خللااااااص........ الدراسة جت

[Bero]

السلام عليكم ورحمة الله وبركاته

خلاص يا جماعة الدراسه بعد 4 ايام وهنرجع تاني لايام المزاكره وتمقيق العيون والسهر ادعولنا باه بس بجد انا هفتقد المنتدى واعضاء المنتدى وهتوحشوني جدا لاني طبعا مش هدخل كتير زي الاجازه(ده مش بارادتي طبعا ديه قرارات عليا)

انا عارفه ان اغلب الاعضاء معانا هنا مخلصين من زمااااان وعندهم اولادهم ربنا يبركلكم فيهم (وطبعا بيصدروا قرارات عليا :P مفيش تليفزيون مفيش مفيش)

بس في معانا اللي لسه بيدرسوا وربنا يوفق الجميع يارب في دراستهم

وكل سنه وانتم طيبين

f((:

وانا بكتب دلوقتي افتكرت ايه اللي حصل معايا اول يوم دخلت الجامعه ياااااااه كان حتة يوم عمري مهنساه ابدا :unsure:

[وليد صفوت]

ليييييييييييييييييييه ؟؟؟

ليه فكرتينى يا بيرو ؟؟؟

انا كنت عايش اليومين دول على أمل انى افقد الذاكرة ....و انسى امتى الدراسة أصلاً ............ :unsure:

و كل فترة أقول ........لأ ....لسة شوية على الدراسة .....

أهو انتى كده بوظتى الخطة بتاعتى :P

أقولك انا حدخل دلوقتى موضوع الفضفضة عشان اطلع الكبت اللى طلعلى من الموضوع ده

الدراسة فاضلها 4 أيام ! :P cbyb: cbyb: cbyb: f((:

واااااااااااااااااااااااااااااااااااء

[Bero]

انا هبتدي بنفسي واحكي ايه اللي حصل معايا ونفسي كلنا نرجع بالزمن لورا شويه ونفتكر مع بعض

طبعا طول الليل مش جايلي نوم داخله الجامعه مرحلة جديده عليا باه وطول الليل بجهز في الهدوم الجديده بتاعتي فرحانه لاني اخيرا تخلصت من الزي المدرسي بصراحه كان خلاص جابلي اكتئاب المهم بابا قاللي هوصلك اول يوم علشان تعرفي الطريق وكدا (على اعتبار ان كليتي في مدينة تانيه)قمت انا قلت لاه ازاي انا كبرت لازم اعتمد على نفسي انا خلاص دخلت الجامعه وهبقى دكتورة اد الدنيا(دكتورة حمير بس مش مهم دكتورة وخلاص :D )

بابا تكرم ووصلني لغاية الموقف وهناك لقيت زحمة موووووت تقريبا كانو بيوزعوا لحمه ببلاش ولا ايه والاقي الناس بتجري ورا العربيات بنات ولاد مش مهم كانت المواصلات ضرب نار fsh::

وطبعا برستيجي ميسمحشي اجري زي الناس دول انا واقفه مكاني وقال ايه مستنيه العربيه تيجي لحد عندي(كنت عبيطه ولا ايه f((: ) المهم عدت اول عربيه والتانيه قلت مش معقول هخليني واقفه كدا طول النهار لازم اتشجع واطلع اجري زي الناس(قرار جرئ بس جه متاخر اوييييي :P )تالت عربية جت وكانت اخر عربيه وفي ثواني اتملت :unsure: طيب اعمل ايه المهم وصلت لقرار اني اسافر واقفه (ساعه ونص سفر في علبة سردين)

المهم بعد العناء الطويل ده وصلنا الكليه بالسلامه وتخيلوا اول محاضره ناخدها كانت ايه كانت محاضرة تشريح على الصبح وريحة الفورمالين اللي خلتنا من كتر الدموع اللي في عيننا مش شايفين اي حاجه طلعت من المشرحة كانت عندي حالة بلاده مستعصيه مش حاسة باي حاجه(قعدت شهر ماكولشي اي نوع من انواع اللحمه) المهم بعد كدا طلعت على المدينه الجامعيه وديه طبعا مينفعشي احكي عنها في كلمتين ديه عايزه حكاياااااااااااااات بس في النهايه توصلت ان نار المواصلات ولا نار المدينة الجامعيه

نفسي اسمع حكايتكم ولو مكنتش طولت عليكم هبقى احكيلكم على المدينه بعد كدا

سلاااااااااااام :P

[se_ Elsyed]

ربنا يوفقكم يا ولاد ... ونصيحة من شخص مخلص دراسة بقى له عقد من الزمن :P ( هو مش العقد = 10 سنين برضوا ؟ والله كبرت يا س س :unsure: )

فأود ان أقول لكم إن من مقومات نجاح أي طالب في دراستة محافظته على الآتي :

1- المحافظة على نظافة المريلة .. لأن تيل نادية غلي .. وكذلك حاول ما تمشيش في الشارع و تشوط في الطوب اللي على الأرض عشان بوز الجزمة ما يتبريش كل شوية .

2- أكل شندوشتات الجبنة بالقوطة اللي بتعلمها ماما وإذا كانت مربة لارنج يبقى مافيش مانع ... وإوعى زمايلك يرموا عليك الهلب وياخدوا الشندوشتات منك في الفسحه .

3- التأكد من إن زمزمية الميه مليانه من بالليل عشان ما تجيش الصبح تحتاس وتلف حوالين نفسك .

بقى طلعتوا طلبة يا فيولنكنج إنت وبيرو ..... إن ما وريتكم :P me0: f((: .... هاهريكم كحك وملاحق كل شهر ومش بعيد نستدعي ولي أمركم هنا في المنتدى :D

وعايز من كل واحد لسه تلميذ يجمع عندي هنا حالاً ويقول هو في سنة كام ...

[وليد صفوت]

1- المحافظة على نظافة المريلة .. لأن تيل نادية غلي .. وكذلك حاول ما تمشيش في الشارع و تشوط في الطوب اللي على الأرض عشان بوز الجزمة ما يتبريش كل شوية .

2- أكل شندوشتات الجبنة بالقوطة اللي بتعلمها ماما وإذا كانت مربة لارنج يبقى مافيش مانع ... وإوعى زمايلك يرموا عليك الهلب وياخدوا الشندوشتات منك في الفسحه .

3- التأكد من إن زمزمية الميه مليانه من بالليل عشان ما تجيش الصبح تحتاس وتلف حوالين نفسك .

مريلة ؟؟؟ :P زمزمية ؟؟؟!!! :o شندوشتات ؟؟؟!! :unsure:

فسحة !!!!!!! vmp:

لأااااااااااااااااااااااااااااااااااااااااااااااااااااااااااااااا

انت فاكرنى فى المدرسة ؟؟ .....

لاااااااااا

دا ان دلوقتى فى تانية حضانة قد الدنيا ..............!

و مش باخد شندوشتات :P

مامى بتعملى بطاطس محمرة :D :D :D

هاهريكم كحك وملاحق كل شهر ومش بعيد نستدعي ولي أمركم هنا في المنتدى  :

P

لأ من الناحية اطمن خالص ...انا الميس بتاعتنا مبسوطة منى عالاخر .....

بتقولى دايما : " يا واد انت مش ناوى تتهد شوية !! تعبتنى !! f((: "

و الناظر بتاع الحضانة كان دايماً يقولى :

" يابنى ..............................................

انت مافيش منك أمل ..............................................خالص!

شوفت الشطارة ؟

[Bero]

يا سلام يا سي السيد جبت المختصر المفيد والله نفس الكلام اللي ماما بتقولهولي بردو وخاصة حكاية السندوتشات بس بالاضافه لكوباية لبن على الصبح :unsure:

دا ان دلوقتى فى تانية حضانة قد الدنيا ..............!

ده على كدا انا وانت يا فيولين زمايل بس انت سابقني بسنة f((:

[Bero]

السلام عليكم ورحمة الله وبركاته

انا هكملكم ايه اللي حصل باه في المدينة وايه اللي بيحصل انا عارفه ان الموضوع ده انفتح هنا قبل كدا بس بجد معاملة سيئه جدااااا

انا دلوقتي كل يوم اسمع واقرا في الجرايد عن تحسين وتصليح المدن الجامعية واستعدادها لاستقبال الطلاب في الدراسة يعني المفروض انها تكون جاهزة وكل حاجه تمام لكن الحقيقه غير كدا

اول مروحت المدينه بعد عناء يوم كامل في الكليه رحت لقيت كل اللي موجود سرير في اوده فيها 5 سرارير يعني هنام مع 5 افراد ديه المفاجاه الاولى سمعت من الناس اللي استلمت قبلي اني المفروض اروح استلم باقي الحاجات بتاعتي منين من الدور التاني في المبنى التاني :o

قلت معلش استحملي اجهز السرير بتاعي الاول وبعدين اروح استلم باقي الحاجه اكتشفت ان السرير عليه 3 ملل بس(المله اللي هيا الخشبه اللي بين طرفي السرير pp: )والمرتبه اقصد قوالب الطوب مدلدله بينهم

طيب اعمل ايه عبقريتي وصلتني لحل جميل اوي كان فيه سرير فاضي واحده لسه مستلمتوش قلت اخد منه مله ولا اتنين واثبت المرتبه عليه من الاول ومن الاخر وخلاص(حركات نداله يعني :P )المهم نزلت استلم حاجتي اللي هيا عباره عن ترابيزه وكرسي وباسكت للزباله(بيتعبوا بصراحه) المهم طلعت هلكانه من نزول السلم وطلوعه اول مدخلت الاوده ملقتش قدامي غير سرير (اللي انا شلت منه الملل)اترميت عليه(عارفين طبعا ايه اللي حصل)هوب لقيت نفسي في الارض :)

بصراحه صعبت عليا نفسي جدا انا مش متعوده على البهدله ديه وقعدت اعيطواتصلت بماما اعيطلها شويه في التليفون(الموبايل ده اختراع كويس جدا :huh: )

وبعدين باه جه ميعاد الاكل (عارفين الافلام العربي القديمه المساجين بيبقوا قاعدين على ترابيزات طويله)نفس المنظر وناس كتير اوي والقطط حوالين القعده ديه smk:

الاكل باه عباره عن ايه عيش لازق في بعضه وحتة لحمه اكتشفت فيما بعد بعد ما سالت ايه ده قالولي انها لحمه ورز بردو عرفت بعد كدا انه رز وطبيخ بس ده عرفته :D

والله اول اسبوع في المدينه كانت عربيه الاسعاف داخله خارجه علينا واحده اغمى عليها كل شويه والتشخيص انيميا من الكل الرائع(ناس بتتبطر على النعمه)

ده بالنسبه للغدا بالنسبه للعشا باه كان عباره عن بيضه مسلوقه وعلبة مربى وحتة جبنه مش قادره اقولكم كام جرام وياسلام لما يكون فيه جبنه رومي الغي المربى(بس مش عارفه كانت بتبقى واقعه من مين ولا لاقينها فين)

لسه في حكايات انا بتكلم باسلوب ساخر بس والله بيحصل اكتر من كدا مشاكل المفروض تتحل

[فــيــروز]

رد فى السريع بين الاجتماعات و انا باخطف سندوتش جبنه رومى و كوباية شاى عجببببببب .. :huh:

اجمل ايام العمر هى ايام الدراسه .. مش عشان انا كنت من الناس الدحيحه :) ولكن لانها فعلا الايام التى يشعر الانسان فيها انه يقوم بعمل له قيمه و جدوى "قبل التحاقه بعمل فعلى يعنى" pp: ماتلاقيش العيال متنطوره فى الشوارع ولا الشباب ملطوعين على النواصى :P .. رغم ان الايام الاولى فى الدراسه بتسبب لى احيانا اكتئاب لا اعرف سببه .. لكن ايام الدراسه ايام جميله جدا وربما لا يشعر الانسان بهذا الا بعد ان ينهى دراسته فعلا .. و بالتوفيق يا شباب smk:

[Bero]

اكملكم باه الحكايه الل قبل كدا الكل والكلام ده كان مجرد رفاهيه المهم نيجي للجد المفروض ان المدينه الجامعية ديه معموله للبنات بس لكن اللي كان بيحصل كان غير كدا انا هحكيلكم موقف

واحده صاحبتي دخلت الحمام اللي في المدينه وبعدين فجاه لقت الباب بيخبط عليها جامد ردت عليها الميس (المشرفه يعني)قالتلها يلا اطلعي بسرعه النجار عايز يصلح الشباك pp: تخيلوا منظر البنت وهيا خارجه وتلاقي على الباب المشرفه ووراها اتنين نجارين :) ديه حاجه من الحاجات ده غير ان النجارين وبتوع الكهرباء طول اليوم كانو رايحين جايين في الادوار

الحاجه التانيه ايام الامتحانات باه كان في ناس بتتبرع من مدينة الولاد اللي هيا قريبه جدا من مدينة البنات (مش عارفه ايه المواقع الجغرافيه ديه :huh: )كانوا بيفصلوا الكهرباء عن مدينة البنات عشان النور يقطع عن المدينه والبنات متعرفش تزاكر(مش عارفه ليه مش بيعملوا لكل مدينه كهربا لوحدها)

الحاجة التالته ان كان في مجموعة شباب بييجوا عند المدينة ويقعدوا طول الليل يعاكسوا في البنات ويملوا ارقام موبايلات وبلاوي تانيه وطبعا محدش يقدر يتكلم ولو حد راح اشتكى للعسكري اللي واقف امن العسكري هيخاف على نفسه وعلى ولاده (لان مبيكونشي فيه نفس اصلا)من ولد متهور يعمل فيه حاجة كدا ولا كدا

بعد ده كله مش بقولكم نار المواصلات ولا نار المدينة smk:

ولا ايه رايكم

[فــيــروز]

بعد ده كله مش بقولكم نار المواصلات ولا نار المدينة :huh:

ولا ايه رايكم

أعتقد انك بتقولى كده لانك فى الغالب مدينتك قريبه من المدينه الجامعيه .. ساعه و نص بالميكروباص ممكن واحد يقضيهم من بيته لحد الجامعه حتى لو ساكن فى نفس المدينه smk: .. عادى يعنى

لكن هناك حالات ليس لها حل سوى المدينه الجامعيه .. صديقة العمر فى الكليه كانت من سوهاج .. وكان لازم تعيش فى المدينه الجامعيه .. و طبعا سمعت منها قصص مماثله لما تحكيه يا بيرو بس هتعمل ايه البنت .. اكل العيش مر .. تخيلى بقى .. كانت عايده ثانويه عامه عشان تدخل اى كليه غير كلية الطب البيطرى :P اللى جات لها فى تنسيق اول مره ثانويه pp:

اعتقد ان اى انسان مقدم على تجربه مماثله لازم يضع فى اعتباره انه ليس هناك مكان فى العالم مثل البيت .. يعنى الواحد مايرتاحش غير فى بيته .. حتى لو كان مقيم فى فندق خمس نجوم .. يا دوب يوم و التانى ويبتدى يشعر انه محتاج بيته و محتاج اهله مهما كان مستوى المكان مرتفع .. والمدينه الجامعيه على ما اظن تخضع لوزارة التربيه و التعليم و مستى الخدمه الذى تقدمه هذه الوزاره فى العموم معروف .. فهى تقدم تعليما ردئيا فهل يعقل ان تقدم خدمة اقامه تحترم آدمية الناس !! دى حتى تبقى عيبه !! :)

[Bero]

.. تخيلى بقى .. كانت عايده ثانويه عامه عشان تدخل اى كليه غير كلية الطب البيطرى  اللى جات لها فى تنسيق اول مره ثانويه 

يا محاسن الصدف :rolleyes:

انتي عندك حق يافيروز انا بحمد ربنا اني بقدر اسافر كل يوم بس ايام الشتاء ربنا ميوريكم

بس انا ملاحظه ان مفيش غير انا وفيولين ومحمد بس اللي لسه طلبه كدا باه انتو في المنتدى هتعملولنا حفلة تخرج ان شاء الله بس على حساب س س م(سي السيد المتدبس)لانه اتبرع بمتابعتنا في الكحك واستدعاء ولي الامر hpc:!:

[se_ Elsyed]

كدا باه انتو في المنتدى هتعملولنا حفلة تخرج ان شاء الله بس على حساب س س م(سي السيد المتدبس)لانه اتبرع بمتابعتنا في الكحك واستدعاء ولي الامر hpc:!:

وانا لها .. أنا لها .. ديتكم قزازة شربات ورد على برميل ميه ساقعة على كيلو سكر من أبو 175 قرش المدعم وفرق فرق وخلصت الليلة ..

بس على فكرة هنك طالب أخر مازال يدرس ويدرس وهو من اوائل المشرفين بالمنتدى .. وقد قابلته شخصياً في مصر ...

أُقدم لكم الأستاذ " لانسلوت " اخر سلالة المحاربين العظماء وهو باشمهندس بيدرس في كلية الصيدلة .. قصدي الهندسة ...

ولانسلوت أصغر المشرفين الزرق ( زي العفاريت الزرق كده ) سناً لكن عقلة سابق سنه .. وانا اللي اكتشفته وازلت من على جسده الغبار لحد ما بقى مشرف قد الدنيا ..

ربنا يوفق جميع الطلبة والطالبات...

تعليقاً بقى على كلامك يا عبير .. فإذا كنتي تشتكين من إن المدينة عندكم بقت مشاع وميدان عام كل الناس بتعدي عليه .. فأسمحيلي أقول لك إن دي غلطتكم وفي حاجة إسمها رئيس جامعة وإن ما أستجبش يبقى فيه مديرية الأمن وأقسام الشرطة .. أنا مش قادر أتخيل إزاي نجار او حداد أو جن أزرق يسمحوا له بدخول سكن الطالبات بل والحمامات كمان أثناء وجود البنات بالداخل ...

ونرجع نقول حالات إغتصاب وقضايا مهببه وحاجة تقرف ... بصراحة حاجة تُخرج الواحد عن شعوره ...

ولا اعتقد يا أخت عبير إنكم لو قدمتوا شكاوى لرئيس الجامعة عما يحدث فإنه سيصمت إزاء هذا التسيب خصوصاً مع تكرار الشكاوى ... وحتى لو إفترضنا وإنه ما أستجبش ممكن تبعتوا فاكس لمكتب وزير التعليم العالي وتحكوا له عن أي شيء لا يعجبكم سواء متعلق بالأمن أو نوعية الطعام أو أي شيء يُعكر صفو وجودكم بمدينة الطالبات وبالتأكيد سيؤثر على درجة تحصيلكم العلمية ...

مشكلتنا إننا نفرط في حقوقنا ونحاول الإتكال على الآخرين في الشكوى والكلام نيابة عنا منعاً للمشاكل وتفضيلاً للمشي جنب الحيط .

[hamo90]

معليش يا أخونا مضطر أرجعكم لموضوع الرجوع للدراسة تاني

بس أنا عندي سؤال أنتو صحيح بتروحوا الجامعة أول يوم ؟

علي كده أحنا ما كناش طلبة كنا بهوات

أول يوم أنتو متأكدين ؟ hpc:!:

( صحيح الحمد لله علي التجارة والجدعنة ) من أقوالي المأثورة أيام الجامعة والدراسة

وعلي العموم ربنا يوفقكم جمعيا وتبقوا من الناجحين وتقعدوا تستتنوا وظيفة عدلة زي حالتنا

hamo

[Bero]

( صحيح الحمد لله علي التجارة والجدعنة ) من أقوالي المأثورة أيام الجامعة والدراسة

انا اعرف ان اللي في تجاره ونسبة حضوره في الكافيتريا بتتعدى 75% ناجح باذن الله hpc:!:

[mohamed]

ربنا يوفقكم يا ولاد ... ونصيحة من شخص مخلص دراسة بقى له عقد من الزمن  :) ( هو مش العقد = 10 سنين برضوا ؟  والله كبرت يا س س  :rolleyes: )

فأود ان أقول لكم إن من مقومات نجاح أي طالب في دراستة محافظته على الآتي :

1- المحافظة على نظافة المريلة .. لأن تيل نادية غلي .. وكذلك حاول ما تمشيش في الشارع و تشوط في الطوب اللي على الأرض عشان بوز الجزمة ما يتبريش كل شوية .

2- أكل شندوشتات الجبنة بالقوطة اللي بتعلمها ماما وإذا كانت مربة لارنج يبقى مافيش مانع ... وإوعى زمايلك يرموا عليك الهلب وياخدوا الشندوشتات منك في الفسحه .

3- التأكد من إن زمزمية الميه مليانه من بالليل عشان ما تجيش الصبح تحتاس وتلف حوالين نفسك .

بقى طلعتوا طلبة يا فيولنكنج إنت وبيرو ..... إن ما وريتكم  :)  me0:  :unsure:  .... هاهريكم كحك وملاحق كل شهر ومش بعيد نستدعي ولي أمركم هنا في المنتدى  :D

وعايز من كل واحد لسه تلميذ يجمع عندي هنا حالاً ويقول هو في سنة كام ...

ماشى يا جدو :P :D

متشكرين جدا

اه صحيح نسيت اقول انى فى kg 2

تانية تانى فصل ابلة عطيات hpc:!:

تم تعديل 15 سبتمبر 2004 بواسطة mohamed

[Bero]

مشكلتنا إننا نفرط في حقوقنا ونحاول الإتكال على الآخرين في الشكوى والكلام نيابة عنا منعاً للمشاكل وتفضيلاً للمشي جنب الحيط .

اسفه يا سي السيد اتاخرت في الرد بس كل ماجي ارد عليك الجهاز يهنج معايا

احنا فعلا رحنا واشتكاينا بس قالولنا ان وجود النجارين والعمال ده طبيعي عشان لو واحده نسيت المفاتيح جوه الدولاب التصليحات وكدا فقلت يبقى انا اللي وجودي هوا اللي مش طبيعي وبعدت وربنا بيوفق hpc:!:

[mohamed]

انا افتكر انى اول يوم دخلت فيه الكلية رحت زى بقيت الناس اول يوم اشوف ايه حوار الكلية دى وايه نظامها يعنى

لقيتهم بيقولوا لنا لا انتو قسم حقوق انجليزى اجازة السبت تعالوا بكرة

قلت ايه الكلية اللى زى العسل دى اول يوم نبتدى باجازة والله حاجة عال

طبعا مروحتش قعدت بقى فى ممر جيمى وقلت اما شوف ايه نظامه لقيته 3 نظام حاجة كده لوز :) مش عارف جايين الكلية دول ولا جايين ملهى ليلى ( مش ليلى علوى )

راقصات مش طالبات علم

بينى وبينكم انا من اول يوم دخلت الكلية حسيت انها مش لذيذة ابدا وهذا ما ثبت لى بعد ذلك

وفعلا حتى الان بتحسر على ال 3 سنين بتوع الثانوى بجد كانت احلى ايام

والله ولا مدرسة المشاغبين كانت ايام يااااااااااااه

كنا نروح المدرسة الساعة 10 الصبح طبعا مش بندخل من الباب :D وبعدين نقضيها من اول اليوم لحد الساعة 2 الضهر لعب كورة فى المدرسة

افتكر انى موقفتش فى الطابور الا وانا فى اولى ثانوى فى اول اسبوعين

وكنت عامل فيها مؤدب ولابس كرافت وعايش الوهم hpc:!:

بعد اسبوعين اكتشفت ان كده مياكلش فى وسط الوحوش دول :rolleyes: trch: سواء الطلبة او المدرسين لازم تعمل فيها طالب ( قصدى شاب صايع ) وتطلع القميص برة والا هتبقى ملقف لكل من هب ودب من الطلبة والمدرسين

ومفيش مانع انك تعملك خناقة فى اول اسبوع ( كارت ارهاب يعنى ) عشان محدش يكلمك بعد كده وتفضل لك هيبتك

انا عارف ان كتير منكم مش هيعجبه كلامى بس والله هو ده اللى حاصل فى المدارس الثانوية دلوقتى ( حتى المدارس الخاصة )

وكانت اكتر حاجة بستغرب لها ان المدرسين كانوا بيسيبوا الحوش ( الفناء ) للطلبة بس وهم ولا ليهم دعوة حتى مدرس الالعاب وكانت تبقى الخناقات قد كده me0: :unsure: والسانجو بلابل بيتلف ورا الحمامات ولا كأننا فى غرزة وكل ده جوة المدرسة

وكان المدير لما يبقى فى لجنة جاية من الوزارة ينبه علينا قبلها باسبوع والنبى يا حبايبى يوم السبت الجاى فى لجنة وحياة ابوكم تصحوا بدرى واحضروا الطابور وبلاش يعنى لبس مخالف لو فيها مضايقة بس هو اليوم ده بس يا حبايبى ( ورغم كده كنا بنكسل نصحى )

حاجة تانية برضه كانت من اهم مميزات المدرسة ( قصدى الغابة ) انه كان لازم بيبقى فى كبير للمدرسة وده طبعا كان بيبقى من 3 ثانوى وهذا الطالب كان بيتصف بان ربنا مديله صحة زيادة عن الباقيين :) فكان هو المتكفل بفض المنازعات بين الطلبة وكان مدرس الالعاب بيوكل له مهام الحفاظ على الامن

وكان اللى له ضهر ( زى حالاتى ) مكنش حد يكلمه حتى لو كان غلطان ( مش بقولكم غابة )

بس برضو كانت احلى من الكلية كانت ايااااااااام

وللحديث بقية

[mohamed]

اكملكم بقى اللى كان بيحصل ايام الثانوية

طبعا زى ما سبق وقلت لكم ان ان احنا مكناش بندخل ولا بنخرج من الباب

المدير بقى كان هيتجنن من حكاية القفز من فوق السور

حاولوا معانا بكل الطرق الممكنة والغير ممكنة

اول حاجة قالو نعلى السور طبعا مجبتش نتيجة

قاموا قعدوا يفكروا قالك ايه نعمل ايه فى الشباب اللى مدوخينا دول قام واحد عبقرى اقترح عليهم انهم يكتبوا على السور ( احذر ممنوع الاقتراب من السور , الاسوار مهددة بالسقوط ) اهو الله زى ما بقولكم كده

فاكرين يعنى ان احنا هنخاف مثلا

مجبتش نتيجة طبعا

قالك خلاص مينفعش غير حل واحد

قاموا جايبين اسمنت وثبتوا ازاز مكسر على السور ( يا سلام شوفتوا الذكاء )

طبعا احنا مغلبناش برضه نطينا وعبرنا السور me0:

خلاص المدير بقى هيتجنن مش عارف يعمل ايه

اخر اما زهقوا راحو مركبين حديد على ابواب الادوار وعلى الباب اللى بين المبنى والحوش وعلى كل ثغرة من الممكن ان تجعلنا ننتقل الى خارج اسوار المدرسة او توصلنا للحوش للعب الكورة

برضه اللى كان بيحصل ان احنا كنا بنخرج برضه ( بالفهلوة )

وكنا بنجمع نفسينا برة المدرسة ونروح نلعب كورة ورا المدرسة

بينى وبينكم انا جيت فى 3 ثانوى لقيت العملية رخمت قمت حولت منازل وقلت بلا وجع دماغ خلينا فى بيتنا احسن ويا دار ما دخلك شر

بس كانت ايام ما يعلم بيها الا ربنا احلى من الكلية بكتيييييير

[فــيــروز]

سؤال يا محمد لو سمحت ;)

لماذا كل هذا الاصرار على دخول المدرسه اذا كان الهدف فى النهايه هو لعب الكوره !! شئ ممكن تمارسوه فى اى شارع مجاور بحريه كامله !! :D

اوعى تقول لى عشان نسبة الغياب :D .. دى حاجه بسيطه بالنسبه للطلبه الواصلين :P

ويعنى ايه سانجو بلابل !! :D

[وليد صفوت]

سؤال يا محمد لو سمحت ;)

لماذا كل هذا الاصرار على دخول المدرسه اذا كان الهدف فى النهايه هو لعب الكوره !! شئ ممكن تمارسوه فى اى شارع مجاور بحريه كامله !!  :D

اوعى تقول لى عشان نسبة الغياب  :D .. دى حاجه بسيطه بالنسبه للطلبه الواصلين  :P

ويعنى ايه سانجو بلابل !!  :D

انا اجاوبك يا عزيزتى فيروز .......

الاصرار على الذهاب للمدرسة بالنسبة لينا ليه اكتر من سبب......

1- لو قعدنا فى البيت ......الوالدين حيطالبونا بالمذاكرة المتواصلة .........و ده مش مطلوب :P خصوصا فى فترة الصبح اللى بيعتبرها البعض اسوأ فترات المذاكرة على الاطلاق .....

2- فى طلاب مابيعرفوش يتهربوا من حكاية الغياب دى .........و بالتالى بيتضطروا للذهاب الى المدرسة....

3- فى طلبة غاويين يقفوا امام مدرسة البنات :D :D و دول بقى ......لازم يجيوا............

و اسباب بقى تانية متنوعة .....

و السانجو بلابل ....هو مصطلح روش ...يعنى ...البانجو .....اللهم احفظنا :D

تحياتى ...و كل سنة و انتم طيبين :D

تم تعديل 17 سبتمبر 2004 بواسطة Violinking