أنا قبطي .. انا مضطهد بس مش قوي

[Simba]

أنا روّحت من الكلية في تاكسي امبارح

آه ده يُعتبَر خبر. أصل لو عملتها كل يوم اسبوعين ونبات أنا وأهلي في الشارع

أمال إيه اللي حصل؟

أصل كان معايا ناس. كنا خمسة سوا في التاكسي

برضو مش دي الحكاية

الحكاية إن أنا اسمي افرايم. وأبويا قسيس. ومن السبت اللي فات قلبي واجعني على كنيستي اللي اتحرقت واخواتي اللي ماتوا في امبابة

الأقباط مضطهدين

إيه ده يعني أنا شخصياً مضطهد؟

فيسبوك والنشرة والجرايد والتوك شو بيقولوا كده

أمال أنا مش حاسسها قوي ليه؟

السبت بالليل نادين محمد بعتت لي: أنا مش قادرة اوقف دموعي

يوم الاتنين اسماعيل قال لي: أنا مش هاواسيك حتى. هما يومين سود علينا كلنا لازم هانستحملهم

ويومها يوسف البرغوتي أول ما دخل على الشات كتب لي: البقية في حياتك

وامبارح؟ كنا في التاكسي أنا ومنعم ومنتصر واسماعيل وابراهيم

منعم مربي دقنه ونفسه نطبق الشريعة. ابراهيم صوفي. اسماعيل ومنتصر مسلمين عاديين. أنا مسيحي وليبرالي اعشق العلمانية

وكلنا كنا راكبين سوا

كل واحد فينا لوحده ماكانش هايقدر يركب تاكسي

بس لما اتفقنا نخمس سوا المشكلة اتحلت. ووصلنا

وساعة ما قلنا نخمس محدش جه قال لي: تعالى اركب معانا عشان قصر العيني فيه وحدة وطنية. ولا حد قال لي انت مسيحي وأنا مسلم زيي زيك العداد عليّ وعليك. محدش قال الدين لله والتاكسي للجميع

كل اللي جه على بالنا ساعتها إن كلنا تعبانبن وكلنا سكّتنا طويلة وكلنا عايزين نوصل بقى وكل واحد فينا لوحده معندوش الإمكانيات اللي توصله

بس مع بعض وصلنا

آه كنا مزنوقين في التاكسي - ماعدا منعم فلت وركب قدام. بجد عمري ما ها آمن لواحد بدقن

وآه الطريق كان زحمة. بس شوية ونسينا دي ودي وسط الكلام والهزار

و عشان مع بعض كل واحد كان مطمن إن عجزه في غيره ها يسده له

ببساطة كده

سيبك من ليلة مسلم مسيحي إيد واحدة وعاش الهلال مع الصليب (مع الأسف) وكليبات البابا شنودة بيبوس الشيخ الطيب

سيبك حتى من كلمة "وحدة وطنية" - محدش بيقول: مصر فيها وحدة مترية الطويل والقصير طول عمرهم عايشين اخوات ومتربيين مع بعض

فاهمين قصدي؟

الحوار دلوقتي إن كلنا مصريين و كلنا تعبانبن وكلنا سكّتنا طويلة وكلنا عايزين نوصل بقى وكل واحد فينا لوحده معندوش الإمكانيات اللي توصله

بس مع بعض لسه في أمل نوصل

ملحوظة: في الآخر ماكانش معايا فكة ونزلت من غير ما ادفع حاجة - باين الأقباط خونة بجد

المصري: افرايم القس بنيامين

تم تعديل 12 مايو 2011 بواسطة سمبا

[Om Zayd]

المهم اننا نتفق على محطة النزول

و نسيب السواق يوصلنا من غير ما نلخمه بتوجيهات متعارضة

[م تيمور المراغي]

قطعة ادبية يا سيمبا وانت شاعر وفاهم دي صياغة فنان ,,

شفت ختمها ازاي !

تسلم ايديك ,,

[nasr-badr]

الحمد لله وحده والصلاة والسلام علي من لا نبي بعده وبعد :

زميلي الفاضل سمبا

( بعد ما كتبت مقاله طويلة جدا وكدت ان اخنم انفصل الجهاز وطار كل ما كتبت والوقت متأخر لذا شاحاول اعاده ما كتبت بايجاز فسامحني )

اولا اهنئك علي مقالتك الرائعه الموفقه من حيث الفكره ومن حيث اسلوب الطرح فهي بسيطة جدا وعميقة جدا في آن ...هذا اولا

ثانيا اعرفك بنفسي انا رجل ممن يقال لهم سلفيين متشددين (من اللي بيقطعوا ودان الناس هههههه) وحبيت اوريك التعصب علي اصوله كما تعلمتها من النهج السلفي فاستحملني ..

ثالثا : من حيث أني مسلم سلفي سأتكلم معك بصدق - والله علي ما اقول شهيد - وانا لا احتاج أن اكذب اصلا فانت لا تعرفني شخصيا فاقول انني قرأت كثيرا وسمعت كثيرا من علماؤ ودعاه وشيوخ السلفية والله لم اسمع احدا منهم يدعوا الي اعتداء علي شخص غير مسلم لا قولا ولا فعلا ولا اعلي كنيسة او دير -نصراني اويهودي -بل علي العكس يدعون الي التآلف والبر لغير المسلم عموما ولأهل الكتاب خاصة وللنصاري خاصة الخاصة ولنصاري مصر أخص الخاصة وأنا لا أقول هذا مجاملة لك ولكن أقسم انها الحقيقة بلا مجاملة وهذا لا بعرض علي سبيل التفضل -لا ولكن هذا أمر ديننا وامر رسولنا فقد قال تعالي " لَا يَنْهَاكُمُ اللَّهُ عَنِ الَّذِينَ لَمْ يُقَاتِلُوكُمْ فِي الدِّينِ وَلَمْ يُخْرِجُوكُم مِّن دِيَارِكُمْ أَن تَبَرُّوهُمْ وَتُقْسِطُوا إِلَيْهِمْ إِنَّ اللَّهَ يُحِبُّ الْمُقْسِطِينَ" فهذا واضح بالبر والقسط طالما لم يكن معتدي فهذا له حكم آخر وأمر رسولنا بذلك وبخاصة مصر فأمر الصحابة الفاتحين لمصر ان يستوصوا باهلها خيرا فان لهم ذمة ورحما وانا قبطي مصري مثلك تماما ثم هناك حق الجيرة في الوطن فنحن شركاء الوطن نقتسم احزانه وافراحه وحتي لا اطيل عليك سأحكي لك ما اريد في نقاط موجزة قدر الإمكان...

- انا عملت لفترة من حياتي في مكتب صاحبه نصراني وكل المكتب كذلك إلا انا وزميل وزميلة مسلمين نعمل معا ونأكل معا و ما كان هناك اي غضاضة من اي نوع بل هناك مواقف جميلة جمعتنا وحتي ان هناك احد عملاء المكتب( نصراني) كان بعاملني معاملة جافة - بلا سبب - وحينما شكوت لصاحب المكتب قالها لي (وش كده ) اصله متعصب وانت عشان مسلم - اي والله - ومع ذلك مرة في مرة تكلمنا في نطاق العمل وخدمته خدمة وتغيرت معاملته لي تدريجيا حتي صرنا شبه اصدقاء وكان ياتيني ويسال علي ويستشيرني في امور العمل وحتي بعد ان تركت المكتب بوقت طويل قابلته صدفة في احد المولات فتصافحنا بحرارة وتحدثنا وما اريد قوله انه حتي مع المتعصب مسلم اونصراني او يهودي حتي مع الحوار والمعاشرة الحسنة يذوب التعصب ....

- اثناء الثورة ولي صاحب نصراني قابلته فقلت له شفت يا عم الشرطة هربت وما فيش حد بيحمي الكنائس في حد تعرض لها باذي ؟؟ قال لي لا قلت فهمت مين اللي كان بيعمل كده قال لي صدقني كنا بنتكلم في الموضوع دا مع جماعة اصحابي وقلت ضفت ازاي كان المسلمين بيصلوا والشرطة بتضربهم والمسيحيين مطوقينهم عشان يحموهم في شكل عفوي رائع معرضين أنفسهم لرصاص الشرطه ؟؟ قال لي فعلا وقلت له شفت مشجد -كذا في المنطقة (وهو والله مسجد للسلفية بالمناسبة ) ازاي كان شيخ المسجد عامله مركز قيادة أثناء الغياب الأمني وجند شباب المنطقة لعمل لجان شعبية وخصص منهم لحماية الكنيسة التي أمام المسجد بمسافة لا تزيد عن 30 متر ؟؟ قال فعلا وكانت ملحمة من التآلف لا تعرفها أمريكا ولا أوربا ولا من يدعون الحضارة ..شيء لأ اظن انه موجود إلا في مصر........... وغيره كثر ....

- فيه فيديو ارجوك شاهده وهو يعنوان "هجمة سلفية شرسة علي الكنيسة " وقد دمعت عيناي عند مشاهدته من الصدق الواضح بلا افتعال بين وفد الشيوخ اللذين "هجموا "علي الكنيسة ومن الإستقبال الرائع من القساوسة ومن المنظر الجميل وهم يأكلون سويا بلا افتعال وبصدق حقيقي وانا اقول بصدق حقيقي لأنه مس قلبي وما صدر من القلب يمس القلب و صراحة لم اشعر بهذا حينما كنت اري شيخ الأزهر يعانق البابا شنوده - وهذا احساس شخصي - ولي هنا ملاحظتان سريعتان

الأولي : لم اشاهد هذا الفيديو علي اي قناه تليفزيونية سوي قناه الرحمة فقط ولا دريم ولا المحور ولا اون تي في ولا اوربت ولا غيره و حتي لم ينوه له علي اي برنامج توك شو ولو شئت فقل كذب شو أو " فتنة شو " فهم يتعامون عن اي خبر يقرب ولا يركزون إلا علي تأجيج نار الفتنة ولو بالكذب وهذا امر شرحه يطول ولكن السؤال كما سأله اللواء الدريني قائد المنطقة العسكرية لمصلحة من ؟؟

الثانية : الا تلاحظ عنوان الفيديو "هجمة سلفية شرسه " وهذا العنوان هو ما جعل حجم مشاهدته كبيرا ..فتأمل

وحتي لا أطيل والله عشنا عشرات المئات من السنين وما رأينا فتنة إلا ما افتعل في الآونة الأخبرة ...ونحن اطفال لعبنا ولم نفرق وانا في الجيش كان يقاسمني المبيت واحد مسلم وواحد نصراني - واحنا اللي اخترنا بعض يعني غير مفروض علينا - وكان اللي بينزل اجازة يجيب معه اكل للباقي بدون ما نتحاسب بناكل مع بعض وقضيت فترة جميله معهما ولكن هناك اياد خبيثه تؤجج للفتنة بوضوح ولكن أظنها ستفشل وعندي اسبابي الموضوعية أهمها ما اراه في الواقع ففي حين يشعلون الفتنة في بعض البرامج السخيفة اري التعامل اليومي عادي جدا وثانيا ان شعبنا له طبيعة خاصة جدا فنحن نعيش - وهذا فضل من الله - "مضفرين" يعني انت ساكن في عمارة و الشقة اللي جنبك مسلم والبقال اللي تحت نصراني جنبه ترزي مسلم وهكذا والحمد لله اننا لسنا مقسمين احياء وعلي فكره هذا ما حاولو ويحاولون ان يفعلوه ان يتم تقسيمنا كلبنان ولن يفلحوا ابدا وأخيرا اعتذر للإطالة مع اني لم اقل واحد في المائه مما اردت قوله فأقول "الفتنة نائمة لعن الله من أيقظها " والله أسال ان يحفظ مصر وأهلها وأن يديم علينا الأمن و الأمان وان يرد كيد من اراد مصر بسوء في نحره ..وأن يجعل تدبيرهم تدميرهم ..إنه بكل جميل كفيل وهو حسبنا ونعم الوكيل والحمد لله رب العالمين

[masraweya]

السلام عليكم

https://www.facebook.com/notes/evra-morgan/%D8%A3%D9%86%D8%A7-%D9%82%D8%A8%D8%B7%D9%8A-%D8%A3%D9%86%D8%A7-%D9%85%D8%B6%D8%B7%D9%8E%D9%87%D9%8E%D8%AF-%D8%A8%D8%B3-%D9%85%D8%B4-%D9%82%D9%88%D9%8A/209577202408283

أجمل حاجة كل ما الاقي نوت متعصبة او بتبص بعين واحدة الاقي الناس حاطة اللينك ده رد

مكتوبة ببساطة و تلقائية.. جزاكم الله خيرا على النقل يا سمبا

بجد .. ليه فجأة الناس بتنسى اننا في مركب واحد

ليه ابقى عايش كويس و اصدق اللي عمال يزن في ودني.. انت مش عايش كويس

ليه ابقى مشفتش من جاري حاجة وحشة و اصدق اللي يقولي .. أصلك مش عارف حاجة و اصلك مش واخد بالك

فيه أخطاء من الكنيسة

فيه اخطاء من بعض من تصدوا للدعوة

لكن اعتقد ان وظيفة الدولة هي التعامل مع مثل هذه الاخطاء

و عدم اهمالها لتتضخم و تسمم جسد مصر

اما نحن .. فيجب ان نتذكر دائما اننا نريد ان نصل لغايتنا بسرعة و سلام