من اجل رشاقتك ...بمعلقه زيت واحده (بطاطس مقليه)

[rewsha]

وانا قاعده الف شويه في بعض المنتديات ,لقيت الموضوع ده

وقلت اخد راْيكم فيه ,ولو حد جربه يقول لنا عل النتائج

بصراحه لو القلايه دي بجد

من بكره الصبح .انزل اجيب 10 واوزع على اهلي واصحابي .وابقى اقسط لهم فلوسها بالتقسيط المريح (اصلها غاليه شويتين)

ندخل على المهم بقى

دي صورتها

اما عن وظائفها بقى خدوا عندكم

استطاعت شركة Tefal الفرنسية تطوير قلاية جديدة ومتطورة والمتخصصة لقلي رقائق البطاطس بوزن كيلوجرام

والتي لا تستخدم إلا ملعقة زيت واحدة فقط من زيت الزيتون , وهو ما يجعل الرقائق صحية تماما.و القلاية الجديدة تسمى AciFry

وتقوم بالعمل بأن بتوزيع الهواء الساخن المخلوط ببخار الزيت حول البطاطس بالتساوي , وتقوم القلاية بتسوية البطاطس كلها في

20 دقيقة, والمحصلة هي بطاطس طازجة وصحية وبدهون 3 بالمائة فقط , بالطبع فإنه لا يوجد مصفاة للزيت في تلك القلاية,

وهي متوفرة بالأسواق.

العقبة الوحيدة لهذه القلاية هي مدة الطهي : 1 كلغ من الرقائق يتطلب 40 دقيقة من الطبخ

السعر بقى

مفاجأه

بس من غير ضرب :sofa:

1800 جنيه بس

[أمل حياتي]

اختي rewsha ......

هذه القلايه موجوده منذ فتره ليست قصيره

هنا بالخليج والحقيقه ايضا انني لم اجربها ....

ولكن اعتقد انها غير عمليه ويوجد لها فيديو

توضيحي على موقع اليوتيوب .....

وايضا سعرها مرتفع وعلى من جربها ان يشرح لنا

إن كان من المجدي شرائها ......

[لونا]

شوفي الموضوع ده كدة يا روشة

الرباط الخاص بي

[rewsha]

شوفي الموضوع ده كدة يا روشة

الرباط الخاص بي

يااااااااااااه

كل ده اتكتب في المحاورات وانا نايمه على وداني ؟؟؟

وانا اللي كنت فاكراها اختراع بقى

وهاخد انا براءه الاختراع ده في المحاورات :sad:

ربنا يكرمك يا لونا

انا موضوع انواع القلايات ده عدى عليه اني اشوفه خالص

بس كويس اني كتبت هنا قبل ما تطق في دماغي وانزل اضيع تحويشة العمر في حتة قلايه من ام 45 دقيقه لكل ربع كيلو بطاطس

مره تانيه باشكرك يا لونا

وطبعا الاخت امل حياتي ...لك جزيل الشكر على المعلومات اللي نصحتوا بيها

[لونا]

لا شكر على واجب يا روشة

أنا برضه كانت عاجباني أوي

لولا شفت الفيديو .. اتصدمت

مالها الطاسة يعني؟؟؟

[ام سلمي]

عارفة يا روشة انا باقطع البطاطس عادي كأني حاقليها وبعدين اجيب صينية تيفال واحط فيها شوية زيت صغيرين واحط البطاطس فيها واقلبها شوية في الزيت ده وبعدين اوزعها في الصينية بحيث تبقي طبقة واحدة بس ، وبعدين احطها في الفرن علي درجة حرارة عالية يعني مثلا 260 درجة ، واسيبها لحد ما تحمر وممكن اقلبها مرة علشان تحمر من الناحيتين ، بس وبتبقي معقولة جدا ، اعتقد هي نفسة فكرة القلاية دي بس تبقي وفرتي ال 1800 جنية:) ، هو طبعا اكيد اللي مقلي حيبقي اطعم بس دي معقولة جدا ، يعني العيال بيحبوها وجوزي بقي حتي بيزعل لما احمر البطاطس علشان دي طبعا صحية اكتر ،ممكن تجربيها كدة وتشوفي

[Om Zayd]

يا روشة .. ما انا قلت قبل كده .. آراء اللي اشتروها برة كانت غير مشجعة إطلاقا

http://www.egyptiantalks.org/invb/index.php?showtopic=121664&view=findpost&p=742185

و فعلا في الفرن بتطلع جميلة .. ممكن تحطي عليها روز ماري -إكليل الجبل - و زعتر مع الزيت

[rewsha]

عارفة يا روشة انا باقطع البطاطس عادي كأني حاقليها وبعدين اجيب صينية تيفال واحط فيها شوية زيت صغيرين واحط البطاطس فيها واقلبها شوية في الزيت ده وبعدين اوزعها في الصينية بحيث تبقي طبقة واحدة بس ، وبعدين احطها في الفرن علي درجة حرارة عالية يعني مثلا 260 درجة ، واسيبها لحد ما تحمر وممكن اقلبها مرة علشان تحمر من الناحيتين ، بس وبتبقي معقولة جدا ، اعتقد هي نفسة فكرة القلاية دي بس تبقي وفرتي ال 1800 جنية:) ، هو طبعا اكيد اللي مقلي حيبقي اطعم بس دي معقولة جدا ، يعني العيال بيحبوها وجوزي بقي حتي بيزعل لما احمر البطاطس علشان دي طبعا صحية اكتر ،ممكن تجربيها كدة وتشوفي

عُلم وسينفذ

ولو عجبتهم كده في البيت ....هادعي لك دعوه حلوه

اصل بصراحه انا باعمل دايت وهمه مستلميني في البيت (بطاطس محمره )كل يوم على العشاء

وسما (بنتي الصغنونه) بتحبها قوي ,وانا خايفه عليها من كتر الزيت

[باهى الطائر الحزين]

من بكره الصبح .انزل اجيب 10 واوزع على اهلي واصحابي .وابقى اقسط لهم فلوسها بالتقسيط المريح (اصلها غاليه شويتين)

يعنى حابب اقول وانا مكسوف والله

يعنى لو هتقسطى يبقى اعملى حسابى فى واحده angl::

والسؤال : ينفع تحمر لحمه وفليه وكبده وكدهوت يعنى ؟

اصل الواد ابنى بيحبهم وفهيمه / مديرة المنزل بتعملهم

بالطريقه الهندى اصلها فلبينيه !! bv:-

الموضوع هايل تسلمى /

[rewsha]

يعنى لو هتقسطى يبقى اعملى حسابى فى واحده

حضرتك تؤمر ..

هاخليهم 11 بدل 10

العربون 30 % ..و في دُفعه اولى و.قسط شهري وقسط ربع سنوي ودفعه عند الاستلام

والدفع بالعُمله الصعبه

اتفقنا؟؟؟

سمعنا الفاتحه بقى

[باهى الطائر الحزين]

يعنى لو هتقسطى يبقى اعملى حسابى فى واحده

حضرتك تؤمر ..

هاخليهم 11 بدل 10

العربون 30 % ..و في دُفعه اولى و.قسط شهري وقسط ربع سنوي ودفعه عند الاستلام

والدفع بالعُمله الصعبه

اتفقنا؟؟؟

سمعنا الفاتحه بقى

ولا الضالين امين

الظاهر ان فهيمه ارحم smk: