المنتدى بقى دمٌه تقيل

[التونسى]

مش حانكابر ولا حانقول ....احمد بيه هو المسئول .

اصل الناس وقعت ف الحيرة ....حتى الخبطة بقت من الجيرة .

صنف البن نقص من السوق .....وعندك شاى حبيب مغشوش .

لسا محدش شاف اصلاح...... نفد الصبر وقلنا ده راح.

تضحك كيف والبال مش رايق ......داحنا قلوبنا على لسان دالق.

حلو كلام طالع من الجوف ...... قاله انسان عدا من الخوف .

بكرة تلاقى سكة براح.......ومداخلات كلها افراح.

صباحك نور وبدايته عظيمة ......مصر خلاص مفيهاش تقسيمة .

كله حايدخل ف الخلاط.......تطلع حاجة بلا احباط .

صباح النور والأمل......وهيا بنا الى العمل :clappingrose:

متتصوريش فرحتى بمداخلة حضرتك دى قد ايه ..اختى الفاضله مدام سلوى .. يعنى ماشاء الله تفاعلك.. بتلك الابيات الزجليه الخاصه بكى و المقتبسه اعلاه ... مع ما نظمت ..كان سريع ..ومتميز .. وفى وقت قياسى بعد حوالى 20 دقيقه من نشر الزجل الخاص بيا .. وده شئ فاجئنى مفاجأه سعيده

ويارب بكره نلاقى جميعا ..سكه براح .. ومداخلات كلها افراح.. وكله يدخل فى الخلاط .. وتطلع حاجه بلا إحباط

[زهرة الجبل]

أضحك الله سنك يا أخ تونسي و الله

ماشاء الله عليك بجد تسلم إيدك

أم كريم

[Diab]

لما كلكوا شعرا أمال مين اللي هينضرب

www.youtube.com/watch?v=FHI62GbJ6VA

حد اول حرف من اسمه دياب

يبقي جنيت علي نفسك

فوق الجبل ليلة تمام البدر

لما تلاق الدم مغرق الأنياب

هتعرف مين هو دياب

تم تعديل 11 مايو 2011 بواسطة Diab

[أمل حياتي]

زجل جميل استاذي التونسي

وفعلا المنتدى بقي كئيب كله سياسه

وناس كتير على وشك انها تهجره

لكن انا مش منهم ولله الحمد

المهم المصريين ما يبقوش زي اللبنانيين

على طول بيتكلموا في السياسه

تحية تقدير لكتاباتك الجميله

[التونسى]

أنا من محبى أشعار بيرم التونسى و بالذات القصيدة دى bv:-

أحسبها مجاملة رقيقه .. أغبط نفسى عليها .. فما أنا الا مُريد.. لشيخ الزجالين المصريين بيرم .. وتلميذ صغير.. ما زال يتلمس خطاه الشعريه ببطء وأناة ..

شكرا أخى الكريم طارق .. على تواجدك الجميل بالموضوع ومرحبا بك فى محاورات المصريين

تم تعديل 11 مايو 2011 بواسطة التونسى

[التونسى]

هما كل التوانسة كدة شعراء

:clappingrose:

هو مقدرش بصراحه أخلع لقب الشعر ..بشكل مطلق ..على القصيده دى ..كمضمون .. لانها اقرب للزجل منها الى الشعر .. أو الطقطوقه ((زى ما قال سمبا)) اللى بتعالج أمور عدة ... اجتماعيه وسياسيه واقتصاديه وثقافيه الخ الخ .. وطبعا بتاخد شكل الشعر ..من حيث القافيه والبحر والسجع ..

أشكرك أخى العزيز دياب .. على تواجدك .. و ورودك .. وحمدا لله ان لاقت زجليتى تلك قبولك

تم تعديل 11 مايو 2011 بواسطة التونسى

[التونسى]

طب تصدق بايه يا استاذي يا حبيب الكل

انا لسه داخلة و هقول صباح الفل

و هقول يا جدعان انا قلبي من الاكتئاب مل

الاقيك حطتها كده و لا اجدع لعيب حريف

يقول الحقيقة في الوش كده من غير تزييف

احنا بجد قلوبنا بقت محتاجة تنضيف

عايزين نعيشها بقي...ده البني ادم ماشي فيها خفيف خفيف

توهت في زحمة.....التعريف

انا بني ادم...متغرب عن روحه...و بنتحت في الملكوت مش لاقيلي تعريف

و محاول الاقي روحي......هنا....من غير تزييف

هعافر

و هتعافر معانا

ما هي الحياة كده مش هتيجي غير لما ناخد السعادة تخطيف

صباحك استاذي....نسمة سعادة....تخليك تقول....يا لطيف ...يا لطيف :)

أدى لمـــاضه .. زى العــــاده

شَدَّا لِجامها ..وراكبه حصان

وبسحر كــلامها .. بتخــطفنا

وتفســــحنا .. فى كــل مكــان

وتاخــدنا... لعـــوالـــم تـــانيه

وتعـزف..بالأفـــكار ..ألحـــان

وتشــــرقــنا . .. وتغــــربـــنا

وتحـــرك ..فينا .. الوجـــدان

وأخيرا.. يا لماضه.. صباحك

بــاقة ورد .... وفـــل كــمــان

تم تعديل 11 مايو 2011 بواسطة التونسى

[أبو محمد]

تك تك تك .. تك تك تك

سيوف الشك فقلبى تشُك

وانا غرقان فى بحور الشك

لقيت التونسى ماسكلى مفك

تك تك تك .. تك تك تك

ياما كلام اتقال محفوظ

والمسمار داخل قلاووظ

جوه دماغ فاضى ومحظوظ

مايشيلهوش ولا ألف مفك

تك تك تك .. تك تك تك

خللى بالك يا تونسى .. أنا كاتب الزجل ده باللون اللى باكتب بيه مداخلاتى الإدارية ..

لملم مفكاتك والعدة كلها .. ما تتعبش نفسك يابنى .. الكل دلوقت بيتكلم فى السياسة .. على "الإمة" .. على الناصية .. فى الراديو .. فى القنوات الرياضية .. فى برامج التوك توك شو ..

مستكترها على المحاورات ليه بس ؟..

نفسى حد يتكلم فى الاقتصاد اللى رايح فى داهية

ملحوظة : هذه مداخلة أدبية لا علاقة لها بفريق الاشراف والتنسيق :P

[م تيمور المراغي]

نفسى حد يتكلم فى الاقتصاد اللى رايح فى داهية

مين عاوز يتكلم في الاقتصاد !

عندي الحل ;)

[التونسى]

خلاص ياعم من غير زق

واحدة واحدة كده بالراحة

دا عتاب بسيط من غير بجاحة

اهلى واهلك قالوها صراحة

المريض عشان يشفى ويتعافى

لازم ولابد نعمل له جراحة

وابدا مافى دوا من غير نواحة

لكن لو صحيح زهقان م السياسة

اجرى روح عل الاستراحة

وابقى ادعيلى فى خمسة سياحة

على قولـِك ...الواحــد فــرفــر

والاعصاب .. تلزمها الراحــه

الترويــح .. يشفـى الأمــراض

لا تقــوللى برشام...وجــراحـه

ونا قررت .. أطنش خــــالـص

ولاحقرا ولا شوف..بصــراحه

اى حاجات.. تقلب لى مـزاجى

وتعيــشنى ف جــو ..مـنـاحــه

يعــنى بفــكــر .. إنى أســافــر

راس البر.. وغرضى سياحــه

[التونسى]

حابب اقول من غير تهليل

ان جيت للحق دمه تقيل

تدخل وانت مبسوط ومهيص

تخرج منه شايل حمل تقيل

بس انت يابن الايه عنتيل

معجون عفاريت من ايُة جيل

لكن مصرى ايوه ومصرى اصيل

بس شويه يعنى شويه بخيل

واوعك تزعل منى ده تبجيل

يابو الطيبه ياشخص نبيل

انا ادامك حد بجد نحيل

اكتب واشجينا من غير تأجيل

وحنسعد برده بكل قليل

واكشف كل ضئيل وعليل وعويل

اكتب تانى علشان الكل وعلشانى

واوعك تبقى علينا بخيل وانانى

يامصرى أصيل يأبن النيل ياجميل

مدح .. ياريت أستاهـل رُبــعُه

من إنـسان ..طيـب ..وأصــيل

دايمــا كده .. بالذوق.. سَبـَّاق

ميرســى جدا ...طائر اللــــيل

أزجــالــك... بتفيض .. بمحبه

وحضورك ..راقـــى ..وجمـيل

يسعـــد أيــــامك .. يالغـــالــى

بحب .. وفرح ..وعمر طويل

تم تعديل 12 مايو 2011 بواسطة التونسى

[Alattar]

ما شاء الله الواحد كل يوم بيكتشف مواهب جديدة عند الأعضاء هنا..

الاعضاء كلهم بقوا شعراء.واضح ان اللي احنا فيه ده بيطلع المواهب الدفينة اللي جوانا فعلا

ولا الغريب اللي بيشرب..قصدي بيشوف كورة عشان ينسي

يعني شعر ..و إدمان كمان..

ربنا يستر علي الناس اللي هنا

و تحية كبيرة للأستاذ التونسي مفجر ثورة التغيير في المنتدي

تم تعديل 12 مايو 2011 بواسطة Alattar

[عبير يونس]

جرى ايه؟ في ايه يا محمود

ما كفاية بقى سياسة وعود

للشعر والزجل يا عصفور

سيبك م الحمائم والصقور

ده انت يا عم في ويك ايند

اعمل لك بقى قفلة و ايند

يللا قوام بينا ع الأشعار

سيبك بقى من ضرب النار

اللي علينا و اهو عملناه

سيبها بقى يا عم على الله