العملية سخنت على الآخر....مظاهرة مليونية أمام السفارة الإسرائيلية 6 مايو

[amgadibrahim]

اليوم السابع:

اتفقت اللجنة التحضيرية للانتفاضة الفلسطينية الثالثة فى مصر على تنظيم مظاهرة مليونية أمام السفارة الإسرائيلية، الجمعة المقبلة يوم 6 مايو 2011، لوقف تصدير الغاز المصرى إلى إسرائيل، وفتح المعابر المصرية أمام الفلسطينيين بشكل دائم تحت سيادة مصرية كاملة.

كما تضم المطالب التى اتفقت عليها اللجنة خلال اجتماعها أمس الأول، الخميس، بناء على المبادرة التى أطلقتها جبهة "التحرير القومية لتوحيد الجهود الداعية للانتفاضة الثالثة"، فتح ملف الاحتلال الإسرائيلى لمدينة "أم الرشراش" المصرية التى أقامت عليها إسرائيل ميناء إيلات، مع اتخاذ كافة الإجراءات التى تمكن مصر من استردادها.

وشارك فى "الاجتماع التحضيرى الأول" ممثلون عن صفحات ومجموعات على الـ"فيس بوك" "أنا مصرى مع الانتفاضة والعد التنازلى للانتفاضة الفلسطينية ورابطة التحرير وفداك يا أقصى والجبهة الوطنية الشعبية للثورة وحركة الثوار الأحرار (ثورة مصر) وحملة إزالة العلم الإسرائيلى من على العمارة المصرى، وإعدام مبارك، واتحاد شعب مصر، والانتفاضة الفلسطينية الثالثة، والجبهة الشعبية، والمصريون من أجل الانتفاضة، مع الانتفاضة، وجبهة التحرير القومية".

[amgadibrahim]

إن شاء الله أيام العسل اللي كانوا عايشين فيها الاسرائليين إنتهت

وهيبتدوا يشوفوا مصر بتاعة زمان مصر العزة والكرامة والعروبة

:egyflag:

[مسافر]

مش وقته خالص

قال الشعراوي رحمه الله

لما يكون الاكل من الفاس

يبقى الحكم من الراس

[ابوهنا]

ارجوكم بلاش فتح المعبر

بلاش فتحه سداح مداح

والله اسرائيل عايزه كده

يتم فتحه للحالات الانسانبه فقط

فتح المعبر سوف يقتل القضيه الفلسطينيه

فتح المعبر يعنى تقسيم فلسطين

قطاع غزه ولها فتحه فى مصر

الضفه الغربيه ولها فتحه فى الاردن

لماذا نتحمل المسئوليه عن الاخرين

الفلسطينيون لم يقدموا من الدم مايستحقوا عليه التحرير

مجرد كلام

بلاش فتح المعبر

[se_ Elsyed]

أنا ضد معاداة العالم والأستفزاز بشكل عام

نفتح المعابر لكسر الحصار ... نعم ونص ونؤيد ذلك ومصر قادرة على السيطرة على المعابر بشكل جيد

لكن مليونية وكلام من ده .. مش وقته خالص

نقف على رجلينا الأول .. ونوحد العرب ... عشان ما حدش بينفع حد

واديكي شايفين . كل واحد ملهي في حاله وسايبيننا متصدرين لوحدنا في وش المدفع

فين دول الخليج ؟

فين دول المغرب .؟

ممكن تجاوبوني

[mustafagamiel]

ارجوكم بلاش فتح المعبر

بلاش فتحه سداح مداح

والله اسرائيل عايزه كده

يتم فتحه للحالات الانسانبه فقط

فتح المعبر سوف يقتل القضيه الفلسطينيه

فتح المعبر يعنى تقسيم فلسطين

قطاع غزه ولها فتحه فى مصر

الضفه الغربيه ولها فتحه فى الاردن

لماذا نتحمل المسئوليه عن الاخرين

الفلسطينيون لم يقدموا من الدم مايستحقوا عليه التحرير

مجرد كلام

بلاش فتح المعبر

معقول يأبو هنا ده كلام تقوله برضه

ميصحش والله كده

خلاص نقفل المعبر ونخليه بس للاموات

يأخي اخوانا هناك شيفين الذل والجوع ونقص في كل شيء ومصر هي المنفذ الوحيد لهم كمان عايز تغلقه

المعبر يفتح على مصراعيه لاخوانا وأهلنا في غزة أكل وشرب ومعونات ومواد بناء وكل شيء

وإلا سيحدث ماحدث من اجتياح للحدود ====>> أقرأ في فقه اجائع

بالنسبة للمظاهرة أرى أنها مش وقها دلوقتي نتمنى أن تقوم مصر الاول على رجليها وسعتها نعمل هذه الخطوات الان يكتفي ان تتحول العلاقات الى علاقات فاترة

وخطوة خطوة ان شاء الله في 60 داهية

[Diab]

نفس حنجرة ما قبل 1967

بلد مفيهاش مرتبات 3 شهور علي بعض بتتكلم كما لو كان عندنا ميزانية تصرف علي حرب طويلة الأمد

ربنا يستر

وشارك فى "الاجتماع التحضيرى الأول" ممثلون عن صفحات ومجموعات على الـ"فيس بوك" "أنا مصرى مع الانتفاضة والعد التنازلى للانتفاضة الفلسطينية ورابطة التحرير وفداك يا أقصى والجبهة الوطنية الشعبية للثورة وحركة الثوار الأحرار (ثورة مصر) وحملة إزالة العلم الإسرائيلى من على العمارة المصرى، وإعدام مبارك، واتحاد شعب مصر، والانتفاضة الفلسطينية الثالثة، والجبهة الشعبية، والمصريون من أجل الانتفاضة، مع الانتفاضة، وجبهة التحرير القومية".

البلد دي فيها كمية حملات وجبهات وحركات ومنظمات ورابطات تكفي كل دول العالم وتفيض ع المريخ كمان

ثم معلش يعني قبل ما أفكر أعمل أي تجمع لازم أعمل scan ع القوي السياسية في البلد وادرسها واعرف افكارها واستراتيجيتها ع المدي الطويل وتمويلها واهدافها وفعاليتها و اختلافها عن غيرها

لو لقيت اللي انا عاوزه مختلف عن اللي مطروح في الساحة يبقي اعمل تجمع علني

مش 1646644564 الف جروب ليهم نفس الاسلوب

تم تعديل 30 أبريل 2011 بواسطة Diab

[ابوهنا]

ليه فلسطسين اصبحت بالنسبه لنا قضيه دينيه ولماذا فلسطين بالذات؟

من زرع فينا هذا الفكر

من غير ماحد يضرب ناخذها واحده واحده

هذا هذا الدفاع القاتل عن فلسطين

هل انها عربيه

طيب العراق عربيه والسودان عربيه وسبناهم ولم نجد هذا الغضب الشديد

طيب هل لانها مسلمه

طيب ما افغانستان مسلمه وقتل فيها اضعاف اضعاقف فلسطين

يبقى القضيه اعلاميه

هناك ممرضه تعمل معى فى القسم تقول انها عندما تجعل ابنها ياكل فانها تقول له كل حتى تكبر وتحرر فلسطين....طيب انا لوقلت لابنى كل علشان تبقى دكتور وتنفع وطنك ودينك ....هل ده حرام

كنا فى الثمانينات على المنابر المشايخ تدعو لاخواننا المجاهدين فى افغانستان وكان الدعاء يختلط بالبكاء وكان الدعاء ضد الروس...اما الان فلانسمع هذا الدعاء.

السؤال: هل الاعلام الغربى او الشرقى تدخل حتى يوجه على من ندعو

الرجاء الرويه لاننا بلد الان نبدأ من الصفر

نعم لمساعدة الفلسطيننين بالمال والعتاد اذا ارادوا تحرير ارضهم

لكن لن نقوم نتحريرهم بدم ابناءنا

[عنبو]

مش وقتها خالص احنا كده عملنا زى اليى بيشترى حبل قبل لما يشترى الجاموسه وكل شويه يفرج الناس على الحبل باعتبار ما سيكون يعنى

فتح المعبر ده مطلب انسانى اسلامى عروبى ومافيش حد يختلف عليه مع احكام السيطره الامنيه عليه

ولكن مليونيه ومعرفش ايه مش وقته

السياسه لا تعرف العواطف ولكن تعرف المصالح والحسابات يعنى كده بنتعامل بالعاطفه دون دراسة الموقف

تحياتى

عنبو

[Dreamwithme]

فتح معبر رفح مع إحكام السيطرة عليه مع عدم استفزاز العالم واستعدائه تجاه مصر خطوة صح

لكن مليونية ومظاهرات هيعملوا أيه؟ مش وقته خالص وأنا شايفة إن دلوقتي وقت الهدوء والعمل وليس الهتاف والكلام اللي معليهوش جمرك

إحنا دورنا نساعد إخواننا في فلسطين بالأفعال .....نفسي مرة نبطل كلام ونشتغل

نقطة ع جنب أن خلاص زهقت من كثر المليونيات والمظاهرات يا جماعة ارحموا البلد والناس

أنا حاسة إن مصر بقت عاملة زي واحد لسه خارج من أوضة العمليات وكل الناس ماسكة في خناقه عشان يرجع ديونه

كل الناس لها مطالب ...نعم ماقولناش حاجة بس بالراحة والصبر ....لكن البلد هتغرق بالشكل ده

لازم ترتيب الأولويات وياريت نستخدم طاقتنا في العمل للخروج من الحالة اللي البلد أصبحت فيها