متى ينتصر العمال؟

[Howayda Ismail]

متى ينتصر العمال؟

«هنجيب لهم فلوس منين؟.. ما البلد خربانة وحالها واقف؟.. هوّ فيه حد بيشتغل أساساً؟»، كل هذا الكلام سيقال اليوم مثلما قيل بالأمس وسيقال فى الغد كلما جأر عامل من عمال مصر بالشكوى من حاله الذى لا يعلم بيه إلا ربنا.

أى منصف يخجل على دمه من الحكم على الواقع الملتهب بينما يده فى الماء البارد، لابد أن يقر بأن العامل له حق عندما يشتكى من أوضاعه المعيشية المزرية، ولابد فى نفس الوقت أن يعترف بأن حكومة عصام شرف محقة عندما تقول للجميع «طيب بس اصبروا علينا شوية؟»، فقد ترك حسنى مبارك وأنجاله مصر على «الجنط»،

فضلا عن تركه لطبقات من الفساد تراكمت فوق بعضها البعض وكلما ظننت أنك تخلصت من طبقة فساد ظهرت لك طبقة فساد جديدة، لكن ومع ذلك فالحل لن يكون أبدا فى أن نقف بكروشنا المتخمة المنصفة، لكى نعظ العمال ونطالبهم بتدوير عجلة الإنتاج دون أن نفتح لهم أبواب الأمل المحسوب المرتبط بجداول زمنية مدروسة يتأكدون منها أن ثورة يناير التى كانوا وقودها منذ سنوات ستجعلهم ينتصرون قريبا مثلما انتصرت هى، لأن انتصارها أصلا لن يكتمل إلا إذا انتصر العمال والفلاحون أولاً وأخيراً.

نعم، ربما لا يكون فى مقدور الحكومة الحالية أن تلبى كل مطالب العمال الآن وفورا، لكنها يمكن أن تسرع من الخطى التى بدأت تتخذها فى مجال تطهير وإصلاح البنية الأساسية التشريعية والقانونية وصولا إلى قوانين ملزمة تتم صيانتها بآليات رقابية حاسمة لمنع استعباد العمال فى مصر، وإذا كنت ترى فى كلمة «الاستعباد» مبالغة انشائية فأعتقد أنك ستغير رأيك بعد وصولك إلى نهاية هذه المقالة التى أخصصها كاملة لمساهمة رائعة فى احتفال مصر الثورة بعيد العمال، قام بها جارى فى موقع تويتر الناشط والمدون البارز علاء سيف الإسلام، الذى قرر أن يجمع شهادات من بين سكان تويتر حول تجاربهم كعمال بعيدا عن منطق (المنحة يا ريس) الذى غار وغارت أيامه بإذن الله.

لفتت انتباهى الشهادات التى جمعها علاء لأنها جاءت ممن لا ينطبق عليهم المفهوم التقليدى لكلمة العامل، فاستأذنته فى تقديمها لقراء «المصرى اليوم» لعلها تشكل زاوية مختلفة للنظر إلى أوضاع العمال فى مصر، أعلم أن هذه الشهادات التى وقّعها أصحابها بأسماء حساباتهم فى موقع التويتر ستُقلّب المواجع على الكثير من القراء،

خصوصا أنها ستدفع الجميع لسؤال مهم: «إذا كان هذا يحدث للعمال المتعلمين تعليما جامعيا فما الذى يحدث إذن لمن هم دون ذلك فى التعليم؟»، لكن الهدف من هذه الشهادات ليس تقليب المواجع، فهى متقلبة جاهزة، ولكن الهدف أن تكون هذه الشهادات بمثابة أضواء كاشفة للدكتور عصام شرف وحكومته للمبادرة بإصدار قرارات سريعة تمنع كثيرا من ممارسات العبودية التى يتعرض لها عمال مصر، ممارسات لو تم تصحيحها فورا لن تشكل عبئا اقتصاديا ضخما على ميزانية الدولة، لكن مجرد تصحيحها سيوجه رسالة واضحة لأى مستثمر مصرى أو عربى أو أجنبى بأن وجوده فى مصر مهم جدا،

لكنه سيكون مطالبا فى ظل الثورة التى قامت لرد كرامة المواطن المصرى بأن يعامل موظفيه وعماله بنفس الطريقة التى يعامل بها أمثالهم فى أى دولة تحترم مواطنيها، لا أكثر ولا أقل، وأن مصر الجديدة يجب أن تؤكد للجميع أنه لا تعارض بين حاجة الدولة إلى الاستثمار وحاجة المستثمر إلى الربح، وحق العامل فى الحياة الآدمية الكريمة. دعونا نفعل ذلك أولاً لكى يستجيب الناس لمناشداتنا بإدارة عجلة الإنتاج بذمة وضمير.

أترككم الآن مع علاء سيف الإسلام الذى كتب مقدمة للشهادات التى جمعها قال فيها «مع أن الإضرابات العمالية ومظاهرات الموظفين فى تزايد من أيام 2006 ولم تتوقف، ومع أن العمال لعبوا دوراً مهماً فى إسقاط مبارك، لقينا كلمة (فئوية) بتتقال كأنها شتيمة وفجأة صورت لنا مطالب الأجر العادل وظروف العمل الكريمة وكأنها مطالب أنانية تخص فئات بعينها، أو أنها مطالب مشروعة بس مش وقتها لأن للثورة مطالب أهم، أو عشان البلد فى أزمة أو غيره، ووصل الأمر لتصوير إضرابات عمال وموظفى مصر على أنها جزء من الثورة المضادة ومؤامرة من الحزب الوطنى.

فى السياق ده تصورت وإحنا بنروّج لفكرة إن عيد العمال عيد لكل من يعمل بأجر فى مصر مش العامل أبو أفرول اللى ماسك مفتاح إنجليزى، إننا هنواجه ردود أفعال غاضبة ورافضة، بدأت التجربة على تويتر، وطبعا تويتر مش مرتع للعمال والفلاحين، الأغلبية خريجين جامعات وبيعرفوا إنجليزى كويس ومدمنين نت وكثير منهم يملك موبايلات غالية بتدخل النت، برجوازية زى الكاتالوج ما بيقول يعنى.

وكانت المفاجأة، عشرات الردود فى الدقيقة من أطباء ومهندسين ومدرسين وباحثين وظابط شرطة فوق البيعة يعملون فى القطاع الخاص والعام، والكل بيشكى نفس شكاوى العمال.

مرتبات وضيعة وفى نفس المؤسسة مديرين واستشاريين ونسايبهم وحبايبهم بيقبضوا عشرات ومئات الآلاف، ساعات عمل مجنونة، مفيش عقود، اللى ماضى على استقالة من أول يوم شغل واللى ماضى على وصولات أمانة، مفيش أجازات، مفيش رحمة مع من يمرض ولا مع من تلد، مفيش أسهل من الرفد والتسريح، مفيش طبعاً تأمين صحى ولا حتى من مخاطر العمل، اللى من غير عقد مفيش تأمينات ولا معاشات ولو فيه أساسى المرتب نسبة ضئيلة من الدخل الحقيقى، وفساد فساد فساد فساد. إزاى المطالب فئوية إذا كانت مطالب أغلب فئات المجتمع؟

يوم واحد مايو فرصة عشان نؤكد إن المطالب الاجتماعية مطالب الجميع وإنها فى قلب أهداف الثورة، إحنا داخلين على انتخابات وعايزين حقوقنا فى العمل الكريم والأجر العادل والتعليم والتدريب وتطوير المهارات والرعاية الصحية، والرعاية الصحية يبقى على أولويات الأحزاب والمرشحين ويضمنهم الدستور الجديد وتركز عليهم الميزانية الجديدة.

تذكرت يوم تنحى مبارك فى ميدان التحرير وفى وسط الاحتفال شاب واقف يتنطط ويقول هيييه هتجوز. إحنا أصلا شيلنا مبارك ونظامه لأنهم كانوا العائق الأساسى لتحقيق المطالب الفئوية. يا أستاذ بلال الشعب يريد إنه يبطل ياخد مصروف من أهله. دى عيّنة مما وصلنى على تويتر، انتقِ منها ما ترى وانشره، يمكن يلاقى صدى عند قرائك ويحتفلوا معانا بعيد كل العاملين فى مصر.

ـ إم إتش: أنا بشتغل مهندس كمبيوتر وشبكات ومرتبى 750 جنيه ومازدتش غير 100 جنيه من 3 سنين ومتأمن علىَّ بـ120 جنيه ومفيش إضافى.

ـ ريم حسن: مهندسة قد الدنيا ومعايا ماجستير وماضية على استقاله من أول يوم عمل.

ـ شريف 65: أخويا مهندس إنشائى استشارى عنده 45 سنة، اتأمن عليه فى آخر مكتب بعد 6 سنين شغل، وكتبوا ربع مرتبه بس فى التأمينات.

ـ ألين زيرو: لما رُحت قدمت فى مدرسة سنة 2003 عشان أدّى حصص رسم، لقيت تمن الحصة بسبعة جنيه.

ـ هيثم مغربى: راتب المدرس بالأجر 90 جنيه ورفع 150 جنيه يعنى ظلم ولا أيام العبودية.

ـ أ. م. صبرى: اللى يغيظ إنهم طلّعوا قانون إن المدرس يروح فى أجازة الصيف يقعد فى المدرسة خلال ساعات العمل، يعنى عبيد بمية وخمسين جنيه فى الشهر.

ـ شهادة أخرى: أنا أعرف مدرس رياضيات ثانوى، 18 سنة تدريس ومراته مدرسة إنجليزى ولسه سايق الفسبا ومن غير الدروس الخصوصية يموت من الجوع.

ـ شامبونجو: دكاترة الجامعة دكتور زى الفل بيرجع من بره معاه البى إتش دى وبيقبض1700 جنيه مطلوب منه يكون برنس قدام جيرانه والطلبة والمجتمع والناس.

ـ منى سوش: طيب وأنا محسوبتك باحث تحت الإنشاء، ماضية عقد يشترط التفرغ ومرتبى - اللى هو قليل - بيتأخر بالشهور. وبشتغل متوسط 9 ساعات فى اليوم!

ـ شهادة أخرى: المعيد فى الجامعة مرتبه 950 جنيه، المدرس المساعد1300جنيه، المدرس 1700جنيه، الأستاذ المساعد 2100 جنيه والأستاذ 2500 جنيه.. والجامعات الخاصة بتتعاقد مع المعيدين والدكاترة البارت تايم، كل تيرم بتيرمه عشان مايبقاش فيه علاوات أو زيادة المرتب السنوية.

ـ أسامة عبدالله: أنا مهندس معمارى ومعندناش حاجة اسمها حقوق. إحنا زى أى أجير، بنعمل شغل بمقابل بنتفق عليه وخلاص.

ـ هيثم مغربى: وأنا مهندس مدنى وطفشت لأنى كنت بشتغل 15 ساعة فى اليوم سبعة أيام فى الأسبوع دون تهويل أو كذب.

ـ إيجيبشان إيراكى: أنا خالى مهندس ميكانيكا سيارات بيشتغل سبعة أيام من سبعة صباحا لحداشر مساء ربنا يديله الصحة.

ـ صدفة بعضشى: أنا داخلة فى سنة ونص من غير تأمين.

ـ ريرى فان هلسنج: أنا اتأمن علىّ بعد 5 سنين شغل وبالخناق. والعمال بتشتغل 12 ساعة متواصل ومفيش تأمين، ومعاملة زى الزفت، وطرد فى أى لحظة، وورق مضروب. أنا من يوم ما اشتغلت ماخدتش أجازة سنوية واللى ياخد أجازة فى الصيف بالخصم ده غير صاحب الشركة لما يجبر العامل على تخليص مصالحه الشخصية ولو مش عاجبه يمشى.

ـ دينوكراسى: تلات سنين وأكتر دلوقتى ومفيش تعيين ولا تأمين وبيقولك جامعة خاصة.

ـ صعيدى راجل: أنا أخويا مدير مساعد فى فرع كنتاكى من 9 الصبح لحد 10 بالليل، بقى ده عدل؟ أما بنته تعبت ماكانش موجود جمبها بيرجع بالليل يبوسها وينام. وفى شركات خاصة أول مابتمضى عقد شغل بتمضى استقالة، لو بقّك بس اتفتح تكون استقالتك مقبولة.

ـ كريم عمر: مكتب هندسى ضخم بيدّى المهندسين أجازة موحدة أسبوعين سنوياً فى نفس الميعاد ويقفل المكتب ومالهمش أجازات تانى.

ـ بيرموفت: شغال دون أى عقود، وماضى على وصل أمانة بـ30 ألف جنيه، مع إنى مش بامسك أى فلوس للشركه فى إيدى، أهلا بك فى صناعة الميديكال ريب فى مصر.

ـ هيثم مغربى: جميع شركات المحمول بتعمل التعاقد كل 6 شهور بحيث تمشّى أى حد دون تكاليف فى حالة تعرضها للخسارة.

ـ هام فاروق: فى شركة (ش.. ) البترولية بتمضى على شيكات على بياض ووصولات أمانة علشان لو حصلت مخالفة وحد اتكلم يتهدد بيها على طول.

محمد طنطاوى: وفى مجال الطيران بتدفع تمن أى تدريب أخدته على حساب الشركة مع إنك نفعتها بيه بشغلك وبتمضى على شيك بـ125 ألف جنيه.

ـ حوكة: تخيلوا شركة بترول وييجى مديرك راكب عربية الشركة بنص مليون جنيه ويقولك مفيش أرباح إحنا خسرانين، ده أنا كنت هتشل لما قال مفيش أرباح ولسه شاريين عربية ليه بنص مليون ومرتبه 200 ألف جنيه شهريا.

ـ آرش تيفا: والدتى مراجع حسابات درجة ثانية برئاسة اتحاد الإذاعة والتليفزيون مرتبها بعد الزيادة بتاعة شهر أبريل 600 وكسور وبقالها 15 سنة شغالة!! أما أنا فشغال علاقات عامة ودعاية وإعلان ومهندس كمبيوتر فى شركة إنتاج موسيقى وباقبض 500 جنيه و6 ساعات زى 12 ساعة ولا بيفرقوا!!

ـ هام خلوف: إنت تعرف إن فيه مطاعم كتير فى بلدنا مابتدّيش الجرسونات مرتبات خالص ويعتمدوا على البقشيش فقط وبواقى الطعام!! آآه والله.. واللى مش عاجبه.

ـ عفيفى: أنا أبويا كان طبيب فى وزارة الصحة لأكتر من 30 سنة وكان مدير مركز طبى ولما مات خدنا مكافأة نهاية الخدمة 5 آلاف ومعاشه 900 جنيه وبس.

ـ خالد غيطاس: هما بيدّونا فلوس! طب تصدق بإيه كنا بنشترى ورق لجهاز رسم القلب من جيبنا عشان نمشّى العيانين، بعدين يطلعوا سارقين 10 مليون فى تجديد المطعم.

ـ منار خولى: لأ وإذا قلت مفيش تبقى بتعطل العمل وإذا قلت للعيان اشترى تتحول للتحقيق.

ـ أسور: الأطباء هم أكتر ناس بتدرس وتتعب وتصرف وبهدلة وسهر ونبطشيات والمرتب أقل من ٢٠٠ وأقل من ألف بعد ١٥ سنة شغل.

ـ شيتيجى: وأنا صيدلى.. بافكر أطفش عشان بقالى سنتين مخدتش يومين على بعض أجازة.

شهادة: الراتب الشهرى للطبيب حديث التخرج 259.45 جنيه، يطلب منه حوالى 2000 جنيه رسوم تسجيل درجة الماجستير.

ـ د. سيهو: وكمان الستات اللى بيولدوا، بياخدوا تلات شهور بس وبعد كده يضربوا دماغهم فى الحيط.. ومش كل الشركات فيها حضانات لأبناء العاملين.

ـ د. جوجو: على فكرة أنا إخصائى ومتجوز وعندى عيال وبشتغل 90 ساعة فى اليوم ولسه برضه باخد مصروف من بابى.

ـ منار خولى: مش بس طبيب الامتياز اللى بياخد مصروف من أبوه: لحد مدرس يعنى معاه دكتوراه وفى الجامعة بيعمل كده.

ـ م. شريف: يا جماعة فى مصر... إنت بتاخد مصروفك من باباك حتى يثبت العكس.

ـ محمد طنطاوى: المطالبة بحقوقك تجاه الحاكم أسهل منها لو طلبتها من صاحب رأس المال الأول هيحبسك، التانى هيخرب بيتك.

ـ محمد الشناوى: كلنا لازم ننزل يوم 1 مايو... وكفاية ظلم بقى.

بلال فضل

تم تعديل 1 مايو 2011 بواسطة Hend ali

[Dreamwithme]

جزاكي الله خيرا يامدام هند علي مشاركتك بمقال بلال فضل

والله قلبتوا عليا المواجع

ـ م. شريف: يا جماعة فى مصر... إنت بتاخد مصروفك من باباك حتى يثبت العكس.

أنا دائما بأقول لوالدتي أنا نفسي أكبر ...طول ما أنا بالرغم من المركز الوظيفي اللي أنا فيه

طول ما بأمد أيدي لأمي أخد منها مصروف يمشيني باقي الشهر طول ما أنا حاسة أني طفلة لسه صغيرة

ويا فرحتي الدكتورة راحت الدكتورة جت

ـ محمد طنطاوى: المطالبة بحقوقك تجاه الحاكم أسهل منها لو طلبتها من صاحب رأس المال الأول هيحبسك، التانى هيخرب بيتك.

دي نقطة تانية خطيرة أنا في مجال عملي وهو البحث العلمي لو طالبت بحقي من الحكومة مش هأخد حاجة

ولو طالبت بحقي من مديري اللي هو مشرفي علي الرسالة مش هأخد حاجة وفي نفس الوقت هيضيع مستقبلي ومش هأخد شهادتي

والحق اللي بأتكلم عليه مش بس موضوع الماديات ولكن الحق المعنوي في المعاملة الانسانية الكريمة .

[الباشمهندس ياسر]

في مصرنا الحبيبة

اللي معندوش بيزنس خاص بيه .. ياكل زلط

مهما كانت وظيفة معاليك ووضعك ف انت مهدد ف اي لحظة انك تسيب ده كله و تقعد ع القهوة

[ابو محمود]

تم الحذف

تم تعديل 1 مايو 2011 بواسطة محمودمصطفى

[Howayda Ismail]

مشاكل العمال فى مصر لاحصر لها

لان ببساطة قانون العمل الحالى قانون مكسح لايصلح للتعامل به وزاد من مساؤه محابة الحكومة له على حساب العمال

والنتيجة عشرات الاضرابات يوميا وفصل المئات تعسفيا واجبار الالاف على تقديم استقالات جماعية دون الحصول

على مستحقاتهم

مامعنى ان تخلى الحكومة مسئوليتها وتنفض يدها من حقوق العمال بداية من عقد تعينه الذى يسبقه استمارة 6

وهى استمارة يمضى عليها العامل متضمنة استقالته قبل توقيعه على استمارة العمل وهذا ماتم فى جميع شركات الخصخصة

وشركات الاستثمار والقطاع الخاص وطبعا يبرزها صاحب العمل فى اى وقت دون اسباب او التزام بحقوق للمفصول

وان تم اللجوء للقضاء تستمر القضية لسنوات وصل بعضها لسبع اوعشر سنوات ربما يتوفى خلالها المشتكى

وان تم الحكم لصالحه لايجد من يسانده فى تنفيذه على صاحب العمل وينتهى الموضوع بتعويض شهرين ثلاثة على الاكثر

مشكلة اخرى تواجه العمال هى عدم كتابة الاجر الحقيقى الذى يتحصل عليه العامل من جهة عمله والغرض تقليل

حصة التأمينات التى يدفعها صاحب العمل عن العامل والنتيجة عند خروجه على المعاش او تقديم استقالة جبرية

لايتحصل على قيمة ماخصم منه اثناء فترة عمله ويحصل على معاش متدنى لايضمن له حياة كريمة

كذلك تتجاهل الحكومة تعمد المؤسسات التنصل من علاج العاملين بها حالة مرضهم وبالتالى لايتحصل على اجازة مرضية

وتحتسب اجازة على حسابه

المصيبة الاكبر عندما شرعوا فى خصخصة الشركات ونتيجة للفساد والعمولات تم بيع هذه الشركات دون تصفية

حقوق العمال حتى من صناديق اشتراكاتهم من جمعيات كجمعيات الحج وصناديق الزمالة والادخار والاسكان

وهى مبالغ وصلت للملايين تحصل عليها المستثمرون ضمن الصفقة بالاضافة ان هناك بعض الشركات كانت اعطت العاملين

بها بعض الاسهم وضعت ايضا تحت تصرف المستثمرين دون اى تعويض للعمال

مشكلة اخرى قديما كان يتحصل العاملون فى ختام ميزانيات الشركات على نسبة من الارباح وبعد الخصخصة

اصبح هذا الامر طوع رغبة المستثمر وهناك عشرات المئات من القضايا مرفوعة لاصحاب معاشات خرجوا دون الحصول

على مستحقاتهم

واخيرا الضرائب التى تقصف عمر المرتبات خاصة الاعلى اجرا بما لايتناسب مع حالتنا الاقتصادية

فى النهاية كما ذكرت الاخت دريم مرتبات هزيلة

تعسف فى المعاملة ماديا وانسانيا ومن يحاول اثبات حقه ينكل به بشتى الصور

وكما ذكر البشمهندس ياسر حياة المواطن المصرى على كف عفريت اذا لم يكن له عمله الخاص وحتى

ذلك لوقت قريب كان خراب بيوت بفعل الحكومة والبيروقراطية وعلى راسها المجحوم بطرس غالى

ادت لفشل وتصفية كثير من المشاريع الخاصة وكلها خدمة لعيون فساد عهد مبارك

[Howayda Ismail]

الى صاحبة الموضوع اهديكى تلك القصة الحقيقية للتذكير

http://www.egyptiantalks.org/invb/index.php?showtopic=44276&st=0&p=313642&fromsearch=1entry313642

عند مشاهدة مداخلة حضرتك اعتقدت انه موضوع حضرتك عن العمالةالصينية فى مصر وربما جاء ذلك تضامنا

مع جال بخاطرى من ضمن هضم حقوق المصريين هو السماح لكثير من شركات الاستثمار بجلب عمالة اجنبية

للعمل فى مصانعهم وربما بمرتبات اعلى من المصريين مقابل حوافز من الدول الموردة لالات ومعدات المصنع

وكذلك تقصير وزراء العمل السابقين وعلى راسهم عيشة ورؤساء النقابات وعلى راسهم مجاور ونخاسى الخصخصة

وعلى راسهم الموزى سببوا خراب للبلد ودمار لاقتصاده ولابدمن محاكمتهم جنائيا على مااقترفوه فى حق البلد وعمالها

[Howayda Ismail]

خالد علي: حل مجلس إدارة الاتحاد العام لنقابات عمال مصر

أكد خالد علي، مدير المركز المصري للحقوق الاقتصادية والاجتماعية، أن المرحلة المقبلة تتطلب الاستجابة لعدد من الخطوات التي قد تسهم في إنصاف العمال مستقبلا، أهمها حل مجلس إدارة الاتحاد العام لنقابات عمال مصر، ومجالس إدارات النقابات العامة العمالية التابعة له، وكذلك مجالس إدارات اللجان النقابية، مشيرا إلي أن انتخاباتها جرت بالمخالفة للقانون، علي حد قوله.

وأشار إلي أن الاتحاد كان مجرد تابع للحزب الوطني الديمقراطي في كل سياساته التي مضت في طريق الخصخصة وتصفية القطاع العام وسيطرة الدولة علي أموال التأمينات الاجتماعية دون النظر إلي العمال وحقوقهم، وطالب علي بضرورة إصدار قرار بالحد الأدني للأجور يتناسب مع الأسعار، وتنفيذ الحكم القضائي 21606 لسنة 64 قضائية.

وقال علي: تقديرا للظروف التي تمر بها البلاد، نطالب باستصدار قرار كخطوة أولي لوضع حد أدني للأجور 600 جنيه شهريا كأجر أساسي يطبق علي مختلف القطاعات (الحكومي والخاص وقطاع الأعمال) مع النظر في زيادة هذا الحد سنويا وفقا لنسب التضخم.

ودعا إلي الإسراع في الخطوات التنفيذية لتنفيذ قرار تثبيت العمالة المؤقتة الذي أصدره وزير المالية الحالي.

وأكد أهمية إلغاء اللوائح الجديدة للمستشفيات الحكومية والتعليمية التي أصدرها حاتم الجبلي وعبدالسلام المحجوب قبل الإطاحة بهما، والتي كانت تتعامل مع الحق في الصحة، باعتباره سلعة تتوافر للقادر علي دفع تكلفتها.

وأشار إلي أهمية إصدار مرسوم بقانون بإلغاء وحل جميع شركات العمالة الوسيطة التي أعادت أحد أشكال العمل بالسخرة إلي مصر، حيث تعمد الشركات والهيئات الكبري رغبتها في استقدام عمال أن تطلب من شركات العمالة توريد العمال، وهو ما يتيح للشركات والهيئات الكبري التحلل من هذه العمالة والتخلص منها في أي وقت دون أن تتحمل أي أعباء لأن عقود العمل في الحقيقة تكون بين شركات العمالة والعمال، ولا تدخل الشركات والهيئات الكبري طرفا في هذه العلاقة حتي تصبح علاقة العمل بلا ضمانات حقيقية، سواء صحية أو اجتماعية.

وأكد أن مثل هذه الشركات واستمرارها يمثل جريمة أخلاقية في حق عمال مصر، مما يستوجب إلغاؤها مع إعادة النظر في الآثار القانونية بين العمال والشركات والهيئات الكبري، خاصة الأجر والتأمين الصحي طوال مدة العمل.

وأكد علي أن قواعد القانون الحالية تتيح لصاحب العمل إصدار قرارات فصل العمال تعسفيا، قائلا: حتي إذا لجأ أحد العمال للمحكمة وحصل علي حكم قضائي يقضي بإلغاء قرار الفصل والعودة للعمل يستطيع صاحب العمل أن يمتنع عن تنفيذ الحكم مقابل حصول العامل علي تعويض بحد أدني مدة شهرين عن كل سنة طبقا لماتقضي به المحكمة.

وطالب بإصدار مرسوم بقانون يعدل من قواعد قانون العمل الحالية، والإعلان عن صندوق البطالة لصرف إعانة للمتعطلين عن العمل وإعلان قواعد وإجراءات وجهات الصرف

http://www.youtube.com/watch?v=ejIUs7khE_w

[Howayda Ismail]

مظاهرة للعمال أمام مقر الاتحاد للمطالبة بإسقاط "مجاور"

نظم الآلاف من العمال بالقاهرة الكبرى وعدد من المحافظات، مظاهرة حاشدة أمام مقر اتحاد العمال، للمطالبة بحل مجلس الاتحاد العام ومجالس النقابات العامة وسرعة إصدار قانون يعطى العمال الحق فى تشكيل نقاباتهم المستقلة ويسمح بإجراء انتخابات حرة ونزيهة وتحت إشراف قضائى، وذلك اليوم الأحد، تزامنا مع احتفالات عيد العمال.

كما طالب العمال بإسقاط حسين مجاور رئيس الاتحاد، والقضاء على كافة أشكال التشغيل المؤقت ودعم الصناعات كثيفة العمالة وتعديل وتطوير القوانين المتصلة بالعمال ومشاركاتهم لحماية مصالحهم والإسراع فى وضع حد أدنى للأجور وإقرار إعانة بطالة ورفض أى قوانين أو إجراءات لتجريم الاعتصامات أو الإضرابات السلمية لأنها حق أصيل للعمال ، رفض كافة التطبيع مع العدو الصهيونى وعودة دولة الرعاية والحماية خاصة فى مجالات الصحة والتعليم ودعم الغذاء، قيام وزارة القوى العاملة بدورها فى مراقبة تنفيذ قانون العمل.

شارك فى المظاهرة عدد من الحركات العمالية من أجل الإصلاح ومنها "عمال الإخوان المسلمين، الجبهة الوطنية للتغيير، ائتلاف شباب بيحب مصر، اتحاد نقابات العاملين بالأخشاب المستقلة، اتحاد عمال البترول المستقل، النقابة العامة المستقلة للعاملين بالأوقاف، مركز السواعد المصرية".

ورفع المتظاهرون الأعلام السورية والفلسطينية واليمنية والعراقية فى دعوة منهم لدعم العمال والثورات العربية، كما شهدت المظاهرة حضور أمنى مكثف وعدد من قوات الجيش والشرطة العسكرية أمام مقر الاتحاد لتأمينه.

وطالب العمال المجلس الأعلى للقوات المسلحة برئاسة المشير طنطاوى والدكتور عصام شرف رئيس الحكومة، بسرعة إصدار منشور لحل الاتحاد والسماح بإجراء انتخابات حرة لهم.

[Howayda Ismail]

حملة لإصلاح قانون العمل وإعادة حقوق العمال

قالت المهندسة ريهام المنشاوي مؤسسة "الحملة القومية لتغيير و اصلاح قانون العمل المصرى" لـ"الفجر" إن الحملة تستهدف تعديل القصور الحالي في قانون العمل، مشيرة إلى ان هذا القانون يخدم مصالح أصحاب الأعمال ويمنحهم سلطات مطلقة في مواجهة أصحاب العمل.

وأضافت ان فكرة الحملة جاءتها مع اقتراب عيد العمال لذا انشأت صفحة على الموقع الاجتماعى "الفيسبوك" للتواصل مع المعترضين على القانون سواء ممن أضيروا منه أو ممن يواجهون مشكلات في اجراءات التقاضى، وتهدف الصفحة أيضا إلى التواصل مع المختصين فى القانون لاقتراح تعديلا على القانون الحالى تضمن حق العامل واحداث توازن بين حقوق وواجبات العمال وأصحاب الأعمال، وبهدف تفعيل سلطة وزارة القوى العاملة، خاصة على القطاع الخاص. مضيفه انها تسعى من صفحتها تحويل عيد العمال هذا العام عيدا حقيقيا ينعم فيه عمال مصر بحقوق انسانية تحفظ لهم كرامتهم.

الحملة تهدف لاصلاح قانون العمل و ليس الغاؤه، و انما الغاء المواد المجحفة و الظالمة فيه، و كذلك اضافة مواد تعطى حقوقا أكثر للعمال، و اسم الصفحة على الفيسبوك يحمل نفس اسم الحملة " الحملة القومية لتغيير و اصلاح قانون العمل المصرى" ، و ندعوكم للتواصل معنا أيضا عن طريق الايميل على EGYPTLABORLAW@YAHOO.COM برجاء ارسال حالات تعسف و شكاوى من القانون الحالى مدعمة بمستندات على هذا الايميل و شكرا

[Howayda Ismail]

[Howayda Ismail]

كان شعارها ماليش دعوة والنتيجة خربتها وقعدت على تلها

[Howayda Ismail]

الكارثة ان رؤساء النقابات واصحاب المناصب من تسببوا فى ضياع حقوق العمل موالسة مع ارباب العمل

مازالوا فى مناصبهم يخرجون السنتهم للمتضررين وكان ثورة لم تقم فين الحكومة من الكلام ده