اتخاذ الاعلام مصدر معلومات طريق فاشل

[pink rose]

ملاحظة من ساعة الثورة و ان كل الناس واخدة الاعلام مصدر اساسي للمعلومات

و دا في رأيي مصيبة كبيرة قولولي ليه

خبر ينشر في المصري اليوم عن موضوع معين ويتنشر الخبر على الفيس

كم التعليقات المهولة و اللي في اغلبها بيبقى يا اشعال فتنة او سب في الحومة او المجلس العسكري

يطلع نفي للخبر

بمعنى اصح الخبر كااااااااااااااااااذب

تطلع نفس الجريدة تنشر خبر بنفس السيناريو فرقعة اعلامية و يتم تكذيب الخبر

المفروض نعمل ايه بقى؟؟؟؟؟؟؟؟؟؟؟؟

اننا و بكل بساطة ما نصدقش اي خبر من الجريدة دي نهائي لانهم مش هدفهم الاعلام لاا هدفهم الفرقعة و التوزيع و المخفي اكتر الهدف توليع الشعب لأغراض لا يعلمها الا الله

المصيبة بقى انك تلاقي الناس كل ما خبر ينشر بتعمل نفس الحاجه تصدق و تشد في شعرها و يطلع كذب

فين العقل بقى في اللي احنا بنعمله

معلش اللي بيقول لما جرنان يطلع خبر كاذب المفروض المجلس العسكري او الحكومة تتصرف و تحاكمه

على اساس ان مافيش حد هايطلع يستهبل علينا و يقولك تخريص الالسنة اللي كان ماشي زمان و تكميم الافواه انتهى و حرية الصحافة فين

و تلاقي حقوق الصحفيين تطلع تستهبل هي كمان و تقول بيعتقلوا الصحفيين

و اللطيف ان الناس برضو هاتصدق و تلاقي اللي يطلع يقولك صح بيخبوا ايه بيسكتوا الناس اللي بتتكلم ليه و ندور في الحلقة دي

اللي اعرفه ان جريدة بتكذب و بتتعمد الكذب يبقى انا اللي اقاطعها

نفسي ناخد موقف ايجابي بقى في حياتنا و لو لمرة واحدة بس

عن نفسي لما لقيت المصري اليوم و اليوم البارد و الدستور شغالين في نفس الوقت في الحملات المضللة عن السلفيين لغيتهم من عندي من على الفيس

لان اللي بيكذب استحالة اقدر اصدقه تاني

ياااااااااااا ناااااااس يا هو ارجوكم كفاية تصديق للجرايد و البرامج اللي بتكذب علينا

برامج التوك شو قبل الثورة كانت بتسد نفس اللي جابونا و بتسود الدنيا في وشوشنا و تشتم في الحكومة و بالتالي الريس بس بالمتداري و اول ما مات حفيده طلعوا نهنهوا و لبسوا اسود و هاتك يا عياط

هما دول نفسهم دلوقتي اللي رجعوا يسودا الدنيا تاني في وشوشنا و قلبنا على الحكومة و المجلس العسكري

مش لمصلحة غير انهم ياخدوا فلوس و يعملوا توزيع و يقبضوا ملايين

بارجوكم تتحروا الدقة و تاخدوا معلوماتكم من مصادر موثوق منها قبل ما يخلوكم ترجعوا تكرهوا البلد و تولعوا فيها انتم بايدكم المرة دي

ارجوكم كونوا ايجابيبن و اقروا برامج الاحزاب و انضموا لحزب هما دول اللي عندهم معلومات اقرب للحقيقة لانهم متابعين للموقف عن قرب

تم تعديل 18 مايو 2011 بواسطة pink rose

[عطر الجنة]

المشكلة حنستقى معلوماتنا منين

[mhamed]

نريد فعلا رد فعل على اى من هؤلاء بغلق جريدة او غلق قناة تنشر اكاذيب او قتنة

حتى يخاف الباقى

كنت اقرأ دائما المصرى اليوم قبل الثورة الكل الان يتسابق لكى يعمل فرقعة فى السوق ويحقق مكاسب اكثر

ولو بالكذب سبحان الله دائما اسأل من هم اصحاب هذه القنوات وهذه الصحف هل لهم مصلحة ام يبحثون عن المكسب وفقط

[rewsha]

احيكي يا بينكي (طبعا مسموح لي اقول لك كده)

احيكي عل الموضوع ده

انا فعلا من فتره .......حوالي 5 ايام كده وانا كنت كتبت في احد مشاركاتي .

اني ما بقيتش اصدق اي خبر خالص الا لما يتذاع على التلفزيون على الاقل .اما موضوع الجرايد ده

بقى مشروع فاشل

لكن احب اقول نقطه

الاخبار اللي بتتكذب كل شويه في الجرايد دي ...اغلبها عباره عن ...بلالين اختبار

وكلنا اخدنا بالنا من كده

لما يحبوا يجسوا نبض الشعب .....يسربوا لهم الخبر عن طريق الجرايد

لو الناس سكتت ...يبقى خلاص

لو الدنيا قامت وقعدت ....يبق الخبر يتنفي ويتكذب والمجلس العسكري يروح نازل لنا رساله رقم(.....)

ينفي فيها ويقول ان مالوش دعوه باللي بيتقال ويدعوا الناس انها تتحرى الصدق والدقه في المعلومات

بصراحه انا كل يوم كنت بادخل اول باول اخد الاخبار الجديده من الجرايد

دلوقتي نفضت لها تماما

وباخد الاخبار من التلفزيون بس ...اقوم ساعتها اعرف ان كان في الخبر الفولاني ...وتم نفيه

بدل ما اوجع دماغي بالخبر طول اليوم واحرق دمي ...وبعدين اسمع النفي بتاعه بالليل

باختصر واسمع الخبر ونفيه مره واحده

تحياتي

[ذهبية]

للاسف الاعلام بتاعنا الان او من سابق لا يتسم بالحايدة ابدااا

قبل الثورة كان كلة مرسخ للتهيليل و التبجيل للنظام و اعضائة

و بعد الثورة كل هدفة بث حالة من الفوضى و الهياج لبعض الاطراف حسب المصلحة

يعنى اللى احنا فية الان مش جديد

[pink rose]

نريد فعلا رد فعل على اى من هؤلاء بغلق جريدة او غلق قناة تنشر اكاذيب او قتنة

حتى يخاف الباقى

كنت اقرأ دائما المصرى اليوم قبل الثورة الكل الان يتسابق لكى يعمل فرقعة فى السوق ويحقق مكاسب اكثر

ولو بالكذب سبحان الله دائما اسأل من هم اصحاب هذه القنوات وهذه الصحف هل لهم مصلحة ام يبحثون عن المكسب وفقط

خلي بس عصام شرف يطلع يقفل جرنان و انت تشوف اللي هايحصل

اول رد فعل هايبقى مليونية تحريرية لاقالة عصام شرف بدعوى حرية التعبير

و الله الحل لازم يكون مننا احنا

مقاطعة الجرايد الكاذبة و توعية الناس لعدم تصديقهم

[ابراهيم عبد العزيز]

كلامك صحيح يا بينك روز طبعا

لكن

لا يمكن باى حال من الاحوال القاء اللوم كله على المواطنين فى انتشار الشائعات

يا اخت بينك روز المواطن عندما يجد نفسه غير قادر على الحصول على المعلومة من مصدرها الصحيح يقوم بالبحث عنها فى المصادر الاخر حتى ولو كان يعلم فى قرارة نفسه انها غير صحيحة

الحل يا بينك روز هو الشفافية فى التعامل وأن يكون هناك يوما محددا من كل اسبوع مخصص للمجلس العسكرى ويوما اخر للحكومة ويكون هذا اليومكمؤتمر صحفى يذاع على الهواء يجيب فيه المسئولين عن تساؤلات الناس فى الشارع ويخبرون الناس بالأخبار اول بأول وبالحقائق

صدقينى وقتها ستختفى الظاهرة التى تتكلمين عنها , اما غير ذلك فسيستمر المواطن فى الاتجاه لاى جهة اعلامية فى سبيل أن يروى ظمأه للمعرفة .

[لماضة مصرية جدا]

السلام عليكم و رحمة الله و بركاته

بصي يا ريمو يا اللي متنكرة جوه الوردة البينكي

صباحك رضا يا رب

قبل ما نجلد اعلامنا الظريف اللطيف اللي مصر انه يعيشنا في فقرات اليوم المفتوح و ناسي خلاص ان احنا شعب حفظنا العيال كبرت و حفظنا مدرسة المشاغبين و الانكي بقينا فاهمين حتي افيهات و اسقاطات فيلم طيور الظلام

و مبقاشي فيه اي بارقة امل انه يتغير

و ع فكرة دي مش مشكلة في مصر بس

دي في العالم كله

حتي امريكا نفسها

الاعلام "مسيس" و اللي بيدرس اعلام بيعرف كويس اوي ان مافيش حاجة اسمها اعلام محايد..غير انك بقي تلفحي كاميرا علي كتفك و تنزلي مع اتنين تلاتت من اصحابك و تصوري بنفسك و تعرضي وجهة نظرك و برضه هتفضل وجهة نظرك انتي الخاصة و سط طوفان الافكار و القوي المتناحرة

استاذي قالي حاجة بسيطة جدا

بدل ما الفح الكاميرا و انزل و صوتي يتنبح...طب ما عقلك اهوت ربنا مركبه بين كتافي

بس بدل الطاقة اللي عمالة تروح في المناهدة مع حاجة عايزالها قيمة عشرين سنة ضوئية عشان تتغير...0و حتي لو اتغيرت برضه عمرها ما هتكون محايدة ابدا

يبقي الحل ان دايما يكون عندك اهداف واضحة تنشني عليها...و تفكري و تحللي و تفلتري كل الطوفان اللي هيخش جوه عقلك دوت في ضوء الافكار او القناعات دي

يمكن تمنعي نفسك من الفرجة ع التلفزيون بكبسة زرار لكن متخليش اي حد يدوس علي عقلك و يطفيه

لازم العقل يكون في حالة استنفار و يقظة دايما

انتي عايزة ايه

بتدوري علي ايه

احنا دلوقتي الثورة لما قامت

قالت

كرامة..حرية...عدالة اجتماعية

يبقي هو دوت المقياس اللي راح نوزن بيه كل واحد طالع و بيزعق في ميكرفون

بتقولي نقرا برامج الاحزاب

المشكلة اني فعلا مبقتش عارفة يعني ايه اصلا حزب و يعني ايه ائتلاف و يعني ايه شلة صوحاب قاعدين مع بعض

هل الحرية ان يبقي عندي عشرين حزب...و خمسميت ائتلاف!

و اذا كانوا كلهم بيطالبوا بالتلات كلمات اللي فوق

يبقي ايه لازمت "الاسهال" الحزبي دوت

عقلي لسه عمال يفكر و يسال

و هيوصل لحل باذن الله

اللي هيريحني انا و مش شرط هلزم بيه غيري

صباحك

حرية

كرامة

عدالة اجتماعية

[pink rose]

خبر عاجل : استدعاء رئيس تحرير الشروق و اتنين صحفيين للنيابة العسكرية لنشرهم اشاعة العفو عن مبارك

انا اهو و انتوا اهو ان ما طلع ناس بكرة يدافعوا عن الصحفيين دول و هايقوموا الناس برضو على المجلس العسكري

الناس العاقلة هاترحب بالقرار دا

الناس المجانين هايعارضوا القرار دا

الحوار دا بيفكرني بجحا و حماره