هل دفعت الحكومة تكلفة الدفاع عن قتلة المتظاهرين ؟

[se_ Elsyed]

وبالمرة عاوزين نعرف اهم نقطة ..

هو لوالمجرم طلع مدان .. يبقى فلوس الاتعاب تبقى منه فيه .. يعني يقتلنا وندافع عنه على حسابنا ؟

[شرف الدين]

عظيم ... إذن فقد أصبح الخلاف الآن في الجهة التي تتولى دفع الأتعاب ...

يا ليت أحد القانونيين يخبرنا ... ما الموقف القانوني في هذا الأمر ؟

للعلم ... دخل العيسوي الآن هو الآخر قفص الاتهام الذي دخله قبله عصام شرف .. والبقية تأتي ..

وطالما الإخوة زعلانين من الشرطة قوي كده ... طب ما الشرطة ريحتهم من نفسها اهو .. وسابت الدنيا وطفشت .. عايزين منها ايه تاني؟

[abdulmuttaleb]

النقطة التالتة لو جاسوس عميل خائن قانونا لازم حد يتعين له ولو مفيش المحكمة بتنتدب حد للدفاع، فيا ريت الله يرضى عليكم ناخد الأمور بالراحة وبشيء من العقل والتروي.

النقطة الرابعة فكرة دفع الفلوس للدفاع عنه، أنا مش شايف مشكلة في ده واحد من ضباط الداخلية والداخلية بتبعت محامي يدافع عنه ايه المشكلة؟! وللا هو مش عارف مين وأبصر ايه تبقى حقوق الإنسان بتدافع عنه بالدولار واليورو وضابط الشرطة اللي "متهم" لا يجد من يدافع عنه؟

عزيزي ... المحكمة تعين له محامي أبو بلاش ماشي ... مش عاجبه وعايز يدفع من جيبه ويوكل محامي كويس هو حر ... جمعية حقوق الانسان ولا جمعية تموين عايزه تدفع بالدولار ولا بالروبيه ماشي برضه طالما من حرّ مالها

انما ندفع مئات الألوف من فلوس الشعب للدفاع عن متهم بقتل مواطنين لأ وألف لأ

يا سيدي شركة أو مؤسسة من ضمن مزايا موظفيها تخصيص محامين للدفاع عنهم،

وبعدين حضرتك متخيل الأثر الإيجابي لتعيين الداخلية محامين عن ضباطها، إن الضابط يشتغل من غير قلق من ضعف قدرته المالية على توكيل محامي في مثل هذه الحالات،

فأنا مش شايف الموضوع من زاوية إن مش عارف مئات الآلاف وفلوس الشعب والكلام ده، لأن الدفاع عن الضابط ده بيعطي ضمانة لكل الطاقم الشرطي وبالتالي ده جزء من الأمان المعنوي لكافة الضباط، وده ردي على رأي أ.سي السيد وأ.إبراهيم عبدالعزيز أنه طيب لو طلع مدان الفلوس دي تتصرف ازاي.

مرة أخرى: حق الضابط ضمن الداخلية هو تخصيص محامي للدفاع عنه، يطلع بريء يطلع متهم، دي مهمة القضاء، وإلا هاتوا لي حد بيعين محامي وبيكون ضامن البراءة مثلا مش معقول طبعا محدش بيقول كده.

أنا والله لا أدافع عن مدير بني سويف ده ولا اعرف اسمه حتى، بس الإعلام فعلا وجه الناس بدري بدري إن الضباط دول كلهم مجرمين وحوش وقتلة، وفي الآخر كلنا الآن ندفع الثمن.

وبعدين بصراحة ربنا يكون في عون الداخلية، إذا واحد متعلم ومثقف زي أ.سي السيد واللي يقرأ كلامه وانفعاله يقول إنه بينه وبين وزير الداخلية طار بايت وهو رجل على الأقل معظم معلوماته من وسائل الإعلام زينا، وشوفوا قد ايه هو مشحون ضد الوزارة وضد الضباط، وده وهو مغترب، لكم يا حضرات السيدات والسادة أن تتخيلوا ما عليه المواطنون العاديون داخل مصر، وخصوصا من كان لهم أحد الشهداء أو الضحايا.

يعني مش عايز أفتح مواضيع ممكن تكون بايتة، لكن لحد دلوقتي محدش بيجاوب على سؤال: هو ليه متظاهرين التحرير يوم28يناير اتجهوا نحو وزارة الداخلية (بالمناسبة معظم قتلى ميدان التحرير بالرصاص كانوا جوار مبنى وزارة الداخلية الرئيسي)؟ وهل كنا احنا كمصريين عايزين الشرطة تخليهم بيس يا مان اتفضلوا يخشوا على الوزارة؟! عارفين تأثير ده على البلد شكله يبقى ايه؟!

أنا كان لي قريب شاب في الجامعة ونزل التحرير يوم الجمعة، لما قعدت أسمع منه بعمق كده، الشاب يا عيني كان على نياته كأن رايح يعني فسحة مثلا أو يعني مجرد تظاهر، يا إخوانا محدش ينسى أن فيه ناس كانوا بيلعبوا بمشاعر البسطاء والمواطنين، والموضوع لا مبارك ولا يحزنون، ولو تشوفوا الإلحاح على فكرة مجلس رئاسي قد ايه، ومن ناس معملوش تجمع كده نادي إلا واختلفوا مع بعضهم وكفروا أيمان بعض، واللي ناسي أفكره أن يوم الجمعة البرادعي الأخبار عنه في العربية شريط الأخبار كده بالبنط الكبير إن البرادعي يقول إنه في انتظار تحرك من الجيش.

أنا لا أشكك في نوايا أو وطنية أحد، لكن حين يكون حسنو النوايا كثيرين وكل له رؤية فالنتيجة هي ما نحن فيه الآن.

ربنا يكون في عون المجلس الأعلى والشعب المصري.

تم تعديل 11 مايو 2011 بواسطة abdulmuttaleb