شخصيات من الشارع المصري

[عمرو]

منذ الطفولة والواحد بيتعامل مع شخصيات غير نمطية في الشارع المصري وبتسائل هل هي موجودة للأن أم اندثرت واللي عنده أمثلة ممكن يحطها

البائع المتجول أمام المدرسة والعربية اللي عليها الدوم واللوحة بتاعة البخت

بياع العرقسوس والصاجات اللي معاه والتانك القزاز اللي شايله والطريقة اللي بيصب بيها العرقسوس

القرداتي والسيرك المتحرك اللي معاه

مصوراتي الميه والكاميرا العجيبة اللي معاه وجردل الميه لزوم الشغل

العجلاتي وضربه للزبائن عند تأخرهم في إرجاع العجلة

بتاع الجيلاتي بالتروسكل وإرتدائه لبالطو أبيض ليميزه عن أقرانه من الباعة الجائلين

بتاع الأنابيب وترزيعه بالمفتاح علي الأنابيب

الراجل اللي بيطلع الأتوبيسات يرمي حاجات في حجر الناس ويعمل مزاد علي الشيكولاتة

بتاع البليلة وعربية الفول

بياع التين الشوكي وطريقة تقشيره للتين بمطوة قرن غزال

بتاع الروبابكيا

الفران بالعجلة ال32 السودا وشايل عشر تقفيصات عيش فوق دماغه وعمال يعمل أصوات غريبة ببقه

حد عنده أي أقوال أخري

تم تعديل 4 سبتمبر 2004 بواسطة عمرو

[bentmasria]

:huh:

بياع الذرة والقفص والشواية الصفيح والمروحة الريش

عربية الكشرى الخشب مخططة ابيض ف احمر بتاعة ابو طارق الشهير وجردل بلاستيك وطبقين ميلامين لزوم الاكل والغسيل

مسحراتى عجووووووووووز من عمر الزمن بيجر ايده طفل ومرت السنين الكل بيكبر الا همه

وام عباس بتاعة الجبنة القريش والزبدة بالطشت النحاس المجلى والفطير السخن على باب المدرسة

وغيرهم كثيررررررررررر جدا

ياه يا عمرو فكرتنا بحاجات حلوة جدا

تصدق حاسة طعم الفطير ف بقى

:angry: :huh:

[kfaya]

زمان كنا ساكنين فى الدور الأول , و كانت أصوات الباعة الجائلين كما لو كانوا قاعدين فى المطبخ بتاعنا ....

كان فيهم واحد بيبيع فريك و فول و عدس ( بقوليات يعنى ) .... كان بينادى و يقول : الفول و الفريك بالعكس .... بالعكس ..... بالعكس ....

طبعا هو كان بيقول و العدس ... والعدس ... و العدس.....

أنا كنت فاكر أنه بدل ما يقول الفريك والفول ... و الفول و الفريك ... أختصارا يعنى كان بيقول بالعكس ....... فين و فين لما قدرت أفسر كلامه و عرفت حكاية العدس دى ...

[Farida]

-الست اللى بتطلع فى الأتوبيس تغنى بصوت قوى و جميل و هى بتدعى تحس ان مكانها المفروض فى الأوبرا

-الشباب اللى بيتدربوا على الزفه بالدفوف تحت كوبرى ثروت

- بتاع الأمن اللى فى كليه الهندسه-القاهرة يبقى راجل لابس ميرى و اخر شياكه و هوب اول ما النبتشيه تخلص تلاقيه لابس الجلابيه و برضه اخر شياكه

- يسريه منادى العربيات بتاعه بارك هندسه بميت راجل و تطلع العربيه من خرم الأبرة و لما كنت اسألها جوزك بيشتغل ايه تقول قاعد فى البيت مع العيال

[hamo90]

كان بيلف عندنا في المنطقة بياعين زي دول من أهمهم

- بياع ليمون ظريف جدا كان بينادي ويقول " ايوه اللمون الي ضرب البيبس علي عينه...... ايوه اللمون الي عايز يهادي حماته"

- بياع بتاع ملوحة كان بينادي بطريقة غريبة " الملوو الملوو"

- واحد شايل فوق رأسه قفص فيه أطباق غسيل بلاستيك وعلي كتفه شوال كبير قوي في هدوم قديمة كان بينادي ويقول

" كامبييييي كامبيييييي" المشكلة أنها كانت دايما تيجي في وداني it can't be كأنه مش عاجبه حاله

- واحد شايل جركنين وبينادي ويقول " اشطه بوزة " محدش يسألني ايه البوزة دي عشان عمري ما جربتها هي بتاعة كده عاملة زي الرغاوي ولونها أبيض

- بياع بتاع عسل أسود تظبط ساعتك عليه كل يوم الساعة تسعة ونص الصبح وكان بينادي بطريقة موسيقية " العسسسسسسل "

للاسف أغلبية الناس دي أختفت

hamo

[صديق الحزن]

بياع الترمس بالعربيه والقراطيس عليها و بينادى اللللللللللللوز للللللللللللوز يا ترمس

بياع البطاطا و المدخنه اللى عاملها و هو ماشى بالعربيه و عليها الفرن اللى بيشوى عليه البطاطا

بياع اللب و الفول السودانى و اللى بينادى السخن المحمص بطريقه موسيقيه ha) rs:

[mohamed]

بتاع التين الشوكى ( احلى من المانجة يا تييييين)

بتاع البطاطا ( معسلة يا بطاطا )

بتاع الليمون ( ع السكين يا لموووون )

واهم الشخصيات سائقى الميكروباصات والتباعين لما تركب مكروباص وتسمع كلامهم ولا الشرايط بتاعتهم تحس انهم مجتمع تانى لوحدهم

[Tamsite]

-الست اللى بتطلع فى الأتوبيس تغنى بصوت قوى و جميل و هى بتدعى تحس ان مكانها المفروض فى الأوبرا

-الشباب اللى بيتدربوا على الزفه بالدفوف تحت كوبرى ثروت

- بتاع الأمن اللى فى كليه الهندسه-القاهرة  يبقى راجل لابس ميرى و اخر شياكه و هوب اول ما النبتشيه تخلص تلاقيه لابس الجلابيه و برضه اخر شياكه 

- يسريه منادى العربيات بتاعه بارك هندسه بميت راجل و تطلع العربيه من خرم الأبرة و لما كنت اسألها جوزك بيشتغل ايه تقول قاعد فى البيت مع العيال

ياااااااااااه يا أستاذة ( أو أقول بقى يا باشمهندسة ) فريدة !!!!

والله فكرتيني بالذي مضى ، أيام هندسة القاهرة

كانت ايام ربنا يعلم بيها mfb:

وواضح بقى انك زميلة عدت على نفس المظاهر اللي الواحد عدى عليها أيام الجامعة

المشاهد والمناظر والذكريات اليومية اللي هتفضل مع الواحد لحد آخر يوم في عمره

، واللي هتعتبر بالنسبة له ، من مظاهر الشارع المصري ، وأشكال المواطن المصري اليومية المألوفة ليه ، واللي ممكن يفتقدها لو طلع بره مصر

والمشاهدات دي - اسمحوا لي يا باقي الأعضاء - أعتبرها مداخلتي في الموضوع الجميل ده ، تعبيرا عن رجل الشارع من منظوري الشخصي

الست اللي كانت بتركب أي اتوبيس معدّي على كوبري الجامعة و تغني وهي بتطلب الحسنة

وأنا كنت بأركب الأتوبيس أحيانا و أشوفها كتير

الحاجة يسرية ، اللي بتنافس أعتى السواقين في التحكم في العربية لما تيجي تركنها وترص العربيات احلى رص وبخبرة ما حصلتش، وكانت بتطبق معانا ( طلبة عمارة ) لتاني يوم لما كان يبقى عندنا تسليم مشروع ، ونبقى زاحمين الباركنج

، ربنا يمسيها بالخير :rolleyes: rs:

بس انا بقى كنت غالبا باركن عند الU-turn قصاد بوابة اعدادي عند عم حجاج ، بعيد عن الدوشة ، ولو حبيت ازوغ بعد المحاضرة الأولى أو التانية ، بأعرف أطلع العربية بسهولة من هناك ، و ..

و هبّه يا فكـيـــــــــــــك ، bk:

على عكس الباركنج عند يسرية ، لايمكن اعرف أطلع العربية قبل الساعة 4 العصر swar::

وطبعا تفتكري (تريزة ) بتاعة تصوير الورق قدام مبنى إعدادي، واللي كان مشهود لها والله بالامانة والجدية وسرعة الانجاز وتصوير 10 طن ورق ملازم وشيتات وحلول شيتات في زمن وجيز

ومانساش أبدا انها مرة جريت ورايا في الشارع عشان ترجعلي باقي حسابي اللي أنا طنشته - من ضآلته - ومشيت بعد ما صورت الورق وحاسبتها ، الباقي ده كان عشرقروش ،

شوف الأمانة ومراعاة الضمير ؟؟!!! :huh:

[Tamsite]

وطبعا بائعات الجبنة القريش والمخللات والساندويتشات اللي كانوا بيبقوا قاعدين وفارشين قصاد حديقة الحيوان، منظر الأكل كان بيبقى مرعب - استغفر الله العظيم - من كتر الذباب اللي عليه ، بس كان المنظر نفسه منظر فلكلوري مأخوذ من الشارع المصري ..

أنا مش متخيل اني ممكن اسكن في منطقة ( متوسطة مثلا ) لا هي راقية ولا هي شعبية ، و ما أسمعش الأصوات دي معدية من الشارع اللي انا ساكن فيه :

- بييييييييييييكيا ، روباااابيييييكيييييا

-عييييييييييييييييش ، عييييييييييييييييش

- تن تن تن تن تن ( صوت الترزيع على أنبوبة البوتاجاز )

-لللللللللااااامووووووووووون

[Tamsite]

وحاجة تانية كمان جميلة قوي

بعد صلاة الجمعة مباشرة ، والشارع في حالة سكون تام أثناء قراءة التشهد ثم التسليم ، و .......

و اذ فجأة يضج الشارع بالباعة أما المساجد

بطيخ ، تين ، مانجة ، جوافة ، تفاح ،........

وأصوات البائعين تنادي ، والمشترين يعاينون قبل الشراء و حركة البيع والفصال ... و ....

كلمة حلوة وكلمتين ، حلوة يا بلدي .....

كان عندها حق داليدة والله :huh:

تم تعديل 6 سبتمبر 2004 بواسطة Tamsite

[kfaya]

مممممممم

فى حد بيقول هندسة القاهرة .......

يا ولاد الحلال , هتفكرونى بأجمل أيام العمر, الشقاوة و الصحبة الحلوة و كافتيرية أداب و تجارة ( معرفش ليه كان عندنا اعتقاد جازم ان الكافتيرية هناك دمها أخف ) ....

كنا بنعمل الشاى فى المعمل و بنغلى المية فى القارورة و نصفية بورق الترشيح ....

المنادى كان اسمة عم سيد , كان بيحاسب العربية اللى تحت الشجر فى الظل ضعف اللى تحت الرصيف فى الشمس ....

نسيت أقول لكم أنى كنت قسم كيميا ..... " أجدع ناس "

تم تعديل 6 سبتمبر 2004 بواسطة kfaya

[se_ Elsyed]

الحاجات اللي إنتوا بتتكلموا عنها دي لسه موجوة .. وانا لسه راجع من مصر ومسلم عليهم واحد واحد .. وبالذات الراجل بتاع التين الشوكي لأني كنت بقى لي سنين ما أكلتوش فوقفت في نص شارع مكرم عبيد وهاتك يا أكل من على العربية رأساً إليك والحساب يجمع ...

مصر بخير يا ولاد والباعة الجائلين زادوا لأنهم غالباً بيبقوا موظفين حكومة والمرتب ما بيكفهمش فبيسرحوا بمشاط وفليات .. ولو واحد عنده واسطة جامدة بيقف بعربية بطاطا ....

الغريبة بقى واللي لو كان حد قال لي إنه بيحصل في مصر كنت هاقول له إنت مجنون ... أنه في ذات مرة كنت أجلس مع عائلتي الكبيرة في البيت ولا بينا ولا علينا وإذ بطرقات على الباب وكان الوقت متأخر بالليل وإذ بي أُفاجأ بمندوبات مبيعات - ده عادي - ولكن اللي مش عادي إنهم كانوا صينيات .... قولت يا نهار مش فايت هم يأجوج ومأجوج وصلوا عندنا .. هو أحنا لحقنا نخلص من الروسيات لما يستملونا الصينيات ... ولأنني ضعيف في اللغة الصينية وماعرفش مها غير جملة " تيانا نامين " أي الميدان السماوي .. فصرفتهم بالذوق ومانفعتهمش بحاجة .

[Bero]

وبياع الخس بردو اللي كان بيعدي وينادي خس الجناااااين وانا م عارفه ليه كنت دايما بسمعها خس الجمايس سوري يعني

وعربيات البطيخ باه ياسلام تحس ان فرقه موسيقيه بتتحرك على العربيه وتعالى بص

ولا منظر الناس وهيا على فرن العيش fsh:: ضرب نار

[Farida]

مش معقول يا تامسايت (ما لقيتش غير الأسم ده ....يعنى ايه صحيح) انا كمان فاكرة البنت اللى واقفه فى كشك التصوير عن اعدادى ....كانت عندها القدرة تصور طن ورق دون كلل او ملل و بمنتهى الجديه و النشاط بس ما كنتش اعرف اسمها

اما عن يسريه تصدق كان ممكن نستلف منها فلوس لو احتجنا اى حاجه .....

ايام ...بقه

[ragab2]

طبعا

العبد لله

ملحقش الطرابيش

وفى طفولتى كنت أسمع راجل عجوز يلف الشوارع والحوارى ليشترى الطرابيش والأحذية القديمة

وكان ندائه المميز هو .. طرابيش قديمة جزم قديمة مع خطف الجملة ومط كلمة قديمة الأخيرة

ولا أدرى ماذا كان يفعل بهذه الطرابيش التى كان قد انتهى لبسها منذ سنوات

أما عم بيومى بياع البلح

فكان صديقا للأطفال ويتركهم يصعدوا عربيته الكارو أم حصان ليأكلوا ماشاؤوا من بلح أحمر ورطب وكنا نراه فى موسم البلح فقط

وكانت العائلات تنتظره فى العصارى والمغرب لتشترى منه أجود أنواع البلح

دون أن يخم فى الميزان

وكان كيلو عم بيومى يزن كيلو وربع أو ونص فى الموازين الأخرى

وكان ندائه المميز هو .. يابلح أجيب بدالك منين يا بلح

كانت أيام خير

[G.G]

أيوه فعلا ظاهرة مندوبات المبيعات الصينيات انتشرت اوي..أول مرة يخبطوا على باب بيتنا كنت بأكلم أخي في التليفون في كندا و كان بيحكييلي عن أصحابه الصينيين.. و إذ بالباب يخبط و ألاقي بائعة صينية :blink: :blink: اتلخبط ..قلت هي الكاميرا الخفية و لا أيه!!! :lol: ..

بس الحقيقة يا جماعة أن معظم هؤلاء الباعة موجودين فعلا..و بيدخلوا شارعنا لحد النهاردة..المسحراتي في رمضان..اللي بيسن السكاكين.. السباك بينده"أصلح حنفياااااات"..بائع الفول و البليلة الساعة 8 مساء..يليه بائع الزبادي..طبعا التين الشوكي ..و العسل من جنوب مصر.. و بائعة الدرة المشوي على الناصية ...و المهنة اللي بتأثرفيه فعلا فعلا..عازفي الموسيقى الناي و الربابة اللي بيعدوا قبل أخير ليلة في رمضان لينشدوا أغاني دينية و أغاني العيد... كل سنة ...كل رمضان يعدوا...بتبقى مؤثرة جدا... :blink:

طبعا متخيلين أني ساكنة في الأزهر مثلا و لكن الغرابة أن بيتنا في شارع جانبي عرضه 6 متر في منطقة راقية من مصر الجديدة...بس كل الناس دي بتعدي عليه!!

و بخصوص كلية الهندسة , أخر أنباء المرأة الطيبة الحديدية يسرية,,لسه بتشتغل ..و زوجها توفى من 4 سنوات ..و قالت أنه كان مريض ..يمكن عشان كده كان في البيت يا فريدة و هي التي خرجت للعمل.. أما تريزا ..فقد تزوجت و أنجبت "Paul" و كان ساعات تحضره معاها للعمل ..و تقعد تنده عليه بأسمه معربا (It sounds so baaad)!! مش كانت تختار أسم سهل نطقه..و أكيد كمان فاكرين "بلانش" من كشك التصوير التاني ,كشك الأعداء.. دي كانت متوحشة , كانت ترفض تكبرلي المناظير بتاعتي , eey:: مش زي تريزا الحبوبة ..

ياااااااااه كان زماااان ...

:)