لفائف القرفة

[لونا]

زي ما هو واضح من العنوان

لذيذة جدًا و المفاجأة إنها سهلة لأني عملتها بعجينة العشر دقائق

كانت أول مرة أجرب السينابون و أول مرة أجرب عجينة ال10 دقائق

المقادير :

المرحلة الأولى ؛

فنجان قهوة سكر /

2 ملعقة أكل خميره فوريه /

2 كأس ماء دافي /

2 كأس دقيق /

ذرة ملح /

2 ملعقة حليب بودر

المرحلة الثانية :

3 كاسات دقيق /

نصف كاس زيت/

الطريقة :

- تخلط المواد الجافة من مكونات المرحلة الأولى

- يضاف الماء الدافيء ( لازم تستحملي تحطي صابعك في الماء )

حتى تصبح عجينة سائلة قليلًا .

- نتركها 10 دقائق فقط ثم نضيف مكونات المرحلة الثانية.

- وتعجن جيدًا وتستخدم مباشرة.

- ملحوظة: الكمية كبيرة ممكن تقسم لعمل سينابون بالإضافة إلى فطائر أو بيتزا فرصة مادام الفرن شغال

- تفرد العجينة على شكل مستطيل بسمك نصف سنتيمتر تقريبًا.

- توزع عليها قطع زبدة صغيرة في درجة حرارة الغرفة.

- نرش سكر ثم قرفة مطحونة طازة.

- نبدأ نلف المستطيل من الضلع الطويل (طول المستطيل و ليس عرضه ).

_ و نقطعها قطع بعرض 2.5 أو 3 سم .

- ترص القطع على مسافات - لأن حجمها يتضاعف - في صينية مدهونة.

- نكون مولعين الفرن من قبلها طبعًا و لا تأخذ وقت كثير حتى تحمر من تحت

نرفعها على الرف العلوي حتى تحمر من أعلى

- يصب عليها و هي ساخنة صوص شيكولاتة أو صوص كرامل أو صوص الحليب و الجبنة

عملت الأخير عبارة عن لبن مكثف و عدة قطع من الجبن النستو حتى يصبح القوام كثيف قليلًا

( بدل اللبن المكثف يمكن إستخدام لبن بودرة و سكر و كمية ماء قليلة)

-

و دي صورة لما تبقى من كرواسون بالجبنة و الزعتر عملته بحوالي تلت كمية العجين

جربوها حتعجبكم .. و سهلة

تم تعديل 5 يونيو 2011 بواسطة لونا

[أمل حياتي]

تسلم ايدك شكلها لذيذ جدا

والصوره اجمل ايضا ......

رغم اني ممتازه في عمل المعجنات .....

الا انني لم اجرب عملها ولا مره .....

شجعتيني لذلك وتسلمي مره اخرى

[نوران]

تسلم الايادي

[لونا]

شكرًا يا أمل حياتي

جربيها و خلي الأولاد يعملوا معاكي

حيتبسطوا أوي .. الفرد و اللف .. بتبقى حفلة

و الأولاد عندي هما اللي لفوا الكرواسون كله عجبتهم اللعبة

*****************************************************************************

أهلًا بيكي يا نوران

نورتي المنتدى

و شكرًا لمرورك بالتوبيك

[shiko]

حرررررررررررام عليكم ....

انا بعشق السينابو....واللى اتعمل هنا ده

لعب باعصابى ....

ماينفعش اقول تسلم ايدكم من غير ما ادوق

حد يحدفنى باالدريفرى بسرعة

[لونا]

طب أعمل إيه أنا دلوقت؟

شيكو حبيبتي

لو كان بإيدي كنت أفضل جنبك ........

و أجي لغاية عندك بدستة كاملة

ممكن تستني لآخر الشهر لما أنزل مصر إن شاء الله ؟

[نوران]

بصراحه كان لازم اقول تسلم ايديكى

الصور رووووعه ماشاء الله والمنتدي منور بأحلي اعضاء

شكرا على الوصفات الجميله دي

[نوران]

انا فعلا سمعت عن شوربة تربيه بس ماكنتش اعرف انها هي شوربة البصل

شكرا علي المعلومة

[لونا]

تسلمي يا نوران بس جربي و قولي لي

*********************************************************************

كنت عايزة أكتب ملاحظة في الآخر و نسيت

لما نلف العجينة رول .. لو قطعناها بالسكينة ممكن تخلي الشكل مش مظبوط

أجيب خيط و أحطه تحت الرول .. و أجيب الطرفين بتوع الخيط من فوق و أشده لغاية لما تقطع القطعة

يا رب تكون وصلت

[نوران]

وصلت علي فكره :yes:

اسلوبك سهل ماشاء الله

شكرا :flr1:

[المهندسه]

تسلم ايديكى

ده انتى بنت حلال ...بقالى كتييير عاوزه اعمله بس لازم ادخل اجيب الطريقه من النت

و طبعا مفيش و قت و انشغالى بالعيال بيخلينى انسى ادور عليها

لقيتك جايبالى الطريقه لغايه عندى.

تسلم ايديكى ...هجربها بكره ان شاء الله بس بنصف المقادير علشان اعرف اعجنها فى الفود بروسيسور

و لا العجيبنه تقيله و ممكن يبوظ؟؟؟

[لونا]

تسلم ايديكى

ده انتى بنت حلال ...بقالى كتييير عاوزه اعمله بس لازم ادخل اجيب الطريقه من النت

و طبعا مفيش و قت و انشغالى بالعيال بيخلينى انسى ادور عليها

لقيتك جايبالى الطريقه لغايه عندى.

تسلم ايديكى ...هجربها بكره ان شاء الله بس بنصف المقادير علشان اعرف اعجنها فى الفود بروسيسور

و لا العجيبنه تقيله و ممكن يبوظ؟؟؟

تسلمي يا حبيبتي

شوفي أنا ما جربتش قبل كدة أعجن عجاين الفطاير و البيتزا في الفود بروسيسور

باخليه للحاجات الخفيفة بس

بس لو إنت متعودة تستعمليه في البيتزا مثلًا .. إستعمليه

و عمومًا المرحلة الأولى بتبقى شبه سائلة و يا دوب تتقلب بالمعلقة

المرحلة التانية هي اللي بتحتاج عجن و طبعًا كل ما عجنتيها أكتر بتبقى أنجح

و إبقي وافيني بالنتايج