تعالوا نجيب الهدايا من مصر

[الغريب]

الباشمهندس عصام أبو الفتح .. ممكن يعمل شير للنك في جروب المغتربين المصريين .. هايفيدنا كتير "

ياريت اللي مشترك في جروب ينشر عليه رابط الدعوة للمناسبة

أنا نشرته على جروب خالد سعيد وبوابة المصريين بالكويت وأتمني أنهم يتبنوا الدعوة وينشروها

http://www.facebook.com/event.php?eid=128523350557441

[capitshino]

سبحان الله

لسه صديقى لى من كام يوم نازل من قطر . كان بيكلمنى فى الموضوع ده

قال "انا ماجبتش اى حاجة من قطر " . ونزل تانى يوم اشترى الهدايا وملابسه من مصر

وقالى برده انا غيرت الحجز من القطرية الى المصرية

ورغم فرق الجودة وفرق الخدمة الا انه كان مبسوط جدا جدا وحاسس انه بيفيد البلد حتى لو بنسبة 0.000001 %

ربنا يبارك فيك يا عنبو .

[amgadibrahim]

حقيقي الفكرة رائعة

ويمكننا التغلب على جشع التجار وفرق الأسعار بإضافة بسيطة...............معرفش هل ممكن تحصل ولا لأ

هل ممكن ندعو بعض التجار وسلاسل المحلات للإنضمام في الحملة بتاعتنا؟؟؟؟؟؟؟؟؟؟؟؟؟

ممكن يقدموا عروض جيدة وهيكسبوا كتير جدا وخاصة إن الموضوع لو نجح هيكرر كل عام وهيعود عليهم بمكاسب عالية

يا ريت يكون فيه آلية يمكن بها اشتراك المحلات في الحملة ويعلن اسم ومكان المحلات المنضمة بل وممكن عروضهم القوية وان شاء الله أتوقع انضمام محلات في معظم أنحاء الجمهورية

ده بقى دور الناس اليى فى مصر واحد يتفق مع المحلات وبكده هتبقى استفاده للكل

أكيد اللي في مصر ممكن يفيدوا في عملية التنسيق مع أصحااب المحلات بس إحنا عايزين الموضوع مايكونش شفهي

يعني لازم المحلات تعرف بالحملة وتعلن عن انضمامها وتعمل دعاية لنفسهم بامنتجات والأسعار اللي هيقدموها

هل ممكن دعوتهم من خلال الفيس بوك بعمل صفحة للمحلات المنضمة للحملة وعناوينها وعروضها؟ أعتقد الموضوع مش صعب وخاصة انهم المستفيد الأكبر من الحملة

تم تعديل 5 مايو 2011 بواسطة amgadibrahim

[capitshino]

المشكلة اللى ممكن تقابل البعض ان معظم المنتجات فى السوق مش صناعة مصري

حد يعرف اماكن بتبيع منتجات مصرية 100 %

اعتقد مكان زى كريستال عصفور عنده هدايا قيمة جدا .. فى ماكن تانية زيه ؟

[الغريب]

أكيد اللي في مصر ممكن يفيدوا في عملية التنسيق مع أصحااب المحلات بس إحنا عايزين الموضوع مايكونش شفهي

يعني لازم المحلات تعرف بالحملة وتعلن عن انضمامها وتعمل دعاية لنفسهم بامنتجات والأسعار اللي هيقدموها

هل ممكن دعوتهم من خلال الفيس بوك بعمل صفحة للمحلات المنضمة للحملة وعناوينها وعروضها؟ أعتقد الموضوع مش صعب وخاصة انهم المستفيد الأكبر من الحملة

محلات التوحيد والنور ممكن تنضم للحملة دي ومحلات عادل لبيب وغيرها كتيير

الناس اللي في مصر بقى تقول

[capitshino]

الموضوع ده برده ممكن يتعمل وانت خارج مصر

عن طريق شراء المنتجات المصرية المتوفرة والتغاطى مؤقتا عن الجودة

يعنى فى مجال الفواكه ممكن نشترى فواكه شركات "مافا و تكنوجرين " وهى متوفرة بالخليج وبعض الدول الاوربية بكثرة

بالنسبة للعصائر .. فى عصير قها كنت باجيبه فى السعودية .. فاكرينه

وبرده اللى عارف منتجات تانية يكتبها .

[لماضة مصرية جدا]

السلام عليكم و رحمة الله و بركاته

و الله يا عنبو انا نفسي ان احنا اصلا نبطل حكاية الهدايا دي اصلا بتاعت مصر و نشوف فعلا اخواتنا و اهلنا محتاجين ايه و نعمله

انا في اول مرة ليا في النزول كان نفسي كل حاجة عشتها و شفتها و مريت بيها اهلي يشوفوها معايا...(مع ان اصلا منبهرتش بحاجة بس هو احساس الحنين مش اكتر)

و دلوقتي بقيت ليلة الهدايا في حد ذاتها غريبة عليا فوق الوصف

انا بحس اني عاملة زي بهجت الاباصيري لما فتح الشنطة بتاعته قدام ناظر المدرسة و قعد يطلع منها برفانات علي شامبوهات علي قوماش و في الاخر طلع مرجع آآآآآآآآآد كدهوت

عارف يا عنبو

انا بفكر نكون فعلا عمليين اكتر

مناخدشي معانا حاجة و احنا نازليين و نشوف اهالينا عايزين ايه و نعمله في مصر

هو ايه القوة الشرائية دي اللي احنا عايشين فيها هنا و لا هناك

انا عارفة ان الهدية دي حاجة رمزية....بس اللي بسعي ليه دلوقتي اني ابتدي اربط نفسي بمصر عشان لما ارجع اكون ابتديت ابني طوبة في خطة استقرار باذن الله

بجد نفسي نبطل "ليلة الهدايا" كلها علي بعض

ينفع؟؟؟

ربنا معانا بقي

باقي من الزمن....مش عارفة...بس اكيد هاااااااااااانت

[Nileman]

نشتري احتياجاتنا من مصر ده لازم و اكيد و---- نصرف فلوسنا في مصر طب يعني حنصرفها فين؟!:)

بالنسبة للهدايا دي موضة قديمة و مالهاش لازمة و ماعادش حد بيجيب هدايا زي الأول و بالنسبة لية انا شخصيا كمقيم في السعودية مابشتريش من هنا حاجة اللا و انت متأكد 100% انها مش موجودة في مصر

[Howayda Ismail]

احنا صحيح مش مغتربين لكن مرينا بتجربة السفر والهدايا اكتر من مرة اخرها سفر زوجى الحج

قبل سفره اقترحت عليه نشترى الهدايا كلها من هنا مع امكانية تبديل او ارجاع الغير مرغوب فيه

لكنه قالى مش حاجيب هداياالا لاهلنا وبس وفوجئت كل شوية يتصل يسألنى على المقاسات والنتيجة لم تقتصر

الهدايا على اخواتنا فقط بل شملت جميع الاقارب باولادهم وكذلك الاصحاب وزملاء العمل

والنتيجة زيادة فى الوزن والجمارك غير طبيعى

نسيت اقول ان سبب اقتراحى ان تجار مكة والمدينة بيرفعوا اسعار السلع كتير فى موسم الحج والعمرة

وده حصل مع صحبتى اختها طلعت عمرة فى شعبان اشترت سلعة معينة بسعر ولما صحبتى راحت عمرة رمضان

وحبت تشترى نفس السلعة من نفس المكان اللى وصفته اختها اشترتها اغلى

والغرض من كلامى ان عدد المعتمرين طول السنة يفوق مئات الالوف غير موسم الحج

ليه منضمش الفئة دى لحملتكم وخصوصا فى منتجات مصرية كتيرة وبجودة كويسة واسعار مناسبة

المهم الاماكن اللى تشتروا منها

[Howayda Ismail]

انا تانى استحملونى عاوزة اقولكم عل حاجة مهمة

الاسعار بتختلف للسلعة الواحدة باختلاف المكان وده بحكم انى اروبة شرا

هناك محلات هاى كلاس وشيك ومظهر فى حى احياء راقية تضرب سعر عليوى اوى فى حين نفس السلعة

لاتقيها فى اسواق عادية ومحلات اخرى اقل بكتير والسبب طبعا كل الهيلمان اللى فيه المحلات دى

وعمالة وضرائب وابصر ايه كله بيتحمل على سعر السلعة ويشربها الزبون لان اقل محل من دول بيدفع فيه ملايين

انا باحب اشترى لاودى احسن حاجة خصوصا البنت باشترى لها بثمن طقم من المحلات دى طقمين وثلاثة بنفس

الشياكة والجودة من محلات عارفها وبتعامل معاها سنين فى المنشية ومحطة الرمل

[Howayda Ismail]

القاهره

1-سوق غزه في شارع بور سعيد

2-الموسكي والعتبه

3- شارع السد فس السيده زينب (شعبي)

4-ممكن مستحضرات تجميل من بين الصورين

5- شارع طلعت حرب بوسط البلد.

6- مول طلعت حرب بمنتصف شارع طلعت حرب بمنتصف البلد.

7- شارع الملك فيصل

8- شارع الهرم.

بالنسبة للاسكندرية

جميع انواع الملابس ( المنشية _ سوق ليبيا _ الساعة (كرموز) _ الساعة فكتوريا_ الابراهيمية _ مول محطة الرمل

بريونى العطارين ومحطة الرمل - محلات شارع سعد زغلول وصفية زغلول واول النبى دنيال )

الساعات والبرفانات : ( المنشية ومحطة الرمل)

البدل الرجالى ( محلات فستيا وستيا شارع سعد زغلول المنشية )

الاحذية والكتاشى ( ش : الغرفة التجارية _ سوق ليبيا المنشية ومحلات ابو علاء : ش سعد زغلول محطة الرمل )

الستائر والمفروشات ( منطقة العطارين - محلات الحلو ونفس النوعية باسعار اقل كتير فى المنشية

السوق الشعبى بكرموز)

السجاجيد ( محلات هانو وعمر افندى والنساجون بالمنشية لكن نفس السجاد باسعر اقل فى محلات عادية

فى المنشية برضه ولمنطقة غرب خان النساجون بالبيطاش امام الحى اسعار خرافية ومحلات بالهانوفيل )

جميع الاجهزة الكهربائية من الابرة للصاروخ شارع النبى دنيال وبها صيانة ايضا

اجهزة الكمبيوتر والطابعات منطقة سموحة

موبيلات شارع شكور والسلطان حسين محطة الرمل جميع الموديلات والاسعار

المواد الغذائية : طبعا كارفور اجنبى يبقى خلينا سلسلة محلات فتح الله منتشرة فى جميع انحاء اسكندرية

المندرة - سان استيفانو - محرم بك - الهانوفيل ودلوقت هايبر فتح الله فى اللعجمى مول ) ده بالنسبة للمصيفين

واللى بيقضوا اجازتهم فى اسكندرية

حتى العربيات لان معروف الجمارك عالية جدا على اللى راجع بعربيته

الاسعار هنا معقول وجميع المستويات ( عند كارفور ومعارض كتيرة فى الطريق الصحراوى )

اقتراح بسيط هناك محلات فى المنشية بتبيع جملة ونصف جملة

وبعض المناطق فيه فصال يعنى بيزود عامل حسابه انك حتفاصل وانتم وشطارتكم بقى ههههههه

الاوكازيون فى اسكندرية مرتين شهر اغسطس وشهر فبراير

[لونا]

فكرة ممتازة جدًا يا أ/ عنبو

و لكن أنا خلاص للأسف إشتريت الهدايا

هو فيه مشكلة زي ما زميل فاضل قال .. فيه فرق كبير في الأسعار و خاصة أسعار الملابس و الأحذية

يعني من 5 سنين أنا فاكرة كنت باشتري لبس العيد لأولادي من مصر .. دفعت مبلغ كبير فعلًا.. و السنة اللي بعدها لما اشتريت لبس العيد من السعودية

كان فرق شاسع.. مع العلم إن الملابس بالذات في مصر .. بتعيش مدة طويلة جدًا و بتحتفظ بقوامها و ألوانها عن الملابس هنا في السعودية

و إن كان ده مش أساسي للأطفال لأنهم بيغيروا مقاساتهم بسرعة .. يعني الحاجة بتصغر عليهم قبل ما تبوظ

سؤال بالنسبة لشركات الطيران

اللي بيشتغل في الحكومة بياخد تذاكر طيران على الخطوط السعودية

هل يمكن تغييرها لمصر للطيران ؟

[Howayda Ismail]

للاخوة والاخوات اللى محتاجين حرفيين ( جميع المهن سباكة - دهانات .......)

ده اول دليل موثق باسماءهم وعناوينهم

دليل الحرفيين فى مصر

كل ماعليك تضغط على المهنة المرغوبة تظهر قائمة بها الاسم والعنوان والمحافظة ووسيلة الاتصال به

[Damo]

فكرة جمييييلة

طب بالنسبة للي مش نازلين مصر

ممكن أعمل اوردر ؟

[رضوي]

فكرة أكتر من رائعة

وياريت مش بس المعتربين اللي يشتروا من مصر

ياريت كمان المقيمين في مصر يشتروا من مصر

أقصد يشتروا المنتج المصري ........... لأن خلاص بقي عمله نادرة .......... مع اني بفضله عن اي منتج .......... وبستغرب جداً لما اشوف الناس بيفضلوا المنتج الصيني علي المنتج المصري ؟؟؟؟؟؟؟؟ طيب ازاي ياجماعة ؟؟؟؟

أكيد لأن الصيني اوفر ........ مع ان من وجه نظري ان جودة المصري اعلي

كلنا لازم نشتري من مصر

بالنسبة للملابس مافيش فيها مشكلة ......... لأن الحمد لله لحد دلوقتي نسبة كبيرة منها صنع في مصر

في القاهرة بفضل محلات وسط البلد في الملابس والأحذية ............. بالاضافة لشارع الهرم ......... فيه محلات احذية كويسة ومش غالية اوي ......... والمولات متوفر فيها كل الملابس والأحذية ..... سواء مولات وسط البلد او مولات الهرم

اما بقي لو عايزين اسعار افضل واختيارات اكتر .......... يبقي شبرا ......... خلوصي ......... طبعاً

دة بالنسبة للاماكن المعقولة في القاهرة

بس ياريت ياجماعة نتأكد ان المنتج اللي بنشتريه مصري وصنع في مصر ............ علشان بتجنن لما الاقي المنتج الصيني بالذات بينافس المصري ........ مع ان في مجال الملابس والأقمشة المفروض ان مصر رقم واحد ( دة المفروض يعني )

الأحذية و الشنط هنلاقيها متوفرة في طلعت حرب

البيرفيوم والاكسسوارات الحريمي متوفرة في المولات كلها ......... وفيه بيرفيوم مصري صنع في مصر ( أو علي الأقل معبأ في مصر )

[رضوي]

فكرة جمييييلة

طب بالنسبة للي مش نازلين مصر

ممكن أعمل اوردر ؟

دامو حبيبتي الجميلة

انتي بالذات ياقمر تؤمري واللي انتي عايزاه يوصلك ........... ها تحبي الاوردر من القاهرة ولا من الشرقية ؟؟

اطلبي بس

ولما تحتاجيني انتي عارفة كلمة السر

جزر

bnd5::

[Damo]

للي مش نازل مصر أنا لقيت دول :

http://www.egyptgiftshop.com/index.html

http://www.egypttalks.com/

وده للي عايز يبعت هدايا لحد في مصر

http://www.egyptpresents.com/index.aspx

أنا مش متاكده من مصداقيتهم متعاملتش معاهم قبل كده.

بس كل دول منتجات للسائحين أكتر.

محدش يعرف محلات عادية ممكن تقبل وتشحن لبلاد تانية ؟

فكرة جمييييلة

طب بالنسبة للي مش نازلين مصر

ممكن أعمل اوردر ؟

دامو حبيبتي الجميلة

انتي بالذات ياقمر تؤمري واللي انتي عايزاه يوصلك ........... ها تحبي الاوردر من القاهرة ولا من الشرقية ؟؟

اطلبي بس

ولما تحتاجيني انتي عارفة كلمة السر

جزر

bnd5::

مرسي يا رضوي

أنا عني مش محتاجة حاجة خالص قولت لو في شركات أو محلات ممكن تشحن لهنا اجرب الonline shopping ويبقى كاني نزلت مصر. يمكن تعجبني سلسة بـ10 جنيه وادفع فيها شحن 50 دولار أو متعجبنيش السلسة اقولهم خدو 50 دولار شحن بس شيلو السلسة

لو عوزت حاجة هقولك علطول

[se_ Elsyed]

عجبتني قوي الإجراءات اللي بتتخذها وزارة العمل في مصر الأن .. وهي إنها بتسحل العمالة الصينية الغير شرعية الموجودة الان في مصر ومنهم ناس كتيرة جداً شغالين في منطقة شق التعبان في السيدة عيشة ومشهورة بورش الرخام ....

كمان الجرمأ المنتشرين زي الجراد في شوارع مصر وبيبيعوا ويشتروا وشغالين حلاقين ودكاترة سنان وحاجة مسخرة ...

طبعاً لا ضرايب ولا تصاريح عمل ولا دياولة

[Howayda Ismail]

عجبتني قوي الإجراءات اللي بتتخذها وزارة العمل في مصر الأن .. وهي إنها بتسحل العمالة الصينية الغير شرعية الموجودة الان في مصر ومنهم ناس كتيرة جداً شغالين في منطقة شق التعبان في السيدة عيشة ومشهورة بورش الرخام ....

كمان الجرمأ المنتشرين زي الجراد في شوارع مصر وبيبيعوا ويشتروا وشغالين حلاقين ودكاترة سنان وحاجة مسخرة ...

طبعاً لا ضرايب ولا تصاريح عمل ولا دياولة

منها لله عيوشة البلاوى دى كلها دخلت مصر بموافقتها وكان فى تواطئ غريب فى كم العمالة الاجنبية الوافدة

ودى احسن حاجة ممكن تقدمها الحكومة لان الصينين دول اتسببوا فى بطالة كبيرة لشباب كتير

ومصانع اعلنت افلاسها بسبب المنتجات الصينية المهربة وغير خاضعة للضرائب وبالتالى ارخص من المصرى

سكان منطقة سيدى بشر والمندرة قبلى بيحلفوا انهم بيتجمعوا الصبح من 6 صباحا زى الجراد

وزى مايكون الارض انشقت وخرجتهم باعداد كتيرة جدا وخلال دقايق يختفوا فى لمح البصر

ده غير باقى محافظات الجمهورية غلبوا اليهود امات بؤجة على ظهرهم يلفوا بها القرى والنجوع زمان

عقبال يارب الباكستانين وعمال بنجلاديش والهند اللى شغالين فى المنطقة الحرة وبرج العرب باعداد غفيرة

لابد من تقنين العمالة الاجنبية عامة والارتقاء بمستوى المدارس الفنية لعمالة مدربة لمنع الحجج

وفرض رسوم اغراق كبيرة على السلع الصينية و غرامات على التجار المصريين المستوردين لها عشان الكفة تتعدل

لان الناس مش حتبطل تشترى المنتج الصينى طول ماهو مرمى على الرصفان برخص التراب

[الســـاري]

لا لا لا ... انا ضد الحملة دي لاسباب وطنية

:closedeyes:

طيب ما تشتروا منتجات مصرية من بلد المهجر وبكدا تنفعوا وتستنفعوا ..

:P

بس حقيقي شعور جميل منكم .. الله يوفقكم ...

bv:- bv:-