صورة و التعليق لكم

[Ahmed Anwer]

الصورة دي التقطتها في شارع كبير في منطقة عين شمس

منقدرشي نمنع حد من عمل الخير و خدمته

و منقدرشي نتهم حملة خيرية زي دي و منتشرة في أنحاء كثير من الجمهورية بإنها رشوة سياسية

و إحنا لا في وقت انتخابات و لا في وقت استفتاء

لدرجة إني قريت في تعليق علي أحد أخبار الأخوان ، المعلق بينتقد أداء الدكاترة الأخوان في إحدي حملاتهم

و بيطالبهم بتحسين الخدمة و تنظيمها !!

طيب هل ينفع أعمل خير و أكتب اسمي تحته ؟؟

مش صدقة السر أفضل من صدقة العلانية ؟؟

طيب هل المطلوب من الأحزاب المنافسة إنها تكون جمعيات خيرية و خدمة عامة عشان تكتسب تعاطف الشارع معها و تقديرها لحركيتهم في الشارع ؟

طب أنا شخصيا أعرف تماما إن عائلة ساويرس ليها أعمال خبرية واسعة و للأمانة بيستفيد بها مسلمين و مسيحين

خلاص يكتب تحت أعماله (( حزب المصريين الأحرار ))

و الكثير طبعا من أصحاب الأحزاب الجديدة و مؤسيينها أكيد لهم أعمال خيرية و أعمال خدمة مجتمع

أنا شخصيا لو هأتبرع لحاجة لوجهة الله ،، هأتبرع بيها لجمعية رسالة مثلا

لإعتقادي إنها هتكون لوجه الله 100% ،، لأن مفيش حزب اسمه حزب رسالة

أنتم أيه رأيكم ؟؟؟

[عنبو]

النيه لا يعلمها الا الله

وبعدين على فكره الاخوان بيعملوا الحاجات دى من زمان

يعنى مش حاجه جديده عليهم فهم عندهم جمعيات خيريه وعندهم نشاط اجتماعى واسع وبيقدموا خدمات للناس كتير قوى وده سبب حب الناس ليهم

دى حاجه منقدرش نلومهم عليها

يعنى واحد بيعمل خير اساسا للناس وطول عمره بيعمل خير يبقى علشان هيرشح نفسه للانتخابات يبقى نقوله بطل تعمل خير علشان

الناس هتتعاطف معاك علشان بتعمل الخير

النوايا لا يعلمها الا الله وحده كون انهم بيعملوا خير فدى حاجه المفروض نشجعهم عليها مش ننتقدهم عليها وكون انهم كاتبين اسمهم

فده شىء طبيعى لان لو جمعية رساله عملت خير هتكتب تحت رعاية جميعة رساله لان الاخوان مش فرد الاخوان جماعه

يعنى احنا مثلا لو عملنا جمعه خيريه وعملنا يوم طبى مجانا فاكيد هنحتاج نعرف الناس هنكتب الجمعيه كذا اسم الجمعيه يعنى

عامله يوم طبى مجانا للناس مش هروح اكتب اسم جمعيه تانيه يعنى

المفروض نشجع اى واحد انه يعمل خير ونسي النوايا على الله لانه اعلم بيها مننا

تحياتى

عنبو

[Alshiekh]

دعاية طبعا

لو لم يكن الهدف هو الدعاية لكان الاعلان كالتالي:

الكشف المبكر للسكر والضغط مجانا

بمقر مركز الشهداء الطبي وذلك يوم الجمعة 6/5/2011 من الساعة 9 حتى الساعة 3

وذلك بمقر المركز أعلى مسجد الشهداء

الكشف سيكون ساعتين ونصف قبل صلاة الجمعة ، وساعة بعد صلاة الجمعة

مع العلم الحالات التى سيقومون بالكشف عليها لن تكلفهم سوى المجهود البدني واشرطة التحليل ، يعني حسبة 100 - 200 جنيه

بس برضه كتر خيرهم ، وياريت يبطلوا يعملوا زي الخواجة كوهين " الخواجة كوهين ينعي زوجته ويصلح ساعات "

وشوف الفرق بين الاعلان ده والاعلان ده اللى فعلا بيقوم بجهود تطوعية وتبرعات حقيقية

[Ahmed Anwer]

صورة تانية بدل ما أفتحلها موضوع جديد

يحمون و ينظمون إمتحانات الثانوية العامة ،،

[spain]

صورة تانية بدل ما أفتحلها موضوع جديد

يحمون و ينظمون إمتحانات الثانوية العامة ،،

وفيها ايه

هما آكلي لحوم البشر؟

والله لو مسكوا الحكم خيروبركة واكيد حيكون لهم مساوئ كتير زي ما لهم مميزات

لازم نتعلم تقبل الاخر مهما كان

وكفايانا بقي ....احبك طالما رايك زي رايي ...واقتلك لو خالفتني

----------------

لو الاعلان في حملة انتخابية امريكية كانوا نجحوا من اول جولة وبلا منازع

هي حملة اوباما كانت قائمة علي ايه؟

انا هاهدي اعصابي كده واتفرج بما سجلبه لنا المسرح السياسي ...وفي النهاية احنا اللي كسبانين .

تم تعديل 12 يونيو 2011 بواسطة spain

[arkan]

اظن كتابة الاسم الراعي او القائم بعمل خدمي ما مهم جدا من وجهة نظري

لو انا بثق في الاخوان هروح اكشف عندهم او اتجه لهم اذا كان لهم مصداقية عندي

اما لو حملة غير معروف توجهها فهيخليني احط علامة استفهام كبيرة .. من هم وبيعملوا ده ليه

اذكر كان في جهة ما - لم اعرف وقتها هدفها - كانت بتعمل خدمات من اموال ومعونات للفقراء ثم ظهرت نواياهم بعد فترة بسيطة وكثير من الناس اللى فعلا محتاجة رفضت الاستفادة منهم

[طارق مصرى]

انا مش شايف فيها اى مشكلة للاعلان عن نفسهم و بالنسبة لصدقة السر مظبوط بالنسبة للافراد و كمان من الفقه حينما تكون قدوة من

الممكن ان تفعل بعض الاعمال الخيرية فى الظاهر من قبيل ان يقتدى بك الناس .