إستفزازات ثورية

[se_ Elsyed]

عمرو دياب يحيي حفل ماتينيه بالجامعة الأمريكية مقابل مليون جنيه

(26-05-2011)

اتفق عمرو دياب مع المسئولين بالجامعة الأمريكية علي احياء حفل ماتينيه لأول مرة في مشواره الفني بمقر الجامعة الجديد بالتجمع الخامس. الحفل يقام في منتصف يونية المقبل ويحصل "عمرو" علي مليون جنيه أجرا الحفل يبدأ في الخامسة عصرا وينتهي في الحادية عشر مساء وفقا للعقد المبرم بينه والجامعة الأمريكية.

[ابو محمد بن مصطفي]

ماتينيه مش سواريه

حسبنا الله ونعم الوكيل

[se_ Elsyed]

طرح الموقع الرسمى للفنان عمرو دياب مسابقة للفوز ب10 تذاكر من تذاكر حفله بكرنفال الجامعة الأمريكية بالتجمع الخامس يوم 2 يونيو والمسابقة مقتصرة على جمهور مصر فقط والسؤال هو:متى كان أخر حفل أحياه الفنان عمرو دياب بالجامعة الأمريكية - أذكر التاريخ كاملاً؟

حد يغششني

ياب اكسب بقى

[Alattar]

طرح الموقع الرسمى للفنان عمرو دياب مسابقة للفوز ب10 تذاكر من تذاكر حفله بكرنفال الجامعة الأمريكية بالتجمع الخامس يوم 2 يونيو والمسابقة مقتصرة على جمهور مصر فقط والسؤال هو:متى كان أخر حفل أحياه الفنان عمرو دياب بالجامعة الأمريكية - أذكر التاريخ كاملاً؟

حد يغششني

ياب اكسب بقى

ايه الأسئلة الصعبة دي يا ريس..ما ينفعش أجمع 10 بواكي شمعدان من بتاع طاهر القويري و أبعتهم علي أي عنوان؟؟

أو غطيان الحاجة الساقعه..ما ينفعش أشوف العلامة اللي تحت..و لو طلعت عمرو دياب..أروح الحفلة..ولو طلع الجادون اللي كان مدوخ مصر كلها..أكسب عجلة و خلاص..و أهي تنفع اكتر من عمرو دياب

بس حلوة الموقع الرسمي لعمرو دياب..

[se_ Elsyed]

بس حلوة الموقع الرسمي لعمرو دياب..

مستغرب ليه

إني هاسيبك ... دلوقت عرفت إني حبيبك

قصدي أومال لو تعرف إن هو وطمورة لهم محطة راديو خاصة بأسمهم وبتذيع أغانيهم ليل نهار ؟

حبيبي يابو اشرف

تفتكر لو روحت غنيت من واحده العصر لحد 2 بالليل قبل حظر التجوال ؟

أنا العملية دي ما أقومش بها أقل من 35 جنيه وقزازة جلكوز .. ولازم أتعشى طبعاً في الحفلة

عاوز حد يكتشفني وأنا اضرب الأسعار دي كلها

[مصري أصيل]

أنا قلت ان الشباب بعد الثورة نفض أيدية من الهلس ده و خلاص هيفوق لمصلحته بس واضح أن زي ما كان فيه شباب فى التحرير همه على مصلحة بلده و راح التحرير وشايل كفنه على ايده فيه شباب تاني كل همه حفلات عمرو هباب ده.

أنا شخصياً لو عمرو دياب بيغني تحت البيت مش هفتح الشباك أبص عليه

مليون جنيه في خمس ساعات عجبي

[Alshiekh]

عمرو دياب يحيي حفل ماتينيه بالجامعة الأمريكية مقابل مليون جنيه

(26-05-2011)

اتفق عمرو دياب مع المسئولين بالجامعة الأمريكية علي احياء حفل ماتينيه لأول مرة في مشواره الفني بمقر الجامعة الجديد بالتجمع الخامس. الحفل يقام في منتصف يونية المقبل ويحصل "عمرو" علي مليون جنيه أجرا الحفل يبدأ في الخامسة عصرا وينتهي في الحادية عشر مساء وفقا للعقد المبرم بينه والجامعة الأمريكية.

مليون جنيه صافي والا بالبروزات والمناور؟

وبالعشا والمشاريب؟ والا انجليزي كل واحد يحاسب لوحده؟

[ابراهيم عبد العزيز]

السلام عليكم ورحمة الله وبركاته

نتنى فى مصر الثورة أن تختفى المبالغ الاستفزازية للشعب المصرى فيما يخص أجور الفنانين ولاعبى الكرة

فمصر دولة تعانى من مشاكل كثيرة جدا ولم تصل لدرجة رفاهية كما اوربا لكى تنفق هذه المبالغ الطائلة من أجل الفن وكرة القدم

تم تعديل 28 مايو 2011 بواسطة ابراهيم عبد العزيز

[wahed_masry]

السلام عليكم

لماذا لا تنتقل الأمسية إلى بورتو طرة

حيث جمهور المعجبين المبسوطن

وهكذا يحتثفظ الفنان يجمهوره

تحياتي

تم تعديل 28 مايو 2011 بواسطة wahed_masry

[عبير يونس]

و حضراتكم زعلانين ليه؟

المسألة عرض وطلب

لو ما كانش في جمهور بيدفع مكانش عمره ياخد مبلغ زي ده

رأيي مش اننا نهاجمه

ليه ما نشجعهوش يتبرع لمصر من ريع الحفلات دي؟

سواء كانت نيته طيبة

أو حتى كدعاية له

مصر حا تستفيد بالتبرعات

النجوم في العالم كله بيتبرعوا للخير من أجور حفلاتهم

انا مش من معجبينه

بس ما ننكرش ان له شعبية كبيرة

و من سنين طويلة

و مادام عليه طلب يبقى الناس حتدفع

و محدش يقدر يحجر على الناس

ولا يفرض عليهم رأيه و يقول لهم ما تدفعوش

أو حتى يسفه منهم و يتهمهم و يحكم عليهم

الحل في رأيي

اننا بدل ما نحاول ننسف ما نراه سلبيا

اننا نحاول نبحث فيه عن ايجابيات

و أكيد حنلاقي

[se_ Elsyed]

مجتمع اليوتوبيا أو المدينة الفاضلة .. فكرة خيالية ولن توجد على الأرض

وبالتالي المطالبة بعدالة إجتماعية كاملة وتوزيع للثروات بين أفراد المجتمع .. شيء مستحيل

لكن على الأقل خلونا نبعد عن الأستفزاز في مثل تلك الظروف التي نمر بها

إنتوا عارفين بقى لهم قد إيه بيحضروا للحفلة دي ؟

وغيروا الميعاد كذا مرة عشان الناس ما تخرجش بالليل ويحدث ما لا يُحمد عقباه ؟

إذن في حاجه غلط ...

وفي ناس مجانين ممكن تقرأ الخبر ده .. وتقارنه بين مشروع الحد الأدنى للاجور اللي لسه هايحصل في المستقبل وبيتكلم عن 800 ج في الشهر

وتلاقي واحد قاعد عمال يضرب كف على كف ويقول : بقى أنا أتفحت طول الشهر عشان أخد 800 ج .. وواحد مغنواتي ياخد مليون جنيه في 4 ساعات .. وناس تروح عشان تتنطط وتسمع أغاني تدفع أكتر من 1000 ج في التذكرة .... طب والله لأوريكو يا مجتمع الظلم

أنا شخصياً مش معترض ... ياخد إن شالله 100 مليون .. لكن

بلاش أستفزاز عشان ما نرجعش نندم

[ذهبية]

رجعت ريما لعادتها القديمة

[Folana]

السلام عليكم ورحمة الله...

ماهو حيغنى أغانى وطنية برضك ياجماعة...وفى صحة مصر...قصدى فى حب مصر...

يعنى أغنية مثل " ميال..ميال"..دى اغنية وطنية صرفة ..وتستاهل الواحد يدفع ماله (اللى مش موجود دلوقت ) ويبدد وقته ويروح التجمع علشان يسمع المطرب الوطنى وهو بيوصف حال المواطن المصرى بل الشعب المصرى أجمع ، بأنه ميال..ميال...

وبحب الوطن مشغول البال...ويوجه اللوم لمصر الغالية ويقولها ليه كده بس " لابتتكلمى ولا بتسلمى " ..ويعلن عن استغرابه الشديد من موقفها ويقولها " كل يومين بالاقيكى بحال"...فى حبك ياغالية أنا مشغول البال...

طب ينفع يعنى مانروحش نحب مصر معاه؟؟؟؟

ده حتى الشعوب تاكل وشنا وتنعتنا بقلة الاصل ...

[se_ Elsyed]

الاخت فلانه هانم .. لقد لمستي كبدة الحقيقة

فعلاً أغاني الاخ الرفيق عمرو دياب كلها معاني ثورية جميلة

ومنها على سبيل المثال في أغنية في الحفلة هايغنيها على روح المخلوع .. مطلعها بيقول :

مستغرب ليه إني هاسيبك ... دلوقت عرفت إني حبيبك يا مخلوع

وكدهوت

--------------

[fatfouta]

انتوا مضايقين من عمرو دياب

طب بصوا كده....فيه اكتر من كده استفزازات ثورية

بعد لحاف الثورة .. الان في الأسواق جيل للشعر ثورة 25 يناير

[جسار]

انا لست من معجبى عمر دياب وتقريبا لا أسمع أغانيه الا فى الافراح والليالى الملاح ، وأعترف بأننى

مازلت من عاشقى المراحيم عبد الحليم و أم كلثوم وسى عبده .

ولكن موضوع الحفلة والاجر المرتفع ، ده موضوع بين البايع والشارى كما قالت ذهبية عرض وطلب

والشارى هو الجامعة الامريكية وهى ليست هيئة حكومية ولا حتى مصرية بالمعنى الحقيقى ، والبايع

متصدر الجدول من خمسة وعشرون عاما ، وعن الجمهور دى ناس أهاليها مدخلاها بالدولار ، آلاف الدولارات

وحتى لانظلمهم فنفس الجامعة يخرج منها المئات المشاركين فى الثورة ومنذ الثمانينات ويمتلكون من

الوعى السياسى والثقافى الكثير ويضاف اليها الجرأة والثقة بالنفس - ناس مليانه - ويفوقوا فى تفكيرهم

الكثيرون ممن يتولوا مناصب وزارية فى مصر .