سيارتك .... ماركة ايه و موديل كام ...

[kfaya]

العربية كانت لفترة قريبة من الكماليات و لا يقتنيها الا الأثرياء ... الأن أصبحت من الأساسيات و الأولويات و حلم كل شاب و فتاة ...

يا ترى أخواننا اللى اشتغلوا و تعبوا و اشتروا العربية .....

احكيالنا عن عربيتك , ماركة ايه ؟ موديل كام ؟؟ بتحبها ولا نفسك تغيرها ؟؟ لونها ايه ؟؟ و الفرش لونه ايه ؟؟ حاطط شرايط كاسيت لمين و مين ؟؟ بتجرج فى الشارع و لا فى جراج ؟؟

العربية بالنسبة لك بتمثل اية ؟؟؟

و أخيرا ..... عملت معاك فصل بايخ ؟؟؟؟ ولا أصيلة ؟؟؟

[kfaya]

أول عربية اشتريتها كانت فيات 128 .... عربيات اقتصادية جدا و سهلة التصليح و قطع غيارها متوافرة جدا .... لونها كان زيتونى .... بعتها و اشتريت عربية نيفا روسى ... ناشفة جدا و متعبة و بتسخن ... بعتها و اشتريت بيجو 504 , دى بقى فى رأى احسن عربية مشيت فى مصر .. ناعمة زى الحرير , واسعة جدا شنطة و صالون , تصليحها سهل جدا و قطع غيارها متوافرة و رخيصة ... مش قادر ابيعها , لونها أبيض موديل 1977 ... جددتها السنة اللى فاتت كلفتنى حوالى 15000 جنية و رجعت زى الزيرو ... التابلوة مليان شرايط قرأن و اغانى عبد الوهاب و ام كلثوم و عبد المطلب و طبعا عبد الحليم ... بخلاف بوتشللى و بافاروتى و كاريرا ....

عمرها ما عملت معايا فصل بايخ ..... حتى لما كان الكاوتش بينام , كان بيحصل لما تكون واقفة عشان ماتخلينيش اتبهدل فى غيار الأستبن .....

بجرج فى الشارع تحت البيت .... الشارع كله عارف العربية دى و بيحبها .....

ما اعتقدش انى ممكن ابيعها فى يوم من الأيام ....

[Bero]

انا ممكن اتكلم في الحكايه ديه على الرغم من اني لسه مشتغلتش ولا حاجه انا لسه طالبه في الجامعه

عربيتي فيات 128 ولونها ابيض حلوه ومحندقه على ادي بس عملت فيا فصل بايخ اوي

كنت مسافره رايحه الكليه بتاعتي وهوب وانا على الطريق العجله فرقعت :huh: وعينك متشوف الا النور ركنت العربيه والحمد لله ربنا كرمني بناس ولاد بلد غيرولي الاستبن

والله لسه البلد بخير :rolleyes: بالنسبه للشرايط اللي معايا معايا شرايط قرآن للشيخ العجمي وبسمع لعبد الحليم وكان الله بالسر عليم

[Cleo]

كيا عصفورة.... بنت حلال مصفية..... بس سعنى قطع غيارها ساعات بتعاكس...

ربنا يقدرنى وأركبلها التكييف.....

شرايط ام كلثوم ومحمد فؤاد والحصرى..

[ســيد مرزوق]

عندي شيفورليه كابرس راكنها لاأستعملها ولا عايز أبيعها لأن لها ذكريات عندي , وباستعمل جالانت 2000 , حمراء , بس مش باحبها قوي يعني عشان متعود على الأمريكاني .

نفسي ربنا يقدرني وأبيعها وأشتري مرسيدس عيون سودا محندقة كده , الجالانت مشاكلها كتير وقطع غيارها وتصليحها نار وكل شوية تعمل فيا فصل بايخ بس ربنا بيسترها دايما .

أعتقد إن السيارة بالنسبة للرجل غيرها بالنسبة للمرأة من الناحية النفسية ودرجة الإرتباط والسلوكيات أثناء القيادة .

[moody00x]

تويوتا كرولا 94 حمرا توماتيكى توماتيكى ولا غيار ولا وجع دماغ...

حتى ألآن أصيلة....اللى قبلها كانت نيسان كانت حلوة وشغالة لكن الله يرحمها راحت فى الوبا...

الشرايط ...محمد رفعت وفيروز وياسين التهامى

تم تعديل 6 سبتمبر 2004 بواسطة moody00x

[kfaya]

بعد اذن صاحب الموضوع و كليو .....

قولى يا مودى .... هى عربيتك النيسان راحت فى الوبا أزاى ؟؟؟؟

كان ماشيها بطال و لا حاجة ؟؟؟؟ :huh:

[moody00x]

قولى يا مودى .... هى عربيتك النيسان راحت فى الوبا أزاى ؟؟؟؟

كان ماشيها بطال و لا حاجة ؟؟؟؟ 

كل اللى أقدر أقوله يا كفاية

إن الله حليم ستار... ;) :P eey::

[bentmasria]

لااااااااااااااااادل حمراء زى العروسة عجوزة زى صاحبتها ومعايا من اول سنة جامعة 85

ركبت عليها عربيات كثير بس هى الاصل ولاغنى عنها مافكرتش عمرى ابيعها هدية والدى الله يرحمه

فصولها دايما معقولة وغير محرجة ماعدا مرة ضربت العجلة فى ميدان التحرير وجابولى ونش ما كانش معايا استبن

شافت معايا الفرح والحزن وحاجات كثير اوى

الشرايط يااااااااه

العجمى وفيروز وحليم الرومى وابنته وورده قديم جدا و منير واحمد منيب وشوية قديم من الستينات فى الغربى انجليزى وفرنساوى

توم جونز وجونى هوليداى والابا والبيتلز وشارل ازنافور وعلى الحجار قديم واحمد الحجار ووووبس

[mohamed]

لا مؤاخذة يعنى لو هدايقكم

المواصلات بنت حلال برضه rs: :D ;)

والمشى بقى رياضة مفيش احسن منه :P

تم تعديل 7 سبتمبر 2004 بواسطة mohamed

[hamo90]

لا مؤاخذة يعنى لو هدايقكم

المواصلات بنت حلال برضه  :D  :D  rs:

والمشى بقى رياضة مفيش احسن منه ;)

يا سلام يا حاج محمد كانت علي طرف لساني

وعلي فكرة أحناعندنا حرية جامدة جدا الاخوة مش حاسين بيها الاوهي أن احنا مش فارقة معنا نركب أتوبيس , ميكروباص , مترو أنفاق , تاكسي يعني مفيش تقييد بالعربية

بس أنا لي سؤال عند حضراتكم أزاي الواحد ما يزهقش من عربية له سنين طويلة بيركبها ؟

علي الرغم من أن الواحد ركب تاكسي معين أو ميكروباص مرتين وراء بعض بيتخنق :P

HAMO

[mnman]

انا بقي عمري ما اشتريت عربية!!! في مصر كانت عربية الوالد و عمليات السرقة المكثفة للمفاتيح اثناء الجامعة للمنظرة و الفشخرة rs: :D !!

وبعد الجامعة (نسيت اقول اني قضيت سنة في القاهرة او باظبت 9 اشهر وكانت ماركة مواصلات مواصلات،، رمسيس عتبة اول عباس و الطيران :D ) بعد كدة سافرت علطول و كان عندي عربية من الشركة كانت باسات مودل نفس السنة ولكم ان تتخيلوا مدي فرحتي بالعربية بس طبعا معرفتش اتفشخر بيها لان في اوروبا الناس الي بتتفشخر قليلة جدا ومن الطبقة الهاي لايف!!! بالمناسبة كانت مكيفة ياكليوا بس دايما شغالة سخن بس :D :D :D !!! وكنت بركنها في جراج البيت عندي!!

وبعد 3 سنين الشركة غيرت العربيات كلها وادوني فورد وكانت عربية كبيرة ومريحة جدا بس ديزل ودة علشان التوفير في الوقود لانة كان علي حساب الشركة!!

وفي البرازيل سقت سيترون أكسارا استيشن!! وانا الي اخترتاها شكلها كان جميل ولونها زيتي !! ومكيفة بردك ياكليوا!!! ودي يمكن اقرب عربية لاقلبي!!

وحاليا معايا تويوتا كامري مودل 2003 لونها اخضر زيتوني !! اتوماتيك!! بصراحة متعة في السواقة!! للاسف فاضل عليها 4 شهور وترجع للشركة المؤجرة!! وحستلم عربية حنطور بدون تكيف :P ;) !!! ان شاء الله هوندا أكورد!!

وطبعا ايام المدرسة والجامعة ياما ركبنا اتوبسات و ميكروباصات و اللذي منة!! وتحية لعامة الشعب وانا اولهم!!

منمان ميكانيكي بيسكلتات!!

تم تعديل 7 سبتمبر 2004 بواسطة mnman

[Cleo]

بالمناسبة كانت مكيفة ياكليوا بس دايما شغالة سخن بس

ومكيفة بردك ياكليوا!!!

:P

;) rs: :D :D :D

[disappointed]

دايو - ليجانزا - موديل 2001 - اللون : جنزارى ميتاليك

حصل معاها فصل واحد بس لغاية دلوقتى (الحمد لله) ... ولم تكن هى الملامة فيه الحقيقه

كانت راكنه فى أمان الله , و بعدين جيت أدوّرها لقيت إنها بتدور و تطفى فوراً ( ما بتدّينيش فرصه حتى أدوس بنزين)..... حاولت معاها ساعه كامله و رأسها و ألف سيف ما تقومش... جبت ونش و شلتها على الضمان ( وهو من خلال شركة غير توكيل الدايو) .... قالوا لى طلمبة بنزين..... غيّروها على حساب الضمان..... أخذتها من الضمان و رحت أجيب حاجه من سوبر ماركت , طلعت من السوبر ماركت عملت نفس العمله ... شلتها بونش و رجعت بيها للضمان..... قالوا لى ضفيرة كهرباء.....سبتها ليهم و رجعت ثانى يوم بعد ما غيّروا ضفيرة الكهرباء على حساب الضمان...... أخذتها من الضمان و رحت الشغل , طلعت من الشغل عملت نفس العمله..... جبت و نش و شلتها و رجعت بيها للضمان...... قالوا لى "سنسور" (حسّاس) فى الكومبيوتر سيستم بتاعها.... غيّروه على حساب الضمان.... مشيت بيها و رحت إتغذّيت فى مطعم...طلعت من المطعم عملت نفس العمله..... شلتها بونش و رجعت بيها للضمان..... لقيتهم بيضربوا أخماس فى أسداس.... كلّمت واحد صاحبى معاه دايو من التوكيل راح مدّينى موبايل مدير صيانة توكيل دايو (شاب مصرى ظريف جدا).... كلّمته..... حكيت له.... قال لى : الناس دى مش فاهمه حاجه.... شيلها بونش و تعالى ليّا فورا...... شلتها بونش و رحت له..... دخل جوّه العربيّه و دوّرها و شاف بتعمل إيه...... قال لى ثوانى...... دخل جوّه الورشه 10 دقايق و معاه المفتاح.... رجع و إدانى المفتاح وقال لى إتفضّل يالاّ خذ عربيتك و روّح :)

قلت له : إيه... هيّه إتصلّحت كده يعنى؟؟؟

قال لى : أيوه

قلت له : طب مش تقول لى كان فيها إيه؟؟؟

قال لى : ولا حاجه...... العربيّه دى مصمّمه بحيث يكون فيها "سيكيوريتى سيستم" ضد السرقه عن طريق برمجة كمبيوتر على المفتاح , فلمّا تحط المفتاح فى الكونتاكت و تدوّر الكونتاكت بيقرأ شفرة البرمجة اللى على المفتاح و يطابقها بالشفرة اللى الكونتاكت متبرمج عليها , ولو واحد مطلّع نسخه على المفتاح بتاعك و حاول يسرق العربيّه تعمل زى ما عملت معاك كده و ترفض تدور..... فإنت البرمجه على مفتاحك إتلخبطت , وغالبا وقع على المفتاح ميّه و إنت مش واخد بالك... حاول تفتكر

قلت له : فعلا......أنا نسيت المفتاح فى جيب الشورت و نزلت بيه حمّام السباحه

قال لى : فالح ...... و مش عايزالبرمجه تروح من على المفتاح؟؟

قلت له: طب و المفتاح الإحتياطى اللى طلّعته عند بتاع المفاتيح؟؟؟

قال: لا... ده بقى تبقى تفتح بيه الثلاّجه عندك فى البيت... لوعايز تطلّع مفتاح إحنا اللى نطلّعه ليك و نبرمجه

فعلا....... ساعات التطوّر العلمى و التكنولوجى لمّا بيزيد عن الحد قوى و بيبقى معقّد جدّا ممكن يعمل مشاكل لايمكن توقّعها

ملحوظه : الراجل صاحب الونش اللى نقل لى العربيّه 4 أو 5 مرّات فى ظرف 48 ساعه كان شكله عايز يعمل لى أبونيه عنده :lol:

تم تعديل 7 سبتمبر 2004 بواسطة disappointed

[disappointed]

العربية بالنسبة لك بتمثل اية ؟؟؟

وسيلة إنتقال و قضاء مصالحى و أشغالى و إلتزاماتى ... ليس إلاّ

يعنى مفهوم العربيّة عندى مفهوم عملى بحت ولا يدخل فيه أى عوامل متعلّقه بالرفاهيّة أو متعة القيادة ( بإختصار... ما يهمّنى هو كفاءة الأداء , الأمان , والقدرة على التحمّل )

ولذلك...ردّا على "هامو" لمّا سأل :

بس أنا لي سؤال عند حضراتكم أزاي الواحد ما يزهقش من عربية له سنين طويلة بيركبها ؟

فأنا طول ما العربيّه ما بتعملش مشاكل و ما بتعطّلنيش و ما بتقريفنيش (يعنى طول ما هيّه ما بتخلّيش دماغى مشغوله , وطول ما هيّه بتؤدّى وظيفتها اللى بتشكّل مفهومى لإقتناء سيّارة) فأنا لا أفكّر نهائيّاً فى تغييرها

وبعدين فيه حاجه مهمّه جدّا....... معرفتك الدقيقه بكل صغيره و كبيره فى سيّارتك عمليّه تأخذ وقتاً ليس بالهيّن.... و أى سيّارة جديدة ستظل معها فى فترة تعارف ليست بالقصيرة ( وعلى فكره... مرّه واحد مهندس قال لى إن العربيّه بتظبّط نفسها بعد فترة على طريقة سواقة قائدها و بتتأقلم معاها ميكانيكيّا - و العهدة عليه طبعاً-)

أنا بأقول الكلام ده و أنا مغيّر 3 عربيّات لغاية دلوقتى , ولكن تغييرى لها كان نتيجة مشاغبات من العربيّات اللى غيّرتها ( ما هو أنا أصلى ما عنديش إستعداد أقعد أدادى فى العربيّه..... و العربيّه لو عملتها معايا مرّة فى الثانيه فى الثالثه بأخلص منها فوراً و أريّح دماغى حفاظا على وقتى و جهدى و أعصابى و إلتزاماتى)

[disappointed]

كيا عصفورة

ربنا يقدرنى وأركبلها التكييف.....

طيب خلّى بالك (لو كان قصدك على الكيا برايد - ودى سعتها اللتريّة على ما أعتقد 750 سى سى زى الــ"ميرا" و الــ"ماروتى"-) إن التكييف لمّا بيركب على السعة اللتريّة الصغيرة دى بيهلك الموتور و يقصّر عمره و يضعف عزم العربيّه جدّا

أخت مراتى عندها "ميرا" فيها تكييف , بس ما بقتش بتستخدمه خالص لمّا لقت موتور العربيّه حيفطس كل ما بتشغّل التكييف

[عصام]

تعالوا لى بقى ...

إنتوا جبتوه لنفسكم

أحكى بقى ... ما هو دورى

فاضيين؟

ما وراكمش حاجة ..

حسبة تلات أيام كده ..

أصل انا بقى هوايتى الأهم .. والأمتع ..

ميكانيكا السيارات :lol:

آه والله ...

أنا ما اعتقدش إنى زرت الميكانيكى من حوالى ..

ممممم

سنتين

أجمل حاجة فى الدنيا إنك تصلح عربيتك بنفسك ..

عموما مش هانخرج عن الموضوع ..

أنا بس عايز أقول حاجة ..

أنا أضع نفسى تحت تصرفكم ..

إستشارى .. يابانى .. كورى .. فيات

على فكرة .. بس علشان ما ترحوش لبعيد ..

أنا راجل متعلم .. ومثقف ... ومدير إدارة قد الدنيا .. وفى شركة اتجليزية كمان :)

يعنى ماحدش يفهمنى غلط ..

والاستشارات كلها مجانية ...

لفترة محدودة :blink:

المهم ..

أنا كان عندى طبعا 128 ..

ألخص قصتها وقصتى فى جملة واحدة :

إشتريتها بـــ 9000 جنيه ...

صرفت عليها 9000 جنيه

بعتها بــــ 4000 جنيه ...

بيتهيألى دلوقتى فهمتوا العربيات بقت هوايتى ليه!! :P

بعد كده كان عندى هيونداى إكسيل ..

كانت أجمل إكسيل فى الدنيا ..

بشهادة الناس ..

ودى بقى كانت مشكلتها ..

يا عينى ما كانتش بتلحق تفوق ... إلا .. ودب .. حادثة

ترجع أحلى مما كانت .. وبعدين ... دب .. حادثة ..

الغريب إن كل الحوادث كانت بتحصل وهى واقفة :blink:

أما اليومين دول فمعايا مازدا 323 موديل 2000 توماتيكى .. وتسمى فى بلاد الفرنجة مازدا بروتيج.

العربية دى تقدروا تقولوا عليها ... بى إم صغيرة .. أو مينى مرسيدس ..

تحفة بكل المقاييس ..

لكن مع الأسف الفظيييييع ...

مالهاش قطع غيار فى مصر ..

وحاليا .. بعد ما اكتشفت الموضوع ده ..

باخد حبوب منومة .. للتخلص من هاجس .. سواق التاكسى اللى ممكن يرشق فيها وهى واقفة .. برضه :blink: :blink:

[ماجد]

اخوانى

اول عربيه كانت سنة 83 و كانت بيجو 79 خضراء كانت تحفه و اشتريتها ب 9400 جنيه و كانت عروسه فعلا سميتها عنتر fsh:: .

لكن ...

بعد ما اترزعت رزعتين بعتها سنة 86 ب 11500 جنيه :lol:

اصلها كانت ماتعرفش تمشى :)

غشيمه يعنى ...

المهم جبت عربيه فولفو مو 83 بيضاء كانت حكايه و سميتها نوجه و كانت بتعرف تمشى .

او بالضبط بتحجل .

ماستحملتهاش يا دوبك اركب فيها ربع ساعه الاقى ضهرى ولع نار . عربية طوبه

رحت التوكيل قالوا هى العربيه كده ؟

المهم بعتها على طول سنة 86 بمبلغ 21000 و اشتريت مرسيدس 230 مو 80 زرقاء تحفه كان تمنها 23000 جنيه ودى فضلت معايا لسنة 91 و فجأه مسكت فيها البرومه من كل حته ( العربيه هى اللى مسكت فيها البرومه ...واخد بالك ) المهم بعتها و اشتريت مرسيدس 81 برتقالى و دفعت فرق 18000 ( علشان البرومه ) اول مراتى ما شافتها طبت ساكته ( طبعا من حلاوتها أو من نصاحتى )

العربيه دى بقى فضلت معايا من 91 حتى شهر مارس الماضى و بعتها و اشتريت شيروكى 98 رصاصى و لأنى بافهم فى العربيات زى مانتوا راسيين لسه ماعرفش عنها اى حاجه غير الاشارات و الكلاكس ( اهم حاجه فى السياره التى تسير فى مصر سيبك من الموتور و العفشه المهم الكلاكس )

[Seafood]

يعيش حزب المواصلات

نصيحة بس لكل من يقود سيارة وخاصة في مصر ...

بالراحة على إللي ماشيين في الشارع , وتذكر دائماً أن الأولوية للسير هي لمن يمشي على قدميه وليس لمن هو جالس في عربته .. وبلاش تلزق في العربية إللي قدامك .. وغير الزيت في ميعاده ما تعملوش زيي

النصيحة الثانية ..

لا يجتمع في قلب واحد القرءآن والأغاني .. إذا إطمأن قلبك بالإستماع للقرءآن فلن يطمئن بسماع الأغاني ..

[G.G]

سيارتي فيات سينا موديل 2000..سيارة حيدة جدا بس متهيالي هنك غلطة في تصميم الجسم الخارجي لها لأن في زاوية معينة كده لا أستطيع أن أرى المشاه..

بس بحبها أوي" زي بنتي تمام" :blink: ..و باحمد ربنا على نعمته و كل ما أركبها أقول دعاء "سبحان الذي سخر لنا هذا..." و دائما باتذكر الحديث (المتهيالي مش موثوق منه) حول أهم ثلاث متاع في الدنيا كان منهم الركوب المريح ..

و مع احترامي لوسائل المواصلات الأخرى ألا أني أرى أن وسائل المواصلات غير أدمية..و تربي في الإنسان أخلاق الزحمة..ألا و هي الفهلوة و "يلا نفسي".. ده غير أحساس الواحد بالضعف و هو تحت رحمة سواق التاكسي و قلة أدبه..أتذكر مرة أني ركبت تاكسي و لما جلست بداخله ..ما ارتحتش للسائق.. شكله يا هينصب عليه في الأجرة أو هيخطفني.. ( أصل ركوب المواصلات يربي في الإنسان الفراسة و فهم الشخص من ملامح وجهه!)..طلبت من السائق أنه يشغل العداد..بصيت لقيت كاني قلت حاجة قلت أدب..السائق بصلي شزرا ..و راح سألني: أنتي جنسيتك أيه ؟؟...

ما فهمتش ايه العلاقة بين الجنسية و العداد :lol:

..بس رديت : مصرية!..قام راكن على جنب و قالي: انزلي هنا..!!

ما أحكيش بأه عن حرقة الدم و الكسفة !

طردني من جنة التاكسي!! :) ..

ده غير وسائل المواصلات الأخرى..مترو الأنفاق مثلا..كل حاجة هايلة فيه..إلا التهوية...و ما أدراك أهمية التهوية بعد يوم طويل من العمل في بلد حر مثل مصر ..بعد ما تكون الطبقات الكادحة أكلت من عرق جبينها كويس أوي...

لذا لا بديل بالنسبة لي عن سيارتي..أشعر بداخلها مثل السلحفاة داخل الshell .. .. أستطيع تحمل أي زحمة أي حر أي حاجة..ما دمت داخل سيارتي و قافلة الزجاج ..حوشت سنتين من أول ما أتخرجت حتى جبتها عشان كده أشعر أنها "شقا العمر" و "و اللي طلعت بيه بعد السنين" ax:

طبعا الموضوع لا يخلو من فصول بايخة.. مرة الراديوتور اتخرم فجأة و أنا مروحة على طريق الأتوستراد..و كانت النتيجة أني وصلت البيت بعد 7 ساعات قضيتهم في التوقف كل 10 متر على الطريق و التهوية و رش المياه حول الموتور ! !!

إلى أن وصلت بالسلامة..

و أما عن الشرائط متنوعة ..بس الأساسي أولا قرآن بصوت مشاري راشد,ثانيا أغاني فيروز و Abba (موضة قديمة: )..Lorena macknet و Budha bar... بس كده..