سيارتك .... ماركة ايه و موديل كام ...

[Cleo]

طيب خلّى بالك (لو كان قصدك على الكيا برايد - ودى سعتها اللتريّة على ما أعتقد 750 سى سى زى الــ"ميرا" و الــ"ماروتى"-)

فشرررررررررررررررررررررر...... 1139 سى سى :lol:

(ومتسألنيش إيه ال39 دول..!!!) :)

[mnman]

عيوب المكيف!!!

:) :lol: cld

علي فكرة يا أسو،، مازدا سيارة مريحة وعملية جدا!!! ابتاء من 323 و626 و زووم 3 و زووم 6 و 929!!!!

وعقبالك يا كليو لما تجيبي الاسبليت!!! بهزر والله العظيم!!

[Cleo]

عيوب المكيف!!!

:) :lol: cld

علي فكرة يا أسو،، مازدا سيارة مريحة وعملية جدا!!! ابتاء من 323 و626 و زووم 3 و زووم 6 و 929!!!!

وعقبالك يا كليو لما تجيبي الاسبليت!!! بهزر والله العظيم!!

vmp:

[ســيد مرزوق]

سيارتي عملت معايا فصل بايخ النهاردة في عز الحر .... درجة الحرارة النهاردة حوالي 70 مئوية في الشمس !!!

بجد مش هزار ...

اللي حصل إنها فجأة وبدون مقدمات نامت العجلة الأمامية اليمنى بس ربنا ستر كنت في شارع جانبي وماشي بشويش .... المهم نزلت أغيرها ماعرفتش ألمس الصواميل من شدة الحرارة ولسعت إيدي جامد .... صبرت عليها .... والمهم بعد وقت طويل والعرق نازل وروحي هاتطلع لأن الصواميل كانت مزرجنة ... المهم غيرتها بالإستبن وكملت مشواري ..... والحمد لله .

مرة سمعت من واحد صاحبي ... إن السيارة عاملة زي الزوجة في كل حاجة ... تراعيها ... تراعيك ... تهملها ... تقرفك ... أحيانا عايزة مسايسة وأحيانا عايزة العافية ..

وحاجات كتير مضحكة بس عجبتني المقارنة جدا ...

مع الإعتذار للسيارات

قصدي للسيدات .

أما بالنسبة للشرايط فأنا لا أستعمل الكاسيت لأن الشرايط بتسيح من الحر لو سبتها في السيارة في الصيف , وعادة أشغل الراديو على إذاعة القرآن الكريم ونادرا محطة بي بي سي العربية لمتابعة الأخبار الهامة ...

وأنا مع الرأي القائل إن القرآن الكريم وشرايط الأغاني لا يجتمعان .... ياده ياده .. رأيي ومحدش يزعل .

[عمرو]

سيارتي عملت معايا فصل بايخ النهاردة في عز الحر .... درجة الحرارة النهاردة حوالي 70 مئوية في الشمس !!!

:) :)

هو سيادتك كنت سايق علي خط الإستواء ولا إيه

[ســيد مرزوق]

لا يا عزيزي ..... ألعن من خط الإستواء

أنا

( عايش )

في

الكويت

أحيانا كتير في الصيف تصل درجة الحرارة إلى 90 درجة مئوية في الشمس , يعني من غير ظل , لو مش مصدقني إسأل أي حد عاش في الكويت .

يوووووووووووه .... دعواتكم

[kfaya]

مرة سمعت من واحد صاحبي ... إن السيارة عاملة زي الزوجة في كل حاجة ... تراعيها ... تراعيك ... تهملها ... تقرفك ... أحيانا عايزة مسايسة وأحيانا عايزة العافية ..

وحاجات كتير مضحكة بس عجبتني المقارنة جدا ...

مع الإعتذار للسيارات

قصدي للسيدات .

مرة رحت للميكانيكى عشان العربية كانت متلخبطه و كل حاجة فيها مش مظبوطه .... الميكانيكى عشان معرفة , قال لى ده مش ركوبك ؟؟؟؟ قلت له فعلا أنا سلفت العربيه لواحد صديقى يومين كنت مسافر فيهم و هو كان محتاج يعمل شوية مشاوير ..... قال لى القول المأثور ....

اياك تعملها تانى يا باشمهندس .....

اللى يسلف عربيته ,,,,, يسلف مراته

و فعلا من ساعتها :)

[ســيد مرزوق]

بصراحة ....

أنا كنت عايز أقول كده برضه ..

بس

كنت مكسوف . :)

[G.G]

وأنا مع الرأي القائل إن القرآن الكريم وشرايط الأغاني لا يجتمعان .... ياده ياده .. رأيي ومحدش يزعل .

طيب و لو اجتمعا فعلا يبقى معناه أيه؟؟...

أنا أقول eey:: ... معناه أن فيه ازدواجية مثلا مش كده..و الإزدواجية هذه أسببها كثيرة...

-.ممكن تكون ازدواجية بسبب عيب في الشخصية كأن يكون الشخص متناقض في تصارفاته و ميوله نتيجة حالة عدم اتزان عامة..

- ازدواجية سببها ثراء في الشخصية كان يستطيع الشخص تفهم رأيين مختلفين و بينهما تضاد واضح و لكن بسعة أفقه ممكن أن يتقبل الرأيين (و يكون هنا في حالة ازدواجية ) إلى أن يميل لرأى واحد أوربما يستطيع ايجاد طريق وسط...

- ممكن ازدواجية سببها أن الإنسان في حالة انتقالية من حالة لحالة و إلى أن يرسو على ارض صلبة في أي اتجاه يكون حاله هو التأرجح بين حالتين..و هذه الحالة الانتقالية قد تستمر أيام عند البعض أو ربما سنين عند أخرين..

- ممكن ازدواجية لو تجمع بين الشر و الخير يكون سببها ضعف الوازع الديني و الاستجابة لهوى النفس...(بس متهيالي دي مش قضيتنا أوي هنا لأن احتا لسنا بصدد تحريم للموسيقى ..و أنما الموقف بالأحرى تعجب من مستمع تدمع عيناه عند سماع أية مثل(قال تعالى) "اعلموا أنما الحياة الدنيا لعب و لهو وزينة و تفاخربينكم و تكاثر في الأموال و الأولاد كمثل غيث أعجب الكفار نباته ثم يهيج فتراه مصفرا ثم يكون حطاما و في الأخرة عذاب شديد و مغفرة من الله و رضوان و ما الحياة الدنيا إلا متاع الغرور"..ثم في أثناء رجوعه من مشواره تراه يطرب بأغنية لأم كلثوم مثلا...)...هي حاجة غريبة فعلا eey::

ف يعني موضوع الإزدواجية هذا ممكن أن يكون حالة مرضية مرهقة جدا للشخص و من حوله أو حالة صحية ايجابية جدا... و أنا الحقيقة لا أعلم متى يكون هذا أو ذاك ..و هي حاجة بتشغلني كثير..بيتهيالي الموضوع يحتاج موضوع خاص و استطراد طويل لأراء مختلفة...

بس في كل الأحيان تجمع شرائط كاسيت لقرأن مع شرائط كاسيت أغاني وارد و بيحصل عمليا..(أنا واثقة على الأاقل أن في حالة واحدة كده :) )

[Seafood]

صحيح .. أتفق معك في أن من يستمتع بالأغاني من الممكن أن يستمتع بالقرآن , وهذا شيئ مُجرب .. بغض النظر عن تعريف الإستمتاع هنا هل هو إستمتاع أم إطمئنان مع إستمتاع ..

لكن العكس غير صحيح .. يعني من يستمتع أو بمعنى أصح يطمئن بالقرآن لا يستمتع بالأغاني ..

ولذلك فقد تعمدت أن أقول في المداخلة السابقة ..

إذا إطمأن قلبك بالإستماع للقرءآن فلن يطمئن بسماع الأغاني ..

وليس العكس ..

وقبل القفز إلى أي نتائج .. يمكننا أن نقارن ذلك بمثالين ..

= فمن يستمتع بالأغاني وفي نفس الوقت يستمتع بالقرآن .. فهو يشبه التصرف الذي بالتأكيد جربه كثير منا , وهو إستعدادنا لتناول الحلوى مهما كانت درجة شبعنا بعد تناول الطعام .. فهو يرى أن القرآن تحلية لذيذة , بعد وجبة الأغاني الدسمة ... ولذلك تجد أن كل عشر شرائط أغاني يقابلها شريط قرآن واحد يتيم في الغالب ..

= أما من يستمتع أو بالأصح يطمئن بالقرآن ولا يستطيع أن يستمتع بالأغاني .. هو يشبه الشخص الذي تناول من الطعام حتى شبع , ثم دخل إلى مكان يتم فيه إعداد الطعام .. هنا قد يصيبه الغثيان من مجرد رائحة الطعام ... وهذا التشبيه قريب جداً من الواقع , حيث تجد نفسك لا إرادياً تغلق التلفزيون أو تحول إلى قناة أخرى عند إذاعة أغنية ما ..

فالفرق بين من يستمتع بالأغاني والقرءآن معاً , وبين من يطمئن بالقرءآن فقط .. هو كالفرق بين من ينظر للقرآن على أنه تحلية وبين من يعتبره طعامه الأساسي ..

وأتمنى أن لا يكون ذلك خروج عن الموضوع .. ولكنني أراه مرتبط بالموضوع , لأن السيارة تكاد تكون هي المكان الوحيد الذي يحدث فيه هذا الجمع بين الأغاني والقرآن ..

تم تعديل 9 سبتمبر 2004 بواسطة Seafood

[Tafshan]

انا لا ارى اي مشكله في الاستماع الي الموسيقي و الاستماع الي القرآن و اري ان هناك فرق كبير بينهم و ليس من العدل المقارنه بينهم .. لا اتفق علي موضوع اطمئنان القلب بغير زكر الله ، لكن الاغاني حاله مختلفه فهي مثل الشعر في الثقافه العربيه وقت الرسول منها الصالح و الطالح ً ...

ممكن نقارن القرآن بشرائط تعليم اللغات مثلاً لان كلاهما مفيد ، لكن بالاغاني ... لأ ! ، انا استمع الي اي اغنيه جميله اذا اكتملت عناصرها من صوت و لحن و كلمه (بالترتيب) .. اسمع لمنير و علي - القديم- و غيره ، و بالطبع لفيروز و ام كلثوم و حليم .. لكن كله في الراديو لاني بسوق علي نفس الخط - خط الاستواء - مثل سيد مرزوق .. انا اصلي في دبي و الجو هنا غبي جداً و كل الشرائط - فعلاً - بتسيح ..

انا هنا الشركه مستأجره لي سياره من شركة تاجير ظريفه جداً ، كل شويه تغير العربيه .. ركبت لانوس و بعدين هوندا سيفيك و بعدين فيات بونتو ، و دلوقتي معايا شيفروليه افيو - عربيه جديده مجمعه في مصنع دايو ... و اهم عامل في اي عربيه هنا هو التكيييييف ! لو تعبان شويه .. ما تتركبش !!!

انا مش بلحق ارتبط بعربيه - طبعاً - لكن هنا مافيش وسيلة مواصلات غيرها .. الكل لازم يكون عنده عربيه لان عداد التاكسي هنا بيبدأ من 5 دراهم (حوالي 9 جنيه) و المشوار الصغير ممكن يقفل 30 درهم (حوالي 55 جنيه !!) في حين انك هنا ممكن تشتري اي عربيه تتخيلها اقل من موديل 1990 باقل من 10000 درهم ! (حوالي 18000 جم) و هنا سهل تأخذ قرض و تعمل كده ..انا جبت لمراتي عربيه BMW مو 90 ب 7000 درهم علشان اوفر مواصلاتها و توصل بها بنتي المدرسه ..

الدنيا هنا زحمه زي مصر بالضبط ، انا بروح شغلي الصبح في ساعه و بعد الظهر في ساعه مع ان المسافه زي بين المهندسين و مصر الجديده .. اسوأ شئ ممكن يحصلك ان العجله تنام مثلاً و درجة الحراره بتوصل - بجد - ل 50 درجه و الرطوبه ل 100 % .. تحس انك بتتنفس ماء - الحل هنا انك تسيب العربيه و تمشى !! و لو عملت شهم و غيرت العجله النتيجه انك لازم تروّح تغير هدومك و تأخذ دش و كباية شاي و دواء للصداع !! - مع احتمال اجازه مرضيه يومين !!

انا مدمن ال BBC العربيه باستمع اليها علي طول في الراديو و قبله - طبعا - ازاعة القرآن الكريم - بصراحه احسن من مصر بكثير - كل شهر في توقيت خروجي للشغل تقدم قراءه للقرآن بصوت احد المشايخ لمدة نصف ساعه حتي يختمه ، و بالتالي فكل من يستمع لهذه الازاعة و يخرج في نفس توقيتي فأنه يختتم القرآن كل شهر ! مع العلم ان كل هؤلاء القراء من الفطاحل مثل العجمي و عبد الباسط و الحصري و مشاري و غيرهم كثيرون ..

[فــيــروز]

لا مؤاخذة يعنى لو هدايقكم

المواصلات بنت حلال برضه

والمشى بقى رياضة مفيش احسن منه

ys):

يا سلام يا حاج محمد كانت علي طرف لساني

وعلي فكرة أحناعندنا حرية جامدة جدا الاخوة مش حاسين بيها الاوهي أن احنا مش فارقة معنا نركب أتوبيس , ميكروباص , مترو أنفاق , تاكسي يعني مفيش تقييد بالعربية

بس أنا لي سؤال عند حضراتكم أزاي الواحد ما يزهقش من عربية له سنين طويلة بيركبها ؟

علي الرغم من أن الواحد ركب تاكسي معين أو ميكروباص مرتين وراء بعض بيتخنق

HAMO

ys):

الناس دى بتتكلم صح جدا .. non::

يعنى الواحد ينزل من التاكسى ولا يشغل باله بقى هيركن فين ولا لو العربيه حد خبطها وهى لسه جديده يبقى يا عبنى قلبه بيتقطع عليها .. cbyb: ولا واحد بتوع مرور بقى ييجى يتنطط عليه .. :unsure: ولا كل كوم و كل شويه عيل صغير ينط قصاد العربيه فجاه و اللى سايق يدوس فرامل باقصى قوه بعد ما اعصابه تكون تلفت والولد بيضحك ولا على باله hpc:!:

وربنا يخلى لنا اصحابنا اللى بيوصلونا سفلقه ويبارك لهم فى عربياتهم mf(

[maksoof]

أنا كنت عايز أشترى عربية كويسة بس لقيتها غالية حبتين فاشتريت عدة نجارة و قلت أعمل عربية خشب. و لو حصل طوفان أهه ممكن برضه تعوم.

فعملت العربية دى

:unsure:

[se_ Elsyed]

فليسمح لي إبن مصر إني أتكلم بإستفاضة عن إمتثال ( إسم الدلع بتاع عربيته )

فلقد حظيت بشرف مقابلتها بل والتعامل معها ... فما شاء الله هي سيارة تحس إنها مصنوعة عند فرغلي ( أشهر محل كوكتيل في مصر ) ... فلا تستطيع ان تقول عليها إنها هوندا سيفيك Pure لأن فيها من كل فيلم أغنية ..

فالشكل الخارجي هو هوندا سيفيك نقول موديل 89 مثلاً ( باكورة إنتاج مصنع الخواجة هوندا وولده سوزوكي )

والفتيس هو لسيارة هوندا اكورد موديل 93

والموتور لهوندا سيفيك موديل 93

والصالون ... مجهول المنشأ

وقالي على حاجة غريبة برضوا مجمعها مش عارف منين إسمها " طنابير " أنا أول مره أسمع المصطلح ده .. فمش عارف هل هي حاجة في الفرامل وإنت داخل على عمود الكردان ولا إيه ؟

بس أحسن حاجة فيها هي " التكييف " إوعى بقى .. بجد حاجة ولا الأسبليت .. واخده بالك يا أخت كليو .

وهي أي نعم ضيقة شويتين وكنا قاعدين في الكرسي الخلفي مقرفصين زي الكاتب الفرعوني اللي في المتحف .. لكن اهي حاجة بتقضي الغرض وتغنيك عن سؤال اللئيم .

الغريب والعجيب بقى إن إبننا إبن مصر مش من هواة السواقة وعشان كده جايب سواق ( اللهم لا حسد يابا )

- اما عن الشرايط فلقد عُدت من المشاوير اللي روحناها وتناولت على الفور شريط بنادول من كوكتيل الحاجات اللي سمعتها ( يعني قال كده عمل معايا واجب لما سمعني اللي ماسمعتوش قبل كده :unsure: ) .. إشي إف إم على شرايط أجنبي على حاجات عربي ماعرفش لمين...

مش بأقول لكم كل حاجة عنده كوكتيل .

[se_ Elsyed]

أما عن نفسي فحتى نهاية فترة الدراسة في مصر كنت أشعر بإني أمتلك جميع السيارات من جميع الماركات في مصر وذلك متمثلاً في التاكسيات بمختلف انواعها والميكروباصات ومترو الأنفاق وبالتالي لم أشعر بالملل على الإطلاق وما فيش مانع بجانب ده كله إن يكون عندي بسكلته وذلك لقضاء المشاوير القريبة .... ولم أفكر إني أستخرج رخصة قيادة مصرية لإستبعادي لفكرة السواقة في سيرك الشارع المصر ( عشان كده ندمت ودخلت مدرسة السواقة هنا إسبوعين من 7 الصبح لـ 2 الظهر لما أتشويت ... والحمد لله سقطت حوالي 5 مرات في الامتحان .. لحد ما عطوا لي الرخصة بالأقدمية حيث إني أصبحت معيد عندهم )

- لكن الحياة في الخليج تختلف حيث أن الواحد حتماً ولابد يبقى عنده عربية .. مش منظرة ولكن لو قل عقله وأستخدم التكسيات يبقى هايفلس ويرجع بلدهم ماشي ... فلكم أن تتصوروا إن بداية العداد هنا في التاكسي بالسعودية هي 5 ريالات .

- وكان أول حظي مع مرسيدس ( زلمكة ) موديل 87 .. لكن حالتها ولا الزيرو حيث أنها كانت مستودرة من اليابان عن طريق الأمارات وبصراحة كانت كل حاجة فيها لسه بكلبساتها ... وفضلت معايا سنة بالتمام والكمال وقاست معايا عدد 4 حوادث مختلفة الأسباب .. اول ثلاثة الغلط من الطرف الأخر والرابعة تابتة غلطتي وراحت في الوبا ولو فاكرين فلقد أقمت سرادق عزاء لها هنا بالمنتدى ....

- اخدت مبلغ التعويض من شركة التأمين وضربت جزء في جيبي وأشتريت بالباقي هوندا سيفيك موديل 98 بحوالي 12,500 ريال ( واخد بالك يا أبن مصر :huh: smk: pp: ) وكانت بحالة جيدة جداً جداً ولكني كنت قرفان منها وبالظبط عامل زي اللي متجوز واحده غصبٍ عنه عشان طمعان في ورثها وكل يوم يحط لها سم في المهلبية عشان تموت ولكنها مصفحة .. وقعدت معايا 12 شهر لم أصرف عليها مليم واحد غير الزيت والميه والبنزين وخلال تلك الفترة أذقتها صنوف العذاب والحق يُقال بإنها كانت أصيلة ولم تشتكي او تزعل وتروح بيت ابوها في أي مره .. الغريب بقى إنها ما تعرضتش لأي حادثة زي ما يكون الناس كانت بتقرف مني وبتبعد عن طريقي وانا ماشي ... مع إن شكلها كان حلو .. وسبق وقولت لكم عن الواد اللي كان راكب شبح وأثناء ما كنت باتحدث في الموبيل زنقت عليه من غير ماخد بالي فجه جنبي وقالي " انا ممكن أفعص لك عربيتك دلوقت ... ولكن ثمن عربيتك على بعضها مايسويش فردة كاوتش عندي .... حرق دمي 3 أيام الله يسامحه )

- وفجأة حدث ما لم يكن في الحسبان .. أخو زوجتي نزل السوق مرة يشتري عربية له واخد عربيتي يروح بها ولقيته راجع أخر النهار ومعاه زبون عايز يشتريها .. وهو شخص أردني يعمل بتجارة السيارات ويقوم بتصديرها من السعودية للأردن وكان مهبول عليها ومتمسك بها جداً لدرجة أثارت دهشتي ففي الأخر وافقت .. خاصة عندما ظهرت امامي الماكسوبيشي اللانسم ( على رأي كليو )

- إشتريت بقى متسوبيشي لانسر موديل 2001 فول أوبشن وأول ما شوفتها بجد وقعت في غرامها وحصل بيننا كونتكت واعجاب متبادل وبعد صراع مع كام شخص عايزين يشتروها فزت بها أخيراً والموضوع ده بقى له 3 شهور ومن ساعتها وهي خاربه بيتي مصاريف على الكماليات .. فبسلامتها عامله فيها عروسه جديدة ومصممه ماتدخلش على عفش قديم فروحت مركب لها تظليل ( فامية ) على كل القزاز ، وفرش مشمع في الأرضية وريموت عشان السرقة والإنذار والفتح والقفل والحركات وكشافين قدام بيبقوا تحت في الإكصدام لزوم المنظرة وعشان أزغلل عيون السائقين في السيارات المقابلة .. وروحت شاري خشب أبنوس من مصر عشان ألزقة على التابلوه والأبواب من الداخل..... كل ده عشان أحسسها إنها عروسة جديدة ولها زهوتها لعل وعسى انول الرضى والقبول.

وبجد بجد إذا الواحد حب العربية اللي معاه بيحس إنها واحد من العيلة .. وانا عن نفسي ماكنتش بأنام لما يكون في حاجة في زوبة ( المرسيدس ) وأقتطع من قوتي وقوت عيالي عشان أصلح فيها أي حاجة تظهر .. اما عزيزة ( الهوندا ) فكنت بأتلذذ من تألمها وشكواها من سوء معاملتي ( آه يا سادي :) ) ... بس تصدقوا إني لحد دلوقت ماخترتش إسم للمتسوبيشي ... إيه رأيكم في رشا ؟ أو نانسي ؟ ( بش مش عجرم ولا بعجر دي )

- أما عن الشرايط فكلها شرايط قرآن أو خُطب ... وبأستمع دايماً إلى إذاعة بانوراما إف إم الاخبارية والإم بي سي بالإضافة إلى إذاعة القرآن الكريم طبعاً .

[disappointed]

- وكان أول حظي مع مرسيدس ( زلمكة ) موديل 87 ..

وانا عن نفسي ماكنتش بأنام لما يكون في حاجة في زوبة ( المرسيدس ) وأقتطع من قوتي وقوت عيالي عشان أصلح فيها أي حاجة تظهر

قطّعت قلبى يا سى السيّد

بتحكى نفس الفيلم اللى عشته

بس أنا بقى ماكانش بيعيش ليّا مرسيدس.... أوّل واحدة كانت 200 موديل 1984 و قعدت سنه و نصف و توفّت بالسكتة القلبيّة بعد ما إتشويت صيانة كل يوم و الثانى ( إشى لىّ رادياتير يضرب , قربة زيت فرامل تفوّت , إلخ إلخ)

ثانى واحدة كانت بعديها على طول و كانت زلموكّة 230 موديل 1987 , ودى توفّت برضه بالسكتة القلبيّة بعد صراع قصير مع المرض لم يستمر أكثر من 8 شهور

وبعد المرحومتين........ بقيت أشوف مرسيدس أودّى وشّى الناحية الثانية و كأنى شفت بعبع من العذاب اللى شفته مع المرحومتين

المرسيدس ( والسيّارات الأوروبية بصفة عامّة) القديمة (موديل 1995 و إنت نازل) أكذوبة كبيرة و فخ مرعب فى الخليج لأنها لاتتحمّل درجات الحرارة العالية و ليست مصمّمة لأجواء الخليج كالسيارات اليابانية و الأمريكية

المرسيدس ما يتركبش غير جديد فى الخليج علشان يستحمل , بس مين بقى يقدر على ثمن المرسيدس الجديد؟؟ و غير كده غالبا المرسيدس القديمة هيّه اللى بتركب الواحد مش الواحد هوّه اللى بيركبها

لمّا فتحوا المنطقة الحرّة فى الأردن من 5 سنين كده و كان الأردنيين بيجيبوا العربيّات المرسيدس القديمة من ألمانيا و يقيّفوها و يولّفوا فيها حاجات (خصوصا التكييف) و يبدروها فى السوق الخليجى (خصوصا السعودية).... وفجأة .... السعودية إتملت مرسيدس قديم ( موديلات أواخر الثمانينات و أوائل التسعينيّات) و الناس إتهبلت عليها و جريت وراها و سوقها مشى.... بس خلال سنتين الهوجه بطلت , و راحت السكرة و جاءت الفكرة , و إنكشفت المرسيدس تحت شمس الخليج الحارقة , و زى ما شوارع السعودية إتملت مرسيدس قديم فجأة , إختفت هذه السيّارات برضه فجأة بعد الكل ما إكتشف إنها مقلب و إنها مشحططاه عند الميكانيكيّة الأتراك و المصريين و الفلسطينيين كل يوم و الثانى (همّه الجنسيّات دى بس اللى بيشتغلوا فى المرسيدس)

أنا عن نفسى بعد ما جبت أول مرسيدس أغلب زملائى جابوا مرسيدس برضه فى نفس السنه , و بقيت تدخل الباركينج تلاقيه كلّه مرسيديسات.... تعالى بقى النهارده شوف الباركنج بعد سنتين ثلاثه............... و لا عربيّة مرسيدس.......... و طبعا السبب هو إننا كلّنا إتشحططنا لأن المرسيدس رفعت الراية البيضاء على الإسفلت الملتهب

[drmsaber]

حد عنده فكرة عن اسعار السيارات فى مصر بعد تخفيض الجمارك الى 40 % وصلت فين ؟

كل كلام الجرايد عايم و مفيش ارقام محددة بانت (4000 الى 10000 جم تخفيض فى اسعار المجمع محلياً )

س.س ....إسأل لنا حد من اصحابك لو تكرمت

[إبن مصر]

سى السيد انت لم تنقل الموضوع كما يجب...

احممممم

امتثال موديل 88 سيفك

المحرك سيفك EX 1600 موديل 93

الفتيس 1993 نفس المحرك

الطنابير اكورد 89

الصالون يا محترم صالون بلدها قبل الحادثه بس انا الى مغير الفرش

التكييف كمان ما كانش شغال كويس بالرغم من كده..

امتثال مربيها على ايديا خصوصا بعد ما لعبت تريك تراك مع الترله ......

المهم

اول عربيه ملكى انا من مالى الخاص هى امتثال وطبعا المعادله معروفه

اشتريتها ب 38000

صرفت عليها 22000

ومش هاتجيب اكتر من 32000

زى البورصه ... والحمد لله على ما كتب

فى البيت عندنا ( والدتى ) بيجو برستيج وجراند شروكى والاتنين موديل 1999 فول اوبشن..

باعوا البيجو والشيروكى عملت حادثه وكله فى الاخر ركب امتثال..

فرانكشتين يا سى السيد

ابن مصر

ملحوظه اسو بيمشى فى الشوارع بعد الجمارك يغنى :

انا سناء اخت القمر

بين العباد حسنى اشتهر

[عصام]

ملحوظه اسو بيمشى فى الشوارع بعد الجمارك يغنى :

انا سناء اخت القمر

بين العباد حسنى اشتهر

:huh: smk:

:)

[se_ Elsyed]

حد عنده فكرة عن اسعار السيارات فى مصر بعد تخفيض الجمارك الى 40 % وصلت فين ؟

كل كلام الجرايد عايم و مفيش ارقام محددة بانت (4000 الى 10000 جم تخفيض فى اسعار المجمع محلياً )

س.س ....إسأل لنا حد من اصحابك لو تكرمت

إيه دكتور صابر إنت نسيت إن مصر هي بلدنا ... يعني مش اليابان والعياذ بالله ولا امريكا حاشا لله ..

اللي أقصده إن مش عشان الريس خفض الضرايب يبقى أصحاب المصانع والتجار الحيتان هايرجعوا لضميرهم بين يوم وليلة ويخفضوا الأسعار ... اعتقد الموضوع هاياخد وقت .. لأن الجميع إتعود إننا بلد ون واي .... يعني اللي بيطلع ما بينزلش تاني ولا بالطبل البلدي .

على العموم أنا هاسأل وبرضوا لو حد عنده معلومات يقول لنا ( في موضوع منفصل ) ولو إن في ناس معانا هاتزعل من التخفيض ده وخصوصاً اللي لسه شاريين سيارات ( سامع يا مجرمون إنت وإسو ) ... شوف يا أخي الحقد الطبقي .