فارس الأحلام

[لماضة مصرية جدا]

السلام عليكم و رحمة الله و بركاته

قعدة البنات و الحواديت...ما هو لازم نتكلم عن "فارس الاحلام"

زمان من قيمة 120 سنة قبل الميلاد كنا بنتكلم عليه كدهوت

حصان ابيض

وولد وسيم جدا هيجي يخطفنا من حالة البؤس اللي احنا فيه..(و مش عارفة البؤس دوت جاي منين!! ده ع اعتبار ان احنا كنا عايشين زي سندريلا مثلا :blink: )

و بعدين هووووووب نطير علي مدينة الاحلام و نمشي علي السحب

و كفاية عليكو كده....احسن عارفة انكم منكن تخبطوني بالكي بورد

بعد ما اتحدفنا في الحياة الحقيقية و اكتشفنا ان الحصان الابيض بقي بعافية شوية و قلب علي حصان حناطير..(وش محمود عبد العزيز في فيلم الساحر)

و الشاب الوسيم....بقي يا عيني طالعة عينه في اقساط الشقة و العربية و اهم حاجة النيش...(و ده تحقيقا لمبدا يا تجبلي النيش..يا متلزمنيش)...اللي ناس كتير مؤمنة بيه

و لما جه يخطف بنت الناس....احيانا بيجليها البيت و احيانا بيتقابلوا في كل دروب الحياة....بداية من الشغل و نهاية بالفيس بوك

و لما هربوا ملقوش مكان في مدينة الاحلام...عشان بس كان فيه سحابة سودا من بتوع حرق الرز فعطلت المسيرة شوية

الخلاصة

يا تري فاكرة لسه فارس الاحلام.....(صوت تنهيدة طالعة من جوه اوي...و محدش يضرب)

يا تري انت كمان فاكر فرساية الاحلام؟

لو لسه في مرحلة انك تأجر حنطور قصدي حصان و كدهوت و تلاقي اميرة...امير الاحلام....يا تري اتغير عندك و بقي اقرب لايه؟؟

لو عديت المرحلة دي....طب لسه قادر تشوف في شريك حياتك...فارس او فرساية الاحلام...و لا يالا اهي عيشة و السلام...(و ش اي واحدة متجوزة...بتبص علي الكائن اللي قاعد جنبيها علي الكنبة...و بتمصمص شفايفها و بتقول....اخدتين زي الوردة المفتحة...و قرطفتها حتة حتة :closedeyes:

احكوا

من غير....حدود

من غير محاسبة

من غير تزويق

كونوا بس انتم

مساكم......عالم فانتزي....بنحاول....نقصه و نعيشه في حياتنا

حتي لو لحظات

علي هامش فيلم الكارتون دوت

انا الحقيقة كنت عايزة احط الموضوع في باب الابتسام

مش عارفة ليه حاسة ان احنا راح نضحك من نفسنا كتير

بس برضه

هنضحك....و هنتعلم....و هنكمل باذن الله

[Dreamwithme]

يوه يا لمضمض يا أختي أنتي بتقلبي علي الواحد المواجع ليه :closedeyes:

طبعا فاكرة......بس تصدقي إني لو كنت إتجوزت فارس أحلامي من 10 سنين كان زماني مش طيقاه خالص bsh:)

لأن شخصيتي أختلفت كتير ....ومواصفات فارس الأحلام بتبقي كل الحاجات المثالية من وجهة نظرك وطبعا دي بتختلف مع السن والخبرة بالحياة

فطبيعي إني لما أفتكر مواصفات فارس أحلامي زمان أضحك من قلبي .....بس عارفة يا لماضة هو ما أختلفش في نقطة واحدة

أني أهم حاجة عندي دماغه بيفكر أزاي في الحياة ....الفرق بقي إن نظرتي أنا للحياة أختلفت فبالتالي هو نفسه لازم نظرته تختلف

مش هو أنا اللي عملاه :wub: ....

مش هأحكيلك عن المواصفات يالماضة عشان البيوت أسرار ومعقولة أفضح الراجل علي الملأ قبل ما قابلة ؟! ;) دي تبقي عيبه ويمكن يتقمص وما يجيش

بس عارفة يا لماضة إن كل ما بأكبر بأصدق أكثر في إني هأتجوزه هو هو فعلا بالمواصفات اللي أنا عايزاها ومش أي حد والسلام

زي ما تقولي كده يقيني بالله أنه هيجمعنا بيزيد .....مساكي حواديت وحكايات وهستني معاكي حد ينفعك ويحكي حدوتة لحسن ردي مفيهوش حواديت :P