كنز تعليمي إسمه " خان أكاديمي "

[se_ Elsyed]

أنا ما صدقتش نفسي بصراحة إن في مواقع زي كده

شيء بسيط وفكرة أبسط .. لكن فجاة تتحول إلى حاجه عالمية ..

وكل ده من سكات خان أكاديمي

ياريت كلنا نتفاعل مع الموضوع ده ..خصوصاً المتخصصين في تلك المجالات

[se_ Elsyed]

أخبار النهاردة

وائل غنيم: ترجمة ''خان أكاديمي'' للغة العربية

شارك

اضغط للتكبير

وائل غنيم

احفظ الخبراطبعأضف تعليق ارسل5/5/2011 12:12:00 AM

كتب – سامي مجدي:

قال الناشط وائل غنيم إنه جاري ترجمة محتويات ''أكاديمية خان'' من فيديوهات ومواد تعليمية ''بسيطة'' إلى اللغة العربية، وإن لم يوضح الجهة التي ستتولى تعريب هذا المحتوى، وإن كان من المرجح أن تتولاها المؤسسة الاجتماعية التي يسعي إلى إنشائها خلال الأيام القادمة.

وتعد ''خان أكاديمي'' واحدة من أشهر المواقع التعليمية، التي تقدم أكثر من 2100 درس فيديو لتعليم العلوم المختلفة مثل الرياضيات والإحصاء والاقتصاد والأحياء وغيرها، بطريقة مبسطة، وهي عبارة عن فكرة تجعل التعليم سهلاً للجميع عن طريق فيديوهات يقوم برفعها علي الموقع تشرح المواد المعقدة نوعاً ما بشكل مبسط.

وكتب غنيم - الذي أعلن في وقت سابق أنه طلب أجازة مفتوحة من عمله بشركة كمدير التسويق افقليمي بالشرق الأوسط وشمال أفريقيا بجوجل العالمية حتى يتفرغ للعمل الانساني والاجتماعي عبر مؤسسة اجتماعية يعتزم انشائها - يوم الأربعاء على صفحة ''كلنا خالد سعيد'' على موقع الواصل العالمي ''فيسبوك'' متسائلاً ''مين يعرف خان أكاديمي؟''. وأضاف ''الموقع التعليمي اللي بدأ بفكرة إن الشاب سلمان خان بيعمل فيديوهات بيشرح فيها لقريبته الصغيرة بعض قواعد الحساب ودلوقتي بقه في موقع أكتر من 2000 فيديو بتشرح مختلف العلوم الأساسية في أقل من سنتين شافهم 50 مليون شخص في كل العالم''.

والأكاديمية أسسها الهندي سلمان خان البالغ من العمر ''33 عاماً''، ولديه شغف بالتقنية والرياضيات، كان يعمل محللاً مالياً لشركة استثمار، أراد مرة أن يعلم أبناء عمومته درساً في الرياضيات فصور الدرس بالفيديو ووضعه في يوتيوب، تلقى الدرس زيارات كثيرة من أناس مختلفين؛ فبدأ سلمان بوضع دروس مختلفة للرياضيات والتاريخ والأحياء ووصلت عدد دروسه لأكثر من 2100 درس.

وحتى يتفرغ لدروسه استقال سلمان من وظيفته، وهو يضع كل يوم ما بين 1 إلى 5 دروس، وجعلت الشعبية، التي حظي بها، بعض الناس يتبرعون له بالمال ووجد تبرعات بعضها كبير وبعضها وفر له راتباً لكي يتفرغ لدروسه.

وقد شهدت الأكاديمية تطورات ملحوظة في تقديم المادة التعليمية خاصة بعد إضافة برنامج التمارين التفاعلية. ففي هذا البرنامج يمكن للطالب الدخول بحسابه في الأكاديمية ثم اختيار التمرين أو مجموعة التمارين في المادة العلمية التي يود التمرن عليها.

ما يميز التمارين التفاعلية أنها تتجدد باستمرار لأنها تعتمد على خوارزمية لإنتاج تمارين بمحتوى جديد في كل مرة يطلب فيه الطالب تكرار المحاولة. لاسيما أن هذه التمارين مبنية على التحدي بحيث لا يمكن تجاوز تمارين معينة من مستوى لآخر إلا بعد تجميع نقاط معينة.

فكرة الأكاديمية لاقت صدى عالمياً واسعاً، حتى أن بيل جيتس، مؤسس شركة مايكروسوفت، وصفه (خان) بأنه صاحب أفضل تجربة تعليمية في عصرنا الحديث.

وحظي ماكتبه غنيم على ''كلنا خالد سعيد'' بأكثر من 350 تعليق في أقل من 4 ساعات فقط. وجاءت التعليقات كلها مرحبة بالفكرة، ورأى البعض أنها ربما تساعد على محو الأمية. تقول فاطمة عطية ''ده احسن تفكير لازاحة الأمية وياريت ناخد بالفكرة ونبدأ نطبقة ديه ناس بتحب بلادها مش بتعمل مظاهرات عشان تزود المرتب ولا تاخد حافز تميز''.

وعرض البعض المساعدة في ''تعريب'' الفيديهات. يقول ''الفلاع المصري'' ''ممكن أساعد في تعريب هذه الدروس لأني متخصص في الرياضيات وعايز أقدم شيء مفيد لتطوير مصر والعرب''.

وأضاف روجو مجدي ''انا مستعد اشرحلكم منهج الرياضيات بحكم عملى من أولى ابتدائي لحد 3 اعدادي ولو عايزين مناهج ثانوي كمان انا مستعد والفكره دى انا بدور عليها من زمان.. عشان نحارب الدروس الخصوصيه''.

ومن المتوقع أن يصل غنيم للقاهرة خلال الأيام القليلة القادمة للانتهاء من أوراق تأسيس الكيان الجديد، الذي سيركز على الأنشطة الاجتماعية والتعليمية، من خلال استخدام وتطويع أدوات وتكنولوجيا المعلومات والاتصالات.

[se_ Elsyed]

يا الله

كانت فين الافكار دي غايبة عن الناس

تخيلوا إن المصريين الغلابة بينفقوا حوالي 13 مليار جنية سنوياً على الدروس الخصوصية

هههههههههه .. في ظل مجانية التعليم

تخيلوا لو إتعمل موقع بسيط زي ده .. بإدارة قوية .. وبرعاية وزارة التعليم والجامعات ورجال الاعمال .. والإعلانات اللي هاتيجي من الموقع ...

واتحطت فيديوهات تعليمية متنقحة كويس ومتوافق عليها من لجان تعليمية محترمة .... وفيها شرح .. وتفاعل ... وتكون مواقع جذابة

تخيلوا حال التعليم عندنا هايبقى عامل إزاي ؟؟؟؟؟؟

ونقضي بقى على غول وبعبع الثانوية العامة

[se_ Elsyed]

أخوكم كان أدبي وضايع في الرياضة

ولان اللي بيخاف من العفريت بيطلع له

ففي دراستي للماجستير .. كل سيميستر اتهبد مادة رياضة أو احصا أو حاجه داخل فيها رياضة تهد الحيل .. ما بالنا لما تكون بالانجليزي ؟؟؟؟؟

وطبعاً المحاضرات بتبقى عبارة عن هايت لايت كده على الموضوعات فمستحيل أفهم حاجه لسه باعرفها لاول مره .. مع العلم إن بتوع علمي درسوها كلها بأستفاضة قبل ذلك فمش صعبه عليهم

المهم يئست والدنسا أسودت في عيني ... وفي واحد صاحبي شافني هانتحر وهارمي نفسي من على كورنيش طريق الملك فهد .. فقال لي أدخل على اليوتيوب وأكتب إسم الدرس اللي معقدك وشوف المفاجأة

ودخلت وفوجئت

الهنود دول بصراحة .. ناس نرفع لهم القبعة إحتراماً وتقديراً لإحترامهم للعلم ولعملهم بمنتهى التواضع

لقيت قنوات رسمية مستأجرة على النت من جامعات هناك وفيها شرح بالفيديو للدروس دي يخلي الواحد يشرب الدرس مش يفهمه

كذلك فعل هذا الشاب صغير السن اللي عنده 33 سنة واسمه سلمان خان

بصراحة موقع عالمي

[engmido]

انا مشكلتى مع البلد هنا انه فى النظام البائد وبعده طرحت افكار تخلى مصر دى فى صدر الامم

ولكن مفيش حاجة بتتنفذ او بتتحط قيد التنفيذ او حتى بتتحطلها خطة زمنية تنفذ فيها وخلالها

نفسى اشوف فكرة بتتنفذ فى البلد دى

وسؤال تانى شديد الارتباط بهذا الموضوع

امتى بقى هنعدى المرحلة دى... اللى هى مرحلة الازمات والانفلات الامنى والبلطجة وازمة الارز ومش عارف ايه

انا نفسى احس يتحسن ولو طفيف انما الثورة الى الان لم تضف تطورا ملحوظا

المشكلة اكيد مش فى الثورة ...بس مش عارف فى مين؟؟؟

تم تعديل 5 مايو 2011 بواسطة engmido

[herohero]

موقع تحفه انا استخدمته قبل كده "GMAT"

مكنتش اعرف انه ف فروع كتيرة كده

الهند ده مثال لتحدي الامكانيات المادية

بجد ناس بتعرف تتصرف وماتشتكيش حظها كتير

[se_ Elsyed]

لقيت موقع تاني ظريف

بس للأسف باللغة الانجليزية برضوا

عشان كده محتاجين ضروري موقع شامل باللغة العربية

learnerstv

[Alattar]

أنا كنت اتعاملت قبل كده علي مواقع زي

lynda.com

وده متخصص في البرمجة..و في الآي تي عموما..بس بصراحة الموقع ده عام و شامل حاجات كتير جدا

جزاك الله خيرا يا سين سين..وان شاء الله أي حد هيتعلم حاجة منه هيكون ليك حسنة جارية فيها

بس علي جنب كده

أنا زعلان من الولا خان ده

يعني جايب كل حاجة في الدنيا..و عامللي فيديو مع بيل جيتس..ومش هاين عليه يحطلنا حاجة في البرمجة

أي حاجة في الدوت نت ولا في السي شارب..ولا حتي في قواعد البيانات

لا لا لا ..أنا زعلان منه..و بهدده اني منكن ما أدخلش عنده تاني..ويبقي يقابلني لو شاف مني ربع فرخة مشوي حتي

[aimen]

أنا كنت اتعاملت قبل كده علي مواقع زي

lynda.com

وده متخصص في البرمجة..و في الآي تي عموما..بس بصراحة الموقع ده عام و شامل حاجات كتير جدا

جزاك الله خيرا يا سين سين..وان شاء الله أي حد هيتعلم حاجة منه هيكون ليك حسنة جارية فيها

بس علي جنب كده

أنا زعلان من الولا خان ده

يعني جايب كل حاجة في الدنيا..و عامللي فيديو مع بيل جيتس..ومش هاين عليه يحطلنا حاجة في البرمجة

أي حاجة في الدوت نت ولا في السي شارب..ولا حتي في قواعد البيانات

لا لا لا ..أنا زعلان منه..و بهدده اني منكن ما أدخلش عنده تاني..ويبقي يقابلني لو شاف مني ربع فرخة مشوي حتي

يابنى ما عندك موقع ميكروسوفت عليه حاجات كثيرة جدا

وكمان demonoid.com

وملفات التورنت ماليه الدنيا

بس فين النفس اللى تقرا وتسمع كل ده ...كمية المعلومات بقت كبيرة جدا جدا فى كل المجالات بطريقة مش طبيعية

:blush2:

تشترى اسطوانات تعليمية ...ال20 جيجا بنص كبسة

لو موافق نتفاهم

لمن يبحث عن فيديوهات عربية

موقع جامعه النجاح الفلسطينية

ممتاز جدا عليه محاضرات مسجلة

ها مين قال هات

http://videos.najah.edu/

عيشوا وانبسطوا وافرحوا

:waving:

تم تعديل 5 مايو 2011 بواسطة aimen