نفض السجادة

[لماضة مصرية جدا]

السلام عليكم و رحمة الله و بركاته

النهاردة الصبح كنت بقرا مقالة لللي مجنني عمر طاهر

بيقولك

نفض السجادة

هو حقيقي بيعرض وجهة نظر خاصة بالثورة

بس الحقيقة انا عجبتني طريقة التفكير

تفتكروا ممكن الواحد يمسك دماغه كده و يقف في البلكونة و ينفضها و يرزع بعزم ما فيه و يفضي كل العنكوبتات اللي معششة جواها

ع فكرة بكلم نفسي...مش اي حد تاني

و عشان كده

شعار المرحلة

نفض السجادة

و ده المقال

السجادة الغالية تستحق منك أن تخرج بها فى البلكونة لتعدمها العافية حتى تخلصها من كل ما عشش فيها من أتربة وحشرات، سجادة الثورة بحاجة إلى هذه التنفيضة الجماعية ليس لأنها أغلى ما نمتلك فى بيتنا ولكن لأننا لا نمتلك غيرها أصلا.

انفُض الـ١٠٠ يوم الماضية جيدا واستعد لياقتك الذهنية من جديد، غيّر الاستراتيجية التى تحكم بها على الأمور والأشخاص، تحرر من الأحكام النهائية التى قد تندم عليها مستقبلا، استقبل من الجميع أفكارهم مهما كانت درجة إيمانك بهم ثم ضع ثقتك فى نفسك، وأعد تقييم هذه الأفكار، فارفض واقبل، لا تأخذ المسائل كومبو،

نحن فى فترة فتنة ولا يوجد أى مبرر لأن يكون تقييمك نهائيا، لا ترتح لأحد بشكل يجعلك أسير معتقداته ولا تعادِ شخصا ربما تجد فيما يقوله فكرة هى الحق بعينه،

لا يوجد دليل واحد على أن شباب الثورة الذين تراهم على الفضائيات هم شباب الثورة فعلا،

ولا يوجد دليل على أن السلفيين الذين تراهم فى مقاطع الفيديو هم السلفيون فعلا،

ولا يوجد دليل على أن دعاة الليبرالية ليبراليون فعلا،

ولا يوجد دليل على أن الذين يغذونك بالأفكار من أمام الكاميرات يؤمنون بها فعلا ولا يقولون لك كلاما لاستدرار إعجابك.

تخلص من أحكامك سابقة التجهيز،

لا دليل على أن الدكتور عصام شرف هو أفضل من يقود البلد فى هذه الأيام،

ولا دليل على أن وزير الداخلية الحالى هو الرجل المناسب فى الوقت المناسب،

ولا دليل على أن من نصبوا المكلمة فى كل مكان هم حماة الثورة،

ولا دليل على أن الشرطة ستعود للعمل بقوة،

ولا دليل على أن القائمين على البلد يمتلكون بدائل لهذا المأزق، ولا دليل على أن زيارة أفريقيا والخليج أهم من زيارة مصر نفسها حاليا «بيت بيت» و«زنقة زنقة»،

ولا دليل على أن ما حدث فى إمبابة مؤامرة (كلمنى عن مؤامرة بدأت قبل الثورة بخمسة أشهر وكانت تتنبأ بالثورة والانفلات الأمنى وتضعهما فى حساباتها حتى تصنع من الأمر كله موقعة إمبابة)، صدق أن رجلاً خسيساً محسوباً على الإسلام كذباً راود امرأة عن نفسها وأوقعها فى الفخ ففرت من زوجها وتزوجته عرفيا (أين الدين فى الموضوع؟)،

صدق أن هذه الواقعة التى انطلقت من أعماق الصعيد فى أسيوط لو كان طرفاها الاثنان مسلمين لذبحهما الأهالى ودفنوهما دون تصريح، لا تعط مخك لأى داعية، لا تجعل مخك نسخة من طبق الجنازة الذى يمد الجميع أياديهم فيه، تسأل عن الطبيب ألف مرة قبل أن تذهب إليه ليعالجك، فلماذا لا تسأل قبل أن تعرف حقيقة الشخص الذى تذهب إليه ليعلمك؟!

صدق فطرتك

وتعلم من قصة سكان الجزيرة المجهولة الذين زارهم يوما رجال دين كانوا على سفر فى البحر، سألوا سكان الجزيرة كيف تصلون؟

فقالوا نقف ونقول: يا الله نحن هنا، وأنت دائما حولنا فلتكن كذلك أبدا..

ضحك رجال الدين وعلموهم صلاة صحيحة، وبعد شهور بينما رجال الدين على مركبهم فى طريق العودة مروا بالجزيرة فلمحوا أحد الرجال يلوح لهم فلوحوا، فأتأهم الرجل سائرا على الماء حتى وصل إلى السفينة، اندهشوا من هذه المعجزة وسألوه «ما الذى حدث» فقال لهم «لقد نسينا الصلاة التى علمتها لنا وعدنا لصلاتنا» فابتسم رجل الدين له قائلا «لا يهم.. حافظ على صلاتك التى تعرفها.. إن كل الصلوات صالحة».

السؤال بقي

لو اي حد بيعمل "نفض السجادة"

ممكن تقولولولي بتعملوها ازاي؟؟؟ ايه التوكنيك يعني؟؟؟

هل تبطل تسمع اخبار

و لا تسمع و متعلقشي

و لا تسمع و تعلق و تدعي الحكمة

و لا لا تسمع و لا تشوف و لا تشم و تقفل حواسك الخمسة؟؟

و لا بتعملوا ايه بالظبط

اللي عنده وصفة مجربة....يديهالي

بس فعلا

نويت

انفض السجادة

صبااااااحكم...بدون اي غبار يؤذي الروح

صباااااحكم...شباك مفتوح و سجادة بتتنفض و دماغ بترجع تتبني تاني باذن الله

فوتكم بعافية

[ذهبية]

يااااة يا لماضة على مووضعاتك الجميلة

المقالة اكتر من رائعة

بجد فاض الكيل و امتلىء الكاس لما وصل للنهاية

و عايزين ننفض نفسنا و دماغنا ةو حياتنا من اللى شوفنها الفترة اللى فاتت

بعدما كنا بنسمع اخبار واحد بس طول النهار النشرة مش جايبة ان سيرة انجازاتة

و حسينا باملل و التجمد و الموت بالبطىء واذا فجاة تنفجر ماسورة اخبار و احاديث عن اشخاص لم اراهم فى حياتى

كل واحد براى و كلمة و اقناع

و كل واحد بيعلب فى دماغ التانى و الكل عمال يسمع يسمع يسمع لما ودنا اتملت كلام مبقاش فية قدرة على استعاب مين الصح و مين الغلط

ازاى ننفض حياتنا وودنا و نفسنا

فترة استراحةةةةةةةةةةة

ايوة اجازةةةةة

اجازة من كل حاجة

اروح فى اى حتة جديدة عليا اشوف ناس ما شوفتهم من زمان

ااقلع لبسى القديم و ادور على لبس جديد

اعمل اى حاجة وحشتنى من زمان

ااقضى يومين فى اى حتة قدام بحر و شمس و هوااا

ولازم لما اقرر انفذ و اتوكل على الله مش اكسل زى العادة و تجرى الايام وافضل زى ما انا

[ابراهيم عبد العزيز]

السلام عليكم ورحمة الله اخت لماضة ,

عنوان موضوعك نفض السجادة

مممممممممممممممممممم فى الحقيقة أعجبتنى جدا فكرة الموضوع واعجبنى اكثر الاستعارة المكنية التى استخدمها الكاتب فى تشبيه الفكرة التى يدعو لها وهى التخلص من الافكار المسبقة عن الاشخاص بعملية نفض السجادة !!؟ فى الحقيقة تصوير روعة لان الواحد عندما ينفض السجادة فهو يتخلص من أسواء ما فيها من غبار ومتعلقات او بقايا طعام مثلا , لتعود لها نظافتها من جديد .

فى رأى ان تحقيق ( عملية نفض السجادة ) فى مرحلتنا الحالية ليست صعبة , حيث جاء فى رأسى حديث لرسول الله صلى الله عليه وسلم من الممكن ان يكون هو ألألية التى ننفض بها السجادة , يقول رسول الله صلى الله عليه وسلم :

( لا يكونن أحدكم إمعة , يقول أحسن الناس فأحسنت , أساسء الناس فاسأت , بل أحسن اذا أحسن الناس , واذا أساؤا فإجتنب ) صدق رسول الله صلى الله عليه وسلم

اذن الحل أن لا نكون امعة ( نسير مع الرايقة )

تقبلى مرورى

[ابراهيم عبد العزيز]

اه صحيح نسيت أن أقول لكى اخت لماضة كنت اود ان اعطيكى علامة استحسان على الموضوع ولكن لم أستطع , يجوز نفذ المتاح

عموما تتعوض , ومدين لكى بواحدة ان شاء الله عندما يكون متاح ذلك هههههههه

شكرا

[Dreamwithme]

بصي يا بنتي يا لماضة أنا اتعلمت موضوع تنفيض السجادة ده بالطريقة الصعبة

يعني أتنفضت أنا شخصيا الأول :closedeyes:

بمعني إني كنت بألاقي نفسي في موقف مش عارفة أخد فيه رأي وكل الأراء الجاهزة والمعروضة قدامي مش مرتاحة ليها

أو في بعض مواقف ألاقي نفسي في صدمة مع حد كنت وخداه مثل أعلي وواخداه كله علي بعضه زي ما عمر طاهر بيقول كومبو

لكن ألاقي في موقف معين رأيه غريب عني ومش مريحني فكنت بأضطر أنفض السجادة ....هي عملية مش سهلة بس النتيجة مذهلة وبتشعري إنك بقيتي إنسانة أنضج وأحسن

طبعا ككل الأمور المتعلقة بالعقل والذهن مش عارفة أشرح لك خطوات محددة لكن هأقولك علي أهم النقط

كنت بأخد نفسي علي جنب عشان أتكلم معايا بعيد عن الدوشة بس بدون انقطاع عن الأخبار لأن وارد جدا ربنا يبعت لك كلمة أو خبر تساعدك علي تنفيض السجادة بشكل أفضل

كنت بأكثر من صلاة الاستخارة ودعاء "اللهم أرنا الحق حقا وارزقنا اتباعه وأرنا الباطل باطلا وارزقنا اجتنابه"

نقطة مهمة جدا وصعبة جدا مش عارفة هأعرف أعبر عنها بكلام صح ولا لأ إنك تفكي الأراء عن أصحابها يعني ما تأخديش في بالك إن الرأي ده اللي قاله فلان اللي أنتي بتحبيه

تبعدي الأراء عن الأشخاص وما تأخديش شخص بأرائه كلها علي بعضها باكدج لأ تفككي الأمور

وبعدين يا ستي نقطة تانية صعبة إنك تخرجي من جواكي وتطلعي فوق فوق فوق بعيد عن المكان والزمان وتحاولي تتفرجي علي الأحداث بدون وجهة نظر معينة

تتفرجي علي الدنيا من بره وأنتي شايفة لماضة ومالكيش علاقة بيها ....هي خطوة صعبة ومحتاجة حالة تأمل وهدوء عالية جدا بس ممكنة وليست مستحيلة

وبعدين نقطة أخري إنك لو في موقف معين مسبب لك حيرة حطي نفسك مكان جميع الأطراف ليس بالعقل ولكن بالعاطفة

يعني بعد ما تخرجي من نفسك فوق فوق ترجعي تدخلي مكان الطرف الفلاني وتحسي هو حاسس يأيه ....ركزي علي المشاعر مش علي المنطق والعقل وهكذا مع كل طرف

صدقيني عملية ممتعة جدا وبعدها بتشعري براحة

أتمني أكون أفدتك وأتمني محدش يقول عليا مجنونة

[لماضة مصرية جدا]

السلام عليكم و رحمة الله و بركاته

شكرا اوي لكل اللي جه النواحيدي و قرا و شارك و شمر دراعاته و ساعدنا في "تنفيض السجادة"

شكرا استاذتي ذهبية..دريمي..و استاذي ابراهيم...0و مستنية النوقطة بقي..ماليش دعوة...وش اي علي صغير شبطان في حاجة :)

انا حبيت ارفع التوبيك

لان اكتر كلمة عجبتني اوي فيه

كلمة

صدق فطرتك

صدق صوت جواك بفضل الله هيقدر يوجهك فين الصح و فين الغلط

فين التراب اللي لازم يتنفض و فين السجادة اللي لازم نحافظ عليها

برفع التوبيك عشان ده الويك اند

فرصة ناخد شهيق عميق.....للحياة....و ناخد كمان زفير قوي....لكل الهوا اللي دخل جوانا غصب عننا بس للاسف كان ملوث بكل "عوادم" الخير و الجمال

افتحوا شبابيك حياتكم....للجمال حواليكم

لعبادة صامتة...زي التأمل

لعبادة منسية زي صلة الرحم.....او اقتربوا من ناس بتحبوا تتواجدوا معاهم...مجرد عبورهم في حياتنا كان نعمة

عيشوا الحياة...و عيشوا النهاردة كأنه احلي يوم و اخر يوم...و هيكون باذن الله يوم مميز جدا

فقط

صدقوا فطرتكم

صباحكم...مساكم......عشق.....للحياة...بتفاصيلها النقية اوي اللي بتصحي فينا فطرتنا اوي

تم تعديل 12 مايو 2011 بواسطة لماضة مصرية جدا