فيديو..أدْمِن آسف يا ريس: أبويا مبيض محارة وأتحدى منى الشاذلى تستضيفنى

[محمد حامد الغنام]

http://www.youtube.com/watch?v=ru1q4I8PYUw&feature=player_embedded

أنا شايل صورة لواء طيار محمد حسنى مبارك، يعنى لما أشيله أنا أشيل جزمته فوق دماغى، أنا أبويا مبيض محارة بيومية 40 جنيها فى اليوم، وقاعد جنبي فى البيت من ساعة الثورة مبيشتغلش، ومستفدتش حاجة من النظام، ولكن أنا بحب الراجل ده لأنى بحترمه ومش شرط الـ 85 مليون مواطن يبقوا كلهم معندهمش أصل، ويبقوا كلهم بيحبوا الإهانة".

هكذا قال كريم حسين ضمن إهانات عديدة وجهها أدمن صفحة آسف يا ريس للشعب المصري واصفا إياه بأنه شعب " معندهمش أصل"، وأن من يهين مبارك يمثل " ثورة مضادة "!

جاء ذلك خلال مداخلة له على برنامج مصر اليوم مع الإعلامى توفيق عكاشة، وهدد كريم بالنزول لميدان التحرير حاملا صورة الرئيس مبارك

أدمن آسف يا ريس الذى بدا منفعلاً بشدة، انتقد الإعلامى توفيق عكاشة، متهما إياه بالقيام بطرده فى إحدى حلقات البرنامج التى استضافته، وتابع:" أنا هاطلع أرد وأعرفكم مين هو حسنى مبارك، الحاجة الوحيدة اللى نجحت فيها الثورة إنها أظهرت الحقد والنفاق، شكرا للإعلاميين المحترمين اللى كانوا كل يوم بيمجدوا الريس ويبوسوا إيده، احنا مش ممولين من حد، هوه احنا خدونا أمريكا كرمونا، إحنا جبنا 4 آلاف خيمة، أنا بكلمك يا أستاذ توفيق وعاوز أعمل معاك مناظرة علشان إنت راجل جرىء، وأتحدى منى الشاذلى ولا معتز يطلعونى فى برامجهم".

وخاطب أدمن آسف يا ريس أحد ضيوف البرنامج وهو مسئول جمعية أحباء ذوى الاحتياجات الخاصة باستعلاء شديد، عندما طلب الكلمة وابتدأها بقوله: "هو مبارك ..." وهنا قاطعه أدمن الصفحة قائلاً بحدة واستنكار شديدين: " مبارك؟!، هو عيل صغير بيلعب معاك، اسمه الرئيس مبارك"!

اقرأ المقال الأصلي علي بوابة الوفد الاليكترونية فيديو..أدْمِن آسف يا ريس: أبويا مبيض محارة وأتحدى منى الشاذلى تستضيفنى

[ذهبية]

اة اية المطلوب يعنى ؟؟؟

توبك غريب و عجيب زى كل موضوعاتك واضح انك بتحب تمشى على مبدا خالف تظهر

يعنى المطلوب مننا نعلق نقول اية بالضبط ؟؟؟

ياريت تشغل بالك باى حاجة فى الدنيا غير سيرة اللى مش هاقول علية رئيس و لا سابق

هاقول علية المخلوع

ياريت تدور على اى حاجة تتكلم فيها لحسن بجد بقت حاجة تزهق

[Howayda Ismail]

يانهار مش فايت

قولى يابنى هو عملك عمل ولا ايه حكايتك بالضبط

صراحة خرجتنى عن شعورى وعمرى ماتعاملت مع حد بالشكل ده يامحمد

انت حتخلينى اقاطع المحاورات والنت كله لانى مش قادرة اتجاهل مواضيعك ولاتعليقاتك بخصوص مبارك

نفسى افهم ايه الغرض من اللى انت بتعمله ده

مش عاوزة اقسم وارتكب ذنب بس ده لو ابوك عمرك ماكنت حتدافع عنه بالشكل ده

والدليل ولاده اللى من صلبه مش هاين عليهم يفدوه ويبرؤه ويشيلوا عنه القضايا بداله

ابتديت اشك فى شخصيتك يامحمد انت مين بالضبط ومتقوليش انك طالب فى حقوق لان المفروض تكون نايم دلوقت

يااما بتذاكر هو مش المفروض عندكم امتحانات التيرم التانى قريب ودى مش اى كلية

ولا عندك احساس انهم حيمتحنوك فى قضايا مبارك وبتذاكر فينا ههههههههه

اعترف من انت ؟!

[م تيمور المراغي]

محمد من اللجنة الالكترونية للحزب الوطني

وانا ضد اقصاؤه خلوه يقول كل اللي نفسه فيه واحنا نرد او مانردش ,,

والعبره بالصناديق :P

[Simba]

لما أشيله أنا أشيل جزمته فوق دماغى،

لا حول ولا قوة الا بالله

[محمد حامد الغنام]

طبقا للقانون المادة السابعة

7. الإلتزام بعدم تغيير مجري الحوار في الموضوعات او محاولة تشتيت الأفكار التي يناقشها كاتب الموضوع أو تحويل الموضوعات إلي مهاترات شخصية أو إضافة مشاركات لا يقصد الإثراء بها أو الأستفادة وانما فقط لزيادة عدد المشاركات وبالأخص إذا كانت في سياق حوارات جادة.

لذلك ارسلت رسالة الى السادة المشرفين بمسح اى مشاركة فى الموضوع لا تتطابق مع هذا القانون

ولكم جزيل الشكر

[dongol]

ماشية معاك يا عم محمد وصلت لناقص 75 أهو

يالا بقي اتجدعن كده وزود لنا موضوعات عن المخلوع علشان توصل ناقص ميه قبل ما يروح طرة

[se_ Elsyed]

ناقص ميه قبل ما يروح طرة

والله يا دُنجل قرأتها " قبل ما تروح طُره "

فقلت إنك جايبها لمحمد الغنام من الكنترول .. وإنه هايشرف البورتو خلاص ... على أساس تحقيقات الكسب غير المشروع في الخمسة وسبعين سالب اللي واخدهم وهايقولوا له " من أين لك هذا ؟ "

بتبعت تقرير عن تحويل مجرى الموضوع يا محمد يا غنام ؟

يابني ده أحنا صابرين عليك غُلب عشان سنك مع إنك بتغير مجرى النيل مش مجرى المواضيع

[لونا]

محمد من اللجنة الالكترونية للحزب الوطني

وانا ضد اقصاؤه خلوه يقول كل اللي نفسه فيه واحنا نرد او مانردش ,,

والعبره بالصناديق :P

معلش انا حاغير مجرى الموضوع شوية

مش المفروض إن الحزب الوطني إتقفل بالضبة و المفتاح؟

إيه معنى إن صوابع اللجنة الإلكترونية للحزب الوطني لسه بتلعب ؟؟

هو إحنا بيتضحك علينا و لا إيه؟

أنا ما قدرتش أتفرج على الفيديو

عكاشة و آسف يا ريس مرة واحدة !!!

لأ أنا عندي ولاد عايزة أربيهم

تم تعديل 31 مايو 2011 بواسطة لونا

[م تيمور المراغي]

طبقا للقانون المادة السابعة

7. الإلتزام بعدم تغيير مجري الحوار في الموضوعات او محاولة تشتيت الأفكار التي يناقشها كاتب الموضوع أو تحويل الموضوعات إلي مهاترات شخصية أو إضافة مشاركات لا يقصد الإثراء بها أو الأستفادة وانما فقط لزيادة عدد المشاركات وبالأخص إذا كانت في سياق حوارات جادة.

لذلك ارسلت رسالة الى السادة المشرفين بمسح اى مشاركة فى الموضوع لا تتطابق مع هذا القانون

ولكم جزيل الشكر

طيب مادمت بتشتكينا للادارة واحنا اللي بنحاول نديك كل الفرص رغم خطاياك ,,

عاوزك تجاوبني وش كده و بكل امانة لو تقدر ,,

لو اي زميل فاضل هنا اتقال عليه انه عضو لجنةا لكترونية للاخوان المسلمين او كفاية او جمعية التغيير للبرادعي او شباب 6 ابريل

تفتكر كان حيشعر بالفخر ,,

ام يشعر انها مسبة وشتيمة زيك كده ويجري يشتكي !!

ده اقرار منك يا محمد ان تهمة الانتساب للكيان الفاسد ده في حد ذاته يعتبر هجوم شخصي يستدعي الشكوى للادارة

يا محمد انت انسان ذكي و عندك موهبة حرام تضيعها مع اهل الباطل او تنقل كل ماتقع عليه عيناك وتنسبه الى نفسك ,,

راجع نفسك يابني انت في بداية حياتك وانا يعلم الله والجميع هنا عاوزين لك الخير وشايفين اللي انت مش شايفه

اما لو اصريت ,,

فسابذل كل ما بوسعي لاجعلك تعبر عن رأيك ايمانا بحرية التعبير - ماعدا السرقات الادبية

اللهم قد بلغت والكلام ليك ولغيرك وليا انا كمان معاكم ,,

[ابو محمد بن مصطفي]

محمد من اللجنة الالكترونية للحزب الوطني

وانا ضد اقصاؤه خلوه يقول كل اللي نفسه فيه واحنا نرد او مانردش ,,

والعبره بالصناديق :P

اللجنة الالكترونية مش دول الشباب السيس

اللي كانوا قعديين ورا احمد عز ماسكين اللاب طظ في الانتخابات اللي فاتت