شرح المصطلحات المستعصية على الطريقة السينسينية

[se_ Elsyed]

كلنا طبعاً شوفنا اختنا فيروز وهي محتارة وتضرب اخماس في أسداس أمام فِهم معاني المصطلحات السياسية البسيطة مثل التكنوقراط والثيوقراط ... إلخ وبالرغم من سهولتها وإنتشار تداولها إلا أن معانيها قد تغيب عن البعض لأسباب ما smk: ...

وإليكم محاولة متواضعة لشرح مبسط لتلك المعاني السهلة والبسيطة :

- أتوقراطية : أي المركزية ( يعني كل خيوط الحكم والسلطة بتبقى في أيد شخص واحد بس .. زي ما مارينجوس الأول بيعمل كده )

- أوليجاركية : حكم الأقلية ( زي الاحزاب الفاشية ما بتعمل )

- ديماجوجية : سياسة تملق الشعب من اجل تهييجه ( أهي دي بالذات زمان اول ما أنضميت للمحاورات كنت مستعد اخد فيها ست أشهر وأفهمها ... لأنها كانت من الإتهامات المتبادلة بين اخونا فرير فري ومحبط .. وقولت يا واد مالكش دعوة ومش مهم تفهم دول ناس كبار في قلب بعض والداخل بينهم مفقود .. اتاري محبط كان عمال يهيج الجماهير وإحنا مش واخدين بالنا "

دجماتية : التعصب الشديد للرأي ( كله موجود عندنا وبالذات هنا ... رأيي أنا اللي صح والباقي سلطة )

- أرستقراط : طبقة المشرفين .. قصدي طبقة المترفين المرفهين .

برجوازية : الطبقة الوسطى .. يعني العضو اللي له 1000 مداخلة وإنت طالع .

بروليتاريا : طبقة الكادحين .. الاعضاء الجدد اللي لهم 1000 مداخلة وإنت نازل وبياخدوا إنذارات pp:

السادية : التلذذ بتعذيب الآخرين ... ودي فرقة أو كورس اللي ينجح فيه ... يبقى مُشرف على طول :) me0: s-: :huh: .

ميكافيلية : سياسة النفعية أو الغاية تبرر الوسيلة ... اومال هانبرر موضوع الإنذارات إزاي .

البراجماتية : الذرائعية ( بيتهيألي إنها قريبة من الميكافيلية )

أيدلوجية : أعتناق فكر او عقيدة معينة .

النرجسية : مدح النفس والثناء الدائم عليه ( قديمة عارفنها دي ... ياختي على حلاوتي وجمالي )

دنكوشتية : محاربة الوهم .

الشوفينية : المغالاة في حب الوطن ( ده غير شوفان كويكر اللي بيتعمل شوربة )

اللوبي : جماعات الضغط ( بصراحة المصطلح ده بقى مرتبط باليهود وبالذات في أمريكا )

شمشونية : تعميم الشر ( علي وعلى اعدائي واللي يتشدد لهم )

دجماتية : التعصب الشديد للرأي

دادية : إحتجاج فوضوي

ذاكروا الحاجات دي كويس عشان هاسألكم فيها في إمتحان الشهر .

[فــيــروز]

دادية : إحتجاج فوضوي

بتتكتب "ناديه" يا س.س. مش داديه !!

انت عندك زكام ولا ايه !! :huh:

smk: على العموم مشكور يا سيدى على توضيح معانى الكلمات التى غابت عنى لاسباب ما :)

[kfaya]

شمشونية : تعميم الشر ( علي وعلى اعدائي واللي يتشدد لهم )

هو ده مش برضك شمشون بتاع دليلة اللى قصت له شعره ؟؟؟؟ و المعبد اللى اتهد عليهم ؟؟؟؟ يبقى تعميم الشر أزاى يعنى ؟؟؟

المفروض شمشونية = خيبة الرجال أمام دهاء النساء fsh::

[G.G]

شكرا يا استاذ سي السيد على هذا الموضوع المفيد جدا لطبقة البروليتاريين :)

و ردا على أستاذ كفاية,,

إقتباس 

شمشونية : تعميم الشر ( علي وعلى اعدائي واللي يتشدد لهم )

المفروض شمشونية = خيبة الرجال أمام دهاء النساء  fsh:: 

ما هو لأن الرجل أول ما يحس أنه سيصاب بالخيبة أمام المرأة و هيتكسف خالص ,,, يقوم قايم قالب المائدة المستديرة على كل اللي قاعدين.. و يقعد يتلكك بأه بأى حاجة:... بأن الناس هي اللي وحشة ..و أن مفيش ضمير..الحكومة و عدم تكافؤ الفرص...و مفيش مانع في النص يذكر أهلها بما لا ترتضيه..و أهو كل ده "حركات"(غلوشة) حتى يينقذ ماء وجهه..

و من هنا كانت العلاقة بين سي شمشون و سياسة تعميم الشر smk: و من ثم تسميتها "بالشمشونية"! :huh: ...

(مش عارفة ليه و أنا باكتب المداخلة اللي فاتت تذكرت مسرحية المتزوجون , و تعريف نجاح الموجي (رحمه الله) لسياسة الوفاق) eey::

تم تعديل 14 سبتمبر 2004 بواسطة G.G

[Dreamwithme]

الله عليك يا سي السيد .....تسلم أيديك علي الموضوع ده

سعيدة جدا إني أكتشفت إني من البروليتاريين بس هانت كلها كام مداخلة وانتقل إلي طبقة البرجوازية إن شاء الله

طبعا أنا كاتبة المداخلة دي لسببين السبب الأول لرفع الموضوع لأنه مناسب للجو اللي إحنا عايشين فيه

والرغبة في تعلم المصطلحات السياسية

السبب الثاني طلب ورجاء لك يا أستاذ سي السيد ما تكمل شوية مصطلحات تانية بنفس الطريقة السينسينية اللذيذة دي؟

تحياتي

[Dreamwithme]

ألو ألو ألو ......أستاذي سي السيد هل تسمعني ؟ حووووووووووول

أنا عمالة أرفع في التوبيك علي أمل جزء تاني من المصطلحات