مسيرة امبابة ضد الفتنة...هنفضل ايد واحدة وبنحبك يا مصــــر

[fatfouta]

مسيرة الوحدة الوطنية بحى امبابة

http://www.youtube.com/watch?v=wX9cLNMA1ao&feature=player_embedded

تم تعديل 10 مايو 2011 بواسطة fatfouta

[fatfouta]

أبلغ صور فى انه مافيش حاجة هتفرقنا....روحى يا شيخة ربنا يبارك لك

[fatfouta]

حمدى قنديل ونجلاء فتحى

[fatfouta]

وائل غنيم

[fatfouta]

قس يمسك المصحف الشريف والصليب فى ايد واحدة....ربنا يبارك فى امثالك

تم تعديل 10 مايو 2011 بواسطة fatfouta

[fatfouta]

ولاد مصر اللى بيحبوها بجد (مسيحيين ومسلمين) واطفالها كمان

[fatfouta]

[fatfouta]

[عنبو]

جميل قوى يا فتفوته المسيرات دى

بس فيه مشكله الناس مش واحده بالها منها ان اليى بيخرج فى المظاهرات دى مافيش عنده اى مشكله

مع المسيحين ولا مع المسلمين

المشكله ان فيه بعض الناس بتسلم دماغها لغيرها يلعب بيها سواء من المسلمين او المسيحين

يعنى واحد يجى يقولك دول محتجزين واحده مسلمه فى الكنيسه هوبا جرى ويلا ياجماعه وهيلا

بيلا عاوزين نحرر اختنا المحتجزه وكأنهم اصبحوا جهه تنفيذيه

العقل بيقول ان فلان قالى كلمه انى اتحقق منها او يعنى لو مندفع تعالى ياعم اطلع على اى قسم

او دبابه من اليى وافقين واقولهم وهما يتصرفوا بقى ده اخرى

انا مش جهه تنفيذيه علشان اروح احاصر الكنيسه والكلام الفاضى ده

نفس الكلام المسيحين واحد يقول ليهم المسلمين بيكرهوكوا وعاوزين يخلصوا عليكم

وعملوا وسوا فيكم سيرا عليهم واقطعوا الطرق

تلاقى الكل طالع اخد صليبه فى ايده وفداكى يا كنيسه انا رايح استشهد

طيب ياعم ركز بس ده المسلم طالع عينه زيك زيه فى البلد دى

ده المسلم اليى كان بيحارب معاك فى الحروب واليى كان معاك فى ميدان التحرير

ده المسلم اليى قال للظلم لاء همومك نفس همومه ركز انت بس مافيش حاجه من دى فى دماغك

كل واحد بيتصرف على حسب دماغه يعنى الموضوع لا موضوع مسلم ولا مسيحى ده بلطجى يعنى

اهدى بس كده يقولك لا

المشكله فى السذج اليى بيسلموا دماغهم لغيرهم

وطبعا المشكله الاكبر فى الدوله اليى كالعاده تستنى لما تحصل كارثه وبعدين تتحرك

طيب وقبل كده كنتوا فين هى وزارة الداخليه مسؤله عن امن حاجه تانيه غير مصر

ممكن يا جماعه ضباط الداخليه بيشتغلوا فى السعوديه مثلاً ولا الامارات بعد الضهر يعنى

الحل مش فى المظاهرات لانى زى ما بقولك اليى بيطلع فى المظاهرات ماعندوش مشاكل مع اى حدا

المشكله فى اليى بيسلم دماغه لغيره وقلبه بقى اسود مش عارف يميز الحق من الباطل

وتقبلوا تحياتى

عنبو

[لماضة مصرية جدا]

السلام عليكم و رحمة الله و بركاته

مش عارفة يا فتفوتة...هو انا قلبي اللي اتقفل و مش عايز يفرح و لا ايه

مبقتشي احس

لا فرحانة بالمشهد اللي حاصل في المسيرة و لا زعلانة

لاني ببساطة زي ما قال عنبو...منبقاش كده سمن علي عسل و فجاة حد يجي يلعب في دماغ الناس و تلاقي الدنيا ولعت في ثانية....و هوووووووب برضه تنزل علي مافيش و نطلع نقول عاش الهلال مع الصليب

الموضوع اكبر من انه نطبطب علي بعض فيه بمسيرة

استاذ هيكل قال "الاحداث الطائفية اللي حصلت جرح تم تطبيبه خطأ لمدة 30 سنة"

الحل

يبقي فيه عدالة تسري علي الكل....و الله ساعتها مش هنحتاج نطلع كل شوية في مسيرات

الكل اتظلم في اللي حصل ده

و مستنيين رد القضاء

[pink rose]

سامحوني في اللي هاقوله

الصور دي ولا بقت تفرق معايا نهائي

معلش مين اللي في الصورة دول؟

حمدي قنديل نجلاء فتحي وائل غنيم

ما دول من الاول و احنا عارفين انهم ناس ما عندهاش مشكلة لا في مخها و لا تعليمها و لا حد غاسل دماغهم

فا ايه الفرحة في انهم ينزلوا يقولوا ايد واحدة الكلمة اللي بدأت تفقد معناها في كل حاجه تقريبا اتقالت عليها

اللي هايفرحني لما اتكلم مع ناس عادية زيي زيهم على النت و اسمع منهم انهم مع المسلمين ايد واحدة

هافرح لما انتقد نجيب ساويرس براحتي من غير ما واحدة مسيحية تفتكر اني بانتقده لمجرد انه مسيحي و يعلم الله ان الفكرة دي خارج دماغي خالص لدرجة انها شالتني من الفريندز عندها

هافرح لما الاقي المسيحين على الفيس حاطين صورة لمصر مش صورة الصليب

هافرح لما الاقي المسلمين و المسيحين عاملين جمعية او اتحاد او ما شابه و رايحين مجلس الوزراء يطلبوا حتة ارض في الصحراء يعمروها سوا

لكن ارفع مصحف جنبه صليب معلش الكلام دا كان اخره ثورة 1919 و انتقل للرفيق الاعلى خلاص ما ياكلش معايا خاااااااالص

[fatfouta]

والله انا بقى فرحت بالمسيرة

لانى حسيت ان فيه وعى وان الناس عندها غضب ضد الفتنة الطائفية ورافضاها

وكل واحد ووجهة نظره برضو

تم تعديل 10 مايو 2011 بواسطة fatfouta

[se_ Elsyed]

انا كمان أتفق مع عنبو ولماضه

انا ما بقيتش أكل من الكلام الأونطه ده

لإن اللي في القلب في القلب ....

وكفيانا بقى أفطار وحدة وطنية .. وعاش الهلال مع الصليب

يا سادة إصلاح النفوس يبدأ من :

1- تعليم محترم يدعو إلى التسامح والروح الحققية للإسلام والمسيحية

2- القضاء على أي تمييز ديني بالمجتمع .. فالدين علاقة بين العبد وربه .. ولا أحد على وجه الكرة الأرضية له الحق في محاسبة الأخر .

3- أرساء روح العدالة بين عنصري الأُمة

4- يجب على كل الاحزاب والحركات السياسية والجمعيات الأهلية والمثقفين .. أن يتركوا أبراجهم العاجية وينزلوا للشارع والقرى والريف ويحسسوا الناس البسطاء اللي سهل ينضحك عليهم إنهم مش لوحدهم وإننا حاسين بهم ويوعوهم في مؤتمرات شعبية وثقافية لشرح المفاهيم المبسطة ونعرفهم الدنيا ماشيه إزاي ..

[se_ Elsyed]

والله انا بقى فرحت بالمسيرة

لانى حسيت ان فيه وعى وان الناس عندها غضب ضد الفتنة الطائفية ورافضاها

وكل واحد ووجهة نظره برضو

إحنا مش معترضين على فرحك يا فتفوته

لكن مش عاوزين نعمل زي اللي بيروح يواسي حد مُصاب وعنده كارثة .. وإحنا لابسين سموكن وحاطين برفان وبعد ما نقول الكلمتين نسيبه يواجه مصيره المؤلم ..

معاكي الكلمة الحلوه مطلوبة والمشاعر الطيبة مطلوبة

لكن كل هذا لا يقضي على أصل المشكلة ...

[doctor ayman]

المشكله ان الناس اللي في المسيره غير الناس اللي بيحرقوا ويولعوا

والناس اللي كانوا في ميدان التحرير ايام الثوره غير الناس اللي بتعمل مظاهرات واضرابات

يعني الناس دوكهما غير الناس دولهما

ومنذ السبعينات مع بداية الجماعات الاسلاميه التي اطلقها السادات ثم جاء كرد فعل لها جماعات مسيحيه متتطرفه اطلقها البابا شنوده

وذاد الكره بين الطرفين الا من رحم ربي . اول حل للمشكله هو زرع روح التفاهم وقبول الاخر في تلاميذ المدارس من الابتدائي

ولكن من سيفعل ذلك اذا كان المدرسين اغلبهم مثل باقي الشعب يكرهون الطرف الاخر

انا اتذكر وانا طفل في الابتدائي عمري حوالي عشر سنوات ولا اعرف شيئ عن المسيحين اتذكر مدرس اللغه العربيه الملتحي وهو يسب المسيحيين

ويطلب منا الانتعامل معهم لانهم كفار ويحكي لنا خرافات عن ما يحدث داخل الكنيسه واكيد هناك مدرس مسيحي يفعل نفس الشيئ في الجانب الاخر

[مغتربة]

هما لسه بيعملوا الافلام و المسلسلات دى ؟

مش احنا قولناهم عايزين حلول حقيقيه للفتنه الطائفيه

للاسف عمر ما الفتنه ما هتخلص طول ما هما لسه بيطبقوا الطرق المستهلكه دى الى معدش حد بيصدقها

حد يوصل لهم صوتنا معدش بياكل معانا الضحك الى على الدقون دا

عايزين اجراءات حقيقيه و افعال حاسمه و حازمه و الاهم تطبيق عادل و كامل للقانون علشان دا لو فعلا عايزين نقضى على الفتنه الطائفيه

[Howayda Ismail]

مسيرة مشابهة فى الاسكندرية

الوفد ينظم مسيره بالشموع احتجاجا علي احداث امبابه

نظم حزب الوفد والأئتلاف المدني الديمقراطي مسيره بالشموع من مقر الحزب ألي تمثال سعد زغلول بالأسكندريه أحتجاجا علي أحداث أمبابه وفرض بعض الأفراد الذين ينتمون ألي جماعات أسلاميه منطق القوي بعيدا عن القانون والمطالبه بعودة سياده القانون

أكد عبدالرحمن الجوهري منسق حركه كفايه بالأسكندريه أن غياب القانون والعشوائيه هو ما أدي ألي مثل هذه الأعمال وأن الدوله مدنيه تلغي كل هذه الأمور وعلي المتحدثين بأسم الدين أن ينظروا الي هذه الاحداث التي ترتكب بأسم الدين وهو منه برأ

قال رشاد عبد االعال المتحدث الأعلامي لحزب الوفد أن هذه الوقفه تأتي للتأكيد علي أن المصريين جميعا مستئون مما حدث بأمبابه ومن قبل في أماكن أخري ،وأنه لابد من سياده القانون وبسط سيطره الدوله

وأضاف محب عبود مسئول الأتصال بحزب الجبهه أن مايتم الأن لتفريق المصريين هو من صنع النظام البائد ومن رجاله والتحقيقات أثبتت أن من حرض علي هذا هو أمين الحزب الوطني السابق بأمبابه وهو للأسف قبطي ولم يراعي ذلك من أجل مصالحه الخاصه

وأشار حسام حداد منسق لجنه نهضه مصر بالأسكندريه ألي أن هذه الأحداث تثبت لنا كل يوم أن هناك من يريد أجهاض الثورة ويطبقون نفس سيناريو النظام الزائل والذي أراد أن يعيش علي حساب المصريين وهذالن نقبله

وأضاف أشرف السيد رئيس جمعيه من قلب مصر أن هناك محاولات من أتباع الرئيس المخلوع يحاولون تنفيذ مخطط الفوضي الذي حث عليه في أحد خطبه عندما قال أما أنا أوالفوضي وهذا ما يطبقه الأتباع لأجهاض ثورة المصريين في التفرقه بينهم

وشدد كريم محروس أمين شباب حزب الخضر بالأسكندريه علي ضرورة أيجاد حلول سريعه لوقف الفتنه الطائفيه التي تحرق مصر بسبب أن هناك بعض الأشخاص لا يهمهم ألا مصالحهم الخاصه وعلي المجتمع المدني أن يطلق حمله توعيه ضخمه بالأحياء الشعبيه في جميع ربوع مصر، وحذر عمرو خيري أتحاد الشباب الأشتراكي من تكرار هذه الأمور التي قد تؤدي في النهايه ألي حرب اهليه وتدمر مصر وتجهض الثورة

[رضوي]

هي في امبابة بس ؟؟؟؟؟؟

البلد كلها النهاردة كانت مليانة مسيرات

وكل مسيرة طالع فيها كام واحد مشهور علشان يجذب اضواء الاعلام ويقولوا شوفتوا المسلمين والمسيحيين ايد واحدة ازاي ؟؟؟؟؟؟؟

انا زهقت ......... يعني الناس دي كلها سابت اشغالها ومصالحها ومصالح الناس ووقفت في مسيرات ؟؟؟؟ يافرحتي بجد

كنيسة القديسين تتفجر ....... تاني يوم مسيرة وحدة وطنية

كنيسة العمرانية يحصل فيها مشاكل ........ تاني يوم مسيرة وحدة وطنية

كنيسة اطفيح تتهد .......... تاني يوم مسيرة وحدة وطنية

كنيسة مارمينا ...... برده مسيرة وحدة وطنية

ماهي لو كانت المسيرات دي بتجيب نتيجة كانت نفعت من زماااااااااااااان ............ بس احنا مصممين نعيش ثورة 19 ويحيا الهلال مع الصليب ....... وربنا يخليلنا عمو سعد زغلول

يعني ماشوفناش حاجة جديدة ........ لأ ازاي شوفت امبارح حاجة جديدة وحاجة حلوة عجبتني اوي

ومش لوحدي الحمد لله اتأكدت النهاردة ان الناس كلها شافتها وسمعتها كويس ....... مش انا لوحدي يعني

علي احدى الفضائيات امبارح ( وبجد والله مابقيتش افتكر ولا اسم فضائية شوفت فيها حوار ولا اسم جريدة قريت فيها خبر ودة لأني بقيت بتلخبط ) كان فيه حوار عن الوحدة الوطنية والمساس بيها والحوارات المعروفة دي ......... وبعدين ياخدوا اراء الناس اللي في الشارع ومن ضمن الاراء رأي لشخص وبيقسم انهم استحالة يسيبوا كنيسة في امبابة الا لما يدمروها ....... ( هو ماقالش هما مين بس اكيد ماكانش محتاج يقول ) ......... يمكن لو كان تليفون ع الهوا كنت كتمت فرستي وسكت ....... انما انا مش بلوم الشخص دة زي مابلوم القناه

حضراتهم ايه وجهه نظرهم في عرض الكلمتين دوووووووووووووول ؟؟؟؟؟

وغالبا مصر كلها شافت الكلمتين دول امبارح والحوار اللي كان مع محمود سعد عن حقيقة عبير ......... وكانت مصر كلها متابعة كل الحوارات علي كل القنوات لأن كل اللي اتكلمت معاهم لفت نظرهم جدا الكلمتين الموجهين دول

علي فكرة اي مصري يعرف كويس اوي ان مصر اصلا مافيهاش فتنة طائفية وبإعتراف من المسيحيين نفسهم انهم بيعاملوا افضل معاملة ومش معاملة اقلية ( يعني مش زي اي اقلية في اي بلد في العالم ) ودة بإعترافهم هما ......... ودة اللي انا شايفاه بعيني ومش محتاجين نسترجع حكاياتنا مع بعض تاني كل يوم بنتعامل سوا واستحالة تلاقي مسلم بيفرق بين معاملته لأخوه المسلم وبين اخوه المسيحي

المهم هنا اني سمعت ان البلطجية هيتم احالتهم لمحكمة امن الدولة العليا ........... وياريت بقي نشوف احكام صح ........ وياريت فعلاً يتحاكموا محاكمة الارهابيين

بس خلاص

[engmido]

سامحوني في اللي هاقوله

الصور دي ولا بقت تفرق معايا نهائي

معلش مين اللي في الصورة دول؟

حمدي قنديل نجلاء فتحي وائل غنيم

ما دول من الاول و احنا عارفين انهم ناس ما عندهاش مشكلة لا في مخها و لا تعليمها و لا حد غاسل دماغهم

فا ايه الفرحة في انهم ينزلوا يقولوا ايد واحدة الكلمة اللي بدأت تفقد معناها في كل حاجه تقريبا اتقالت عليها

اللي هايفرحني لما اتكلم مع ناس عادية زيي زيهم على النت و اسمع منهم انهم مع المسلمين ايد واحدة

هافرح لما انتقد نجيب ساويرس براحتي من غير ما واحدة مسيحية تفتكر اني بانتقده لمجرد انه مسيحي و يعلم الله ان الفكرة دي خارج دماغي خالص لدرجة انها شالتني من الفريندز عندها

هافرح لما الاقي المسيحين على الفيس حاطين صورة لمصر مش صورة الصليب

هافرح لما الاقي المسلمين و المسيحين عاملين جمعية او اتحاد او ما شابه و رايحين مجلس الوزراء يطلبوا حتة ارض في الصحراء يعمروها سوا

لكن ارفع مصحف جنبه صليب معلش الكلام دا كان اخره ثورة 1919 و انتقل للرفيق الاعلى خلاص ما ياكلش معايا خاااااااالص

مداخلة ممتازة مدام هند