البحث عن كارثة...!

[بهية]

هما كلمتين...

تماما كما أن نفسك –يابني آدم- ان لم تشغلها بالحق شغلتك بالباطل؛ فشعبك –ياوطن-ان لم تشغله بالثورة شغلك بالطائفية

والحقيقة انه ربما نحتاج أحيانا –أو كثيرا- لاستبدال كلمة "ثورة" هذه بكلمة "كارثة" ...

لكن بما ان ربنا تاب عليا من بعد يوم 25 يناير وقررت من ساعتها اتفاءل رغم أنفي وأنشكح للحياة وأقلع عن المفردات السوداوية تماما –احم- أقصد يعني قدر الامكان؛هنمشيها "ثورة" مؤقتا ...والأهم من كدة اني مش عايزة أسد نفسك من أول سطرين كدة ع الصبح وأبتديها بكلمة "كارثة"

لا أدري لماذا تلح عليّ بشدة هذه الايام -الى درجة الزنّ بطريقة الكريشندو التصاعدية - المقاطع الأولى من قصيدة (التحالف) للعبقري نجم الذي قال فيها:

يعيش أهل بلدي وبينهم مفيش...

تعارف يخلي التحالف يعيش

تعيش كل طايفة

من التانية خايفة

وتنزل ستاير بداير وشيش...

بغض النظر عن الظرف الزمني والموضوعي الذي دفع نجم لكتابة هذه القصيدة في أواخر ستينيات القرن الماضي ،سيبك من باقي القصيدة وركز على أول تلات اربع جمل هما دول اللي فيهم الزُبَد ...

هيييه قدييييمة...ماطول عمرنا كدة وطول عمر كل طايفة من التانية خايفة...ايه الجديد يعني؟!

لا معلش... دلوقتي مينفعش تبقى قديمة...طالما الحالة دي وجدت بعد الثورة-بعد البعث- مبقتش قديمة .....دي بقت حالة حرجة محتاجة تدخل جراحي فوري

السؤال بجد...ياترى البلد دي ليه مابيعيشلهاش تحالف؟!

وياترى قدرنا ان نحيا على حافة بركان ثائر حتى نصل الى درجة الحرارة الحرجة اللازمة لدفع الطوائف الى تعارف (مبتسر اضطراري) ثم تحالف (مؤقت اضطراري برضو) لحد ما البركان يخمد والحرارة تبرد وترجع ريما لعادتها القديمة ؟

بالبلدي كدة: محتاجين يعني الدنيا تولّع عشان(نضطر) نمسك في ايد بعض ...نتحامى في بعض...ونبطّل نخاف من انعكاس صورنا في المراية ونكِشّ من ضلّنا ع الحيطة؟!

أقول قولي هذا وانا أتذكر ايام الميدان ...وأتذكر صوره الملحمية التلاحمية اللي من كتر ماهي حقيقية قوي وصادقة زيادة عن اللزوم تبدو الآن وكأنها وهمية تهييسية !

انا مش جاية أمارس الندب ومصمصة الشفاة واللي بقى هواية اعلامية اليومين دول ...ولا جاية أغني ( للتحالف الشعبي) بحسرة وأقول له : كلموني تاني عنك ...فكروني تاني بيك ...يا حسرة قلبي!

انا جاية أفكر معاكم في حل بجد وبحق وحقيق في موضوع قتل بحثا، ولو فشلنا كلنا في ايجاد ضالتنا من حلول ، فأنا عندي حل جديد-صحيح مش عارفة آلية تحقيقه- بس دة حل نوفي ثوري لوذعي غير تقليدي وفي نفس الوقت الحل دة في صورة اعتراف مخجل قلته من كام شهر قبل الثورة ...بس مضطرة أكرره تاني ..استحملوه واستحملوني معلش

الاعتراف هو: بعترف وأنا بكامل قواي الوطنية اني ضبطت نفسي متلبسة كذا مرة –لااراديا والله- بالرغبة الشديدة أحيانا في حدوث كارثة موحّدة-بكسر وفتح الحاء- لانقاذ هذا الوطن مما هو مقبل عليه لو استمر هذا الحال كما هو ...

ايوووون انت فهمت صح ... أنا ساعات بحس ان الكارثة هي الحل ...بل وبيبقى عندي رغبة شديدة في كدة كمان... الكلام واضح...

وقبل ما حد يحدفني بحاجة أو يتهمني بإني "مش عارف ايه" أو اني اكيد "تيييييييييت"... بقول لو فشلت كل الحلول وفضل الحل الوحيد اللي هيرجع المصري مصري أولا ويبطّل استنبات عدو من بذرته وأرضه ودمه هو الكارثة.....اذن فلتكن الكارثة ...وإلا.... ستكون الكارثة ! (وكارثة عن كارثة تفرق...واخدلي بالك ؟)

طيب على غرار فيلم البحث عن فضيحة..ياترى نعمل زي عادل امام و ندور للبلد دي على كارثة حتى يحدث المراد من رب العباد والشعب يرجع يتعجن في بعضه غصب عنه؟ أم نحلها سلمية...سلمية وكفى الله المؤمنين شر الكوارث(بس ازاي؟...ازاي؟؟ ) ؟؟ ولا نقعد نحط ايدينا على خدنا وننتظر حدوث كارثة من نوع آخر؟؟

بمناسبة الأفلام ..تذكرت الآن مشهد سناء جميل في فيلم الزوجة الثانية عندما وضعت نفسها تحت قضبان القطار عملا بنصيحة الداية لعل المعجزة تتحقق وتحمل بولي العهد ووريث العمدة...

فهل نفعل ببلدنا المثل -ويا صابت يا خابت- علّها تحبل بجنين سيولد ويعرف نفسه جيدا ولن يخشى من صورته في المرآة أو (يكشّ) من ظلّه على الحائط ...وسيعرف امه جيدا ومقامها ...والأهم انه هيكون نبيه وشاطر عشان يقدر يدرك الحقيقة العلمية اللي بتؤكد استحالة فصل اللحم عن العظام مع الابقاء على الانسان حيا !!

(يا نار في قلبي والعة من غير فحم....ازاي هنفصل عضمنا م اللحم؟!...القلب واحد صابه نفس السهم ...سوا غلابة جوا نفس المعجنة!)...متاخدش في بالك...دة فاصل غنائي تجاهله ان أردت !

ايه رأيكم دام فضلكم...ماهو مينفعش نقوم بثورة تاني تلمّنا وتخلينا نشوف شغلنا على حق ربنا من غير ما نمقق عينينا في خانات ديانة و كارنيهات أحزاب خلق الله عالفاضي والمليان ... الثورة قامت وانتهينا...هي صحيح الثورة منهتتش طبعا بس الحالة الثورية التلاحمية انتهت ورجعت كل طايفة من التانية خايفة وعاملة فيها السبع رجالة وهي بتترعش من جوة، محدش يقول لي ان دة مش موجود ...لأ دة موجود قوي...

معقول يعني ممكن نوصل للمرحلة اللي نتمنى فيها حدوث الكارثة اللي تخلي كل طايفة -وطايفة هنا اعني بيها دينيا وفكريا وعرقيا-متلاقيش غير ضهر أختها اللي خايفة منها عشان تتحامى فيه من أي خوف (غصب عنها مش بمزاجها) ؟!

ولا نقعد نحط ايدينا على خدنا وننتظر حدوث كارثة من نوع آخر مش هتقضي على الطائفية وبس وانما هتاخد في سكتها الجمل بما حمل ونبقى ريحنا المريض خالص مالص برصاصة رحمة بلا دوا بلا عملية بلا وجع قلب ؟؟

ولا إيه؟؟؟؟؟

انا رأيي باختصار بليغ- لحد دلوقتي- وحتى اشعار آخر هو : (إيه )

انت بقى رأيك ايه؟؟

___________________________________________________________________

"كُتب بتاريخ 28-4-2011 قبل أحداث امبابة "

تم تعديل 19 مايو 2011 بواسطة بهية

[التونسى]

مقال لذيذ ... وان كنتى جبتينا معاكى ..يمين وشمال.. وشرقتينا وغربتينا .. وطلعتينا ونزلتينا.. ((على اساس انك انتى اللى كتباه لانى مش شايف كلمة منقول)) ..

مش معاكى ابدا فى وصف ثورتنا بالكارثه .. الا اذا كان قصدك انها كارثه.. بل مصيبه سوده ومقندله.. بالنسبه لمبارك بابا وعائلته ..وعصابته ..واعوانه.. وزبانيته.. واشياعه ..واتباعه ..ومريديه . وكده يعنى .. الكارثه ممكن تقوليها عاللى حصل فى ليبيا وسوريا واليمن ..انما عندنا ممكن تسميها(( ثوره ربانيه)) او ثورة (إخلاص النيه) .. وكده يعنى

معاكى اننا شعب لا يتحالف الا فى الشديد القوى .. احنا كدا ..شكلنا كده ...خلقتنا كده .. مينفعش نكون غير كدا((مع الاعتذار لنجيب الريحانى))

اهم شئ خليكى متشبثه بحبل التفاؤل .. مين كان يصدق .. مييييييييييييييين ..كل يوم هو فى شأن

[بهية]

مقال لذيذ .Posted Image.. وان كنتى جبتينا معاكى ..يمين وشمال.. وشرقتينا وغربتينا .. وطلعتينا ونزلتينا.. ((على اساس انك انتى اللى كتباه لانى مش شايف كلمة منقول)) ..

مش معاكى ابدا فى وصف ثورتنا بالكارثه .. الا اذا كان قصدك انها كارثه.. بل مصيبه سوده ومقندله.. بالنسبه لمبارك بابا وعائلته ..وعصابته ..واعوانه.. وزبانيته.. واشياعه ..واتباعه ..ومريديه . وكده يعنى .. الكارثه ممكن تقوليها عاللى حصل فى ليبيا وسوريا واليمن ..انما عندنا ممكن تسميها(( ثوره ربانيه)) او ثورة (إخلاص النيه) .. وكده يعنى

معاكى اننا شعب لا يتحالف الا فى الشديد القوى .. احنا كدا ..شكلنا كده ...خلقتنا كده .. مينفعش نكون غير كدا((مع الاعتذار لنجيب الريحانى))Posted Image

اهم شئ خليكى متشبثه بحبل التفاؤل .. مين كان يصدق .. مييييييييييييييين ..كل يوم هو فى شأن

أهلا بحضرتك ...ما هو انا اللي كاتباه فعلا عشان كدة الموضوع خالي من كلمة "منقول" :)

يا سيدي الفاضل ..و هل وصفت ثورتنا العظيمة بالكارثة؟!! حقا أحزنني ان هذا المعنى قد وصلك دون قصد مني ...ثورتنا هي ثورة فحسب ،ولا توصف الا بهذا الاسم ....( ثورة زي ما الكتاب بيقول)... هي أطهر وأنبل وأجمل وأثمن ما حدث وسيحدث في تاريخ وحاضر ومستقبل هذا البلد

ما قصدته من المقال باختصار هو انني أخشى ما أخشاه ان يكون السبيل الوحيد لاستعادة (التحالف) الذي رأينا في بدايات الثورة واختفى في ظروف غامضة هو (الكارثة ) فحسب كبديل (للثورة) ....أصله لا يعقل أبدا ان تكون طبيعة هذا الشعب هو انه لا يتحالف الا في الثورات أو الكوارث!!....(وشتان بين المعنيين)

ولمّا كانت الثورة ليست بالحدث المزمن أو المتكرر في أي وطن ، فأخشى أن يأتي اليوم الذي نرفع فيه شعار (الكارثة هي الحل) بل ونتمنى حدوثها -كما اعترفت انني اتمنى هذا احيانا- حتى يلتئم شتات هذا الشعب!

أشكرك على جرعة التفاؤل يا استاذنا ...فهو حقا وقودنا الوحيد الملرحلة القادمة

كل التحية

تم تعديل 20 مايو 2011 بواسطة بهية

[Om Zayd]

حمدا لله على سلامتك يا بهية- بحب الاسم ده على فكرة

طول ما في مجموعة مصرة متتصارحش مع نفسها و مع غيرها و بتبص بعين واحدة... للاسف مفيش كارثة هتنفع

احنا دخلنا حرب كاااام سنة.. لما الامور تهدا .. يعود كل ما كان تم تجاهله و التسامح فيه ليصبح خطايا لا تغتفر

ليس من الشعب ككل .. بل من "ذوي أغراض" .. و بسرعة يلعب الاعلام دوره

الناس العادية ليس عندها مشكلة في العيش المشترك .. لكن بالتأكيد تراكم الاحداث و "التصريحات " صنع جوا من التوجس و استعداد اكبر لتصديق السلبيات

الحل .. المصارحة في ظل دولة قوية

إعلام واع و مسئول

[Om Zayd]

ممكن ناخد مثال من انجلترا

او المملكة المتحدة ككل

الانجليز بيتريأوا على الويلزيين و الاسكتلنديين و الايرلنديين -و احيانا على نفسهم-.. الويلزيين شايفين انهم الانجليز الاصليين .. الاسكتلنديين معتزين باصولهم و ثقافتهم المختلفة.. الايرلنديين شايفيهم محتلين

تقعدي مع حد من منطقة معينة .. و الكلام يجيب بعضه .. تلاقيه بيتريأ على اللي من المناطق التانية جوة انجلترا او براها

زي عندنا ما بنطلع نكت على المناطق المختلفة

لا و كمان زاد عليهم المهاجرين من مناطق مختلفة من البلاد اللي احتلوها قبل كده و اوروبا الشرقية

الكلام ده موجود حتى في الإعلام.. لكن بحدود

لو حد زودها و وصلت للإساءة و الناس اشتكت منه

عادة بيتفصل من شغله .. مفيهاش هزار

في الدين و الاصول العرقية .. نفس الكلام

ليه؟

قانون يطبق على الكل

و تغليب المصلحة العامة

شوفي حتى في الافلام .. بيركزوا على صورة إيجابية بل سياحية لبلدهم

لدرجة الناس في اماكن كثييير متخيلين ان انجلترا لوردات و حفلات و ارستقراطية و تقاليد

عذرا لو كنت خرجت عن الموضوع

[ابراهيم عبد العزيز]

لا نحتاج لكارثة ولا شىء يا أخت بهية

حالة الطائفية والتشرذم التي يظهر عليها المجتمع المصري منذ سنوات ثبت بالدليل القاطع والبرهان الساطع أنها يتم زراعتها وتغذية المجتمع المصري بها بفعل فاعل ومع سبق الاصرار والترصد

بل بالعكس لاعتقادك فالشعب المصري معروف عبر تاريخه بالتوحد والترابط

لاحظي أن فى الأيام ال 18 لثورة 25 يناير لم نسمع عن واقعة طائفية واحدة مع أنه لم يكن هناك اي وجود لأي رجل أمن والسبب هو أن فى هذه الأيام انشغلت اليد التي كانت تشعل هذه النعرات فى الشعب المصري بما هو أهم وهو الحفاظ على كيانها , وبمجرد أن إبتعدت هذه اليد ظهر جوهر المعدن المصري

نحن لا نحتاج لكارثة حتى نتوحد , ولكن نحتاج فقط لأن تبتعد الأيادي الخبيثة عن العبث بهذا المجتمع

تم تعديل 15 سبتمبر 2011 بواسطة ابراهيم عبد العزيز