الأحداث الحالية و تشتيت الذهن المتعمد..

[Alattar]

السلام عليكم

حالة كبيرة و عجيبة من تشتيت الذهن..اللي حاسس انه أصبح متعمد..أصابت الشعب المصري..طبعا أنا مش موجود في مصر عشان أحكم علي الشعب كله..لكن أحاول أن أبني وجهة النظر علي أعضاء المحاورات علي أساس أنهم ان شاء الله يمثلون فئات مختلفة من المصريين

أنا لا أتحدث عن أشخاص وهميين..اللي هقوله دلوقتي ده بينطبق علي ناس كتير .. و أنا أولهم

أشعر ان فيه حالة من تشتيت الذهن المتعمدة تحدث لنا الآن حتي لا يستطيع أي منا اتخاذ قرار حازم..و يظل مشتتا لفترة ولا يعرف ماذا يفعل

الحالة دي بدأت بعد الخطاب الثاني لمبارك و الذي أعلن فيه عن عدم ترشحه للرئاسة مرة أخري..و ما أصاب المصريين يومها من انقسامات..و لكن و لله الحمد الناس كان عندها من الوعي ومن عدم الثقة في كلام رجال النظام ما يكفيهم لعدم تصديق كلام الرئيس السابق

بعد الثورة..بدأت عدة انقسامات..هل نحاكم الرئيس..أم نعفو عنه؟..

طيب..بدأنا المحاكمة..و كثير منا رفض فكرة المحاكم الاستثنائية..و قلنا أنها ستكون بقعة سوداء في ثوب الثورة الأبيض..

و أنا كان رأيي..ان حتي لو ما كانش فيه محاكم استثنائية..علي الأقل يكون فيه استعجال لمحاكمة رمزو النظام..لتهدئة الشعب الثائر..و لإشعاره بأن الثورة لم تغير أشخاصا فقط..و أنها اسقطت بالفعل نظاما بأكمله..و أنه ان شاء الله لن يعود مرة أخري بوجوه جديدة..

لأن مش معقول..يبقي واحد من القضاة الموالين للنظام السابق..و يقوم هو بإصدار أحكام عليهم..و ليته فعل...إلا أنه كان يتحجج بكلام فارغ..من نوعية..القاعة صغيرة..و هنأجل محاكمة العادلي لحد ما نشوف قاعة كبيرة شوية..و تأجيل للمحاكمات بشكل مستفز..

و برضه مش معقول ألاقي القضاه المحترمين مش فاضيين لمحاكمة رموز النظام عشان عنده حالة سرقة..ولا طلاق..ولا قضية رؤية..و أنا لا أقلل من ظروف الناس..ولا أحتقرها..ولكن أي قاضي ممكن يحكم فيها و مش محتاجة جهبذ..يبقي نسيب القضاه الكبار..أصحاب النزاهة و الخبرة للمحاكمات التي ستهدئ من غضب الشعب الثائر

و بعدين قلنا..لا بد من احترام أحكام القضاء..لأننا لو رفضناها يبقي بنرفض الشرعية..و النظام..و لازم نحترم أحكام القضاء كخطوة أولي علي طريق بناء دولة عادلة بإذن الله تعالي

و لكن اللي بيحصل الفترة دي..غريب جدا..

رموز النظام بياخدوا افراج يوما بعد يوم..و المحاكمات بتتأجل لأسباب تافهة و غير منطقية و أحيانا غير معروفة..و كأنها سر حربي..

لو اعترضنا عليها و قلنا لازم نعمل ثوة تانية..ناس هتقول اننا كده لا نحترم أحكام القضاء..و اننا بنظلم الناس اللي أفرجوا عنها دي..لأننا ما نعرفش ظروف و ملابسات القضية زي النيابة و القاضي اللي أفرج عنهم

ولو قلنا نحترم أحكام القضاء..و نبدأ نبني البلد..لأنها فعلا محتاجة مجهود جبار لإنقاذ ما يمكن انقاذه..هيفضل عندنا خوف داخلي ان دي كلها تكون تمثيليات..و ينضحك علينا تاني..و البلد اللي عمالين نبنيها من جديد دي ما نستفيدش أي حاجة منها..و خيرها يروح لغيرنا زي ما كان بيحصل قبل كده

حالة من الحيرة الشديدة..و تشتيت الذهن..الذي أخاف أن يكون متعمدا..يكي ينقسم المصريون..و تدور الدائرة عليهم

كتبت موضوع منذ فترة و كان اسمه

بين بن جوريون مؤسس دولة اليهود..وثورة 25 يناير

و بإختصار علشان ما اطولش أكتر من كده..ان بعد ما اليهود خلصوا جهادهم المقدس و أخذوا أرض فلسطين..سمع بن جوريون و هو يسير في الشارع..يهودي سوفيتي و يهودي أمريكي يتحدثون..و هذا يقول لذاك صعدنا الفضاء قبلكم..و التاني يرد عليه و احنا متقدمين عنكم في كذا و كذا

فشعر أن اليهود اذا لم يكن لهم عدو و بدأوا يشعرون بالاستقرار انقسموا فيما بينهم..و بدأ كل منهم يتكلم بقوميته التي جاء منها..و ليس القومية اليهودية..أننا كلنا يهود و يجمعنا دين واحد..لأ..أنا أمريكي و انت سوفيتي و هذا ألماني

فقال حينها شعرت أننا دولة لا نحيا ولا نتحد الا بوجود عدو..فأخذنا عهد علي أنفسنا..أنه لا بد من وجود عدو لكي نحيا..ولو لم يكن هناك عدو..أوجدنا عدو

فهل هذا المثل بينطبق علينا أيضا؟؟