حكايتي مع التكييف - ده غير فيلم حكايتي مع الزمان

[se_ Elsyed]

هذا الموضوع ليس شخصياً على قدرة ما هو يتعلق بظاهرة متفشية في الشعب المصري وهي عدم الأحساس بقيمة الوقت بالإضافة إلى درجة إتقان العمل والكروتة والفهلوة واللكلكة الموجودة عند الكثيرين ...

وتعود احداث القصة إلى عام 1945 إبان الحرب العالمية الثانية ... عندما قررت شراء تكييف جديد وسبق أن أستشرتكم في النوعيات الجيده منها في مصر قبل نزولي إجازة .. وقمت بجمع معلومات جيدة عن الانواع وأستقريت على شراء تكييف من نوع " كاريير " و بعد ما نزلت بيومين زرت فرع شركتنا بمصر وسألتهم عن أفضل موزع لهذا النوع فنصحوني بشركة كبيرة موجوده في شارع مكرم عبيد وهي بالمصادفة قريبة جداً منهم ( فركة كعب ) المهم جابولي غدا من عند " كوك دوور " وحلينا من عند " المالكي " وبعدين خطفت رجلي لشركة التككيف وقابلوني بشكل جيد وجابولي حاجة ساقعة من أم جنية وتعاقدت على الجهاز المطلوب وحسب العقد فإن التوريد والتركيب سيتم خلال 48 ساعة .. والحمد لله الذي لا يحمد على مكروه سواه الموضوع ده أستغرق 17 يوم !!!!!! ..

مش بأقول لكم الوقت والأيام ربنا مبارك فيها في مصر ..

- قالوا لي أول حاجة إن التوريد هايتم بكره وبعد بكره التركيب .. اتصلت بهم بكره الساعة 11 ص الراجل بتاع المبيعات قال لي العربية طلعت من المخزن خلاص ومعاها البضاعة وهما في الطريق إليك ( بيني وبينهم بالكثير قوي نص ساعة قول ساعة لو خدوا الطريق الزراعي والإشارات كانت حمرا والريس كان معدي ) .... إتربطت في البيت لحد المغرب بالظبط .. أتصلت تاني .. إيه يابني العربية دي طالعة من حلايب وشلاتين ولا إيه ؟ .. فرد وقال لي أصل المخزن في الهرم معليش يا بيه أصبر شويه .. إستنيت تاني .. واتصلت تاني قال لي معليش مش هانقدر نورد النهاردة .. أنتظر لبكرة .. فقلت له طب يا كذاب ليه قولت لي إن العربية في الطريق إليك ... أعتذر وأتأسف وبكى بين يدي ... فقلبي حن ومشيت الأمور .. أنتظرت اليوم اللي بعده ولغيت مواعيدي وكل شويه إبن مصر يتصل ويقولي فينك يابني أقوله أصل عقبال عندك بأركب تكييف والناس في الطريق وهافضالك يا باشا... نفس الموال بتاع أمبارح طول اليوم إتصالات وهما بيثبتوا في ويقولوا لي في الطريق في الطريق .. لقيتهم جايين الساعة 10 بالليل .. فأول حاجة سألت السواق .. يابني هي الهرم نقلوها بقت في السلوم عند شعنونة ؟ فقال لي هرم إيه ؟.. قولت له إنتوا مش مخازنكم في الهرم .. قال لأ المخازن في مدينة نصر جنب الشركة لزق ... شوفتوا إزاي ؟

- تاني يوم جاء فريق التركيب المرعب .. وهوب بالصلاتو عالنبي ماخدوش ساعة وكانوا ظبطوا المسائل وكل شيء تمام وجربوه .. ماكنش التبريد بتاعه مظبوط وقولت يمكن الفريون لسه هايطلع في المواسير والحركات دي ويا واد إسكت وماتبقاش مُحدث نعمة وعمرك ما شفت تكييف وكفاية إن بقى عندك حاجة متركبة في السقف وعامله منظر... قعدت يومين في عذاب والفريون لسه ماطلعش في المواسير والهواء خارج وكأني مركب شواية فراخ مش تكييف وكل ما أشوف تكييف عند حد أحسده وأقول يامنتوا متهنيين يا اهل البندر .. وكل الناس متكيفه إلا انت يا س س مكتوب عليك تعيش وحيد وتموت فريد .. المهم سافرت المصيف عشان أنسى الموضوع وأريح أعصابي .. قعدت أسبوع ورجعت الشقة .. أشتغل يابا الحاج تكييف .. أبداً والله مانا شغال ... وبالفعل إنتقل إلى رحمة الله .. مات قبل ان يولد .. يعني وهو لسه جنين ... اتصلت عليهم وقولت لهم تعالوا شوفوا الجثة اللي عندي اللي فلوسها لسه مابردتش يا جبابرة .. المهم جم بعد 3 أيام .. وكانت لجنة فنية مكونة من عدد واحد مهندز وأتنين فنيين .. وقالوا معليش يا بيه الكمبروسور محروق .. قولت له نعم ؟ هو احنا لسه عملنا حاجة ده لسه بيلين يابني.. قال دي غلطة المصنع .. قولت له مصنع إيه ؟ ده لو ورشة حدادة بيبقى عندهم حاجة إسمها quality assurance تسمع عنها ؟ الراجل بلم . فقولت له يعني عدم اللامؤخذه قبل ما الورشة بتطلع حتة شغل بيجربوها الأول شغالة ولا ميتة .. فقال لي على العموم إحنا هانغيرهولك على حسابنا ...

- ماستنتش أنا بقى وروحت تاني يوم شركتنا إتغديت كباب وكفتة عندهم من عند " أبو علي " على حسابهم طبعاً ... وقولت أخطف رجلي لحد شركة التكييف اهزأهم شويه عشان اهضم ..فاعتذروا لي وجابولي حاجة ساقعة زي الأولانية من أم جنية برضوا .. ووعدوني إنهم هايطلعوا لجنة تاني تكتب تقرير نهائي لتغيير التكييف كله .. إلى هنا وإنفجرت فيهم وهاتك يا شتيمة من المنقي خيار وقولت لهم أومال اللي بعثتوه إمبارح ده كان إيه ... مهندس مراجيح ؟ وقولت لهم ماليش دعوة انتوا تروحوا تشيلوا البتاع بتاعكم ده وتجيبوه هنا تعملوا عليه تقارير تعملوا عليه شوربة الـ Paper Work ده مش شغلي أنا .. فجابولي حاجة ساقعة تاني عشان اهدأ.. ووعدوني إن التوريد هايتم خلال يومين بالكتير .. وصدقت وبراءة الأطفال في عيني ... كل ده وإبن مصر عمال يتصل وعايزنا نتقابل لأن الاجازة قربت تخلص .. وانا أقوله أنا خلاص كبرت في دماغي ويا أنا يا هما ..

- المهم عدى يوم والتاني وما فيش حاجة جت وهما عمالين بينيموا في الزبون ويقولولي أسباب واهية .. اليوم الثالث خلاص بقى طفح الكيل وكلمت مدير الشركة وقولت له قسماً عظماً وأيمانات مغلظة التكييف ده لو ماجاش النهاردة قبل الظهر أقسم بالله هارمي الجثث اللي عندي دي من خامس دور وإبقوا تعالوا لموها من الشارع وهاجي أخد فلوسي وأوريكوا شغلكم ..

- وبالفعل ما فيش نص ساعة جه التكييف الثاني زي الفريرة ( ناس ما بتيجش إلا بالعين الحمرا ) ....

- وجم بتوع التركيب تاني يوم .. وظبطوا المسائل وأتكيفت وكل شيء بقى تمام

- .... إستنوا ما فيش حد يروح لسه في جزء تاني وأخير ...

يُتبع

[se_ Elsyed]

الموقف الآن أصبح معقد ... عندي جثتين هامدتين مرميين على الأرض وزاحمين المكان واللي رايح واللي جاي يلطش فيهم . حيث إن بتوع التركيب مسئولين عن التركيب فقط فما أخدوش التكييف اللي طلع محروق.. أما المسئول عن إنه ياخد القطع اللي عندي دي هما بتوع المخازن .... مر يوم والثاني وأسبوع ودخلنا في الثاني وفاضل على سفري يومين وأنا أتصل كل يوم ياخوانا تعالوا شيلوا الجثث دي .. واهددهم والله لو مش حرام انا كنت كتمت عليهم وقفلت الشقة وإبقوا قابلوني ... وهما يقولوا حاضر العربية هاتجيلك ومش عارف إيه .. واللي كان مصبرني إن الواد عمر كان واخدها لعبة وعمال يخلع في الخراطيم بتاعة التكييف ويطلع فوق الكراتين وعاملها ملاهي.

- المهم في اليوم قبل الأخير لسفري صحيت من النوم الصبح على صوت زوجتي وهي عماله تهزأ في بتوع الشركة اللي أتصلوا يشوفوا إحنا موجودين ولا لأ عشان ييجيوا يشيلوا الجثث .. فلقيتها عماله تديهم في جنابهم لأننا بقينا في الوقت الحرج وخلاص هانسافر ونسيب الشقة ... وفين وفين جم اخدوا المطلوب ...

الخلاصة بقى عشان طولت عليكوا .. هو إني كنت كل اللي باطلبه منهم إنهم يقولوا الحقيقة ولما يكونوا هاييجوا إن شالله بعد سنة أبقى عامل حسابي أفضل ما يقولوا خلاص إحنا في الطريق والاقيهم جايين بعد 3 أيام ... وكلمتهم كثير عن المصداقية والضمير وعدم إستخدام الفهلوة في كل شيء لأني أخذت إنطباع سيء عنهم حتى ولو كانوا شركة كبيرة وبالتأكيد هانقل الإنطباع ده لأي حد هايسألني .. لكن الظاهر إني كنت بأذن في مالطة وكل اللي كان يسمع حكايتي مع التكييف يغلطني انا ويقول لي إنسى بقى الطباع اللي إتعلمتها بره دي.. إنت فى مصر يعني اللي يقولك جاي الظهر يبقى وإنت مغمض توقع إنه هاييجي العشا .. واللي يقولك جاي بكره يبقى فيها إسبوع ... وبقيت أنا الغلطان وأنا اللي جاي من كوكب زُحل .

- حاجة تانية غريبة حصلت ... وهي إني ماكنتش عامل حسابي في تركيب مواسير صرف للمياه الناتجة عن التكثيف أثناء عمل التكييف .. وبالتالي الفنيين ركبوا خرطوم طويل وأول حاجة عملوها إنهم راحوا راميينه ناحية الشارع عشان يرمي المياه على عباد الله سواء الجيران او اللي ماشيين في الشارع .. فكنت باحسب إن العملية بسيطة ففوجئت خلال يوم ببركة مياة تحت البيت ... فروحت فكرت وجيبت " جركن " مياه سعة 25 لتر قد الداهية وحطيته في البلكون وحطيت الخرطوم فيه .. أفاجأ بقى إنه بيتملي كل يومين وأوقات كنت أنسى أشيله لسكبه في الحمام لبضعة ساعات فقط وألاقي البلكونه بقت بحر ... وذلك لأن نسبة الرطوبة عالية في مصر وعشان كده بتخرج على هيئة مياه وده غير جو الرياض الجاف فمافيش نقطة مياه بتخرج من التكييف... المهم بقى إن كل اللي يعرف كده يستلمني وهاتك يا ضحك وتريقه وإيه الجنون اللي انا باعمله ده .. وما تعمل زي كل الناس يا أخي وإرمي الخرطوم ينقط في الشارع .. وبطل بقى التزمت اللي إنت فيه ده .. وأشياء من هذا القبيل ..

فهل أصبح إحترام المواعيد وإتقان العمل والخوف على شعور الناس والجار هو التزمت والحنبلية زي ما بيقولوا ؟

إنتظرونا في حكاية آخرى مع معمل التحليل الشهير ..

( س س فيديو فيلم يقدم .. حكايات وأفلام على اجزاء .. وعندنا كمان مسلسلات تراجيدي وكوميدي ومعايا امشاط وفلايات ونافتلين بليه )

[فــيــروز]

مالها المراوح !! :rolleyes:

ده حتى التكييف ده بيجيب روماتيزم ومش كويس ابدا على الصحه العامه hpc:!:

بس احقاقا للحق

يبدو ان من يعتاد على وجود تكييف يكون صعب عليه الاستغناء عنه

رغم انه فعلا اختراع بايخ جدا و متعب للغايه :angry:

تم تعديل 14 سبتمبر 2004 بواسطة فــيــروز

[Bero]

مالها المراوح !! 

والله يافيروز عندك حق

ده انا عندي مروحة سقف في الاوده بتاعتي معتبره لو طلعت لفيت انا جنبها هجيب هوا اكتر وطالعه بيها السما ولا بتنقط ميه ولا بتاع hpc:!:

[ragab2]

حكاية

من القلب ومن الواقع المصرى المؤلم

وباسلوب سى السيد الشيق

والزمن الذى ساد فيه فى مصر الفهلوة وعدم الإنضباط

حتى فى أكبر المؤسسات والشركات

ولو أنكم لم تذكروا اسم التكييف

ولكن كان لى تجربة مريرة مع شركة باور

من عامين عندما دفعت ثمن مكيف اسبليت أربعة حصان للمجلس

وماطلونى فى التركيب فى عز الصيف وعلمت من أحد رجالهم سرى أنه سوف لا يتوفر لديهم مكيفات الا قبل الشتاء وعملت لهم عجين الفلاحة كى استرد منهم مادفعته بعد مماطلة وتسويف ولم تفلح معى أكاذيبهم حيث كنت قد فقدت الثقة فيهم

ثم توجهت الى شركة يونيون إير وهى شركة محترمة الى حد ما ولكن مكيفاتهم لا تبرد بالقدر المطلوب أو مثل مكيفات الخليج التى كانت تنفث ثلج فى عز الظهر

وألف مبروك على سلامة التكييف يا عمنا أبوالسيد

وعقبال المركزى

ان شاء الله

[Guest Mohd Gramoun]

فك الكيس يا خويا :angry: و هاتلك جهازين ميتسوبيشي و لا حتي سامسونج..

انت واحد بتتعامل بالاخضر :rolleyes: .... سيب الكارير ده للغلابة اللي زينا hpc:!:

[عصام]

انت واحد بتتعامل بالاخضر

وأوببببااااااااا

جوه الجووووووون

شوف يا ابو السيد ..

أنا عندى أخ ماحدش يعرف عنه حاجه ..

حسد واحد قبل كده ...

موته hpc:!:

[se_ Elsyed]

س س في معمل التحاليل ... أقوى أفلام الموسم ( إثارة .. تشويق .. متعة .. رعب .... ندالة ... )

- موقف ثاني تعرضت له ومشابه لموقف التكييف بالظبط .... قبل ما أسافر بثلاثة أيام كنت لازم أعمل تحليل معين لعمر إبني وروحت لمعمل شهير في القاهرة وكلنا عارفينه وله فروع حتى في الدول العربية وواجعين دماغنا إعلانات ودعاية عنه .. المهم قالوا لي نتيجة التحليل تيجي تستلمها بكره الساعة 10 مساءً .. فلم أذهب في الموعد لوجود مناسبة سعيده لدينا في العائلة وهي خطوبة أختي الصغرى .. المهم روحت لهم يوم سفري قبل الظهر .. فلقيت موظف الإستقبال بيهزر معايا ويقول لي إنت المفروض كان تستلم النتيجة امبارح ماجيتش ليه ؟ وقولت له معليش كان عندنا مناسبة سعيدة .. قصر بقى وهات النتيجة .. فضل يلف ويدور حوالين نفسة ويدور في الملفات .. شوية وراح نادى مدير الدكتور مدير المكتب .. وفضلوا يلفوا هما الاتنين حوالين بعض .. وأنا منتظر وبأبص لهم وعارف اللي هايحصل .. شوية وإتصل المدير بالتليفون ولقيته عمال يهزأ في الناس ويقول لهم إزاي النتيجة ما وصلتناش لحد دلوقت .. المهم قولت لازم أتدخل لأني كده اتأخرت وكان معايا حمايا منتظرني في سيارته ... لأ وأنا أقول له ثانية واحده بس هاخطف النتيجة وانزل لك على طول .. المهم المدير اعتذر لي وقال بالحرف الواحد " إحنا أسفين لأن النتيجة لسه ماوصلتش .. أصل مراة الموظف المسئول عن توصيل النتائج كانت بتولد إمبارح فماجاش الشغل " فرديت عليه برضوا بالحرف الواحد وقولت " الكلام ده انا ممكن أقبله لو كنت عملت تحليل في معمل أم عبدو اللي تحت بير السلم .. اما إنكم معمل له سمعته وتدعون حصولكم على علامة الجودة والأيزو فلا يمكن ان أقبل مثل هذه الإعتذارات التافهة .. فالتحليل بتاعي أنا أيزو دلوقت ومن غير شوشرة " فراح إتصل تاني بالمعمل الرئيسي وجاب لي النتيجة " بوقيقي " يعني شفوي وقال لي الحمد لله النتيجة نورمال وأطمئن الولد بخير .. قلت له أسف ده غير مقبول .. ولو فضلنا نستخدم كلمة معليش وعشان خاطري وسماح النوبه البلد هاتفضل متخلفة زي ما هي .. إنما لما يكون في الموضوع عقوبة مالية يبقى الموظف المحترم اللي ولد ده هايبطل يخلف بعد كده وهايحترم شغله ... ولو سمحت انا عايز النتيجة دلوقت عشان مسافر النهاردة .. فقال طب سافر بالسلامة وإحنا هانبعت ها لك بالنت .. فقلت له طب أديني فلوسي وأنا هابعت لكم الفلوس من هناك برضوا عن طريق النت ... المهم قلت له من الأخر انا رجل محترم والمفروض إن إنتم معمل محترم فعشان نبقى محترمين مع بعض وماتحولش وأبقى مازنجر وأعمل شوشرة لو سمحت إديني فلوسي دلوقت حالاً .. فبصراحة راح مطلع الفلوس من الدرج ويا دار ما دخلك شر.

واهو على كده المواضيع بتنتهي بإعتذار ومش عارف مين بيولد ومين متخانق مع البواب ...

السؤال بقى .. هو عيب أنشر أسم شركة التكييف ومعمل التحاليل ولا ده يبقى أذى ولا إيه بالظبط ؟

[se_ Elsyed]

سعادة الدكتور رجب ..

فعلاً شركة باور وبالرغم من أسعارهم التنافسية إلا إن عندهم مشاكل إدارية ومشاكل أكثر في الدعم الفني .

ويونيون إير ماشيين بحكمة " الصيت ولا الغنى " وجايبين الواد عطوه الفيشاوي عمال يديها إعلانات سمجة ودمها تقيل .

اما كاريير فبصراحة ماركة محترمة وHeavy duty ومجربينها هنا في الخليج .. حاجة محترمة .

الأخت فيروز وزميلتها عبير

المراوح دي كانت زمان كان الواحد يشغلها ساعة العصرية مع بؤين ميه من القلة واليوم بيعدي أخر حلاوة .. اما مع تغير الجو وثقب الأزون وعوادم السيارات والحركات دي .. المروحة بقت عامله بالظبط زي اللي بيهوي على دره مشوي ...

الأخ جرمون ... بقى كاريير بتاع الغلابة ؟!!! وبعدين كيس إيه وفول أخضر إيه ؟ اهو نقكم ده هو اللي خلى سعره بقى 7.20 ج وإنضربنا في السوق يا خويا ... فاكر ولا أفكرك ؟

الأخ إسو .... وكان فين أخوك ده لما شارون عمال يدب فينا هو وبوش ؟ ما تسلطه عليهم يديهم عين تجيب اجلهم .. ولا فالح يشتغل شغل محلي فقط .