28 يناير على كوبري قصر النيل

[لونا]

الفيديو طويل شوفوا من الدقيقة 11 بداية المشاهد الجديدة

يا ريت كلنا نتفرج على الفيديو ..

و نفتكر لما كنا كلنا إيد واحدة .. لما كلنا كنا مصريين و بس ...

لما تجاهلنا إختلافاتنا و خلافاتنا .. لما كنا أنقياء ..

و مدورناش عن مين اللي حيسبق التاني و مين اللي حتكون له الغلبة..

اللي فوق الكوبري هدفهم كان واحد حرية و كرامة و عدالة إجتماعية

يا ترى الهدف اتغير ؟؟.. و علشان كدة النفوس اتغيرت ؟؟

و الاتهامات المتبادلة نازلة ترف من هنا و من هنا؟؟

اتفرجوا و استمتعوا و حسوا بالفخر ..

و ما فيش مانع تنزلوا كام دمعة من عيونكم ..

يمكن تفكرنا باللي كنا عليه من توحد من 4 شهور بس

http://www.youtube.com/watch?v=2ExW3vxFMig&feature=player_embedded

تم تعديل 5 يونيو 2011 بواسطة لونا

[se_ Elsyed]

للاٍسف يا لونا

ناس كتيرة كانت مستخبية وقت الطحن ووقت المواجهة ... وبعد ما خلصت الحدوتة .. إبتدوا يظهروا على الوش ويطالبوا بجزء من السبوبة

أه ما هو بيشوفوا مصر سببوه دلوقت ولازم يطلعوا منها بحاجه

وما حيليتهمش إلا الجعجعة والظهور على شاشات التليفزيون كل يوم عشان يقولوا إننا قوة على الأرض ..

لكن ما زلنا نراهن على شرفاء مصر

على شباب مصر اللي ما كانش بينتمي إلا لمصر ... وخرج بصدرة العاري عشان يجيب لنا الحريةواحنا قاعدين في التكييف وبنشرب شاي

لا حد قال ده سلفي ولا أخوان ولا علماني ولا مسيحي ولا يحزنون ... لكن كنا كلنا مصريين ...

لكن للاٍسف هناك ايادي خفية عاوزة تقسمنا وتشرذمنا

لكن بإذن الله لن يفلحوا في ذلك ... وكلهم هايرجعوا لجحروهم اللي كانوا مستخبيين فيها قبل ووقت الثورة ...

لأن في الأخر لا يصح إلا الصحيح

[لونا]

أهو أنا كل أملي يا سي السيد .. إنه إن شاء الله لن يصح إلا الصحيح

و ربنا مش حيضيع تعب اللي نزلوا ميادين مصر من قلبهم

و كان هدفهم الوحيد خير البلد دي

ثورتنا حتكمل على خير بإذن الله......

علشان كان فيها ناس وقفوا بقلب شجاع و قهروا خوفهم و خوفنا

علشان الناس اللي اتصابت

و علشان الورد اللي فتح في جناين مصر

بس يا ريت النخبة اللي مش نخبة

و اللي بيتقال عليهم مثقفين .. يفكروا في مصلحة البلد الأول قبل مصالحهم

و يكملوا الثورة اللي متشعلقة دي لا حصلت ثورة و لا حصلت حركة تصحيح حتى

يكملوها بإنهم يبقوا بجد إيد واحدة مش شعارات

[محمد حامد الغنام]

ربنا يرحم كل الى مات ويصبر اهليهم

ونوصلوا للقاتل الحقيقى

[لونا]

ربنا يرحم كل الى مات ويصبر اهليهم

ونوصلوا للقاتل الحقيقى

وصلوا له يا محمد :closedeyes:

بيقول لك إيه بأة

طلع أمين شرطة هو اللي إدى الأوامر بضرب و قتل و سحل المتظاهرين .. و تخزيق عيونهم

و اللطيف في الموضوع إن أمين الشرطة اللي حكموا عليه ده

مش موجود .. يعني الحكم غيابي

تم تعديل 5 يونيو 2011 بواسطة لونا