الوجه المظلم والقبيح للثورة والثوار

[ozoozo]

إتقوا الله شويه ده أنتوا شككتوني في الإسلام وفي المسلمين وكرهتوا الدنيا كلها فينا

انا شوفت الفيديو يا أخ طارق

بقى زعلان على شوية عربيات وجايب .. الياي العيال الثورجية وهما بيكسروها ؟

ومش زعلان على 800 شهيد

مش زعلان على شهادة ناس اجانب وهم وفد طبيي جاي من النمسا يعالج مصابي الثورة اللي لسه متلقحين في المستشفيات بين الحياة والموت وصرحوا أمبارح إنهم لم يتوقعوا ان تكون الاصابات بالبشاعة دي ووعدوا إنهم هايرجعوا تاني بوفد أكبر الشهر القادم

كل ده لم يهز فيكم شعره ؟

مش دي السيارات اللي دهست إخواتك .. قصدي دهست الثوار .. أسف على كلمة إخواتك لو هاتجرح شعورك

مش هي دي السيارات اللي دهست الناس وهما بيصلوا على كوبري قصر النيل وكأنهم كفره ولا يعرفوا ربنا ولا يعرفوا حُرمه للصلاة ..؟

ما شوفتش الفيديوهات اللي ختلت العالم كله يحرتم ثورتنا وينحني لنا تقديراً ؟

إنتوا بتعملوا كده ليه وعاوزين إيه سواء كنتوا سلفيين ولا جايين من المريخ ؟

إنتوا بتنتعشوا وبتبقوا في أشد حالات الفرح لما تشوفوا منظر الدم ؟

رأيك إيه يا أخ طارق فيما قاله المجاهد المنفعل أبو أنس رضوا الله عليه ؟

هؤلاء لا يحتسبوا من الشهداء

حيث انهم خرجوا عن طاعه ولي الامر وامام جماعه المسلمين امير المؤمنين سيدنا حسني بن مبارك

وعليه فما فعلوه فهو معصيه وقد ماتوا علي معصيه فلا يجوز احتسابهم من الشهداء :closedeyes:

[tarek hassan]

هناك من يتبع أسلوبا موضوعيا في الرد أحترمه وأقدره

وهناك من يتبع أسلوب ريان يا فجل والردود البزرميط التي لا تحمل فكرا ولا أسلوبا

ولكني خلصت إلى نتيجة مهمة

هي أن هناك بعض الناس لا يريدون سيادة القانون وإن تغنوا بها على غيرهم ليل نهار وصباح مساء

وهناك من يؤيد البلطجة والغوغائية وأخذ الحق باليد مع إنهم يدعون دائما دائما أنهم مع سلطان الدولة وسيادة القانون

هناك من يؤمن أنه ينبغي أخذ العاطل بالباطل والمحسن بالمسيء دون تفريق

هناك من يتعامل مع الأحداث بمبدأ الحب والكره لا العدل والإنصاف

هناك من يعتبر كل الشرطة مباح قتلهم لأن بعضهم أخطأ ويعتبر أن عليه هو لا الدولة محاسبته

هناك من يحب سماع الكذب وقوله وقول الزور وشهادته مع أن ذلك عند الله عظيم

وعلى فكره أنا لا أختار موضوعاتي اعتباطا وأكثر ما أكتبه لا يفهم منذ الوهلة الأولى ويا ريت المداخلة دي تتفهم كويس

علشان يعرفوا أنا عملت فيهم إيه ؟ بس للأسف محدش بيتعلم

والحمد لله أنا كنت مع الثورة الشريفة السلمية وارجعوا لمداخلاتي ولكني لست مع الغوغائيين والعملاء المخربين وبطلوا مزايدات ياللي في بالي

تم تعديل 11 مايو 2011 بواسطة tarek hassan

[aimen]

اتمنى ان اشاهد موضوع باسم

الوجه المظلم والقبيح للأخوان المسلمين والسلفين

[tarek hassan]

اتمنى ان اشاهد موضوع باسم

الوجه المظلم والقبيح للأخوان المسلمين والسلفين

المفروض تطلع أنت بالموضوع الفذ ده

لأن دي شهادة لا تكتمها لأنه من أظلم ممن كتم شهادة عنده من الله ( ولا تكتموا الشهادة ) صدقني عايزك تطلع بالموضوع ده ولا خايف يطلع الموضوع إفك وبهتان وحرام فعلشان كده مش عايز تطلع بيه

تم تعديل 11 مايو 2011 بواسطة tarek hassan

[aimen]

اتمنى ان اشاهد موضوع باسم

الوجه المظلم والقبيح للأخوان المسلمين والسلفين

المفروض تطلع أنت بالموضوع الفذ ده

لأن دي شهادة لا تكتمها لأنه من أظلم ممن كتم شهادة عنده من الله ( ولا تكتموا الشهادة ) صدقني عايزك تطلع بالموضوع ده ولا خايف يطلع الموضوع إفك وبهتان وحرام فعلشان كده مش عايز تطلع بيه

يا حبيبى انا مبطلعش مواضيع وبصراحة انا لا احب الجدال

ولا عندى وقت فاضى اصلا للجدال والنقار

بس اتخنقت من الكل

بصراحة المنتدى بقى حاجه تخنق

والله العظيم بتصرفاتكم و افكاركم

واعتقادكم انكم احسن من الناس كلها

بتخسروا كثير

المعظم بتكلم كانه هو محرك الأمور وهو الصح والكل غلط

ناس كثير لا يهمها الإخوان ولا يهمها السلفيين ولا غيره

يهمها مصر

لكن حضراتكم عمالين تقطعوا فى بعض

على ايه

انا مش فاهم

تحياتى

وربنا ينصر مصر

ويحفظنا من كل الشرور

[tarek hassan]

اتمنى ان اشاهد موضوع باسم

الوجه المظلم والقبيح للأخوان المسلمين والسلفين

المفروض تطلع أنت بالموضوع الفذ ده

لأن دي شهادة لا تكتمها لأنه من أظلم ممن كتم شهادة عنده من الله ( ولا تكتموا الشهادة ) صدقني عايزك تطلع بالموضوع ده ولا خايف يطلع الموضوع إفك وبهتان وحرام فعلشان كده مش عايز تطلع بيه

يا حبيبى انا مبطلعش مواضيع وبصراحة انا لا احب الجدال

يا راجل دا أنت لسه طالع بموضوع لسه من شوية واسمه ( مصدر عسكري: انتخابات البرلمان بـ«القائمة والفردي» ولا تصويت في الخارج لمنع شراء الأصوات )

يا راجل حقق أمنيتك وأطلع بالموضوع أوعى تنام قبل ما تطلع بيه ولا تؤجل موضوع اليوم إلى الغد وزي ما قلتلك دي شهادة هتتحاسب عليها يوم القيامة لا تكتمها ولا تزورها علشان كتم الشهادة حرام وكمان تزويرها

تم تعديل 11 مايو 2011 بواسطة tarek hassan

[أبو محمد]

حتى وإن أدت إلى تغيير نظام الحكم البغيض عندنا في مصر فهي حالة فريدة لم ولن تتكرر كثيرا

والشواهد كثيرة على ذلك

خطأ

[أبو محمد]

اتمنى ان اشاهد موضوع باسم

الوجه المظلم والقبيح للأخوان المسلمين والسلفين

المواضيع كتير .. بس ناقص اللى يقرا

بكلتا العينين

[yasser moustafa]

الأخوان اجدع ناس

السلفيين ما فيش زيهم

طيب فين المشكلة؟

المشكلة اننا بنبحث على اللى يفرقنا اكتر من بحثنا على اللى يجمعنا

كلنا عايزين مصر آمنة وقوية اقتصادياً وفيها حكومة بتحترم الشعب وتعمل على مصالحه

يا ريت نتفق على كده ونحاول نوصله

[جسار]

شاهدت الفيديو ولم أرى به شيئا تخجل منه النفس و لاعارا يجب محوه أو الاعتذار عنه

ناس متظاهرين عزل من السلاح خرجوا فى مظاهرات سلمية يطالبون بالحرية والعدل ومحاربة الفساد

وكان فى الطليعة شباب العلمانيين والديمقراطيين وشرائح كثيرة من الشعب المصرى الذى آمن بتلك

الثورة وتلاحم معها وتحمل هؤلاء الشباب الذين تهاجمهم الآن عبء الايام الاولى الصعبة والقاسية والدامية

بينما تخلف الآخرون فى انتظار النتائج بمنتهى الانتهازية السياسية ، وكان طبيعيا ان ترد السلطة الغاشمة

بعنف بل وعنف مفرط ، ان ترى جارك فى المظاهرة يخر صريعا بطلقة من قناص أو رجل مسن يختنق من الغاز

أو طفلة تفقأ عيناها من خرطوش المطاطى ، ماذا تتوقع هل يقف المتظاهرون أمام هذا القتل العمد مكتوفى

الأيدى أو أن يدافعون عن حياتهم وسلاحهم الوحيد المتوفر هو طوب الشوارع

أن لم تعجبكم سلوكيات الشعب الغوغائية وتصرفات الرعاع من المصريين فنحن نعتذر لكم جميعا لانه ليس متوافرا

عندنا سوى هذا النوع من الشعوب و اعتقد انه أفضل بكثير من مظاهرات السلفيين فى مدينة الزرقا فى الاردن

وهم يحملون السيوف والسكاكين التى طعنوا بها جنود قوات الامن هناك ومن اول مظاهرة وبالطبع تم القبض عليهم

وحكم على الكثيرون منهم بالسجن ولكن بعد ان نجحوا فى مخططهم بأطفاء ثورة الشعب الاردنى السلمية التواقة

للحرية والعدالة .

[محمد عبدالعزيز]

هو أنا لو جبت نفس الفيديو ده هو هو, وكتبت عليه شوفوا المقاومة الإسلامية فى فلسطين, ولا بلاش المقاومة الإسلامية خليها المقاومة بس, وهى بتقاوم الاحتلال الإسرائيلى بكل قوته وعتاده والمقاومة سلاحها الوحيد هو الحجارة.

ياترى ممكن أعرف تعليق الأستاذ طارق عليه يكون إيه؟

[Ahmed Anwer]

الأهرام علي نفس المنوال

http://gate.ahram.org.eg/Malafat/101/870/%D9%85%D9%81%D8%A7%D8%AC%D8%A3%D8%A9-%D8%B9%D9%85%D9%84%D8%A7%D8%A1-%D8%A7%D9%85%D8%B1%D9%8A%D9%83%D8%A7-%D9%87%D9%85-%D9%85%D9%86-%D9%82%D8%A7%D8%AF%D9%88%D8%A7--%D8%A7%D9%84%D8%A7%D9%86%D8%AA%D9%81%D8%A7.aspx

و للأسف ،، أقروا التعليقات

[التونسى]

شعورى الانسانى ((ويمكن العاطفى الاندفاعى)) لأول وهله أثناء مشاهدة الفيديو .. ان سائقى العربات التى ترجم بالحجاره .. وكذلك الضباط والعساكر الذى يتم ضربهم .. صعبوا عليا جدا ..وتألمت لهم بالفعل.. لانى حطيت نفسى مكانهم ..وكان شعور مرعب انك تكون معرض للموت ضربا وركلا ورجما ..

لكن بعد شويه فكرت بعقلى .. واستنتجت ان المشهد الدامى ده هو (((رد فعل))) لغضب مكتوم ..ومراجل كانت فى صدور الشعب تغلى .. ولسوء تقدير سياسى .. لم يقدر حجم الثوره .. او يتعامل معها بالهدوء والامتصاص .. بل تعامل معها بعنف مفرط ..أدى الى ردة فعل عمياء .. تبغى الانتقام .. والقتل ..والحرق والتدمير ..

يا صديقى طارق بك .. حينما يغيب العدل ..لفترة طويله.. وبشكل اساسى ومجحف .. ويحل محله.. الظلم ((اللى له ناسه ))..يهتز عرش المُلك .. فيصبح فريسه سهلة القنص .. لكل من كانت لديه اراده ..وبمشيئة الرحمن ..

ومع ذلك فهؤلاء الثوار.. هم ضحيه .. فلا تلوم الضحيه.. بقدر ما تلوم من أوصلهم لتلك الحالة.. التى تستنكرها ..ويستنكرها معك كثيرون((وليس كل من يستنكر فعلة هؤلاء الثوار .. هم فلول... او معادىن للثورة على فكره.. وللانصاف))

وبعدين حسيت لبرهه ان فيه تلميح ان الثوار دول ماجورين او تبع اى حركه ..وتم تدريبهم فى الخارج على كده . انا أؤكد لو كان 99 % من الثوار دول ..لو جتلهم الفرصه انهم يسافروا اميركا او اى دوله .. مكنوش رجعوا مصر تانى من أصله . ولا تقولى تدريب ولا ثوره ولا اى شئ

استاذ طارق .. بديل الثورة ..كان عبودية على المدى القريب .. 10% تستعبد 90% .. فهل ترضى بذلك .. لنفسك.. ولغيرك .. اقول قولى هذا ..واحسب انك مع الثورة قلبا وقالبا .. ولكن يبدوا انك تنظر للثورة بمثاليه زائده ... هذه هى الثوره ..وهذه هى طبيعتها.. جمد قلبك يا صاح ..هى موته والا اكتر

وكما قلت فى إحدى أشعارى حول الثوره

الثوره نور.. الثوره دم .. الثوره نار

الثوره نور.. الثوره دم .. الثوره نار

الثوره نور.. الثوره دم .. الثوره نار

تم تعديل 12 مايو 2011 بواسطة التونسى

[tarek hassan]

هو أنا لو جبت نفس الفيديو ده هو هو, وكتبت عليه شوفوا المقاومة الإسلامية فى فلسطين, ولا بلاش المقاومة الإسلامية خليها المقاومة بس, وهى بتقاوم الاحتلال الإسرائيلى بكل قوته وعتاده والمقاومة سلاحها الوحيد هو الحجارة.

ياترى ممكن أعرف تعليق الأستاذ طارق عليه يكون إيه؟

طبعا مثالك مبني على خطأ ظاهر بين

هو اعتبار الشرطة عامة يهود واعتبار كل الثوار مقاومين للاحتلال وعليه يمكنك أن تبيح ما يحدث من اعتداء

أقول مرة أخرى

أنا مع الثورة السلمية التي كانت

وأنا لست مع من قاموا بقتل ضباط أو أفراد للشرطة دونما محاكمات وهؤلاء عندي بلطجية وغوغائيين يستحقون المحاكمة

أنا مع سلطان الدولة ولست مع الغوغائية

وهذه شهادتي لله أنني رجل اشتركت في الثورة أبرأ من هذه الأفعال التي صاحبتها من البعض والبعض فقط أقول

وبعد ذلك كل إنسان حر في شهادته على ذلك

تم تعديل 12 مايو 2011 بواسطة tarek hassan

[ozoozo]

الأهرام علي نفس المنوال

http://gate.ahram.or...9%81%D8%A7.aspx

و للأسف ،، أقروا التعليقات

قول كده والنيعمه امريكا هي اللي ساعدت الثوار

طيب شكرا يامريكا انك خلصتينا من الظلم والعار وجميلك فوق الرؤس محفوظ

هاه حد تاني

اه وائل غنيم ماسوني

شكرا للماسونيه اذا كانت هي اللي جابت الحريه

اللي في الميدان كانوا ايرانيين

شكرا ايران

كانوا سويسريين (الملحم عمرو مصطفي قال كده)

شكرا سويسرا

شكرا حماس

شكرا كنتاكي

واخيرا احب اشكر الراجل اللي كان بيبيع الاجندات في ميدان التحرير

شكرا لكل من ساعد المصريين علي التحرر

اه قولولي ياشباب

مين كان بيسافر كل سنه امريكا يتمسح علي الباب يطلب ومعونه

مين كان بيجي اخر النهار في جيبه العموله

هل امريكا حلال عليهم ولما تيجي عندنا منها تحرمونا

وعجبي

تم تعديل 12 مايو 2011 بواسطة ozoozo

[محمد عبدالعزيز]

هو أنا لو جبت نفس الفيديو ده هو هو, وكتبت عليه شوفوا المقاومة الإسلامية فى فلسطين, ولا بلاش المقاومة الإسلامية خليها المقاومة بس, وهى بتقاوم الاحتلال الإسرائيلى بكل قوته وعتاده والمقاومة سلاحها الوحيد هو الحجارة.

ياترى ممكن أعرف تعليق الأستاذ طارق عليه يكون إيه؟

طبعا مثالك مبني على خطأ ظاهر بين

هو اعتبار الشرطة عامة يهود واعتبار كل الثوار مقاومين للاحتلال وعليه يمكنك أن تبيح ما يحدث من اعتداء

أقول مرة أخرى

أنا مع الثورة السلمية التي كانت

وأنا لست مع من قاموا بقتل ضباط أو أفراد للشرطة دونما محاكمات وهؤلاء عندي بلطجية وغوغائيين يستحقون المحاكمة

أنا مع سلطان الدولة ولست مع الغوغائية

وهذه شهادتي لله أنني رجل اشتركت في الثورة أبرأ من هذه الأفعال التي صاحبتها من البعض والبعض فقط أقول

وبعد ذلك كل إنسان حر في شهادته على ذلك

كنت متأكد إنك حتجاوب الإجابة دى, ولكن أؤكد لك إن الخطأ فى تفكيرك مش فى المثال, لأن المفروض الحكم يكون على المسمى مش على الأسماء, ولذلك أحب أسألك, إيه اللى الاحتلال ممكن يعمله ولم تفعله الشرطة فى اليوم ده ومن قبله؟

قتل حصل, سحل حصل, اعتقال حصل, إلقاء قنابل وضرب بالعصى حصل, رش بالماء حصل, مش فاهم يعنى إيه الفرق فى اللحظة دى بين الاحتلال وبين الشرطة؟!!!

ومش عارف بصراحة شرعية إيه وقانون إيه اللى حضرتك بتتكلم عنه أثناء الثورة, هو حد قال لا سمح الله إن الثورة أساساً عمل قانونى أو مشروع من النظام الحاكم؟

يعنى لو لا قدر الله كانت الثورة فشلت كان حيبقى عادى كده وحضرتك اشتركت فى الثورة ماحدش حيعمل لك حاجة ولا يحاسبك؟

وليه فى حاجة اسمها شرعية ثورية تسقط الشرعية التى ثارت عليها؟

وبعدين فين القتل اللى بتتكلم عنه فى الفيديو؟ ياريت تشاور لنا كده على لقطة معينة واحد من المتظاهرين قتل ضابط أو فرد شرطة. ولا هو حضرتك مش لاقى حاجة تقولها فبتألف أى كلام وخلاص؟

نفسى أعرف الثورة اللى اشتركت فيها ولم يحدث فيها مثلما حدث فى الفيديو كانت فين وامتى؟

ونفسى أعرف برضه لو كان حصل هجوم عليك من الشرطة أثناء اشتراكك فى الثورة كان رد فعلك حيبقى إيه عشان تبقى ثورة قانونية شرعية وليست غوغائية؟

نفسى أعرف برضه رأى حضرتك إيه فى اللى حصل من المتظاهرين فى موقعة الجمل؟ هل مقاومتهم كانت عمل مشروع ولا كانت غوغائية؟

ومش عارف لحد امتى حفكرك بمقولتك المشهورة لما بتقول: الغرض مرض.

ربنا يشفى.

[tarek hassan]

ومش عارف لحد امتى حفكرك بمقولتك المشهورة لما بتقول: الغرض مرض.

ربنا يشفى.

لما تفتكر أنت إن الاستفتاء خلص والناس قالت نعم خلاص أنظر لتوقيعك

[محمد عبدالعزيز]

ومش عارف لحد امتى حفكرك بمقولتك المشهورة لما بتقول: الغرض مرض.

ربنا يشفى.

لما تفتكر أنت إن الاستفتاء خلص والناس قالت نعم خلاص أنظر لتوقيعك

أنا أعتبر ده انسحاب من المناقشة لأنك بدأت تتكلم خارج الموضوع, ومفيش ولا إجابة على أسئلتى اللى فى صلب الموضوع.

وبالنسبة لتوقيعى, فده توقيعى أنا ورأيى أنا وأنا حر فيه, أنا ياسيدى بحب أعيش فى الماضى.

تم تعديل 12 مايو 2011 بواسطة محمد عبدالعزيز

[tarek hassan]

أنا عندي نقاط محددة في هذا الفيديو وأتمنى على العقلاء الذين أحترم رأيهم أن يجيبوني عليها

- إذا كانت أمريكا تدرب بعض الشباب في مصر على عمل الثورات فهل أنتم موافقون على ذلك ؟ وأن كان هذا خير كبير فلماذا لا تنال أمريكا حظها منه وتدرب شبابها أو شباب الدول المجاورة أو الأوربية

- هل أنتم مع مضمون هذا الفيديو أم أنتم منه براء أمام الله ؟

- هل أنتم موافقون على أخذ الحق باليد أو تريدون القانون ؟

- هل أنتم موافقون على العنف في مواجهة العنف ؟

- هل أنتم فعلا مع سيادة الدولة وسيادة القانون ؟

- هل أنتم مع قتل المجندين من أفراد الأمن المركزي أو الشرطة ؟

- هل أنتم مع قتل الضباط وسلخ معانوا الشرطة في الشوارع من قبل البلطجية ؟

- هل أنتم مع بقاء مصر تعاني من الفراغ الأمني ؟

- هل أنتم مع مبدأ الاحتكام للشارع وفرض أمر واقع في كل صغيرة وكبيرة ؟

وما سر المباديء التي يرفع بها البعض صوته في موطن ثم يتناساها في موطن آخر أليس هذا تناقض ظاهر بين واصح مكشوف ؟

رجاء التوضيح لأن أحدا لم ينكر ما حدث في هذا الفيديو وهذا أمر خطير مفزع

تم تعديل 12 مايو 2011 بواسطة tarek hassan

[محمد عبدالعزيز]

أول مرة أعرف إن حدف الطوب محتاج كورس فى أمريكا.

على كده بقى العيال اللى عندنا فى الشارع أبطال أوليمبياد فى حدف الطوب.

ومش عارف برضه إذا كان أطفال الحجارة فى فلسطين كان لهم فرصة وتدربوا فى أمريكا ولا دى موهبة عندهم مولودين بها!!!