هو حظر التجول فى مصر لسه شغاااااااااال؟

[hOuSsAm]

الموضوع باين

سؤال عشان اخوانا المغتربين اللى بينظموا رحلات النزول لمصر ومواعيد الرحلات

هو حظر التجول لسه شغال ولا خلاص الدنيا بقت ماشية؟

اللى اعرفه انه خلاص معتش فيه

بس لى زمايل مصممين انه لسه شغال وبناء عليه ناويين يظبطوا رحلاتهم يبقوا فى مصر بدرى يعنى قبل 8 بالليل

اللى يعرف المعلومة يقولنا

تحياتى

[herohero]

شغال من الساعه 2 صباحا الى 6

بس محدش ملتزم بيه

[abdulmuttaleb]

صباح الفل

ده احنا الشعب اللي الوحيد في العالم اللي اتفرض عليه حظر تجول من غير فائدة

من كام كنت على الصحراوي بعد منتصف الليل وصباح الفل يا باشا إنك تلاقي عربية شرطة أو جيش أو حتى حد يقوللك انت مين ولا الهواء، والمايكروباصات بين القاهرة والإسكندرية شغالة عادي جدا والحياة فلة شمعة منورة

الناس دلوقتي نفسها تشوف ضابط أو حتى عسكري بوليس، والله ح ينزلوا يبوسوا ايديه ورجليه كمان

بس هو طبعا الاحتياط واجب، يعني ميجيش حد ياخد طريق مقطوع بالليل يعني

وبصراحة سيبك بقى من الإعلام والتلفزيونات وأبلة منى الشاذلي وأنكل عمرو أديب، البلد أمان وده اللي احنا كلنا حاسينه، آه طبعا الناس بتحرّص أكتر بس الدنيا زي الفل

يعني كان فيه خناقة في اسكندرية في شارع بمحطة الرمل اللي فيه محمد أحمد، الخناقة كانت بين بائع متجول وصاحب محل وحد ضرب نار في الهواء فالمحلات قفلت أبوابها على من فيها، مفيش ثلث ساعة والمولد اتفض والحياة رجعت تاني

حتى حكاية شارع عبدالعزيز لما قرأت التعليقات هنا ممن عاشوا هناك أو تعاملوا، تلاقي إن الخناقات هناك كانت حاجة طبيعية يعني مش مرتبطة بانفلات أمني أو خلافه

وبعدين حتى الحرامي، يعني مثلا صديق في بنها قبيل الفجر فوجئوا باتنين (يطفشوا) قفل المحل اللي في الدور الأرضي، حد من الجيران كان قايم للفجر انت يا ولد بتعمل ايه واحدة من الجيران رقعت بالصوت من بلكونة عمارة مقابلة، هوب يا جدع وحد من السكان ضرب نار في الهوا العيلين الحرامية اخدوا بعضهم وهربوا، فيعني حتى المجرم بيكون قلبه ضعيف جدا، والمجرم المصري بقى فيه ميزة، إنه لو انت عاملته راس براس يعني فكرته بربنا وإنك عارف إنه جايز محتاج فلوس وممكن تساعده بالحلال ح يتحول لبني آدم مسالم وممكن يعيط في حضنك كمان؛ لأن معظم البلطجية عيال بتكون فعلا فقيرة ومحتاجة وعايز يرجع بعلاج لأمه أو أكل لبيته اللي فيه 20واحد

معلهش طولت في الرغي بس أنا مزاجي النهاردة عال العال كنت بأسمع نشرة الأخبار ع الراديو من البرنامج العام والأخبار واحد عن جهود مصر في المصالحة وواحد عن ليبيا ومفاوضات بين القذافي والثوار، وواحد عن العراق ورابع عن الجزائر، زي نشرة الأخبار أيام مبارك يوم السبت بالذات مبيكونش فيه أنشطة حكومية أوي، فيعني الحمد لله بدأت الحياة تعود لمجاريها

على الله بس الإعلام يتهد ويوعي الناس بالاقتصاد والإنتاج، امبارح كنت بشوف ع اليوتيوب وزير المالية مع عمرو الليثي بيقول سواقين التاكسي الجديد ضمن اعتراضهم عايزين يغيروا اللون بتاع النقط أبيض وأسود! والإعلام المصيبة إنه قاعد ينقل وتظاهر آلاف ويا ريته حتى يقول طلباتهم ايه عشان الناس تنزل تديهم على دماغهم.

[hOuSsAm]

شغال من الساعه 2 صباحا الى 6

بس محدش ملتزم بيه

يعنى اتوكل على الله وعلى ضمانتك :D

انا فى الغالب بوصل فى الميعاد ده وباخد الطريق لحد المنصورة

متشكر ليك جدا والشكر واصل لاخونا عبد المطلب

--------------------------

طيب وانا ماشى فى مصر الواحد يشيل فى جيبه مطوة مثلا ولا حاجة يدافع بيها عن نفسه ولا آلة حادة - طيب طبنجة -

طيب لو مسكتك هتسجن 6 شهور ممسوك بسلاح ابيض؟

قولولنا يا جماعة مش بعد العمر الطويل ده الواحد يتقلب على كبر وتبقى فضيحة فى العيلة

وارجع السعودية مكسور الجناح

تحياتى

[engmido]

عايز ايه ياحسام؟؟؟

ما تيجى وتخلصنا ما احنا عايشين اهه وبناكل عيش

تعالى وعلى ضمانتى وحظر التجوال ياسيدى من 2الى 5 صباحا والدنيا زبادى فى الخلاط بس زيادة فى الاحتياط

احجز يا سيدى طيارة الساعة 3 عشان على ماتيجى تبقى براءة والنهار طلع

وبرده لو حجزت طيارة الساعة واحدة على ماتيجى وتخلص اجراءات المطار برده يكون الحظر رفع

بس على الله تفتكرنى بس بهدية كده عليها القيمة بدل ما نت تاعب قلبى فى المنتدى طول السنة

وابقى عرفنى ميعاد طيارتك وانا اجيلك المطار....ههههههه

[ozoozo]

حزق التجول من 2 الي 5 وفي استثناء للعاملين بالمطارات والمسافرين يعني لو الدنيا قفلت بازابورتك في جيبك وعليه ختم الدخول

ده غير ان محدش اصلا مهتم بالحزق

واظن انه محطوط حجه عشان اعتقالات البلطجيه يعني لو واحد انت متأكد انه بلطجي ومش عارف تمسكه هاتقول انه كان ماشي ساعه الحظر

اظن لن تنتهي رسميا الا مع الدستور الجديد

[abdulmuttaleb]

والله حكاية إنك تشيل سلاح دي تعتمد، يعني لو أنك رجل يأكل الطعام ويمشي في الأسواق - أقصد يعني بتركب المواصلات العادية بتاعت المواطنين- فمش ضروري أوي سلاح، ولو تعرف تضبط سفرياتك داخل مصر على القطر يكون أفضل،

لكن لو ح تؤجر عربية مرفهة شوية مثلا فيفضل أن تحمل سلاحا أو حتى مسدس صوت،

واحد قريبي زرته من كام يقوم لقيته حاطط المسدس على المكتب، بس هو بيسافر كتير على الزراعي من القاهرة للمنوفية والعكس،

بلاش الله يكرمك تروح تشتري حاجة غالية من حد متعرفهوش، يعني حكاية شراء وبيع العربيات دي بلاش منها خالص لأن ممكن يكون الطرف الآخر عصابة أو مجرمين، إلا لو شخص انت عارفه وواثق منه،

خليك برضه على تواصل مع أقاربك أو معارفك لما تيجي تخرج وللا حاجة بحيث تطمئنهم باستمرار كل كام ساعة، وأدعية الصباح والمساء وتوكل على الـلـه،

معظم كلامي أعلاه عن القاهرة والإسكندرية، أما مثلا محافظة زي المنوفية الناس هنالك مش حاسين بالآثار السلبية بتاعت الثورة أساسا إلا اللي شغالين في القاهرة والمدن كموظفين قطاع خاص، أما ما عدا ذلك فلا قلق نهائيا.

هو بس أيام انتخابات مجلس الشعب والرئاسة الواحد قد يكون متخوف منها، وربما تكون مجلس الشعب بروفة للرئاسة من حيث الانضباط الأمني، ويا ريتهم عملوها في رمضان علشان الناس تبقى صايمة ومؤدبة.

تم تعديل 7 مايو 2011 بواسطة abdulmuttaleb

[masraweya]

توصلوا بالسلامة يا رب

بس متنسوش.. الهدايا من مصر

:closedeyes:

[Dreamwithme]

توصل بألف سلامة يا أستاذ حسام وتنور مصر بوصولك إن شاء الله بس متنساش هديتي من فضلك

بالنوسبة لحظر التجوال حضرتك هو لسه لغاية دلوقتي شغال من 2-5 صباحا قانونا فقط وليس واقعيا

إحنا يا مؤمن البلد الوحيد في العالم اللي أول ما اتفرض حظر التجوال المواطنون المخلصون نزلوا في الشارع عشان يتصوروا مع حظر التجوال

ده حتي السي إن إن ياعيني أول يوم فرض فيه حظر التجوال كتبت علي الشاشة فرض حظر التجوال في مصر والشعب يتجاهله

تاني يوم كتبوا لليوم الثاني علي التوالي المصريون يكسرون حظر التجوال وفضلوا كل يوم يكتبوا كده لغاية خامس يوم

فهموا إن المواطن الوحيد الملتزم بحظر التجوال كان مبارك شخصيا

وعلي أقوال أخري إن حظر التجوال ده كان للشرطة فقط

مش قادرة أنسي مواطن لذيذ جدا علي العربية كان بينادي الناس اللي في البيوت تنزل

وبيقول ما تصدقوش إن في حظر تجوال تعالوا وفعلا في الأيام الأولي للثورة كانت الناس بتبدأ تسخن

وتنزل في المظاهرات من أول 4 الظهر وهو وقت بداية حظر التجوال :happy:

شعب لذيذ بجد مفيش زيه

وبعدين يا أستاذ حسام كل مصري دلوقتي مع صورة مع العلم في التحرير وصورة مع الدبابة

وصورة مع البلطجية المقبوض عليهم (بالنسبة للشباب اللي كانوا بينزلوا في اللجان الشعبية)

وصورة مع صباعه بعد الأستفتاء وصورة في حظر التجوال فالحق لك صورة علي السريع في حظر التجوال

بالنسبة لموضوع السلاح ما أقدرش أفيدك فيه بس أنا الحمد لله الوضع مش زي ما هو مهول في وسائل الاعلام

يعني أنا لغاية الساعة 11 في الشارع أنا ووالدتي لوحدنا ومعاناش سلاح ولا حاجة والدنيا تمام

طبعا أخويا بيشد في شعره ونفسه ومني عينه يحبسنا في البيت بس أهي الدنيا ماشية الحمد لله.