سيارتك .... ماركة ايه و موديل كام ...

[Ahmed Mohsen]

أنا واقع في مشكلة عويصة يا جماعة، وعايزكم تساعدوني بجد في حلها.

لوزة جالها سكتة دماغية ومش عارف أعمل أيه.

سامعكو بتقولوا لوزة مين ... معلش نسيت أعرفكو عليها

لوزة هي عربيتي الدايو لانوس موديل 1999 الشكل القديم.

تكييف وباور بس.

اشتريتها مستعملة في أغسطس 2002 بـ 37 ألف جنيه

عملت بيها حادثة محترمة في أكتوبر 2002 (من الآخر بعد الحادثة كانت هاتش باك من قدام)

صرفت عليها 13 ألف جنيه تصليح وترويق وكل حاجة (وطبعا مرشوشة كلها برة وجوة)

استلمتها في يناير 2003

عملت بيها حادثة تانية - برضة محترمة - في مارس 2003

اتشائمت منها وقررت أبيعها ... بس قولت أصلخها علي خفيف وأبيعها.

وهي مخبوطة جابتلي 30 ألف جنيه ... قولت حرام ... أصرف عليها ألفين أو تلاتة عشان تجيبلي 40 ألف

الحمدلله .... صرفت عليها 7 ألاف جنيه وعرضتها للبيع ماجابتش أكتر من 37 ألف جنيه

(ملحوظة: أول حادثة أنا كنت موجود في كل خطوة لتصليحها وأنا اللي اشتريت قطع الغيار كلها جديدة .... تاني حادثة بقه كنت قرفت منها جدا وسبتها عند مركز صيانة بتاع واحد زميل أختي في الشغل وما سألتش فيها أبدا ... وهو اللي عرضها للبيع)

المهم، قررت إني أغامر وأركبها تاني وبلاش أبيعها

إستلمتها في شهر مايو 2003 ومن ساعتها الحمدلله إعتزلت الحوادث.

ولكن ..................

من 3 أسابيع، جابت وش سلندر (نتيجة إهمالي في المياه وعيب في الثرموستات من يوم ماجبتها ماحدش كان عارف يكتشفه) والمارش إتحرق .... صلحتها واتكلفت ألف جنيه لزوم الوش والمارش.

ولكن النتيجة إن الموتور شخصيا كان بيموت ... السخونية أثرت عليه وجابت أجله.

المهم الميكانيكي قاللي إمشي بيها شهرين تلاتة كمل علي باقي الموتور وابقي هاتلها موتور جديد (نظرا لأن مفيش فلوس - ماتنسوس إني لسة متجوز من 3 شهور)

اللي حصل بقي إيه ....

يوم الخميس اللي فات ... العربية وقفت مني فجأة وأنا ماشي وراسها وألف سيف ماهي متحركة قيد أنملة.

إيه اللي حصل يا أخواني ....

طلمبة البنزين باظت ... جبتلها طلمبة جديدة بـ 500 لحلوح

برضة مصممة .... والله مانا دايرة ولا ماشية

طلع إيه كمان .......

حاجة في الموتور إسمها "كامة" طلعت مقطومة نصين

أدور بقة ياسيادنا علي الكامة دي ...مش موجودة غير لازم مع نص موتور ... بكام بقة ... ألف ونص ....

ساعتها بقي زرجنت وقلت والله مانا لاعب

قررت إني خلاص ........ لوزة لازم ترحل ... هابيعها إلي الأبد

ومن ساعتها وانا محتاس ... خاصة مع قرار الجمارك

مش عارف هي كدة تسوي كام .... وممكن أجيب إيه بدالها؟؟؟؟

دلوني ربنا يكرمكم

(ملحوظة: أنا مصمم أبيعها وانا معرف اللي هايشتريها كل اللي فيها)

بجد أنا مستني نصايحكم لأني فعلا محتاس

[se_ Elsyed]

كان الله في عونك يا حاج احمد .. بصراحة وإنت بتحكي ظروف

لوزة الصعبة عقدتني أنا شخصياً وحسيت كأنك نازل بحر لا قادر ترجع ولا قادر تكمل ...

أنا رأيي تخلص من لوزة في أسرع وقت وتقبض القرشين وتنام شوية لحد ما الأمور تتضح في سوق السيارات وتشتري حاجة مناسبة لك .

[Ahmed Mohsen]

ماهو أنا بقي نفسي أعرف القرشين دول يطلعو كام؟

[Guest Mohd Gramoun]

على العموم أنا هاسأل وبرضوا لو حد عنده معلومات يقول لنا ( في موضوع منفصل ) ولو إن في ناس معانا هاتزعل من التخفيض ده وخصوصاً اللي لسه شاريين سيارات ( سامع يا مجرمون إنت وإسو ) ... شوف يا أخي الحقد الطبقي .

smk: عينك دي اللي هتخلينا نركب كلاركس pp: (موش كلاروس) آخر السنة.....خف شوية... :)

ما انت عارف اننا أكتر واحد بيخسر في العربيات :huh: ...في الشرا و في البيع...حتي في الاستخدام....

[kfaya]

الى الأخوة الأعزاء ... ذلك هو بيان تخفيضات جمارك السيارات كما جاء فى جريدة الأهرام بتاريخ 9 سبتمبر

سعة المحرك -------- قبل التعديل -------- بعد التعديل

لا تتجاوز 1000 سم --- 40 % ----------- 32 %

1000 - 1500 -------- 55 % ----------- 40 %

1500 - 1600 -------- 100 % --------- 40 %

أكثر ------------------ 135 % ---------- 135 %

ومنه يتضح أن اكبر تخفيض سيكون على السيارات ذات السعة من 1500 سم الى 1600 سم , و لكن غير واضح هل هل يسرى التخفيض على 1500 ام 1501 سم ... طبعا الغموض ده سمة حكوميه متأصلة ...

على العموم انا هسأل على تفاصيل أكثر و نتابع مع بعض .....

على فكرة .. هونداى عمل تخفيضات تعتبر كبيرة و منشورة فى اهرام أول أمس ..

[se_ Elsyed]

طب إزاي حكومة مصر ورئيس مصر يعملوا حاجة لوجه الله .. ده حتى تبقى عيبه والدول التانية تاكل وشهم ... فبالرغم من التخفيض الهائل اللي عملوه على جمارك السيارات إلا إن يظل هناك مانع مائي يجب أن تجتازه في حالة إذا الشيطان وزك وأشتريت سيارة من الخارج وهو " ضريبة المبيعات " التي تضاف لقيمة الجمارك فماحدش يفرح قوي ويقول هــــــــــيه الجمارك إتخفضت .. دي ناس ما بتهرجش يابا .

[drmsaber]

شكرا أخونا كفاية

فيه اخبار عن دايو ؟

و لو عندك فكرة عن اسعار بروتون (ماليزى) و رينو بعد التخفيضات اكون شاكر افضالك

[Guest Mohd Gramoun]

كرولا 2004 الشكل الجديد 107 بدلا من 141(فل اوبشن)

لانسر2004 ...105 بدلا من 126 (فل اوبشن)

أسعار الأمس

[Ahmed Mohsen]

شكرا ..... (وش واحد كان نفسه حد يساعده ومالاقاش)

[maksoof]

أول عربية إشتريتها لما كنت فى مصر جبتها من إيطاليا سنة 1970 كانت فيات 1300 موديل 1962 - إشتريتها ب 100 جنيه و بعد الشحن و الجمارك كلفتنى 625 جنيه.

تم تعديل 19 سبتمبر 2004 بواسطة maksoof

[se_ Elsyed]

كرولا 2004 الشكل الجديد 107 بدلا من 141(فل اوبشن)

يا عيني يابني ..... في واحد هايتقهر من الـ 34 ألف اللي دفعهم هباءً منثوراً ...

لكن أحب أفكره إن مصلحة الجماعة لابد ان تُقدم على مصلحة الفرد :D

لانسر2004 ...105 بدلا من 126 (فل اوبشن)

وقرأت إمبارح عرض عليها بـ 101,000 ج ... يا بلاش

[se_ Elsyed]

بالمناسبة ضريبة المبيعات على السيارات الواردة من الخارج هي 10 % ...

وبالنسبة للي موجودين في السعودية - ما اعرفش الدول الثانية أخبارها إيه - في 10 % تخفيض جمركي زيادة عن كل سنة من بعد سنة شراء السيارة إلى حد أقصى 3 سنوات ..

علشان نبسطها ... يعني إحنا دلوقت في سنة 2004 ممكن أروح أشتري عربية موديل 2004 وأقوم مسجلها في السفارة بتاعتنا وأقعد أستخدمها هنا وكل سنة تعدي أستفيد من 10 % تخفيض بس لازم أنزلها مصر تتجمرك قبل نهاية سنة 2007

[فــيــروز]

يا ترى فيه اخبار عن اسعار جولييت !! انا مش عارفه قوى هى انتاج مين دايو ولا لانوس ولا ايه عشان معلوماتى فى العربيات لديها انيميا حاده :) بس انا زهقت من التاكسيات خصوصا بعد بدء الدراسه الميمونه :) فلو سمحتو لو حد يعرف يقول عشان آخد فكره و يمكن اشترى بعد بكره :P

[Cleo]

يا ترى فيه اخبار عن اسعار جولييت !! انا مش عارفه قوى هى انتاج مين دايو ولا لانوس ولا ايه عشان معلوماتى فى العربيات لديها انيميا حاده  :)

جوليت ولانوس التنين نوع من أنواع الدايو ;)

بس أعتقد الجوليت مابقتش تنزل.... :P

أصل أنا معلوماتى عن العربيات عندها عته منغولى... :)

[فــيــروز]

جوليت ولانوس التنين نوع من أنواع الدايو ;)

يا ستى اهو كله برتقال :P

بس ايه ده ليه مابقوش يعملوها دى كانت عجبانى اوى .. :)

يا ميت خساره :) cbyb:

[Don Quixote]

كل سيارات دايو اصبحت تصنع الان باسم شيفروليه و اللانوس اصبحت افيو و الليجانزا ايبكا و مش فاكر ايه تاني، ماعتقدش انك هتلاقي الجولييت موديل السنه

[kfaya]

فيروز كتبت :

يا ترى فيه اخبار عن اسعار جولييت !! انا مش عارفه قوى هى انتاج مين دايو ولا لانوس ولا ايه عشان معلوماتى فى العربيات لديها انيميا حاده  بس انا زهقت من التاكسيات خصوصا بعد بدء الدراسه الميمونه  فلو سمحتو لو حد يعرف يقول عشان آخد فكره و يمكن اشترى بعد بكره 

مع موجة اعلانات تخفيضات السيارات بمناسبة تخفيض الجمارك و جدت السيارة الجوليت موديل 2005 اللى نفسك فيها .... سعرها بعد التخفيض أصبح 67900 جنية ( قبل التخفيض 75900 جنية ) ... و تباع لدى موزعى سيارات دايو " يوجد معرض على كورنيش المعادى , و أخر فى شارع التحرير امام المركز القومى للبحوث " ..

و مبروك مقدما ....

[kfaya]

الدكتور صابر كتب :

شكرا أخونا كفاية

فيه اخبار عن دايو ؟

و لو عندك فكرة عن اسعار بروتون (ماليزى) و رينو بعد التخفيضات اكون شاكر افضالك

أخر أسعار الدايو يا دكتور ....

لانوس اس اى .......59900 جنية بدلا من 67900 ج

لانوس اس ...... 64900 ج ... بدلا من 72500 ج

نوبيرا عادة .... 78900 ج ... بدلا من 91900 ج

نوبيرا اوتوماتيك ... 86500 ج بدلا من 99500 ج

سنواليكم بباقى التخفيضات فور معرفتها ....

كفاية ... سمسار عربيات و صاحب أجنص

[Ahmed Mohsen]

الحمد لله .... ntw:

باركوا لي يا جماعة .... أخيرا تخلصت من "لوزة" إلي الأبد :lol:

بعتها أخيرا بعد ما خسرت فيها كتيييييييييييير بس يالله الحمدلله، ربنا يعوض عليا إنشاء الله.

أنا بعتها بـ 28 ألف جنيه :lol:

تم تعديل 28 سبتمبر 2004 بواسطة Ahmed Mohsen

[kfaya]

بصراحة يا أبو حميد السعر ده يعتبر كويس جدا فى ظل الركود الهائل فى سوق العربيات ..... الأشاعات على ودنه ان فى تخفيضات تانية , لدرجة ان وزير الصناعة صرح اليوم بأن تخفيضات يوليو القادم ( 2005 ) لن يشمل السيارات و ذلك فى محاولة منه لأزالة الغموض الحكومى المعتاد و محاولة تحريك سوق السيارات ....

على مهلك بقى .... ممكن تحط قرشين على المبلغ ده و تركب حاجة كويسة .... و ياريت زيرو عشان تريح دماغك سنتين تلاته من الميكانيكية و قرفهم ....

و بلاش يا سيدى تسميها لوزة تانى ...... سميها بندقة أو جوزة ... لو يعنى بتحب أسامى المكسرات ...