أوعوا تنسوا انا مت ليه

[Dreamwithme]

من بعد ثورة 25 يناير كل ما تحصل مشكلة ويبدأ ينتابني يأس أو غضب

بأحب أفتكر الشهداء.....بأحس إنهم بيقوني ويخلوني أفوق ويرجع لي الأمل في مصر أحلي

نفسي في المحاورات كل واحد مننا قبل ما يكتب أي مداخلة يبص فوق علي الشمال علي صور الشهداء

ويستشعر حوار معاهم يا تري هيقولوا أيه؟ ياتري لو كانوا لسه بيننا كانوا هيقولوا أيه؟ كانوا هيعملوا أيه؟

فياريت نأخد من وقتنا دقيقة نسمع الحوار

"سألوا الشهيد نفسك ف ايه وايه توصينا احنا بيه قال خلى بالكوا من البلد دى واوعوا تنسوا انا مت ليه"

http://www.youtube.com/watch?v=J_PRf6kFi3Q

http://www.youtube.com/watch?v=btXZMh5tHDA

ربنا مد في عمرنا إحنا لسبب وحكمة .....لدور معين المفروض نقوم به فهل بنقوم بيه فعلا؟!

[ابو محمود]

والله موضوعك محترم زيك

ان شاء الله غمة وهتنزاح متخافش

مشكلتى ان لى صديق اسمة يزين اسامى الشهداء كل ما أفتكرة وانا فى الشارع اشعر بالبكاء وكلما صمم اى حد على رآية يحدث لى نفس الشيء ربنا يرحمنا جميعآ احنا وهما انا متفائل لان لايمكث بالأرض الا ما ينفع الناس مهما كانت قوة الباطل فأنة ذاهق ان شاء الله

[Howayda Ismail]

ربنا يكرمك يادريم ويجزيك خير عن الموضوع ده

انا دايما يادريم بابص عليهم يمكن عشان صورة واحد منهم طبق الاصل شبه لابنى الكبير

ودايما ييجى فى بالى طيب لو كان ابنى اللى حصله كده لما كان بينزل معاهم جامع ابراهيم

كان حيبقى نفس شعورى بحزنى عليهم ولا اشد ولاكنت افتخر ان ابنى شهيد زيهم

واوقات افكر شبان كتير فى الوقت ده كانت قاعدة فى بيوتهم فى حضن امهاتهم واسرهم وبعد الثورة بيتكلموا

دلوقت كانهم ابطال رغم اللى دفع التمن وضحى بنفسه هؤلاء الشباب وغيرهم اللى منعرفهمش ومظهروش فى الصورة

اللى بيحزنى احنا عملنا ايه لهؤلاء الشهداء او اهاليهم عملت لهم ايه الدولة والحكومة عشان تصبر ذويهم

ايوة تصبرهم على فراقهم لان محدش حيدر يعوضهم مجرد لحظة عن حرمانهم من اولادهم واحلامهم اللى ماتت يوم موتهم

لان كان فيهم وحيد امه وسندها ووحيد ابوه واخواته البنات ومنهم الاب اللى اتيتم اطفاله وترملت زوجته قبل الاوان

وغيرهم كتير كتير وزى مايكون القدر اختار ناس غالية فى قيمتها ووضعها بالنسبة لاسرهم عشان تبان غلاوة

الثورة ان انتصرت مش بكثرة العدد زى بقية الثورارات اللى سمعنا عنها لكنها انتصرت بقيمة وغلاوة هؤلاء

اضعف الايمان اننا ندعى لهم لما نشوفهم هنا فى المحاورات او على الشاشات او حتى كل مانسمع خبر حلو

يخص الثورة ومننساش دعوتنا تشمل شهداء ليبيا وسوريا اللى صورهم تدمى القلوب من شدة قسوتها

اللهم ارحمهم واسكنهم فسيح جناتك وصبر اهاليهم وعوضهم خيرا

http://www.youtube.com/watch?v=GJ4kw4FuuEw&feature=related

[عادل أبو عمر]

http://www.youtube.com/watch?v=NNVYFdhYMNE

واحد من إخواننا الذين نحسبهم عند الله من الشهداء

هم

ثاروا

وضحوا

واتقتلوا .....

و احنا

بعد

ده كله

لسة

.

.

.

.

.

.

بنتكلم

خلاص معدتش قادر اتكلم

ممكن تكون نفس مكسورة

أو دمعة محبوسة

أو صرخة مكبوتة

بجد معدتش قادر أتكلم

[عادل أبو عمر]

حذفت للتكرار

تم تعديل 8 مايو 2011 بواسطة عادل أبو عمر

[fatfouta]

اوعوا تنسوا هيثم وباقى الشهداء ماتوا ليه اسمعوا والدته

والدة هيثم بتقول مارضيتش احوشه عن انه ينزل لان ده حاجة لله....الله يرحمك يا هيثم ويصبرك يا امى ياااارب

http://www.youtube.com/watch?v=Jg4Nugs1eM0&feature=youtu.be

[fatfouta]

وكمان مينا مات ليه؟؟؟ عشان مصر تعيش

والدة الشهيد مينا نبيل....انا هموت عليك يا مينا ومش هغسل هدومك غير لما احس ان دمه جه وحقه رجع تانى

مافيش حاجة اسمها فتنة طائفية احنا عندنا جامع فى الشارع احنا مسحناه وكنسناه انا وامى واخواتى ماحدش هيفرق بيننا

http://www.youtube.com/watch?v=gIo9X3f6zSY&feature=relmfu

[رضوي]

تسلمي يادريم علي الموضوع الرائع دة

فعلاً الناس اللي ضحت بحياتها دي ........ الناس اللي ضحت انها تشوف مصر بعد التغيير .... وفضلوا انهم يكونوا سبب في التغيير دة

تفتكوا ياجماعة لما يشوفوا اللي بيحصل فيها هيفرحوا ؟؟؟؟ هيقولوا فعلا التغيير يستاهل ؟؟؟؟؟

مشكلتنا ان كل واحد بينتهز الفرصة وبيضغط علي البلد علشان يحقق مطلب سواء بقي فئوي او جماعي او مش وقته اصلاً

عارفة عاملين زي مين ....... زي واحد دراعه مكسور وكل من اولاده عايز منه حاجة يقوم ضاغط علي دراعه علشان يضطر تحت تأثير الالم يوافق علي الطلب

وبالطريقة دي عمره ماهيخف وهيعيش طول عمره بعاهة ماينفعش تتعالج

يارب احمي بلدنا ........ يارب ابعد عنها كل شر ......... يارب قويها وقوينا نرجعها احلي عروسة

[لماضة مصرية جدا]

السلام عليكم و رحمة الله و بركاته

هو ممكن اسال سؤال

هي روح الميدان فين؟؟؟

انا مكنتش في الميدان

لكن روح الميدان قدرت توصل لنا حتي و احنا في دنيا تانية خالص

لما كنت بسمع اغنية انا بحبك يا بلادي...كنتب ببكي

و بقولها من قلبي اوي

و برددها بصوت عالي

روح الميدان راحت فين؟؟؟؟

مين قاصد ينهكها كده؟؟؟

انا خايفة مش احنا ننسي الشهدا يا دريمي؟؟؟

انا خايفة تروح مننا روح الميدان؟؟؟

[Om Zayd]

عارفين ايه المشكلة؟

احنا بنكلم نفسنا

البلطجية مش هيفرق معاهم الشهداء

مبيدخلوش على النت

و مبيسمعوش نداءات برامج التلفزيون

و الناس العادية.. أغلبها في حالها و قافلة عليها بيتها

الناس بقى اللي بيتم تجييشهم و حشدهم من الجانبين .. كلام "كباراتهم" اهم عندهم من اي حاجة

عشان كده.. القانون لازم يطبق بحسم و عدالة .. و العقوبة تبقى قاسية

ده اللي هينفع مع البلطجية

و في نفس الوقت .. لازم نطرح كل الشكوك اللي عند الاطراف المختلفة

و نواجهها و نحقق فيها

مرة واحدة و الى الابد

محتاجين نعرض كل حاجة للشمس

الضلمة و الغموض هما اللي بيدوا الفرصة "للمندسين" و المخترقين

على فكرة .. موضوعك يا دريمي فسر لي ليه ببكي كل مااقرا اي حاجة أدبية مكتوبة عن الثورة

دم الشهداء بيفرق مع "التيار الرئيسي المصري

مش مع البلطجية و المغيبين

[عادل أبو عمر]

السلام عليكم و رحمة الله و بركاته

هو ممكن اسال سؤال

هي روح الميدان فين؟؟؟

انا مكنتش في الميدان

لكن روح الميدان قدرت توصل لنا حتي و احنا في دنيا تانية خالص

لما كنت بسمع اغنية انا بحبك يا بلادي...كنتب ببكي

و بقولها من قلبي اوي

و برددها بصوت عالي

روح الميدان راحت فين؟؟؟؟

مين قاصد ينهكها كده؟؟؟

انا خايفة مش احنا ننسي الشهدا يا دريمي؟؟؟

انا خايفة تروح مننا روح الميدان؟؟؟

سامحيني حضرتك و باقي الزملاء .. بس عايز أفضفض

في حكمة بتقول : همك ما أهمك

و فيه مقولة لابن الجوزي فيها :( ألم تر إلى أرباب الصنائع لو دخلوا إلى دار معمورة رأيت البنَّاءينظر إلى الحائط، والنجَّار ينظر إلى الباب والنوافذ، والحائك ينظر إلى النسيج.فكذلك المؤمن اليقظان: إذا رأى ظلمة ذكر ظلمة القبر، وإذا شكا ألما ذكر العقاب،وإن سمع صوتًا فظيعًا ذكر نفخة الصور، وإن رأى نيامًا ذكر الموتى في القبور، وإن رأى لذة ذكر الجنة)

بنفس المنطق ... سأتحدث عن أهم نقطة في كلام حضرتك و هي ... روح الميدان

روح الميدان حضرتك لم تخرج من الميدان ...

روح الميدان تواصل معها من في قلبه هذه الروح من الأساس

أيام الثورة عشت ككل المصريين أيامها و لياليها الطويلة بايتين في الشوارع نحرس أنفسنا و أهالينا و تعرضنا لضرب النار أمام بيوتنا و للبلطجة مثل كل المصريين

والحمد لله رحت زي ملايين لميدان التحرير ... لحظات من احلى لحظات العمر لحظة التواصل الحقيقي مع روح الميدان ... احساس غير طبيعي ...

ممكن تتخيلي احساس ولاد يتامى أقنعوهم طول عمرهم إن أمهم ماتت لكن لما راحوا ميدان التحرير لقيوها مستنياهم و عارفاهم واحد واحد ... تعبت أوي من بعدهم عنها بس خلاص ولادها رجعوا يبوسوا تراب رجليها و يقولولها نفديكي بأرواحنا يا أمي .. تخيلي احساس اللحظة دي و الابن بيقول من قلبه بحبك يا أمي .. أهو هو ده نفس احساس كل اللي عنده روح الميدان لما بيقول ... بحبك يا بلادي

ملايين من أرواح طيبة تواصلت مع روح الميدان

لكن في نفس الوقت فيه للأسف أرواح خربانة ..

كان فيه أرواح خربانة ... راحت ميدان التحرير عشان تفسد فرحة الأم بأولادها

كان فيه أرواح خربانة ... راحت ميدان التحرير و جالها قلب تقتل أبن في حضن امه

كان فيه أرواح خربانة ... في كل حتة في مصر ... شايفة إن اللي في ميدان التحرير .. دول عيال خونة عايزين يبوظوا البلد و ياريت الشرطة تقتلهم

كان فيه ناس و الله كانت بتتفرج في التلفزيون على الشباب بيتسحل في ميدان التحرير و منهم غرقانين في دمهم و بيقولوا عليهم يستاهلوا ... يستاهلوا قطع رقابيهم ..... تصدقي لو قلتلك نسبة الأرواح الخربانة دي كام ... مش هقولك عشان ما تتصدميش .. أنا شوفتهم ... بقولك أرواح خربانة حتى لو راحت لقلب قلب قلب الميدان

بعد الثورة و مع فرحة المصريين .. كان و ما زال يوجد بينهم بعض أرواح خربانة حاولت تعيش الصدمة مش تعيش الفرحة ... و عملوا نفسهم فرحانين

تخيلي و أحكيلك عن واقع أعايشه .. لغاية النهاردة .. النهاردة الصبح ... فيه مصريين مازالوا حتى هذه اللحظة يلعنوا في الثورة و اللي عملوها .. ممكن تسميهم إيه

مصيبة إمبابة ... مش ريموت كنترول و شريحة متركبة في دماغ كل واحد بتوجهه .. دي ناس بيتحركوا زيهم زي المطالب الفئوية بتاع السواقين و عمال الشركات ..

كلها للأسف أرواح خربانة مش فاهمين إن أمهم في غرفة العمليات بتعمل عملية قلب مفتوح مش هتعرف تشيلك يا ضنايا إنت و أخوك تتطبطب عليكوا دلوقتي أرجوك أبوس إيدك ... اصبر إنت و أخوك

الست كاميليا طلعت اتكلمت ... هافترض كلامها صحيح ... كل كلامها على العين و الراس وهي أولى بالقلق على نفسها منا فهي من سيحاسب وحده يوم القيامة

لكن سؤال واحد و إجابة واحدة و سكوت واحد .. هاموت من غيظي بس قلت دي أرواح خربانة

سؤال : هل تؤمنين أن محمد رسول من عند الله و أن القرآن كتاب من عند الله ...

إجابة : لأ طبعا مستحيل أعتقد بحاجة زي كدة

سكوت : زوجها القسيس

سكوت : كل من سمع الحوار و لم يستنكره

سكوت أرواح خربانة ترضى إزدراء عقيدة شريك في الوطن بهذا التبجح

كل ده ولسة فيه ناس بتتخانق مع بعضها ليبراليين و سلفيين و اخوان و مسلمين و مسيحيين و جماهير كورة بلطجية ... و ناس بتقولك اياكشي تولع عشان يعرفوا قيمة النعمة اللي كانوا فيها .. حزب واحد كان مريحهم .. طب دي روح ميدان حضرتك

كلنا بنقول عاوزين القانون يسود و يطبق على المفسدين ... طب و إيه اللي حايشنا ... أكيد برده في في مستويات القرار العليا أرواح خربانة مش عايزين ياخدوا قرار مناسب

كلنا بنقول الشرطة لازم بقى تقوم بدورها و تحمي المواطن لازم الاتنين يحطوا ايدهم في ايد بعض و يعيشوا حبايب ... طب حبايب إزاي يعني ... دول إتنين مطلقين والدنيا كلها شافت خناقتهم و بينهم قضايا في المحاكم ... طب يعني مفيش ولا واحد كبير فيكي يا مصر يصلح بينهم .. و الآية الكريمة تقول عن الصلح في حالة الطلاق : ( إن يريدا إصلاحا يوفق الله بينهما ) ... فيه ناس مش عايزة الصلح ده ... عايزاها زي ما هي كدة ... بقول لحضرتك ناس أرواحها خربانة رغم إنها ممكن تكون واقفة في الميدان

روح الميدان قربت تدخل الفانوس السحري ... لأ طبعا ...

روح الميدان هي التي ستنتصر بإذن الله .. بس صبر جميل

مش كنت سكت أحسن .. أنا عارف هاجيب لنفسي الكلام .. بس كدة ع الأقل ممكن أعرف أنام .. معلش سامحوني

خدوا بقى الفيديو ده ... ظلم المصريين قبل الثورة ... و ماذا قدمت لهم روح الميدان و لله الحمد ...

http://www.youtube.com/watch?v=u9jvL65m6qw&feature=player_embedded

شوفتوا بقى الأرواح الطيبة اللي بقولكم عليها ...

مسيحي على أيده الصليب واقف يحمي مسلم بيصلي ..

و لسة بيقولوا فيه فتنة طائفية

تم تعديل 8 مايو 2011 بواسطة عادل أبو عمر