لأ أن جبت الك سندوتش زعتر زيادة .. ايش هنلعب اليوم .. قلتلها أنا باعمل طيارة ورق .. وعملنا طيارة ورق .. قلتلها بيتكم فين .. قالتلي في فلسطين .. فين فلسطين دي؟ بعيدة .. مش مهم بعيدة ولا قريبة.. قلت: في الإجازة تاخدي الطيارة دي وتروحي على فلسطين وانت طايرة بيها ..قالت: أبوي بيحكي مش راح نعود على فلسطين .. بس أمي حكت.. إن شاء الله بنعود .. وأنت يا احمد تيجي معاي علشان تسوق الطيارة ..ووضعت يدها على كتفي .. ووجدتني أطبع قبلة على خدها .. وفي اليوم التالي لم أرى "منى" وحتى تلك اللحظة لم أرها.. لكني لم أنسها أبداً ولا نسيت الزيت ، والزعتر ، والطيارة الورق .. ولا نسيت فلسطين