سؤال محيرنى

[نوران]

السلام عليكم ورحمة الله وبركاته

كنت بتصفح المنتدى وقرات شويه فى موضوع الهجرة لكندا

لقيت اني بالنسبه لي فكرة الهجره دى مستحيلة خالص. . . ليه؟؟

دي بعض الاسباب على سبيل المثال لا الحصر:

-درجة الحرارة في الشتاء هناك بتوصل ل30 وممكن 40 تحت الصصفر -عادى يعنى- وانا فى شتا مصر بتغطي ببطانيتين ولحاف قطن 50 كيلو وبرضه بتكتك!

-مشكلة الفراخ واللحوم :هل تم دبحها حلاااال ام لا

يعنى هناكل وللا لا؟

لقيت الاخوة المهاجرين واقعين في خلاف جامد كالاتي:

.كل من المحل اللى كاتب حلال حتي لو مش دابح حلال هيبقي الدنب عليه(ملحوظه لاب توبي ما بيكتبش دال قصدى زال)!

.كل من الجزاره اللي اصحابها يهود علشان دول بيدحوا مش بيضربوا المواشي بالنار ولا بيضربوها علي راسها بالبلطة زي الجزارين الكنديين!

.الحكومه الكنديه بتدبح فراخ للمسلمين هناك علي الشريعة الاسلامية بس رفقا بالفراخ بتكهربهم الاول عشان يدوخوا ويفقدوا الوعي !! ودي كمان فيها اشكال لان فيه شوية فراخ بتموت من الكهربا قبل الدبح وبما انك مش هتعرف تفرق ايهم مات مدبوح وايهم مات متكهرب يبقي الاكل من الفراخ دي حرام!!!

.خليييك نباتي وريح دماغك!!!

وانا مش ممكن ابقي نباتية

-الاخوه اللي بيهاجروا ما بيكونش فيه عقد عمل مستنيهم دول بيروحوا يدوروا علي شغل ويا سلام بقي لو المهاجر رايح الجزء الفرنسى من كندا (كيبيك)

وما يعرفش كلمتين فرنساوي علي بعض زي حالاتى كده طبعا لازم ياخد كورسات فرنساوي الاول مش عارفة كام شهر كده وبعدين ي دور بقي علي شغل

-ازاي بقي هتربي ولادك وتحافظ عليهم هناك لما يكبرو ويبقوا علي اعتاب سن المراهقة؟؟

لقيت اقتراحات من الاخوه المهاجرين كالاتي:

.لازم يكون عندك عقليه شطرنجيه اكروباتيه تحسب خمسين خطوة لقدام!! وخليك دايما مصحصحلهم!!!شوف مصاحبين مين وبيعملوا ايه

.او لما يوصلوا اعدادي خدهم على مصر وارجع بيهم على الجامعة في كندا يكونوا كبروا وعقلوا!

-طب فيه بنوك اسلاميه؟طب فيه مدارس عربيه واسلاميه؟طب لو فيه هل يعني متوفره وقريبه؟

-طب تعرفوا ان كيلو الجبنه الرومي هناك ب50 دولار ويمكن اكتر!

طب تعرفوا ,ولا مؤاخده يعنى, ان ما فيش شطافات في الحمامات هناك!!!

بس بصراحة الناس اتصرفوا ماشاء الله عليهم اشتروا حاجه زي مسدس رش وركبوه علي حنفية الدش او الحوض وشغالة تمام!

دي بعض عيوب الهجرة مش كلها

طبعا اكيد فيه ميزات كتير

وفيه ناس كتير ربنا بيوفقها هناك بعد صبر وتعب في الاول وبيقدروا يتاقلموا علي العيشه هناك \خصوصا البرد!

بس سؤالي ليه لما كل حاجة في الدنيا فيها ميزات وعيوب ليه اللي بيقرروا يهاجروا بيشوفوا عيوب بلدنا من خلال عدسه مكبره ويتجاهلوا عيوب الهجره ويشوفوها صغيرة؟؟

في النهايه بدعي لكل الناس بالتوفيق والعيش بسعاده في كل مكان

نفسى ولاد بلدنا ما يسيبوش بلدنا

نفسى نلاقي في بلدنا كل اللي بنحلم بيه

نفسي بلدنا تبقي احسن بلاد العالم

مع تحياتي.. والسلام

.ملحوظه 1: انا وجوزى وعيالي عايشين في السعودية !!

بس طبعا هنستقر في مصر قريبا ان شاء الله.

ملحوظة 2:انا طبيبة جلديه وجوزي باطني وتحت امركم في اي استشاره مجانيه

[shawshank]

السلام عليكم ورحمة الله وبركاته

...

بس سؤالي ليه لما كل حاجة في الدنيا فيها ميزات وعيوب ليه اللي بيقرروا يهاجروا بيشوفوا عيوب بلدنا من خلال عدسه مكبره ويتجاهلوا عيوب الهجره ويشوفوها صغيرة؟؟

وعليكم السلام ورحمة الله وبركاته

أكيد حضرتك تعرفي إن

The grass is always greener on the other side of the fence

فالمهاجرين كندا بعد فترة أنا متأكد إنهم بيبدأوا يشوفوا ميزات مصر ويتجاهلوا عيوبها ويشوفوها صغيرة، ويشوفوا عيوب كندا من خلال عدسة مكبرة

يا سلام على الفول والطعمية في مصر، يا سلام على المحشي، يا سلام على القعدة مع الأصحاب والأهل، يا سلام على كوباية شاي بالنعناع، يا سلام على رمضان وشم النسيم والعيد، يا سلام على زحمة الشوارع، يا سلام على المصايف، يا سلام على طيبة الناس ... الخ.

هي في الآخر كلها دنيا ... كلها فيها منغصات. وطاعة الله فيها هي سبيل السعادة، ومعصيته سبيل الشقاء. سواء كان الواحد في مصر أو كندا أو جزر القمر.

عميق التحية لحضرتك يا دكتورة وأهلا بيكي

[نوران]

السلام عليكم

شكرا جزبلا استاد shawshank علي ردك

انا قرات موضوع فديم من 2001 عنوانه:السلام عليكم من كندا 1

الحقيقه مشاركتين للاخوة مصراوى وكليوباترا

بيوصفوا سلبيات خطيرة لكندا:

-حضرتك ادا ضربت طفلك وحد بلغ عنك هتاخد السلطات الكندية ابنك منك وتديه لعائلة تانيه تكون امينه عليه وتتولي تربيته

ودكروا واقعة حصلت لاسرة صومالية مسلمة السلطات خدت منهم بنتهم وسلمتها لاسرة اخرى غير مسلمة !!!(ده باختصار)

وواقعه اخري لطفل يمني مش عارفة مين اللي عضه سالوه:بابا بيضربك؟لو ما جاوبتش هنحط بابا في السجن فالولد خاف علي باباه وقال اه بيضربني

بس ربنا ستر والقاضي رجع خضانة الولد لباباه واللي حكي الواقعه كان ابو الولد في ندوه للجاليه العربيه بتناقش المشكله دي!!!

وواقعه ثالثة لام عراقيه اخدوا منها بنتها المراهقة لما حاولت تمنعها من موضوع البوي فريند!

ده غير دراسة مشروع وقتها-2001-عن تضمين بعض فقرات عن الشدود(بالزال)في المناهج الدراسيه -والعهده علي الراوى وهي الاخت كليوباترا-

وبتحكي اختنا عن بنت واحده صاحبتها في تانيه ابتدائ المدرسه(بضم الميم) قالت لهم:مش المفروض اي حد يلمسكوا حتي لو كانوا ماما وبابا!!!(ده لان الاهل ممكن يسكروا هناك وممكن اى حاجه تحصل بعد كده)فبالتالي البنت رفضت ان مامتها تحميهاوقالتلها:ما تلمسينيش والمدرسه قالت من حقي اقول لك لا :

blink: :blink: :blink:

وده كلام كليوباترا اللي كانت قلقانه علي بنتها (ربنا يحفظهالها ويحفظ لنا اولادنا ...امين)

اما الاخ مصراوي فرأيه ان كندا اللي مساحتها شاسعة وتعدادها قليل بتاخد خيرة شباب البلدان الناميه بمؤهلاتهم الممتازة زي المهندسين والصيادلة

وغيرهم عشان تشغلهم في الوظائف الدنيا اللي الكنديين مش بيشتغلوها زي عمال مطاعم وجرسونات وفي البنزينه ...الخ

وكمان بتاخد منهم ضرائب أد كده يعني الحكومه كسبانه كسبانه

اما اللي عايز شغل معقول فلازم يكون معاه خبره كنديه

ولازالت العهده علي الراوي ..هو شايف ان نسبة النجاح قليله والناس اللي بتوصل مثلا زى عمداء الكليات نسبتهم واحد في الالف

وناس تانية متفائلة جدا ومبسوطه انها هاجرت وحست اخيرا بادميتها وشايفة ان ما سبق دكره من كوارث نادر الحدوث

طيب علي اي اساس اللي اتقال ده نادر(مسألة اخد الابناء)؟؟

علي اساس ان اصابة ابنك من الضرب ما عملتش كدمه زرقاء وان مين يعني اللي هيروح يبلغ عنك؟!

يا اساتده البنت في تانيه ابتدائ وقالت لامها ما تلمسينيش وانا من حقي اقولك لأ

يعني لو امها خبطتها وللا لطشتها والبنت حبت تأدب امها ترفع بس سماعة التيليفون وتتصل ب911 وتقولهم ماما ضربتني ..خلاص خلصت

ما هم بيعلموهم في المدرسه ازاى ياخدوا حقهم من ابوهم وامهم

وطبعا ما تنسوش ان ممنوع الاطفال- والكبار كمان اللي مش عايزين يروحوا النار-ممنوع التيليفزيون بعد الساعة 9 مساءا!!

بصراحه وده رأى الشخصي لو كندا دي جنة ربنا في الارض -بعد اللي قراته ده-بالسلامه هي وتمدنها اللي يخلي الابناء هم اللي يربوا اهاليهم

وتفقد الاطفال احترامهم لاهلهم وتخلى ابنك ند ليك ولا هيبه بقي ولا خيبه

-ملحوظه :انا ضد ضرب الابناء بس الامر ما يسلمش الواحد يتنرفز من حاجه يلطش ابنه لطشه واحد ابن حلال يبلغهم خلاص راح منك ابنك؟!!

-ملحوظة 2 :ده رأى أنا مع احترامي للجميع واحترامي للمهاجرين واللي عايزين يهاجروا وربنا يوفق الكل في كل مكان

والسلام.