مد العمل بقانون الطوارئ

[Alattar]

بعيدا عن مبدأ تخوين المجلس العسكري..وبعيدا عن كل ما يثار بأن هناك أيادي خفية تعبث بالوطن

بفرض..أن المجلس العسكري وطني 100%..وبفرض أن ما يحدث الآن من أحداث فوضوية هي نتاج فوضي و عدم الاحساس بالمسئولية من قبل البعض

فلا بد من إيجاد حل استثنائي نظرا للظروف الاستثنائية التي تمر بها البلاد الآن

أنا لا أقر قانون الطوارئ..و لكن لا بد من حل للفوضي الحاصلة في البلد الآن

هذا الكلام السابق كله يأتي بفرض أن المجلس كما قلت وطني 100%..و أنا ما يحدث هو عفو الخاطر من الشعب نفسه..

وان كنت أثق في أن الشعب نفسه لا يفعل هذا كله من تلقاء نفسه..

[شرف الدين]

من المصرى اليوم على توتر :

"المجلس العسكرى" يمد العمل ب "الطوارئ" حتى الإنتهاء من الإنتخابات البرلمانية و الرئاسية http://ow.ly/4TfYo

ده كان شيء متوقع استاذ عادل

وبصراحة وبعد كل اللي شفناه ... احنا شعب ما يتحكمش إلا بالطواريء

السلام عليكم و رحمة الله و بركاته

هو انت راي حضرتك كده؟؟؟

احنا شعب ميتحكمشي غير بالطريقة ديت!!

طب مش هقول لحضرتك ان الشعب هو مين لانه المفروض انه حضرتك و انا اخويا و الناس العادية اللي ماشية في الشارع

مش هقول لحضرتك ان اصلا الثورة لما قامت كانت بسبب قانون الطواريء اللي اخد العاطل و الباطل في سكته و كانت هي هي نفس الحجة...عشان الارهاب يا جماعة و عشان الشعب ميتحكمشي غير بالحديد و النار

مش هقول لحضرتك....اشمعني بنجري اوي علي قانون الطواريء اللي هيقش شوية ناس و بنحط راسنا في الرمل و مبنحاولشي نجيب اساس المشكلة من الجدر

لكن اللي هقدر اقوله لحضرتك

انا واحدة من الشعب اللي حضرتك قولت عليه فوق دوت

و مرضاش اتحكم بالطواريء

تحياتي استاذي

وتحياتي أنا أيضا

أنا لا أدافع عن الطواريء أو قانون الطواريء

لكن قوليلي كده لو سمحتي

احنا من ساعة مبارك ما مشي ... واظن اهه مفيش قانون طواريء ... صح

ايه اللي حصل ..

هل احنا قدرنا نشوف ايه المطلوب مننا عشان نبني بلدنا ... ولا فضلنا رافعين يافطة ثورة ثورة.

انا بسألك حضرتك سؤال دلوقت ...

ايه اللي احنا عملناه من ساعة مبارك ما مشي لحد دلوقت ... ايجابي وفي صالح اقتصاد البلد ... اللي هو كان السبب الرئيسي في خروج الناس للثورة ...

يمكن حضرتك لو كنتي في مصر كنتي خرجتي في الثورة عشان قانون الطواريء ... لكن اعرفي حضرتك كويس ان الملايين اللي خرجت في مصر خرجت كلها عشان الفساد اللي دمر اقتصاد البلد وحول حياة الناس لجحيم ...

3 شهور بدون طواريء ...

عدي حضرتك كام مظاهرة واعتصام واضرابات عن العمل ... اتسببوا في خساير 7 مليار جنيه حسب تصريحات وزير المالية

كام حادثة فتنة هنا وهناك ... عمرنا ما سمعنا عنهم من زمان قوي ... يعني هو كان كتيرها انه يحصل خناقة ... واحد يتجرح ... أو يحصل حادث فردي في اتجاه واحد زي حادث القديسين .. لكن حوادث في اتجاهين ومعارك بالرصاص بين الطرفين زي ما شفنا في منشية ناصر وامبابة ...

حضرتك شايفة انك مترضيش انك تقبلي قانون الطواريء .. وده صحيح لما تكوني عايشة بره مصر في الأمان .. لكن لما تبقي في مستشفى والبلطجية يدخلوا يكسروا المستشفى ويضربوا نار جواها وممكن يجيلك سكتة قلبية من الرعب .. هتقولي يا أهلا بالطواريء ... لو كنتي ماشية في الشارع ساعة ضرب النار بتاع امبابة وجت لك رصاصة من هنا ولا هنا .. هتقولي يا أهلا بالطواريء ...

استاذتي الفاضلة ... علينا أن نعترف أن مجتمعنا ليس هو مجتمع الواعين المثقفين الذين كانوا ينظفون ميدان التحرير ... ( بالمناسبة اين ذهبت حملات تنظيف الشوارع ؟ ذهبت مع الريح لصالح مليونيات التحرير ).

مجتمعنا فيه فئات كثيرة جدا .. زي الفئة اللي ضربت الدكتور البرادعي بالطوب وكانت هتموته وهو راح الاستفتاء .. من غير ما تراعي إنه راجل محترم وعلى الأقل كبير في السن ...

في فئات كتير جدا ... زي الفئة اللي اقتحمت مستشفى المطرية ونزلوا ضرب نار جوه المستشفى عشان ياخدوا بتارهم من واحد بلطجي زيهم .. وقتلوه جوه المستشفى.

في فئات كتير جدا زي الفئات اللي ليل نهار نازلة هجوم على الاقسام عشان تخرج المجرمين ..

عارفة حضرتك .. مش جميع المتهمين اللي في أحداث إمبابة اتحولوا لمحكمة عسكرية .. طب مهو ده قانون طواريء .. ليه مسمعناش حد اعترض وقال لأ .. دول مينفعش يروحوا لمحاكم عسكرية عشان ده ضد القانون الطبيعي.

استاذتي الفاضلة ...

" ... عندما تتعرض سلامة البلاد للخطر، ينبغي أن تتخذ كافة الإجراءات التي من شأنها المحافظة على كيان البلاد واستقرارها دون نظر أو اعتبار إذا كانت هذه الإجراءات عادلة أم جائرة..."

لما نلاقي ناس واعيين .. عارفين ايه سبل الاعتراض على القرارات وعارفين أنه في إجراءات قانونية نقدر نعملها لو اعترضنا على قرار معين ... زي قرار محافظ قنا مثلا ... بدل ما يروحوا يقطعوا شريط السكة الحديد 13 يوم كاملة .. من غير ما حد يفكر في الخساير الهايلة اللي هيتسبب فيها حاجة زي كده .. يبقى ساعتها وبكل نهتف جميعا ..

لا للطواريء.

[se_ Elsyed]

حالة الطواريء تعني الأستنفار والحيطة والحذر من أي خطر يهدد البلد

قانون الطواريء كلنا عارفينه إنه سيء السمعة

وفي إختلاف بين الاتنين كبير جداً

ما حدش واخد باله من حاجه ؟

إحنا كمان شهرين داخلين على مدبحة ...

وهاتشوفوا كلامي ده بالحرف الواحد

المدبحة هي إنتخابات مجلس الشعب اللي الكل طمعان دلوقت وعاوز يثبت نفسه على الارض .. ولو ما كانش في حالة طواريء .. وأمن 100 % .. وقوانين مُنظمة مُلزمة للجميع ... هاتحصل مدابححححححححح بكل معنى الكلمة

[Abu Reem]

طبعا انتخابات مجلس الشعب القادمة هي فرصة ذهبية للمخربين ولاعداء الثورة من الخارج ومن الداخل ايضا لاشعال فتن اكبر من الفتن الطائفية ودق الاسافين بين المرشحين

وسنرى تبادل الاتهامات وقد تحدث امور تخريبية في البلد وخاصة الامور التي يتم اتهام فئات معينة معروفة فيها كالعادة

- المهم اللي عاوز اقوله ان مفيش مشكلة الان من مد حالة الطوارئ او قانون الطوارئ حتي انتهاء الانتخابات

بس اللي يهمنا كلنا ان اذا تم حدوث اي اعمال عنف او تخريب او فتن تضررت منها البلاد

رغم وجود هذا القانون فيبقي مفيش غير استقالة الداخلية بكل قيادتها الكبيرة ومدراء الامن

والا يبقى ايه معنى وجود هذا القانون وبرده المصائب لا تنتهي وستكون الداخلية هي المتهم الاول في كل ما حدث وكل ما يحدث

تم تعديل 12 مايو 2011 بواسطة Abu Reem

[ذهبية]

للاسف احنا الى بنعمل فى نفسنا كل الى احنا فية من الاول لحد الاخر

احنا اللى سيبنا مبارك يبيع و يشترى فينا و يسرق و ملقاش حد يقولة انت بتعمل اية

احنا اللى بنقطع فى بعض فى الفتن و مدين عقولنا و تفكيرنا لغيرنا يتحكموا فينا و فى تصرفتنا

لما الجيش يشوف البلد بتتقطع فى ايد ناس ليها غرض ناس ملهاش غرض بس دمغاها مقفولة و مش بتفكر و لا تعقل الامور

الجيش المفروض يعمل اية

انا موافقة جدااا على التصرف دة

عشلان اى حد نفسة فيها حاجة او شوية رجال اعمال او اصحاب اغراض خبيثة تعرف انها ممكن تتشد فى اى لحظة يبقوا يفكرو ا الف مرة قبل اى حريقة او نار تترمى فى القش و تولع الدنيا

عشلان الحرامية و البلطجية اللى ماشية تسرق و تنهب ومخلية سمعة مصر زى الزفت يلموا نفسهم

وهارجع اقول احنا برضة الى عملنا فى نفسنا كدة مش الجيش

لو البلد كانت استقرت و كلنا كنا فكرنا فى بكرة

لو كلنا كنا عرفنا اننا داخلين على كارثة و اقتصادنا بينهار و ايدنا كانت واحدة

مكنش الجيش اضطر انة يلم البقية الباقية من مصر

[abdulmuttaleb]

ده كان اول مطلب من مطالبنا وقف العمل بقانون الطوارئ

يعني كل دول العالم اللي خلقها ربنا دي و اللي بتواجه الارهاب محتاجة لقوانين طوارئ !

ولا دي بداية التفاف المجلس العسكري على مطالب الثورة والثوار !

الحركة تدرس الموقف ,,

وسنصدر البيان بعد قليل ,,

عسل وحياة قلبي والله:)

ادرس براحتك يا حبيبي، بس والنبي خد بالك إن الناس كمان شوية ممكن ما يبقاش عندها فلوس مواصلات تنزل مليونيات أصلا، واحتمال نوفر فلوس ديزل الكهرباء للمنازل لاحتياجات جهات أهم في الدولة،

عسل وحياة قلبي والله:)

[كلامي أعلاه ليس عن معلومات وإنما فقط القافية حكمت مع عمنا تيمور]

[fatfouta]

[tarek hassan]

حمدا لله على السلامة أستاذة فتفوتة وخبر كويس لأن الافتراءات على المجلس العسكري كثيرة

[م تيمور المراغي]

.. ولو ما كانش في حالة طواريء .. وأمن 100 % .. وقوانين مُنظمة مُلزمة للجميع ... هاتحصل مدابححححححححح بكل معنى الكلمة

الاخوة المواطنون ,,

خوفا من المدابح المتوقعة وحتى تزول حالة الاحتقان

قرر المجلس العسكري تاجيل الانتخابات التشريعية الى العام المقبل

والله الموفق والمستعان

[شرف الدين]

وحشتينا يا فتفوتة

ايوة كده عايزين الاخبار الحلوة دي

[fatfouta]

حذر المجلس العسكري كافة طوائف الشعب من الشائعات المغرضة التي تهدف إلى النيل من وحدة الشعب.

يذكر أن "تحالف المصريين الأمريكيين" قد أبدى اعتراضه على ما تردد ونشر قبل حين عن منع تصويت المصريين بالخارج، وهو ما نفاه المجلس العسكري.

''المصريين الأمريكيين'' يعترض على منع المصريين فى الخارج من التصويت

[fatfouta]

وحشتينا يا فتفوتة

ايوة كده عايزين الاخبار الحلوة دي

الله يخليك يا شرف والف شكر ليك

طبعا خبر جميل فرحنا بيه جداا كلنا

ان شاء الله بكرة احلى ياااااارب منهم لله اللى بيحاولوا يعملوا الفتنة بأى طريقة بين طوائف الشعب المختلفة او بين المجلس العسكرى والشعب نفسه

[عادل أبوزيد]

.. ولو ما كانش في حالة طواريء .. وأمن 100 % .. وقوانين مُنظمة مُلزمة للجميع ... هاتحصل مدابححححححححح بكل معنى الكلمة

الاخوة المواطنون ,,

خوفا من المدابح المتوقعة وحتى تزول حالة الاحتقان

قرر المجلس العسكري تاجيل الانتخابات التشريعية الى العام المقبل

والله الموفق والمستعان

سيدى الفاضل هل هذا خبر جاد أم أنك تخلط الجد بالهزل ؟

[م تيمور المراغي]

فاكر عادل بك مخاوفك اللي قلتها بخصوص عودة قطع الاتصالات والانترنت !!

القانون المشبوه ده يعطي الصلاحية للمجلس بكل بذلك ,,

ده غير الاعتقالات بدون اذن من النيابة وتجديد الحبس لمدد غير محددة واطلاق النار بالذخيرة الحية ,,

معناها رجعنا الى المربع صفر ,,

قلتلكم بيلحسوا كلامهم ماصدقتونيش ,,

الاول بعد التنحي قالوا اوقفناه بعدين قالوا حنلغيه بعد الاستفتاء بعدين لما تقرب التشريعية بعدين بعد الانتخابات الرئاسية بعدين ابقوا قابلوني في تربتي !

[م تيمور المراغي]

.. ولو ما كانش في حالة طواريء .. وأمن 100 % .. وقوانين مُنظمة مُلزمة للجميع ... هاتحصل مدابححححححححح بكل معنى الكلمة

الاخوة المواطنون ,,

خوفا من المدابح المتوقعة وحتى تزول حالة الاحتقان

قرر المجلس العسكري تاجيل الانتخابات التشريعية الى العام المقبل

والله الموفق والمستعان

سيدى الفاضل هل هذا خبر جاد أم أنك تخلط الجد بالهزل ؟

برد على تبريرات احمد لمد العمل بقانون الطوارئ

ده اللي متوقع لو تركنا الحبل على الغارب بدون حسيب ,,

على المجلس العسكري ان يلتزم بما قطعه للثوار من وعود واولها

وقف العمل بقانون الطوارئ المشبوه قبل الانتخابات التشريعية ,,

لو الداخلية او الحكومة مش ماليه مركزها يفكروا في ترتيب تاني ,,

انما ماتكونش ابدا على حساب مكتسبات الثورة واول مطالبها واللي سقط في سبيله الشهداء

[Damo]

عشلان الحرامية و البلطجية اللى ماشية تسرق و تنهب ومخلية سمعة مصر زى الزفت يلموا نفسهم

مدام ذهبية.

السرقة والنهب والبلطجه كل واحد له قانون لوحدو ومش قانون الطوارئ هو للي يجرمه.

اللي بيسرق بيتسجن عشان في قانون بيقول السرقة غير قانونيه

اللي بيقتل بيتسجن عشان في قانون بيقول القتل غير قانوني

اللي بيرهب (أو يتبلطج) بيتسجن عشان في قانون بيقول الارهاب غير قانوني

كل القوانين دي مش محتاجة يتعملها قانون طوارئ مخصوص عشان خاطر تتنفذ.

[ذهبية]

عشلان الحرامية و البلطجية اللى ماشية تسرق و تنهب ومخلية سمعة مصر زى الزفت يلموا نفسهم

مدام ذهبية.

السرقة والنهب والبلطجه كل واحد له قانون لوحدو ومش قانون الطوارئ هو للي يجرمه.

اللي بيسرق بيتسجن عشان في قانون بيقول السرقة غير قانونيه

اللي بيقتل بيتسجن عشان في قانون بيقول القتل غير قانوني

اللي بيرهب (أو يتبلطج) بيتسجن عشان في قانون بيقول الارهاب غير قانوني

كل القوانين دي مش محتاجة يتعملها قانون طوارئ مخصوص عشان خاطر تتنفذ.

اتفق معاك ان الحرامية و البلطجية مش محتاجين طوراىء توقفهم

لكن

لو كنا فى حالة استقرار او كنا فى ظروفنا العادية كنت قولت لك فعلا انا مش محتاجين ظوراىء لكن يا دامو هل مصر الان مش فى حالة طوراىء

هل انتى مش شايفة ان االى عايز حاجة يعملها بيعملها

اى حد تطلع فى دماغة اى كلمة حتى لو بالكدب يجرى على وسائل الاعلام يبث فيها النار و الدنيا تولع

انتى مش شايفة حل التسيب الى احنا فيها

كلنا هنا كنا بنادى بالحزم و الشدة

فية ناس بتعرف تضبط نفسها و عارفة مصلحة البلد فعلا و على حق

و فية ناس تانية عايزة نار و تشبع فيها حريقة

دى بقى اللى معمول لها الطوراىء

مش بتشوفى على اليوتيوب كمية الفديوهات اللى بتدعو الى الفتنة و الى الحرب دة احنا كاننا داخلين على حرب اهلية

البلد الان محتاجة شدة

و لما الام تشد على اولادها او تهددهم بالعقاب لو حصل خطا مش عيب

العيب اننا نسيب البلد بلا حزم و لا شدة و لا رقيب

[se_ Elsyed]

ياريت نقرأ الاول ونفهم تفاصيل الخبر

وتطبيق القانون على أعمال الفتنة الطائفية، والبلطجة، وتخريب المنشآت العامة والخاصة، وقطع الطرق، ومقاومة السلطات، والتعرض لرجال القوات المسلحة والشرطة، وذلك ضمن الإجراءات المتخذة لعودة الأمن والانضباط.

أتفق تماماً تطبيق كل القوانين الأستثنائية على هذه الأعمال

وانا متأكد مليون المية إننا

1- لن نعود للوراء مرة أخرى

2- لن يحكمنا عسكر مرة أخرى

3- لن نسكت على الظلم مرة اخرى ..

من 8 سنين كانوا بيقولوا علينا مجانين لما قولنا ( مليون المية مافيش توريث ... ومليون المية حلمنا هايتحقق ... ومليون المية بلدنا هاتتحرر )

عارفين ليه ؟

لثقتنا في الله

ثم .. لثقتنا في الشعب الأصيل ده

-----------

هل تخافون أن يسرق المجلس العسكري حلمنا ؟

أبداً .. ولو استعان بجيوش العالم كلها بقنابلهم النووية

هذه ليست شعارات

لإن اللي انا متأكد منه إن الـ 8 مليون اللي نزلوا الشارع لاول مرة في تاريخ البشرية كلها ان ينزل هذا العدد في الشارع ... من السهل ان ينزل أضعافهم إلى الشارع لو حدث وكان هناك شُبة شك في إن الثورة تُسرق

لكن أيها السادة دعونا من الكلام عن حاة الطواريء . ودعونا نتحدث عن دورنا ومشاركتنا في " البناء " والسير إلى الأمام

[Damo]

اتفق معاك ان الحرامية و البلطجية مش محتاجين طوراىء توقفهم

لكن

لو كنا فى حالة استقرار او كنا فى ظروفنا العادية كنت قولت لك فعلا انا مش محتاجين ظوراىء لكن يا دامو هل مصر الان مش فى حالة طوراىء

يا ريت آي واحد معترض على استخدام قانون الطوارئ أو حالة الطوارئ في مثل هذه الأيام يقولنا إيه الحالة أو الوضع أو الأحداث اللي يمكن تطبيق الطوارئ فيها؟

أنا هرد على حضرتك حسب موقفي وحساباتي أنا.

الحالة اللي يستخدم فيها قانون الطوارئ زي دلوقتي.

و أنا معترضه على قانون الطوارئ دلوقتي.

أنا مقتنعة تماما ان دلوقتي وضع استثنائي طارئ وعايز اجراءات صارمة و استثنائية.

وأنا مع مبدأ قانون الطوارئ جدا ومقتنعة إن ايوه لما بلد تبقى بدون حكومه والشعب مبهدل الدنيا زي دلوقتي بالظبط تعلن حالة طوارئ ولو حد ماشي بليل وشكلو مخبي حاجة أو عامل عامله ييجي الظابط يشتبه فيه ويخدو يحبسو لحد مايحققو في الموضوع و ممكن يطلع بريء واتظلم واتهان بس للأسف دي ظروف قسوي غير كل يوم مضطرين نعمل كده ونستحمل كده. للتوضيح أنا مكنتش موافقة طبعا على قانون طوارئ التلاتين سنة اللي فاتو. مفيش في الدنيا حالة طوارئ تستمر 30 سنة ده كان فساد وخلاص.

قانون الطوارئ المفروض بيعلن في الحالات الاستثنائية اللي زي دلوقتي.

انا معترضه على قانون الطوارئ دلوقتي عشان الحالة الاستثنائية اللي موجوده دلوقتي دي....استثنائية.

أنا اوافق على الطوارئ لما :

البوليس يقولي إنتي كل ماهتخوشي شارع هنقولك طلعي البطاقة وهنسالك رايحة فين وجاية منين ولو شكينا إنك بتكذبي و حسينا انك مخبية حاجة هنحجزك في القسم ومش هنطلق سراحك لحد مانتأكد إنك بريئة (يعني عكس الطبيعي : المتهم مدان حتى تثبت براءته). ولو معملناش كده الناس اللي في مصلحتها تسبب مشاكل مش هنعرف نمسكهم قبل ماتسببها فعلا. ودي مش مستحمله نستنى الجريمة لما تقع عشان نمسك عليهم دليل قاطع. دي فيها مستقبل دولة كامله والمخربين دول صعب جدا اصطيادهم زي أي مجرم تاني. أيوه هوافق إنك تفتشني في الشارع لو هتفتش اللي جمبي وتلاقي معاه سلاح كان هيقتل به كمان نص ساعة أو منشورات غرضها فتنة وبس, الخ

أنا مش اوافق على الطوارئ لما :

البوليس يقولي هنقولك طلعي بطاقتك في كل شارع ورايحة فين وجاية منين ولو شكينا أننا مش عاجبينك هنخدك على القسم و ونحطك في الحبس وهتفضلي محبوسه لحد ماتعجبي بينا لان عدم اعجابك ده خطر على مصلحة الدولة. ولو ان أكيد مش بيقولوها صريحة كده بس مش محتاجة الهيستوري والتجارب اللي فاتت كفاية قوي مش محتاجة اثبات أكتر.

زي ماأنا قلت قبل كده مش لاقيه حد مستفيد من الفتنه غير جهه واحده بس. و مستبعده تماما إن تكون مجرد صدفه إن نفس الجهه دي مستفيده من ( أو محتاجه) تتلاعب بقانون الطوارئ ومستبعده إن تطلع صدفه بردو إن نفس ذات الجهه دي بردو هي اللي تقدر تصدر قرار إعلان الطوارئ.

قانون الطوارئ اوافق عليه عشان هيشعرني بالامان. بقول لحد فتش اللي عايزو و اعمل اللي عايزو بدون مذكرات بدون اجراءات لو حاسس انو خطر عليا. فما بالك لما اللي مفروض انو يحميني أنا شايفة هو اكبر خطر.

أنا مش معترضه على مبدأ القانون. أنا معترضه على اللي هينفذو.

وإذا كان الوضع دلوقتي صعب جدا والبعض ممكن يقول ميئوس منه فقانون الطوارئ هيزيد الطين بله.

تم تعديل 12 مايو 2011 بواسطة Damo

[fatfouta]

اللواء ممدوح شاهين يؤكد الخبر

http://www.youtube.com/watch?v=-xmXQ_PFNPE&feature=player_embedded