أول فيديو يظهر مدبر فتنة أمبابه وهو يطلق الرصاص بالكنيسة

[raouf]

انتشر على اليوتيوب فيديو يكشف عن اسرار خطيرة ليلة حرق الكنيسة ومن هم مشعلوا الفتنة الحقيقيين .

ويظهر الفيديو مجموعة من البلطجية تتجمع أمام باب الكنيسة مدججين بالاسلحة البيضاء والشوم والاسلحة النارية ثم تقوم هذه المجموعة بتحطيم باب الكنيسة الخارجي، ودخلوا صحن الكنيسة وسط تصفيق وتهليل البعض رافعين السنج والشوم والاسلحة النارية..

وبعد لحظات تدخل مجموعة من السلفيين الي الكنيسة وتحاول منع البلطجية من تحطيم الكنيسة أو احراقها إلا أنهم فشلوا . ثم يواصل البلطجية أعمال تحطيم الكنيسة.

وسجلت لقطات الفيديو التي استمرت حوالي 3 دقائق بلطجياً يرتدي چاكت أسود يطلق النار من مسدس محلي الصنع داخل الكنيسة، وعدداً من الشباب يحطمون أثاث الكنيسة ومحتوياتها.

طبعا بعد ما تشاهدون الفيديو هيكون معروف مين اللى رجع يستحدم العابه القديمة زى كنيسة القديسين وتفجيرات شرم الشيخ

عصابة مبارك مازالت تلعب وتحاول العودة

شوفوا الفيديو وبعدين نتناقش

http://www.youtube.com/watch?v=Zuf2R9RCodE

[se_ Elsyed]

الجيش إستعان بكل تلك الفيديوهات ويومياً بيتقبض على كل من ظهر في الفيديوهات دي

ووصل عدد المقبوض عليهم الأن أكثر من 300 شخص

[elrasy]

للاسف فى واحد لابس جلبية بيكسر معاهم فى الدقيقة 1 و31 ثانية

انا متاكد ان الموضوع فى اثارة فتنة وان فعلا السلفيين معملوش كدة

الفيديو للاسف يتهم السلفيين

عامل زى الفيديو اللى قدمة مواطن لضباط شرطة بيضربوا الناس من فوق سطح القسم علشان يدينهم بس كان فى لقطة بتبين ان الدور اللى تحتيهم مولع والفيديو دة بدل ما ادان الشرطة فدهم

[raouf]

الجيش إستعان بكل تلك الفيديوهات ويومياً بيتقبض على كل من ظهر في الفيديوهات دي

ووصل عدد المقبوض عليهم الأن أكثر من 300 شخص

صح كلامك يا ريس بس الغرض من الفيديو فقط توضيح مين اللى كسر باب الكنيسة وحرقها

ومين اللى كان بيحاول يمنعهم

[se_ Elsyed]

بإذن الله كل يد أتقدمت وحرقت بيت من بيوت العبادة .. ستقطع هي ورقبة من تجرأ وفعل ذلك عشان يبقوا عبرة للجميع

[arkan]

ربنا يظهر الحقيقة وكل مجرم ياخد عقابه

ولا اصدق ان السلفيين قاموا بحرق الكنيسة وانما استغل تعاطفهم مع عبير - الغير حكيم في الوقت الحالي من وجهة نظري - لالصاق التهمة بهم والمناخ السائد عند استعداد لالصاق التهمة بهم

انما الجريمة تدل على ناس قلوبهم جامدة وحاقدة وعايزين يخربوا البلد علشان نترحم على ايام بسلامته

[se_ Elsyed]

سندفن رؤسنا في الرمال لو قولنا إن دول فلول الحزب الوطني ..

او عصابات من خارج إمبابة ... أو سلفيين متعصبين

أو أو أو أو

للأسف أيها السادة ... هذا السلوك الهمجي يُعرف بـ " سياسة القطيع " وموجود في كل المناطق الشعبية والعشوائيات

يعني كلنا عارفين إن دي منطقة شعبية مكتظة بالسكان ... فسهل جداً إنتشار الشائعات بها كإنتشار النار في الهشيم ...

فمجرد ما تطلع إشاعة إن في مسلمة مخطوفة داخل الكنسية وإن في ضرب نار جاي من جوه .... بس خلاص .. سيب إيدك وأتفرج على اللي هايحصل

القطيع الجاهل بيتحرك بشكل تلقائي من كل فئات الشعب لإن واضح من الفيديو إن مش كلهم سلفيين ... ولا السلفيين دول مثلاً قاعدين طول اليوم على القهوة على أهبة الإستعداد لأي حاجه زي دي ....

الغريب أن تجد من بينهم مدمني مخدرات وبلطجية وعواطلية وعيال ما تعرفش ربنا أساساً ...

ومع ذلك بيتحركوا مع الهوجة ويهيصوا مع اللي بيهيصوا

وحكيت لكم كذا مرة عن مشاهد شاهدتها بعيني الإتنين عند إحراق كنيسة عين شمس من سنتين ...

العجيب أن تجد بينهم متعلمين والمفروض إنهم مثقفين ..

لما شاهدت الفيديو بتاع عين شمس .. كنت حريص إني أعرف كل التفاصيل من المشاركين فيها - للأسف يعني - .. لإن المسافة بين الكنيسة وبين بيت صديقي في الجامعة ولسه على إتصال بيننا وبين بعض .. حوالي 10 أمتار بالتمام والكمال ... وأتصلت به على طول وفاجئني إنه إشترك في الأحداث .. فصرخت فيه وقلت له : ليه يا بتاع الجامعة يا محاسب يا كبير ؟

وهو لا ينتمى إلى سلفيين أو غيره وإنسان عادي جداً

يقوم يرد بكل برود : أيوه .. المنطقة مش محتاجه كنايس .. وعندهم كنيسة كبيرة في شارع أحمد عصمت ( على بُعد إتنين تلاتة كيلو ) ولازم يتركب لها مواصلات رايح جاي ..

فقلت له وإنت مين عشان تقول المنطق محتاجة أو مش محتاجة ؟

هذا واقع على الأرض أيها السادة

والمشهد واحد لا قل ولا زاد ..

نفس المجرمين والبلطجية ومدمني المخدرات هما اللي كانوا شايلين مولوتوف وبيحرقوا الكنيسة

واللي بيحصل اليوم وكل يوم كان نتيجة التراخي الأمني بعد كل حادث للأسف .. ونتيجة جهل وإنعدام للثقافة ... وكتير منهم فاكرين إن دي غزوة أو نصرة للإسلام لما أحرق كنيسة أو أكسرها أو أو أو

فلو كان العيال بتوع كنيسة عين شمس مثلاً .. ومن بعدهم كنيسة أطفيح كان إتعدم منهم إتنين تلاتة على رؤوس الأشهاد .. كان أي حد عرف إن الله حق وما كانش يجرؤ حتى إنه يمر بجانب بيت من بيوت الله

فما لا نرضاه على نفسنا .. لا نرضاه على غيرنا

وأنا كمسلم لو شاهدت في مرة مسجد بيُقتحم بمثل هذه الهمجية .. بالتأكيد سأغضب ولا ادرى ماذا سيكون رد فعلي ..

[hOuSsAm]

اشطة........ كسروا ودمروا واحرقوا واخربوها

ماهى مش بتاعتكوا

------------------

انا عندى اقتراح

بالاضافة للاحكام والعقوبات اللى هياخدوها هؤلاء الهمج فوق دماغهم واتمنى انها تكون احكام مشددة اذا ثبتت تهمتهم

ان يتم اصلاح ماتم اتلافه على نفقتهم الخاصة - او على نفقة مجلسهم المحلى ويتخصم من ميزانية المجلس المحلى وبلاها بقى خدمات للمنطقة كلها عشان ينصلح حالهم ويفضلوا عايشين بدون خدمات

او يتم تحميل النفقات على فواتير المياه او الكهرباء للمنطقة كلها دون استثناء

عشان حتى لو فيها ناس محترمة فالاولى بهم ينشغلو بالاصلاح العام وتوعية الاخرين ومحدش يقول وانا مالى وتسيب الناس تولع فى بعضها

بكدة كل واحد هيحصلح وينصح غيره بالاصلاح كفاية نوم بقى

تم تعديل 14 مايو 2011 بواسطة hOuSsAm