اقتراح ويارب الاقي الحماس

[Bero]

بسم الله الرحمن الرحيم

السلام عليكم ورحمه الله وبركاته

انتو طبعا اكيد سمعتم عن التصويت اللي الاستاز عمرو خالد عامله واكيد في ناس منكم صوتت

انا بقترح اننا نحاول نفكر في حاجه هنا في المنتدى كلنا مع بعض حاجه تفيدنا وتفيد الشباب واكيد تفيد بلدنا ونحاول ننفزها كلنا مع بعض وهيا هتبقى فرصه انها تجمع ناس من محافظات كتير انا عارفه ان في ناس كتير من المنتدى من بره مصر بس اكيد في ناس كتير من جوا مصر

وعندهم نفس الحماس اللي عندي

يارب الاقي صدى لكلامي عندكم ولو حتى تقولو افكار بس نقدر ننفزها

[Bero]

انا هبتدي اقول اقتراح يخصني انا يعني زي مبيقوله مجهود فردي

بما اني الحمد لله ربنا اكرمني بحفظ 13 جزء من القران فانا الحمد لله بروح لمسجد قريب من البيت وبساعد الناس في الحفظ

بس بردو حاسه اني عندي طاقه ورغبه

[mohamed]

انا دخلت على موقع عمرو خالد

وبصراحة كده انا مش فاهم حاجة من الموضوع وهيوصل لايه وايه فايدته اما نصوت ولا نعيط :D

بجد والله حاول افهم بس تعملى ايه مش عارف افهم برضه

يا ريت لو تشرحى لنا ايه المشروع ده و هيحصل ايه لو صوتنا

ممكن ؟؟؟؟؟؟؟؟

[Bero]

السلام عليكم ورحمه الله وبركاته

بص يا اخ محمد موجود على الموقع احلام كتيره لشباب من بلاد كتيره في مجالات كتيره بردو يعني المراه التعليم الصناعه........

بتختار المجال اللي عندك حلم وعايز تصوت فيه وتبتدي مراحل التصويت

بعد الانتهاء من العمليه التصويت هتترتب المجالات اللي تم التصويت عليها حسب نسبه التصويتات حسب الاولويه يعني ويبتدوا في تنفيز الاقتراحات زي المرحله الاولى لو تفتكر بتاعت جمع الملابس

يارب اكون قدرت اوصلك حاجه :D

[Bero]

بالنسبه باه لحكايه هنستفيد ايه انا عن نفسي مش حاسه اني هقدر استفيد منها بس الفكره ممكن استفيد منها عشان كدا طلبت المساعده

ويااااااااااااارب تفيدوني

[mohamed]

متشكر جدا اختى الفاضلة عبير

اهو تقريبا بدات افهم

معلش اصل انا فهمى بطىء حبتين :D

بس مش فاهم ايه اللى مطلوب نعمله هنا :D

[Bero]

لا يا اخ محمد هو العيب مش عندك العيب عندي انا انا مش بقدر اوصل اللي انا عايزه اقوله للي قدامي

انا كل اللي بقترحه اننا نفكر في حاجه تفيدنا زي مقولت اي حاجه نمحي الاميه نعلم الناس الكومبيوتر يعني كل واحد يقول افكاره واحنا هنا نوسه الفكره بحيث لو ربنا اكرمنا واراد اننا ننفزها تتنفز بطريقه موسعه ومدروسه وفي اماكن كتير جوا مصر ده قصدي

ويارب اكون قدرت اوصله يعني نستغل الطاقه اللي جوانا

[mohamed]

طيب نديها اول اقتراح

انا شايف ان بداية اى نهضة بتيجى من الترجمة والقراءة

وبما ان احنا شعب نصفه أمىّ لا يعرف القراءة ولا الكتابة

فنبتدى بمحو الامية

لانى بصراحة كده لما دخلت وبصيت على الاقتراحات فى موقع عمرو خالد لقيت فى اقتراحات خيالية شوية وده مش عيب

بس العيب ان احنا منعرفش الاولويات

يعنى ازاى تقدر تنمى بلد نصفها لا يقرا ولا يكتب ؟؟؟؟؟؟؟؟؟؟؟؟

فى مثل عربى قديم بيقول ( اراد ان يتزبب قبل انا يتحوصل )

يعنى العنب بيبقى زبيب فى الاخر خالص فى اخر مرحلة ليه لكن بدايته بتكون الحوصلة وهو على الشجرة

اما اخينا ده فاراد العكس يعنى عايز الزبيب والعنب لسة متحوصلش ع الشجر

يا رب اكون قدرت اوصل وجهت نظرى من غير اما حد يتحوصل :D

[Bero]

وجهه نظر جميله يا اخ محمد واشكرك على المساهمه برايك بس يا ترى في حد يحب يساهم معانا في المشروع ده من المنتدى يعني هننفزه بردو بطريقه فرديه ولا اوسع على مستوى اكبر

وانا بازن الله هبتدي ادرس الفكره ازاي انفزها بطريقه مدروسه واكتب ردي

يارب مكون متقله عليكم

ياااااااارب

[جـورج]

وانا بازن الله هبتدي ادرس الفكره ازاي انفزها بطريقه مدروسه واكتب ردي

ننفـــذوهــا

مش تنفزيهـا

بأ ذ ن اللـه

[Seafood]

الأخت عبير

حرف الذال في لوحة المفاتيح غالباً ما يكون مع علامة ~ أو مع ! ..

لا أتصور أنك تحفظين 13 جزءاً من القرءآن , وتخطئين خطئاً بسيطاً كهذا إلا إن كنت لا تعرفين أين حرف الذال ..

لكنني مندهش حقيقة من إستخدامك للغة العامية بكثرة رغم حفظك للقرءآن ..

هل هي أسهل في التعبير عما تريدين قوله ؟

أرجو أن لا أكون قد ضايقتك بتعليقي ..

تم تعديل 2 سبتمبر 2004 بواسطة Seafood

[se_ Elsyed]

في الأسبوع الأخير من شهر يوليو تلقيت دعوة من مجموعة من أالأصدقاء لحضور ورشة عمل مُصغرة لمناقشة ما يمكن ان نقدمه نحن كأفراد مثقفين لمجتمعنا الإسلامي والعربي بشكل عام ( وهم شباب مشارك بفاعلية في موقع عمرو خالد )

وبدوري وجهت الدعوة لأخي هاندي كرافت وذهبنا لحضور هذه الورشة ووجدنا مجموعة من 7 أو 8 أفراد تقريباً سعوديين ومصريين وأستمر الإجتماع حوالي 3 ساعات وكل واحد منا طرح مجموعة من الأفكار التي تُفيد المجتمع كمحو الأمية وترجمة الكتب العلمية وتفعيل دور المرأة بالمجتمع ... إلخ ..... وبالرغم من إني انا وهاندي كرافت كنا أكبر إثنين سناً في الحضور إلا إني خجلت من نفسي أمام تحمس هؤلاء الشباب وطريقتهم العلمية المنظمة في طرح الأفكار وصياغتها بشكل جميل إستعداداً لطرحها على موقع الأستاذ عمرو خالد عسى ان تجد فكرة منهم طريقها للتنفيذ وللأسف لظروف السفر لم أتمكن من حضور تكملة تلك الإجتماعات .

ولكنها فكرة جديرة بالإحترام من الأخت بيرو وبإذن الله سوف أقوم بطرح بعض الأفكار البسيطة التي يُمكن تطبيقها بسهولة .

وأعتقد بإن من ضمن أسباب تأخرنا كمجتمعات إسلامية وعربية هو أننا نتحدث أكثر مما نعمل بالإضافة إلى نظرتنا الخاطئة لبعض الأمور التي قد تكون صغيرة ولكنها في الحقيقة ممكن أن تكون نواة لأعمال كبيرة وعظيمة ... على سبيل المثال الموضوع الذي بدأه عمرو خالد في برنامج " صُناع الحياة " وهو عبارة عن القيام بحملة لجمع الملابس الفائضة عن إحتياجتنا لتوزيعها على المحتاجين ... فمن الممكن ان ينظر لها البعض بإنها فكرة غير مجدية ولن تُفيد المجتمع في شيء على حين يرى الكثيرون بإنها إنطلاقة وبداية للعمل الجماعي وإنتقال من خانة الكلام والثرثرة إلى خانة العمل البناء .

[G.G]

لكنني مندهش حقيقة من إستخدامك للغة العامية بكثرة رغم حفظك للقرءآن ..

هل هي أسهل في التعبير عما تريدين قوله ؟

فعلا هناك أعضاء كثر يفضلون اللغة العامية..ربما لأنها تظهر خفيفة كده و متبسطة..بالنسبة لي بحبها ..

بس ما يدهشني فعلا,و معذرة عن خروجي عن الموضوع , الأخطاء الإملائية من أعضاء يكتبون بالعربية الفصحى في باب الأدب ,و رغم ذلك هناك تكرار لأخطاء تزعج العين... ز بدل ذ...و ة بدل ه .. يعني مثلا "زراعية" مقصود بها "ذراعيه" eey:: ..

الحقيقة كنت كثيرا على وشك التعليق لكني أثرت الصمت خوفا من إحراج حد ..

و انتهز الفرصة دي لأقول حيلة أولية تساعدنا على تمييز الفرق بين الهاء و التاء المربوطة:

نستخدم تاء منونة بالضم في الكلمة محل الشك , مثلا: "كتابة" ..ننطقها:"كتابتون"..و نشوف هيمشي المعنى ولا لأ..مثلا :القراءة و ال"كتابتون" ...المعنى مضبوط ..إذن هذه تاء مربوطة و تكتب "كتابة"..

لكن مثلا: "أحمد أخذ كتابه"..لا نستطيع أن نقول :" أحمد أخذ كتابتون".. لا معنى لها..إذن هذه هاء و ليست تاء مربوطة و تكتب "كتابه".... ax:

معلهش ..أعتذر عن الخروج من الموضوع الأساسي و عن التطويل...بس الحكاية دي كانت بتزعجني شوية,,

عودة للموضوع بأه...أنا معجبة كثير بخفة دمك و حماسك يا Bero.. و حلوة قوي فكرتك..و هناك أماكن كثيرة ممكن تستثمري فيها هذا الحماس ..مثلا جمعية رسالة

Resala Charity Community

Web Site:

www.resala.org

Addresses:

Mohandessin:

24 El-Madina El-Monawara St., off Mohey El-Din Abul Ezz St. Mohandessin

Phone Number: 02 3377714 02 3385116

Fax: +202 3377714

Al-Haram:

5 Mansi Yassin St., off Feissal St. Al-Haram

Phone Number: 02 7442003 02 7442004

رأيتهم حقيقة شعلة من النشاط و الإيجابية.. تستطعين الإشتراك كيفما تشائين..هناك دروس للكمبيوتر لغير القادرين..فصول لمحو الأمية..مساعدة التلاميذ الغير قادرين في دراستهم ..رعاية المرضى في المستشفيات..رعاية الأيتام....دروس تحفيظ القرأن ..

تظهري استعدادك في المجال الذي ترغبيه..لتصبحي جزء في بناء فعال في المجتمع..

و ربنا يوفقك eey::

[Lighthouse]

بس ما يدهشني فعلا,و معذرة عن خروجي عن الموضوع , الأخطاء الإملائية من أعضاء يكتبون بالعربية الفصحى في باب الأدب ,و رغم ذلك هناك تكرار لأخطاء تزعج العين... ز بدل ذ...و ة بدل ه .. يعني مثلا "زراعية" مقصود بها "ذراعيه"  ..

الحقيقة كنت كثيرا على وشك التعليق لكني أثرت الصمت خوفا من إحراج حد

هنا في المنتدى موضوع عن اللغة العربية واعتقد ان الشرح فيه سهل وواضح لمن يريد ان يتلافي الاخطاء اللغوية والاملائية التي يرتكبها في حق اللغة العربية

والموضوع موجود في باب العلم

لغتنا العربية ... إسأل ونحن نجيبك

تم تعديل 2 سبتمبر 2004 بواسطة Lighthouse

[Sherief AbdelWahab]

أهلا بكل عضو يكتب في أي قسم من أقسام المنتدى ، لكن أن يعرف مسبقاً ما هو موضوع الركن الذي يكتب فيه..

ركن "مكافحة الفساد" يتناول الفساد بمعناه المعلوم للكل ، الفساد السياسي و الثقافي والإعلامي و الاقتصادي و الفني و الرياضي ، أسبابه و طرق مواجهته..

مع كل الاحترام لما ورد في ورشة العمل ، لا يمت حرف واحد مما ذكرته الزميلة بيرو بصلة بموضوع مكافحة الفساد..

أطلب نقل الموضوع إلى المناقشات العامة..

خلص الكلام

[Bero]

بسم الله الرحمن الرحيم

السلام عليكم ورحمة الله وبركاتهانا عايزه اشكركم جميعا على نصيحتكم وتاكدوا اني قبلتها بصدر رحب non::

انا فعلا اللغه العربيه بستخدمها بطريقه مش سليمه وده بسبب ان دراستي كلها انجليزي

بس انا اشكركم مره تانيه لانكم لفتوا نظري للموضوع ده وان شاء الله هصلح من لغتي :)

بالنسبه لآرائكم انا اتمنى بجد اننا نبدا في تنفيذها وميكونشي مجرد كلام

وبالنسبه لفكره الاستاذ عمرو خالد عن جمع الملابس الحمد لله كان في ناس كتير بينفذوها بس في حاجه غريبه هيا اللي بتخلي الشباب يبعدوا كان معانا ولد ملتحي وبنت منقبه في المشروع وامن الدوله قام بالواجب واستضافهم يومين يعني تقريبا كارت ارهاب انا مش

عارفه وده السبب اننا مش لاقيين تشجيع

وبالنسبه لفكره محو الاميه وتعليم الكومبيوتر انا الحمد لله اتفقت مع والدي ووفرنا المكان كل اللي ناقصنا اننا عايزين افراد معانا

احنا من محافظه المنوفيه

اللي يحب الساعد

ولكم جزيل الشكر

___________________________

يارب اكون صلحت من الاخطاء

mf(

[DARWEEN]

الأخت عبير ... مع خالص تحياتي لحماسك ونشاطك أنا عندي أقتراح صغير

أنتي بتقولي إنك من الأقاليم ودا شيء جميل جدا ...

عن نفسي أنا مشكلة النظافة في مصر كلها بتؤرقني فممكن أقترح عليكي لو تكونوا جماعات من شباب المنطقة اللي أنتم عايشين فيها وخلوها بنظام مسابقة مثلا ... كل مجموعة تتنافس على نظافة وتجميل الشارع اللي بتسكن فيه وتشكلوا لجنة تحكيم من ناس كبار في المنطقة وخلال 15 يوم مثلا يختاروا أجمل شارع في الحي والجايزة مش حتكون حاجه كبيره مش أكتر من يافطة تتعلق على الشارع الفائز ...

وصدقيني النظافه بتعدي ويوم والتاني حتلاقوا الحي اللي جنبكم عمل زيكم والحي اللي بعده

ومع الوقت الناس مش حتطيق أي شيء مش نظيف لأنهم حيكونوا أتعودوا على النظافة

الإقتراح ده مش حيكلف أي شيء ومش مطلوب غير مجموعة شباب متحمس زيك وعلى رأي المثل إبدأ بنفسك

بس المهم الحماس مايقفش بعد فترة وفي أقل من سنه حتكون مدينتك كلها نظيفه من غير مانطلب حاجه من الحكومة

للأسف أنا مش عايش في مصر حاليا بس لو فيه أي أقتراحات عندك ممكن نشارك فيها من بره أنا معنديش أي مانع

تحياتي لك وللمنوفيه كلها .... أحنا نقدر نتكلم non::

[G.G]

برافو عليكي Beero بداية موفقة انشاء الله..وجودك في الأقاليم يعتبر ميزة هامة..لأن للأسف معظم المشاريع التي تبغي تنمية المجتمع تنحصر في القاهرة..و ده من اسباب تخلف الأقاليم..

ربنا معاكي و تبقي انشاء الله نواة لمشروع عظيم..

( شكرا أوى Lighthouse على وصلة موضوع اللغة العربية..مجهود مبهر حقيقي..هاعمله File word عندي ..شكرا لك .. eey:: )