ثورة الغضب المصريه الثانيه 27 مايو

[Ahmed Anwer]

فعلا ، كل الناس متضايقة جدا و بتكلم هنا علي مستوي الناس البسطاء ،،

لكن المشكلة

إن النخبة الديكتاتورية يستغلون الحشد لمطالب مشروعة 100% في الدعوة لوضع دستور جديد والمطالبة بمجلس رئاسي.. لا أحترم انتهازيتهم

تم تعديل 17 مايو 2011 بواسطة Ahmed Anwer

[Om Zayd]

[م تيمور المراغي]

لا معلش

مادام ارتضيتوا تنزلوا معترك الحياة السياسية بقيتوا تحت رحمة المحاسبة و الانتقاد لكل تصرف سياسي منكم

مافيش حاجه اسمها لاتزجوا باسم المجلس العسكري والسبب ,,

انتم الان اصبحتم تحملوا صفتين ,,

الصفة العسكرية كمؤسسة عسكرية القانون يجرم التعرض لها اوكي ربنا يوفقكم في الثكنات

اما الصفة الثانية وهو تحمل اعباء ادارة شئون البلاد فده دور سياسي لنا الحق كل الحق في الاعتراض عليكم و انتقادكم و التظاهر ضدكم اذا لزم الامر ,,

ثورتنا مش حتتسرق مننا ,,

ومش حنسيب اي فاسد - بقول اي فاسد - يفلت من الحساب والعقاب ,,

[Om Zayd]

الناس اللي سابوها

القضاء هو اللي اصدر القرار مش المجلس

اذا مش عاجبنا القرار .. نطعن بالقانون

اذا القاضي عليه شبهة.. نطلب تنحيته

مش نهد البلد

[م تيمور المراغي]

لازم نسأل نفسنا .. احنا عايزين ايييييييه؟

دولة قانون .. أم فوضى؟

عاوزين ماحدش يقرطسنا او يستغفلنا تاني ,,

النظام بكامل رموزه ومن تهاون معه كمان يتحاكم ,,

سوزان وعزمي و سرور ومفيد يرجعوا السجن

مش يمسكوا اخواتنا قدام السفارة ويسيبوا اللى اكلوا مال النبي ,,

مبارك اللي مستموت في المستشفى ده مش كان بيبرطع كل ليله قدامنا وبيلعب

سايبينه بره السجن ليه !!

وقانون ايه !!

الشرعية الثورية فوق الدستور والعرف والقانون !

[Howayda Ismail]

مدام هند ,,

حتسمحي انها تفشل ,,

طب و

الشهيد !

وانا فى ايدى ايه اعمله

ابقى باكدب لو قلت انى حانزل معاهم لانى مش حرة نفسى

اضعف الايمان ان اتضامن مع اى شئ يحفظ للشهيد حقه

نفس السناريو بيحصل تانى تشتيت الناس فى اعمال بلطجة و حدوث فتن وغلو اسعار وازمات سولار وانابيب بوتاجاز

نفس الساقية بيدور فيها من جديد عشان المواطن يتلهى على عينه فى لقمة عيشه

لكن كل ده كوم والافراج عن عزمى وسرور وسوزان كوم تانى خلى الغليان بيزيد

[Howayda Ismail]

لازم نسأل نفسنا .. احنا عايزين ايييييييه؟

دولة قانون .. أم فوضى؟

بالشكل اللى بيحصل ده ياام زيد مش حيبقى فى دولة قانون ولايحزنون والجواب باين من عنوانه

القانون حيبقى زى ماهو على الغلابة وبس

والفوضى هى اللى بيحصل دلوقت الافراجات عمال على بطال لرؤوس الفساد

[Howayda Ismail]

الافراج يا هند تم بالقانون

نطعن عليه

و مش عايزة ننسى ان مينفعش نحط نفسنا مكان القاضي

و مش هنضيع حقنا بمحاكمات استثنائية

و مش هنهد بلدنا بايدينا

الجيش كده خلع ايده من الموضوع ورمى المسئولية على القضاء

كان المفروض الناس دى اتعمل لها محاكمات عسكرية فورية لشدة جرمهم وتخريبهم للبلد

وبكده تصان البلد من حالة الغليان اللى بقى فيها الشارع

[محمد عبدالعزيز]

لسه راجع من معركة الأنبوبة من نص ساعة.

من 10 مساء لحد 3 الفجر عشان أنبوبة بوتاجاز يا مؤمنين.

وبتوع التموين بيتلاعبوا بينا هما والموزعين عشان يقرطسونا ويلفوا يبيعوا الأنابيب فى السوق السوداء.

طلبنا الشرطة ردوا بكل وقاحة إنهم خايفين يحتكوا بالناس.

هددنا إننا نروح نجيب العربية والسواق وبتوع التموين من قفاهم وندغدها على دماغهم, قعدوا ينيمونا 3 ساعات لحد ماوصلوا والمسافة ماتكملش 30 كم.

بس الحمد لله حصلت على الأنبوبة فى النهاية.

واستخلصت من ده كله إن الأزمات دى مفتعلة, لتركيع الشعب المصرى والضغط عليه لقبول الصفقة الحقيرة اللى ابتدت ملامحها تظهر.

أكتر من 100 واحد كانوا واقفين من الناس البسطاء كان رأي الأغلبية نفس الرأى, 2 أو 3 بس اللى كانوا بيقولوا ادى الثورة وادى اللى اخدناه منها.

ده كله عشان أقول... مشارك إن شاء الله لحد ماكل الزبالة اللى فى البلد تنضف.

[Ahmed Anwer]

بيان من حزب العدل حول محاكمات المسئولين وتسريبات العفو عن مبارك

يتابع حزب العدل بقلق شديد تطورات محاكمات المسئولين السابقين فى النظام السابق ويعرب عن استغرابه الشديد لطول فترة المحاكمات رغم أهميتها وحساسيتها لكل المصريين ، كما يتساءل مع كل المصريين عن طبيعة التهم الموجهة لهؤلاء والتى لا تتناسب حتى الأن مع كم اجرامهم وفسادهم الذى لا خلاف عليه

اننا نحترم القضاء المصرى الشامخ ولا نتدخل فى عمله ولكن من حقنا أن نتساءل هل هذه التهم التى يتم محاكمة عدد من المسئولين بسببها هى كل جرائمهم ؟

كما صدمنا أيضا تسريب أخبار عن عفو قد يصدر عن الرئيس المخلوع ورغم نفى المجلس العسكرى لهذه الأنباء الا أن مجرد تسريب هذه الأخبار هو شىء يدعوللقلق ويصيب الناس بالاحباط

ان مجرد التفكير فى العفو عن المخلوع وعدم ادانته ومجازاته بما يستحقه من عقاب هو أمر يضع كل من يفعله فى مواجهة مباشرة مع جموع المصريين ، ان المخلوع لم يرحم شعبه حتى يطلب منه الرحمة الأن ، ان شهداء العبارات الغارقة والقطارات المحترقة وضحايا التعذيب فى أقبية أمن الدولة وشهداء ثورة 25 يناير هى كلها جرائم تجعل اعدامه شفقة عليه ورأفة به ، ولو قضى ما تبقى من عمره يطلب العفو من ضحاياه ما سامحه أحد

لن نقبل أن يخيرنا أحد بين عودة أموالنا وبين العفو عن المخلوع بل سنحصل على الاثنين معا ، ان عيون أمهات الشهداء لم تنم حتى الأن ولم تعرف الى الراحة سبيلا ومازال الجميع ينتظرون القصاص العادل

اننا نهيب بالمجلس العسكرى وبمجلس الوزراء عدم استفزاز المصريين الذين أرهقهم غياب الأمن – حتى الأن - والذين يخافون على ثورتهم من الاجهاض وسيفعلون كل شىء من أجل أن يضمنوا نجاح ثورتهم وتحقق مكتسباتها

نريد الأن تحركا سريعا يربط على قلوبنا يتمثل فى سرعة انجاز محاكمات المسئولين السابقين ومعهم الرئيس المخلوع ونريد ان تكون جلسات المحاكمة علنية ومذاعة على الهواء على التليفزيون الرسمى للدولة ، وهذا حقنا لضمان الشفافية ، كما نطالب بالافراج الفورى عن كل الشباب الذين تم احتجازهم خلال الايام الماضية

ونترك لأنفسنا جميع الخيارات كمواطنين مصريين فى التعبير عن رفضنا لهذا البطء فى انجاز المحاكمات بشكل سلمى وحضارى يكفله لنا الدستور والقانون

حمى الله مصر من كل سوء

حزب العدل

--------------------------------------------------------------------

حزب العدل نبت من ميدان التحرير

من مؤسسينه د/ مصطفي النجار و الشاعر عبد الرحمن يوسف ابن العلامة يوسف القرضاوي و الغنية عن التعريف المستشارة نهي الزيني

و اتكلمت مع د/ مصطفي النجار ، زي البيان كده ضد المجلس الرئاسي و الدستور أولا

فقط مع المطالب المشروعة

الناس المحترمة محترمة

مش مجاهدي فريدم هاوس

[مسافر]

يا اهلنا

لا حركة ابريل عملاء

ولا السلفييين مش فاهمين

ولا الاخوان خونة

الموضوع اكبر من كده

تم ازاحة الصف الاول

والصف الثاني هو الحاكم الان

فلن يسجن او يقتل من كان سببا في وجوده

سينجح المصريين في 27 مايو

في ازاحة الصف الثاني وسيبقى امام المخابرات العالمية الصف الثالث

وبعدها

افتعال مشكلة مع اسرائيل

او حماية الاقباط في مصر

او لتوزيع القمح على المصريين

فيكون سببا لتدخل القوى العالمية مصر

[أسد]

كنت أقول أن الثورة قد نجحت

اليوم تحول رأيي

50% فقط

واحتمال نجاح عمليات إجهاد الثورة .. يزداد ...

وإحتمال نجاح الثورة المضادة يزداد يوماً بعد يوم ..

50% أيضاً ...

الحال أسوأ مما نتحدث عنه ..

الشعب المصري تحدث له عملية تركيع .. حتى يرضى بأي حل وأي مخرج للنفاذ من الأزمة ..

ولكن ...

من يقوم بفعل ذلك ...

المسألة محتاجة ... سرعة .. حسم .. حزم ... في التعامل ..

أعتقد أن ما نحتاجه اليوم .. خو مطلب واحد فقط ... ثم يأتي الباقي في المرحلة التالية ..

يجب أن يتم إختيار مجلس رئاسي وطني .. مدني ... يتم إختياره لحكم البلاد

تكون مسئولية الجيش .. الحماية .. والحفاظ على الأمن ..

ثم إعادة بناء جهاز الشرطة .. وإعادة الثقة فيه

منع كل الحركات الإحتجاجية والتظاهرات ... بأي شكل

تأجيل الإنتخابات النيابية والرئاسية لفترة .. ولتكن ستة شهور ..

التركيز على البناء والإصلاح والعمل ...

غير ذلك ستتحول البلد إلى فوضى

لا يمكن فرض الرأي بهذا الشكل .. في الإنتخابات القادمة .. كل تيار يقدم مرشحيه .. واللي يكسب يعمل اللي هو عايزه

يقطع العلاقات .. يطور العلاقات .. يصدر الغاز .. يولع في الغاز ... يعلنها إمارة إسلامية ... يعلنها علمانية .. أي حاجة ..

اللي ينجح في الإنتخابات .. حيكون الشعب هو اللي إختاره .. وبالتالي سيكون بينفذ رغبات الشعب .. أو للتصحيح الأغلبية ...

والضمانة الوحيدة لتحقيق إنتخابات صحيحة .. الإستقرار .. والأمن .. والهدوء ..

أما في ظل الوضع الحالي .. فلا توجد أي ضمانة لأي شئ

اللي عايز يطلع يوم 27 .. مفيش مشكلة ..

لكن نخلي المطالب واضحة .. ومختصرة .. وواقعية ومنطقية ...

أعتقد أن مصر في تلك المرحلة تحتاج إلى مجلس رئاسي مدني .. وهذه أولوية عظمى .. وقصوى ..

مصر تحتاج لفرض السيطرة الأمنية لأقصى درجة

مصر محتاجة الهدوء .. وعودة دولاب العمل .. للإصلاح ..

مصر محتاجة تكاتف الشعب كله .. وليس المثقفون فقط .. أو أصحاب الصوت العالي ..

الثورة المصرية .. هي ملك لكل طوائف الشعب .. مفيش حد يقدر يدعي أنه هو من قام بالثورة ..

[التونسى]

مليونيه يوم 27 مايو ..أه ... ثوره تانى... لأ

ضغط على المجلس العسكرى .. أه ... مواجهه وتخريب.. لأ

[الغريب]

يجب أن يتم إختيار مجلس رئاسي وطني .. مدني ... يتم إختياره لحكم البلاد

هذه فقط كفيلة بنسف السلم الوطني ، كيف سنختار مجلس رئاسي وطني في هذه المرحلة العصيبة التي تشهدها البلاد والغالب عليها صفة التخويين بين جميع أطياف الوطن

أرجو توضيح آلية عادلة تضمن لنا هذا

ولو تم توضيح هذه الآلية ، فمن سيأمن لك تنفيذها في ظل ما تشهده البلاد من حالة إنفلات أمني ، وحتى الجيش أنت نحيت مجلس قيادته وصاحب قراره عن موضعه ومكانته وسحبت ثقتك منه ، فمن يضمن لنا أنه لن يتحول كما تحولت الشرطة و "يبلط في الخط"

وحتى لو أخترت مجلس مدني وطني بنجاح ، فمن سيضمن لنا التوافق بين قياداته في وجهات النظر ، هذا طبعا لو تم إختيارهم بطريقة تعبر عن تطلعات الشعب

صراحة أنا أؤيد رأي الفاضل التونسي

مليونيه يوم 27 مايو ..أه ... ثوره تانى... لأ

ضغط على المجلس العسكرى .. أه ... مواجهه وتخريب.. لأ

[جويرية]

من كان يتخيل ..مجرد التخيل ..ان مبارك و زمرته الفاسده فى السجون الان محبوسين و القضاء يلاحقهم

و من كان يتخيل ان نرى رموز العمل الاسلامى المحترمين على شاشات الفضائيات و فى المساجد و الجامعات

بعد سنوات طويله من الكبت و الاعتقال و حجب صحيح الدين عنهم .

تخيلى ان محمد عبد المقصود يظهر على شاشه النيل و يقول قال الله و قال الرسول ..

لقد كان حلما و تحقق و خرج هؤلاء الى العلن و دخل الصوص الى اماكنهم الطبيعيه .

ما هما الجيش بيقولولنا كدة ، كفاية عليكم كدة ، هوه انتو تحلموا ان احمد عز و صفوت الشريف يبقوا في السجن

بس الفلوس مرجعتش ، الفلوس هربها المشير لبقية العصابة بتاعته

و المواطن العادي لم يستفيد من الثورة شئ

و افرجوا عن سوزان ثابت و زكريا عزمي

و كمان طالبين العفو عن مبارك ، و طالع بيان من الجيش بيقول احنا ملناش دعوة بموضوع طلب العفو ده

[أسد]

الضمانة الوحيدة لنجاح أي شئ في مصر الآن

هو حب الوطن ..

وإنكار الذات

والبعد عن الفرقة والإختلاف

وتعاون كافة الطوائف بدون إثارة أية خلافات

التوافق بين الجميع لاجتياز تلك المرحلة

لا توجد أية ضمانات أخرى ..

ولا يوجد مخرج غير ذلك لاجتياز ما نحن فيه

ولإدارة البلاد

[ام سلمي]

طب ما منعا للخبطة نخللي مليونية الضغط علي المجلس العسكري الجمعة دي 20 مايو ، تبقي مطالبها واضحة زي مثلا اقالة الجمل اللي طلبنا يرحل الجمعة اللي فات وما حدش سأل فينا ، وحل المجالس المحلية برضه ، و الاعتراض علي العفو عن اي حد من الفاسدين وعلي رأسهم مبارك ، ونهدد باعتصام مفتوح لحد ما المطالب تتحقق طالما المظاهرات لحد العصر ما بقاش المجلس العسكري ولا مجلس الوزرا بيسألوا فيها والميزة ان السبت برضه اجازة فا مش حيتعطل حد عن شغله لو اضطروا يفضلوا لبليل او للسبت نفسه

اما بقي ثورة 27 مايو ، اللي عايزة مجلس رئاسي ما نعرفش حيحطوا لنا مين فيه ودستور ما نعرفش مين حيعمله ، والشرطة العسكرية ممكن تتعرض لهم، اللي مش عايز ينزلها ما ينزلش خاصة ان ممكن المجلس العسكري يستجيب للمطالب يوم 20 وما يبقاش في حاجة ليوم 27 اصلا

تم تعديل 18 مايو 2011 بواسطة ام سلمي

[الغريب]

الضمانة الوحيدة لنجاح أي شئ في مصر الآن

هو حب الوطن ..

وإنكار الذات

والبعد عن الفرقة والإختلاف

وتعاون كافة الطوائف بدون إثارة أية خلافات

التوافق بين الجميع لاجتياز تلك المرحلة

لا توجد أية ضمانات أخرى ..

ولا يوجد مخرج غير ذلك لاجتياز ما نحن فيه

ولإدارة البلاد

لو قلنا أن حب الوطن سيضمن لنا العمل السليم بين أفراد المجلس الرئاسي الذي تقترحه ، وسيضمن لنا حفظ الأمن خلال مرحلة إختيار المجلس الرئاسي المدني المقترح

ولكن

أين آلية التنفيذ لإختيار مجلس رئاسي مدني ، يعبر عن أطياف الشعب ؟؟

[Mr MAGED]

عزيزي أرك

لماذا تحاول دائما أن تختزل الثورة في 6 أبريل ... هل كان كل من في التحرير من 6 ابريل

هل كانت 6 أبريل هي المنادي الوحيد للقيام بالثورة؟؟ ... اعذرني أري شيئا من الاستفزاز في معظم مواضيعك

وعلي قدر ما احترمت 6 ابريل وأعضائها ... أري الامور تتبدل عندما أقرأ كل تلك الامور المستفزة .. هل 6 ابريل هي حامي الحمي الان؟

لماذا الانقلاب علي المجلس العسكري الآن؟؟ ..

ألم يكن هو صديقكم الصدوق منذ يومين عندما سرب لكم الموافقات الضمنية للزحف عبر سيناء!!! فلماذا لم تزحفوا ؟

هل هذا هو السيناريو المنتظر .. ازاحة المجلس العسكري !! ثم ماذا بعد ؟؟ ما هو السيناريو الذي وضعته 6 ابريل لحكم البلاد وتسيير امورها ؟؟

الا تري في ذلك نوعا من الاستخفاف بالعقول ... واستغلالا لعواطف البسطاء .. الشعب المصري الان لا يفكر الا بالثورة والانقلاب

وعندما لا يجد ما ينقلب عليه .. سيبدأ بالانقلاب علي نفسه .. فهل هذا هو ما تصبوا اليه 6 ابريل .. أن تصل الامور لحد انقلاب الشعب علي نفسه ؟؟؟

[عنبو]

رغم انى عارف ومتأكد ان كل الازمات اليى بتحصل فى مصر مفتعله واليى يقول كلام غير كده يبقى

راجل بيطيخه وعامل زى النعامه ودافن راسه فى الرمال

فيه ضغوط جباره على الشعب المصرى علشان يسلم ويوافق بالصفقه اليى بيعرضوها عليه

وطبعا مافيش حد يقولى ان ده عفو لان قولت قبل كده ان العفو بيكون عن المقدره

لكن نظام سيب وانا اسيب ده ابتزاز رسمى

ولكن ......................................................................

مش عاوز اصطدم بالجيش ليس حباً فى الجيش ولا فى قيادته

ولكن من اجل مصر فقط لا غير

انا مع الضغط على الجيش لتنفيذ مطالبنا والتهديد بعصيان مدنى ولكن الوقوف فى مواجهه مع الجيش

معناه هدم مصر ومافيش حد يقولى اصل جيش مصر ومعرفش ايه والكلام اليى ميأكلش عيش

واليى خدم جيش يعرف معنى الكلام ده قوى

علشان كده بقول نضغط على الجيش وعلى المجلس العسكرى لتنفيذ مطالبنا

تحياتى

عنبو