هذا بلاغ للشعب!....مقال مهم جدا لبلال فضل

[رضوي]

بصرف النظر عن طريقة البلاغ فهو تحليل منطقي جداً لما يحدث

وللأسف كان فيه من كام اسبوع محاولة ادخال اسلحة لمصر كانت جاية من السودان والجيش قبض عليهم وفجرلهم عربية وكلنا قرينا الخبر دة ومافيش اي تصريح بشأن العربيات دي طلع بعد كدة ؟؟؟؟؟؟ ولا عن سبب دخولها ولا عن اقوال المقبوض عليهم

وبعيداً عن نظرية المؤامرة ....... بس كلنا نقدر نأكد ان اللي بيحصل في مصر النهاردة مدبر ومرتب ليه بكل دقة .......... وموجه كمان

وربنا يستر بقي

لأننا لازم مانامش ابداً لحد لما نطمن ان مافيش حد هيلعب بينا

30 سنة فساد ومش عايزين كل دة يحصل طيب ازاي ؟؟؟ نبقي غلطانين جدا لو افتكرنا ان الاسماء الكبيرة مسئولة وحدها عن كل القرف دة ....... مش معنى حبس سرور وصفوت وغيرهم ان مالهومش ايادي برة بتشتغل وبتدبر وبتنفذ ...... وف الاخر يتقال ان كل الناس اللي بنتهمهم كانوا محبوسين يبقي مين اللي عمل دة كله ؟؟؟؟

واحدة اعرفها سنها صغير قالت كلمة ابهرتني ....... قالتلي : يعني الناس الحرامية اللي في السجن دلوقتي مالهومش اهل يهدوا الدنيا ويحرقوا البلد علشان يطلعوهم ؟؟؟

وبالظبط دة اللي بقوله ....... كل الفاسدين دول مالهومش اعوان ينفذوا ؟؟؟؟

بعيداً عن اسرائيل وامريكا وكل الدول الاخري ........... كفاية العصابات اللي عندنا دي كفيلة تعمل اكتر من كدة علشان تخربها

علشان كدة ماينفعش ننام بعد كدة

[لماضة مصرية جدا]

السلام عليكم و رحمة الله و بركاته

بلال فضل معودنا من ياام ما ابتدت الثورة انه يحط لينا النقط علي الحروف...(و ده ليا انا بشكل شخصي و مقدرشي اعممه)

بس وجهة نظري برضه الشخصية اللي مش هلزم بيها اي حد

خلاص

كفايانا تحليل و تستيف في نظرية المؤامرة

هو احنا كنا فاكرين ايه مبارك هيتنحي و بعدين يتحاكم و بعدين نعيش في تبات و نبات و نخلف صبيان و بنات و تبقي ثورة اللوتس زي اي فيلم عربي كنا بنضحك علي نهايته الرومانسية اوي

اللي اقدر اطلع بيه من المقال كلمة واحد

نفوق...و نصحي و نفضل ايدينا علي سلاحنا

سلاحنا

هو

كرامة

حرية

عدالة اجتماعية

هو دي السلاح الحقيقي

هو ده اللي لازم نخرج بره صدماتنا المتكررة و خيبات املنا و احباطتنا اللي كل يوم ننام و نقوم فيها

الناس قامت بالثورة ليه

مش عشان نطلع كاميليا ع التلفزيون

و لا عشان نلبس حبيب العادلي البدلة الزرقا

عشان

كرامة

حرية

عدالة اجتماعية

اكتب يا استاذي بلال فضل بده

فكر الناس بده

خلي روحنا القتالية ترجع تاني

حادثة امبابة.....طب هنروح بعيد ليه و احنا فعلا شعب بينسي...فاكرين لما صحينا اول يوم في السنة علي حادثة كنيسة القديسين

و بقي المسيحين في موقف الضحية و المسلمين بقم في موقف الدفاع

و التلفزيون هاتك ور ور ور اغاني من بتاعت جرجس و حسانين...(مين دلوم اصلا)

دلوقتي مش ممكن بعد الثورة نبقي نفس الحال

مش ممكن كلنا نرجع تاني ليناير و احداث القديسين

اومال ثورة ليه

اكتب يا استاذي بلال

احنا لسه في حالة ثورة

يمكن مش في ميدان التحرير

بس لازم كل يوم نقول لنفسنا

كرامة

حرية

عدالة اجتماعية

هو ده اللي هيرجع الثورة تاني لينا

الثورة لسه مخلصتشي

و المشوار طويل

و مصر تستحق مننا....منفضلشي قاعدين جنب الحيط نعيط و نولول و نفتح ملفات و نتصعب علي اللي عايز يخربها

يا نفز ومعذرة في اللفظ و نبنيها

يا ضعنا كلنا

كلنا....اللي بره و اللي و اللي جوه

اللي حبها و اللي محبهاش

اللي قعد ع الكنبة و ايد الثورة و الي نزل الميدان

اللي خايف و اللي مش خايف

كلنا هنضيع

و الحقيقة.....انا شخصيا نويت اكمل....نويت اعيش

كرامة

حرية

عدالة اجتماعية

تحياتي

[abdulmuttaleb]

مع احترامي لبلال فضل اللي واضح أنه تخصص تلفونات مؤامرات، زي لما نشر عن تهديدات بالاغتيال للبرادعي وغيره، وظهر على أون تيفي مع واحد اسمه حسام عيسى أستاذ قانون هو اللي كان مبلغ بلال فضل،

الطريف أن لما حد من الجيش اتصل ومسح بيهم البلاط وقاللهم بالذوق الكلام بتاعكم ده هبل في هبل، فقام د.حسام عيسى قال والله اللي اتصل بي جايز ينكر أنه وصل لي أي حاجة،

وفي الحقيقة بلال فضل سقط من عيني بعد موضوع كلية الإعلام والمظاهرات ضد العميد، حيث إنه تقريبا خريج للكلية وكان أسلوبه غير حيادي وغير مهني وكل اللي عاوز تقوله قوله، واللي كان منرفزني أياميها إنه وأمثاله كان عايشين كأن كل مشاكل مصر اتحلت واقتصادها زي الفل واللي ناقصنا بس هو إن عميد إعلام القاهرة يتشال،

يا استاذي سيبك من بلال فضل وركز على المحتوى

مش اللي بيقوله ده هو اللي بيحصل بالحرف الواحد

والله يا سيدي بلال بيرد على نفسه بنفسه شوف المقطع المضحك ده من كلامه في المصري اليوم:

"

وكانوا عايزين يعملوا فتنة طائفية امبارح قدام الكاتدرائية بس الحكاية باظت لما السلفيين راحوا قدام السفارة الأمريكية بدل ما يروحوا الكاتدرائية، وكان المفروض أن يترتب إنه تحصل مواجهات بينهم وبين المسيحيين اللى قدام الكاتدرائية"

ما شاء الله الناس الوحشين بتوع التكتيك اللي بيحذرنا بلال فضل منهم، آل ايه كانوا عايزين فتنة طائفية امبارح (الجمعة) أمام الكاتدرائية، بس باظت عشان السلفيين كانوا قدام السفارة الأمريكية،

طيب الناس الوحشين دول مكانوش موجودين الجمعة اللي قبلها والسلفيين موجودين أمام الكاتدرائية وبيصلوا الفرض حاضر أمام الكنيسة؟

وبعدين اللي عايز يولع الدنيا وعلى كلام بلال فضل إن عندهم بلطجية بيوزعوا عليهم سلاح، طيب كانوا منتظرين ايه بالصلاة ع النبي؟! كام واحد سلفي يعدوا على المكان عشان يولعوا الدنيا مثلا؟

مشكلة بلال فضل ومعه صحفيين كثيرين إنه لا يحدث الناس بما يعقل، وإنما بما يملأ به عواميده الصحفية (عادة وليس دائما طبعا حرام نظلمه على طول الخط).

تم تعديل 9 مايو 2011 بواسطة abdulmuttaleb