سيارتك .... ماركة ايه و موديل كام ...

[أسد]

من خلال هذا الموقع يمكن التعرف على الأسعار الجديدة لكافة أنواع السيارات ...

ســـــــــيارات مصــــــر

إبحث عن نوع السيارة التي ترغب فيها

ستجد كافة التفاصيل الفنية والسعر الجديد ...

الموقع في الحقيقة جيد جداً ...

مبروك مقدماً ..

[kfaya]

عزيزى أسد ...

أشكرك على هذا الموقع المفيد و ده ممكن يخدم كمان اللى عايز يبيع عربيته القديمة ..

هجوم السيارات الصينى سوف يؤدى بالتأكيد الى أسترخاء أخر فى سوق السيارات , و الى أن تثبت تلك السيارات نفسها سوف يظل سوق السيارات فى حالة من الترقب , لكن فرق السعلر مغرى جدا ....

تيجى بقى تشاركنى على الأجنص بتاعى ؟؟؟؟ ;)

كفاية خبير و مثمن و صاحب أجنص

[فــيــروز]

فيروز كتبت :

يا ترى فيه اخبار عن اسعار جولييت !! انا مش عارفه قوى هى انتاج مين دايو ولا لانوس ولا ايه عشان معلوماتى فى العربيات لديها انيميا حاده  بس انا زهقت من التاكسيات خصوصا بعد بدء الدراسه الميمونه  فلو سمحتو لو حد يعرف يقول عشان آخد فكره و يمكن اشترى بعد بكره 

مع موجة اعلانات تخفيضات السيارات بمناسبة تخفيض الجمارك و جدت السيارة الجوليت موديل 2005 اللى نفسك فيها .... سعرها بعد التخفيض أصبح 67900 جنية ( قبل التخفيض 75900 جنية ) ... و تباع لدى موزعى سيارات دايو " يوجد معرض على كورنيش المعادى , و أخر فى شارع التحرير امام المركز القومى للبحوث " ..

و مبروك مقدما ....

شكرا جزيلا يا كفايه mfb:

بس شكلى كده هاستنى مشروع تاكسى العاصمه :blink:

[a_ragab_itp]

انا على فكرة عضو جديد بالمنتدى ده وانا مش قادر اقولكم اد ايه انا عاجبنى المنتدى بكل اعضاؤه وخاصة كليو التى بضحك من قلبى مع قراءة مشاركاتها .

وعلى فكرة انا عضو بمنتديات كثيرة اغلبها من الخليج وده لانها هى اللى بتقع فى ايدى ولكن هذا المنتدى فعلا مميز .

المهم انا موضوع العربيات ده هو هوايتى الاساسية احب دايما اعرف كل حاجه وادق التفاصيل عن السيارات حتى ان اى حد من اصحابى عايز يعمل حاجه فى العربية او عايز يسأل على حاجه ليها علاقة بالعربيات او عايز يشترى عربية بجيلى فورا

وانا لسه فى الجامعة كنت باتخانق مع والدى مووت على شان اخد عربيته وهو عمره ما رضى يديهالى وكانت بيجو 504 وكنت الصبح باغلس عليه لدرجة انه كان يصحى الصبح بدرى على شان يوصلنى الجامعة ويقطع على فرصة انى اطلب العربية وكنت انتهزها فرصة واسوق انا طبعا وانا كنت وانا صغير سواق مجنون ولكنى والحمد لله عمرى ما عملت حادثة واحدة حتى الآن وكنت طول ما احنا ماشيين رايحين الجامعة اعد ابص على اصحابى واقول يا رب القابل حد منهم لزوم الفشخرة

المهم بعد ما اتخرجت خطبت على طول زميلتى التى كانت دفعتى وكنت بموت فيها واحمد الله على اننى تزوجتها وبالرغم من عدم وجود فلوس قررت انا وخطيبتى ان نشترى سيارة حتى نذهب اى مكان احنا عاوزينه وما نعدش نحسب مصاريف التاكسيات التى تتجاوز مصاريف السيارة بمراحل وفعلا اشتريت عربية اى كلام (من وجهة نظر الناس) كانت ماركتها بولونيز وعلى عكس رأى الناس كانت عربية ممتازه كانت مستحملانى وعمرها ما عملت معايا حركات ابدا وكانت موديل 90 وسعتها اللترية 1600 ب 16000 جنية عام 1999 وكانت ممتازه بكل المقاييس كانت حمالة اسيه وكنت بعمل بيها اللى ما يتعملش كنت باسافر بيها وكنت ايام تجهيز الشقة بشيل فيها اسمنت ورمل وكل حاجة ولم ابيعها الا بعد الجواز لما زوجتى تمردت عليها وقالت عايزه عربية بتكييف

المهم بعت العربية اللى عمرها ما قلت اصلها معايا ب 14000 جنيه

ولأننى بفهم فى العربيات اعدت ادور على عربية واسال واطقس لغاية ما عرفت ان الهيونداى الاكسل عربية كويسة وفعلاً نزلت سوق السيارات 13 مرة اتفرج وافصص والف على معارض المهم اشتريت عربية هيونداى اكسل موديل 97 سعتها اللترية 1500 فول اوبشن ب 29000 جنية عام 2002 وهى سيارة كويسة جدا مريحانى جدا وعمرها ما قلت اصلها معايا ابدا بالرغم من اهمالى الشديد لها والمريح فيها هو قطع غيارها متوفرة ورخيصة جدا مقارنة بباقى السيارات التى فى فئتها

وانا احب سيارتى جدا واتمنى ان ربنا يرزقنى بفلوس على شان اجددها ولا انوى ان ابيعها بس ربنا يهدى مراتى عليها على فكرة مراتى اشترت السنه اللى فاتت عربية حلوه برضه تويوتا ايكو موديل 2000 فول اوبشن ولكن قطع غيارها ربنا ما يوريكو نار النار

على فكرة فى المرة الجايه هحكيلكوا حكايه ظريفة عن كتالوج السيارة

[فــيــروز]

مبروك عليك العربيه و ربنا يبارك لك فيها :blink:

بس سمعت ان العربيه الهيونداى الصاج بتاعها مش قوى اوى يعنى :rolleyes: فما رايك فى هذا الكلام بصفتك خبير فى السيارات :angry: "اعتبر انى باقدم لك الميكروفون من خلال ال emotion دى

[a_ragab_itp]

بصى يا فيروز هانم

اولا شكرا على الميكروفون

ثانيا بالنسبة لموضوع الصاج كل العربيات الجديدة نسبيا صاجها ضعيف سواء دايو او هيونداى او كيا او حتى تويوتا

العربيات الوحيدة اللى صاجها جامد شوية هى الاسكودا

ده طبعا بالنسبة للعربيات الخاصة بالشباب (السيارات الرخيصة نسبيا) ولكن ما بتكلمش على المرسيدس والبى ام وخلافهم من السيارات الفارهه

وانا لى رأى شخصى وهو ان الحادثة ساعة ما بتحصل الله لا يقدر اى عربية بتتبهدل بغض النظر عن الصاج فموضوع الصاج موضوع فرعى وليس اساسى فى المفاضلة بين السيارات

فشدة الحادثة تتوقف على السرعة واتجاه الخبطة ونوع السيارة اللى خبط فيها وغيره وليس على الصاج فقط

اهم شئ فى السيارة هو توافر قطع الغيار واسعارها وسهولة الصيانة هذا هو المعيار الحقيقى لجودة السيارة فى رأى

[عصام]

على سيرة الصاج ..

أحب أوضح حاجة ..

الصاج بيكون ضعيف لسببين .. هما على الترتيب

1. عامل أمان عالى جدا :rolleyes:

2. ضغط التكلفة ..

ييجى واحد يسألنى يا كابتن إسو .. إزاى يعنى أمان؟ إيه اللخبطة دى؟

أقوله .. لو شاف أى اختبار تصادم لأى سيارة من السارات الحديثة .. بالبطيء ... سيلاحظ أنه عند التصادم مع حائط مثلا .. تبدأ مقدمة السيارة فى الانضغاط والتلاشى شيئا فشيئا .. حتى تصل إلى - تقريبا - الزجاج الأمامى .. ليمتص الصاج أثناء انضغاطه كل رد الفعل الناتج عن التصادم ..

فتصل عملية التصادم غلى نهايتها بينما عملت مقدمة السيارة "المرنة" كوسادة ومنعت وصول أثر الصدمة إلى داخل السيارة ...

وما لا يعرفه البعض .. أن مقدمة السيارات الحديثة قد تم تصميمها "من الداخل" أى من حول المحرك بحيث تخدم هذا الغرض فأصبحت عوارض الشاسيه مائله قليلا لأسفل بدلا من أفقية تماما .. وهذا أيضا ليخدم نفس الغرض .. فتميل تلك العوارض لأسفل عند التصادم ساحبة معها باقى مقدمة السيارة ..

فيتحول رد فعل التصادم من أفقى كامل - وهو ما قد يؤذى النصف الأسفل للسائق - إلى أفقى مائل فتندفع عجلات السيارة الأمامية وباقى أجزاء المحرك لأسفل السيارة بدلا من داخلها ...

وبهذا تقدرى تقولى .. "العوض على الله فى العربية للأبد" ولكن السائق خرج سليم وهو المطلوب فى أوروبا والدول المتقدمة :angry:

أما عندنا فنحن لا مانع عندنا من تدمير النصف السفلى للسائق لكن لا تمس بوية السيارة ..

وعجبى ..

لأى استفسارات إتصل على زيرو عربية زيرو سبع عربيات ...

[a_ragab_itp]

على سيرة الصاج ..

أحب أوضح حاجة ..

الصاج بيكون ضعيف لسببين .. هما على الترتيب

1. عامل أمان عالى جدا

2. ضغط التكلفة ..

اوافقك الراى ولكن اضيف ان احد الاسباب هو زيادة الاستفادة من قوة الموتور اى كلما خف وزن السيارة كلما زاد ذلك من زيادة امكانياتها للتسارع

[عصام]

ما هو هذا الكلام أيضا يندرج تحت بند "ضغط التكلفة"

لأن كلما كانت السيارة خفيفة تستطيع تحقيق معدل تسارع أكبر دون الحاجة لزيادة الـــ horse power للمحرك وهو ما يزيد التكلفة ..

تحياتى

[a_ragab_itp]

ماشى يا عم esssothegreat اسفين يا سيدى ومتشكرين على التوضيح

[Cleo]

ثانيا بالنسبة لموضوع الصاج كل العربيات الجديدة نسبيا صاجها ضعيف سواء دايو او هيونداى او كيا او حتى تويوتا

والله ما تظلموا الكيا معاكو....

فعلا بنت حلال وأصيلة...

أيام أول ما كنت باتعلم السواقة عملت بيها حتة حادثة.... (فى الزمالك :blink: اللى أكبر شارع فيها اتنين متر)

كنت باعدى تقاطع وأنا لسة على 20 كم... جاى من على شمالى تاكسى لااااااااااااااااااااادا حب يعدى هو الأول وأنا لسة بقطع الشارع.... وطبعا لأنى كنت لسة جديدة فسرة استجابتى للتعامل مع العربية بتكون بطيئة... فاكنت النتيجة إنه...

طيرنى....!!!!

ولولا إنها كانت بنت حلال وتصون العشرة كان زمانى دلوقتى :blink: بجد...

ربنا يكفينا جميعا جميعا شر الطريق..

[عصام]

ثانيا بالنسبة لموضوع الصاج كل العربيات الجديدة نسبيا صاجها ضعيف سواء دايو او هيونداى او كيا او حتى تويوتا

والله ما تظلموا الكيا معاكو....

فعلا بنت حلال وأصيلة...

أيام أول ما كنت باتعلم السواقة عملت بيها حتة حادثة.... (فى الزمالك :blink: اللى أكبر شارع فيها اتنين متر)

كنت باعدى تقاطع وأنا لسة على 20 كم... جاى من على شمالى تاكسى لااااااااااااااااااااادا حب يعدى هو الأول وأنا لسة بقطع الشارع.... وطبعا لأنى كنت لسة جديدة فسرة استجابتى للتعامل مع العربية بتكون بطيئة... فاكنت النتيجة إنه...

طيرنى....!!!!

ولولا إنها كانت بنت حلال وتصون العشرة كان زمانى دلوقتى بجد...

ربنا يكفينا جميعا جميعا شر الطريق..

طبعا ومن غير ما اعرف ..

أنا مغمض عينيا أهوه ..

كليو معاها .. كيا .............................. برايد

صح؟ :blink:

mfb:

أصل دى أقوى عربية (من حيث الصاج) عملتها كيا

[Cleo]

أصل دى أقوى عربية (من حيث الصاج) عملتها كيا

عشان كدة بطلوا ينتجوها؟؟ :blink:

[a_ragab_itp]

البرايد يا كليو عربية كويسة وهى تعتبر استثناء فى موضوع الصاج أما باقى الكيا فهو بصاج ضعيف

وموتور الكيا أيضاً كويس

لكن العفشة وحشة

والدريكسيون بتاعها تقيل موووووت عامل زى العربية النقل

قطع غيارها ليست رخيصة أيضا

وأوعى تركبيلها تكييف لأنه هيهلك الموتور ويسخنه وهتبقى مركباه ومتضايقة لما تشغليه وبالتالى لن تستمتعى بالفلوس اللى دفعتيها

[kfaya]

ألف راجب كتب :

البرايد يا كليو عربية كويسة وهى تعتبر استثناء فى موضوع الصاج أما باقى الكيا فهو بصاج ضعيف

وموتور الكيا أيضاً كويس

لكن العفشة وحشة

والدريكسيون بتاعها تقيل موووووت عامل زى العربية النقل

قطع غيارها ليست رخيصة أيضا

وأوعى تركبيلها تكييف لأنه هيهلك الموتور ويسخنه وهتبقى مركباه ومتضايقة لما تشغليه وبالتالى لن تستمتعى بالفلوس اللى دفعتيها 

ماشاء الله ....

نصائح من خبراء ..... و كمان مجانية ....

متهيألى الأخوة هنا ممكن يعطوا نصائح مفيدة جدا لكل زميل مقدم على شراء أو يريد السؤال عن أحوال سيارته ....

و كما شارك معنا الأستاذ ماجد فى موضوع تجديد وديكورات شقتك بأراء مفيدة جدا ....

هذا الموضوع يؤكد حاجتنا لباب " خدمات للأعضاء "

[د/ألفا]

السلام عليكم

مرحبا بيك أستاذ رجب بيننا

الحقيقة انا ركبت كتير من الماركات

القديم والحديث

ركبت الشاهين 97 أول ما ركبت

وهى عربية فى نظري ملائمة للبيئة المصرية والمواطن المصرى متوسط الدخل لأن قطع غيارها مش غالية والعربية حمارة شغل فى نظري ,

وبعدين بعتها واشتريت تويوتا 91 مواصفات خليجى

ودي عربية جميلة بس مشكلتها إنها 1300 سي سي ,

وركبت بعدها الكيا سيفيا موديل 99 أوتوماتيك ودي من احلى العربيات اللى انا ركبتها واستمتعت بيها وللأسف نادم على بيعها

مع إني راكب أختها الآن السبكترا 2004 بس مش داخلة دماغي مع أنها كاملة فوووول أوبشن أوتوماتيك ,

عموما انا أحترم العربية الكيا عربية عالية مفيش مشكلة مع المطبات ولا الوزن التقيل , مفيش مشكلة مع التكييف لانها 1600 سي سي , أوتوامتيك .. مفيش مشكلة مع المرور والزحمة , بالإضافة للميزات أخري ,

وركبت أيضا الأوبل فيكترا 95 اوتوماتيك وكانت عربية سحبها رائع جدا جدا وقوية جدا جدا من أقوي العربيات من حيث البودى الخارجى فى نظري ,

[بنت شعنونة]

سويفت كحلي موديل 94 باين!!

اول ما قالوا يا سوزوكي في البلد كنت انا اشتريتها

بدون تكييف بدون مرايات بدون سنتر

دريكسيون بس ;)

قبلها كان فيه 128 لبني عاشت معايا سنة وشوية قبل ما اغير

سقت عربيات كتييييييييييييييييييييييييير

دايو لانوس

اوبل كورسا

كيا

دول سقتهم كتير

اللي سقتهم طياري بقى

سكودا فليشيا

مرسيدس " بتاعت جارنا اللي تحت وماعرفش السايس يركنها ف ادهاني اركنهاله! :P "

جيب فرونتيرا.... هييييييييييييه ايااااااااااام

ميتسوبيشي لانسسسسسسر..........بعشقهااااااااااااا تحفة فعلا انيقة موووووووت

مرة سقت السوبر جيت طول شارع واحد " كانت طقة حلوة اوي"

السويفت بنت ناس اوووووي

انما خفييييييييفة البودي بتاعها هوا

اي خبطة صغيرة تلات ارباع العربية يضيع

لدرجة خايفة حد يركن عليها تطبق! :D

عملت معايا فصوووووووول وكلها اتجمعت قبل الخطوبة بيوم او يومين

سبحان الله فعلا

وكل ما خطيبي يبقى معايا فيها لالالالالالالالالازم تعمل فصل!!!

مافيش عمار ما بينهم rs:

احلى حاجا في ال 128 اني كنت بغلس بقلب على اي حد يسخف عليا

عارفا ان ديتها ميت جنيه واصلح العربية كلها

فكنت بخبط في الناس بضمير

دلوقتي مش عااااااااااااارفاااااااااااااااا :rolleyes:

الشرايط

كللللللل حاجا واي حاجا

من شعبولة ل ايهاب توفيق لعمرو خالد لقران ل فرانك سيناترا لموسيقى فيروز لموسيقى كلاسيك لاوبرا ل فرقة ايرا ل فرقة ويست و بويزون واكتر حاجا تلاقوها عنددي كوكتيلالالالالالالالالات بالهبل فيها كل واي اغنية جدييييييييدة خصوصا حبيب قلبي جاد شويري

علاقتي بالعربية

ياااااااااااااااه

صاحبتي الأنتيييييييييييييم جدا جدا جدا

لو زعلانة اطير بيها

متنرفزة ادووووووووووس بنزين

فرحانا حركات بقى وكلاكسات

شقية ..حركات ومعاكسات وشد مع البشر

بعمل فيها فصوووووووول وحشة

بس طول عمرها اصيلة و بتحافظ عليا

عملت بيها 3 حوادث بشعين

اللي يشوفها يقول لازم اكون ميتة

لكن الحمدلله عدت

هدفي

الجيب4X4

ها امووووووووووووت عليها

لو جبتها وسقتها خلالالالالالالالالالالاص

ابقى حققت هدفي من الحياة واقدر اموت ضميري مستريح

ياااااااااااه

تركب فووووووووق كدا وتدوس على العربيات

ياعييييييييييييينيييييييييي

والا صوتها وهيا بتعمل

فففففففوووووووووووووم ففففووووووومم

:D

تم تعديل 14 أكتوبر 2004 بواسطة بنت شعنونة

[هشام عبد الوهاب]

الشرايط

كللللللل حاجا واي حاجا

من شعبولة ل ايهاب توفيق لعمرو خالد لقران ل فرانك سيناترا لموسيقى فيروز لموسيقى كلاسيك لاوبرا ل فرقة ايرا ل فرقة ويست و بويزون واكتر حاجا تلاقوها عنددي كوكتيلالالالالالالالالات بالهبل فيها كل واي اغنية جدييييييييدة خصوصا حبيب قلبي جاد شويري

دول عاوزين نص نقل لوحدهم :rolleyes:

لاوبرا

خير اللهم اجعله خير .... :P

[se_ Elsyed]

ميتسوبيشي لانسسسسسسر..........بعشقهااااااااااااا تحفة فعلا انيقة موووووووت

إلهي يجبر بخاطرك ويطعمك ما يحرمك يا شعنونة يا رافعه معنوياتي ....

وسمعني يا عم قصيدة شعبولا اللي بتقول " شباب كثير راكبة اللانسر .. بتسوق بسرعة وتتمنظر "

إتمعينوا في المعاني والإستعارات والإسقاطات ... هو ده الشعر الجاهلي ولا بلاش .

[kfaya]

بنت شعنونة : كتبت

مرة سقت السوبر جيت طول شارع واحد " كانت طقة حلوة اوي"

كان فاضى ولا بالركاب !!!!!!!! ....... :P