رسالة إلي الحاكم ..... مقالة عامية أتمني تعجبكم

[ramy basha]

رسالة إلي الحاكم

أتوجهه برسالتي إلي فخامة حاكم جمهورية مصر العربية المرتقب في عام 2012م وأقول له

هل تعلـم يـا سيـادة الحاكـم إنك فـي هذا التوقيت بالضبط ستكون كلاعب كرة القدم الذي

إنفرد بالمرمي والجمهور كلـه قـد حبس أنفاسه ويشاهـده في قمة التركيـز فـإما أن

تسددها وتسجـل هـدف رائـع إقتصاديا وإجتماعيا وعلميا وسياسيا ( خلي بـالك سياسيا

في الآخـر ) ويسجل إسمك فـي التاريخ بحروف مـن ذهب وإمـا أن تضيعها ويمحي إسمك

مـن التاريخ لكنه قد يعلق في أذهان الناس بمـا لا يطيب لأذن أحفـادك سماعـه وأيا كـان

تـوجهك سواء كنت ديمقراطـي أو ليبـرالـي أو اشتـراكـي أو حتي إخواني

( والأخيـر ده طبعا مش مفهوم لحـد دلـوقتـي هـل هـذا توجه ديني أم سياسي بس

ياتـوجـه إنهاردة بفلـوس بكرة يبقي ببلاش ) عمومـا أيـا كـان توجهك فأنت أمام موعد مع

التاريخ لتسجيل أفضل أهداف بطولة نهضة مصر الحديثة و إياك والكرسي فقد أصبحت فترة

صلاحيته فقط أربعة سنوات بعد إنتهاء كل سنة ستنكسر أحد أضلاع حوامله وإياك والبطانة

فإنهم أول من سيتبرأ منك وإياك والإعلام فإنه أول من سيسبك علانا بعد رحيلك

هؤلاء الثلاثة الأوائل أنت من ستختارهم لكنك أخر من ستسيطر عليهم أمام قوة وجبروت

الشعب نحن يافخامة الرئيس نعلم أن الدنيا ليست وردية وأننا لسنا دولة متقدمة لذا

فأعطيناك مفتاح النيل فالأرض ممهدة ولا يبقي سوي أن تروي بالماء وتضع فيها البذور

لتنبت شجرة التنميه وهي كغيرها من سائر الأشجار فقط علينا زراعتها وعنايتها أما

طرحها فمن عند الله ( وإن الله لايضيع أجر من أحسن عملا ) ،

والآن جاء وقت الطلبات هو طلب وحيد مفيش غيره أبوس إيدك ياشيخ تهتم بالعلاقات

الداخلية بدلا من العلاقات الدولية فقط تهتم بعلاقتك بشعبك بدلا من علاقتك بالاتحاد

الأوربي وأمريكا و إسرائيل مش عيب أبـدا إنـك تكون رئيس جمهورية وتجلس مـع

مجموعة من الشباب بالصدفة ( غير المرتبة مسبقا ) يعني توقف عربيتك أمام أحد

الجامعات في وقت خروج الطلبه وإسألهم تتمنوا إيه لبلدكوا وممكن يتحقق إزاي إقسملك

بالله ستخرج بنتائج أفضل مليون مرة من التي ستخرج بها من الخطط الخمسية وإجتماعات

مجلس الوزراء ومش عيب والله لو إخترت وزراء سنهم لا يتعدي الـ 30 أو الـ 40 علي الأكثر (

يا أخي دا الرسول إختار قادة جيوش في عقدهم الثاني ) وبلاش وحياة والدك تستخدم

الألفاظ دي ( الأخوة المواطنون ، البنية التحتيه ، عجلة التنمية ، سبل الرخاء ،

تعزيز الديمقراطية ،...،....) وياريت لما تشجع الاستثمار يكون المستثمر عينيه سوداء

وشعره إسود وبشرته قمحي ويفضل مصري الجنسية بلاش التليفزيونات الملونة اللي

راكبه عربيات مابنعرفش حتي نقرأ ماركتها وفي الآخر نكتشف إنه واخد متر الأرض بشلن

أو واخد مصنع بأقل من قيمة الأرض اللي مبني عليها وإلا هانكون كشباب مصري مضطرين

لضرب شعرنا أكسجين وإستخدام عدسات لاصقة علشان نعرف نتعامل معاك بس وقت

الجد هتلاقيها بقت سودا في ميدان التحرير ( ها خلي بالك ) الشعب المصري مايعرفش

أبوه ، وبلاش وحياة والدك الأخوة العربية تضغي علي قلبك يعني ضيق قلبك شوية من

الناحية دي بلاش توسعه أصل ما قلوكش الناس دي بتحبنا أد إيه ولا بتحقد علينا

ولا بتكرهنا وياسلام لما بيقابلونا في الغربة بيبقوا عايزين يطيروا بينا طيران ( علشان

يرجعونا مصر طبعا ولا فخامتك فهمت إيه )ولما برجع مصر ماقولكش بحس بإيه لما الاقي

إبن المليونير الفلسطيني بيدرس بدون مصروفات في جامعات بلدي والمهندس السوري

بياخد 3 أضعاف مرتبي من بلدي ( مجاملة للوحدة العربية )والصحفي اللبناني بيتفتحله كل

الأبواب وأنا بيترزع في وشي نفس الأبواب وبصراحة أول حاجة بيعملوها الجماعة دول لما

بيرجعوا بلادهم بيشكروا أوي أوي أوي فينا وفي حضرتك بس يمكن أنا اللي بفهمهم غلط

أصل الشتائم الشامية تختلف عن المصرية شوية ،

عموما فخامتك لازم كل يوم الصبح تفتكر إن إحنا إللي فخمنا فخامتك فماتنسناش علشان

اللي بيفخم واحد هو بس اللي يقدر يفسيه ، وأغلي مورد نمتلكه هو الكرامه إياك ثم إياك

تسمح لجنس بني آدم عربي أو أجنبي يمسها ، وبلاش ولادك يحضروا متشات المنتخب

علشان الفترة اللي حضرتك هاتحكم فيها هايكون المنتخب بيمر بمرحلة إحلال وتجديد

وخلي بالك من الفنانين وبلاش تلتقي بيهم هما فعلا بيكون فيهم شوية بيطروا اللقاء

بس معلش خلي فترتك الاولي ناشفة علشان يمكن تقعد فترة تانية ، في بقي جماعة يا

فخامة الرئيس دول متخصصين شعر في الرؤساء عايز منك خدمة أول ماتشوف واحد فيهم

بينفخ في فخامتك عايزك تتخيل لحظة التفسيه فـلازم تشد مـن إيـده المنفاخ بسرعـه

عـن طريـق كلمة تحرجه أو إن شالله حتي تسفخه قلم محترم عـادي مش هـايصعب علينا

ولما تيجي خارج من المؤتمرات أواللقاءات الجماهيرية وتلاقي الناس بتصقفلك سايق

عليك النبي ياشيخ ماتكفيش إيـدك نص كـافية وإنت بتشاورلهم ويـاسلام لـوقلدت

الأوربيين وحطيت إيدك علي صدرك وإنحنيت لهم تعظيما لتحية الشعب صدقني يا فخامة

الرئيس إحنا شعب كل ما هتتواضع لنا هاتكبر في نظرنا وكل ما تتكبر علينا وتننفخ (هانفـ...

أقولها ولا خلاص فخامتك فاهمها ) ،

آه صحيح نسيت أقولك علي حاجة بلاش والنبي حكايـة الواسطة دي يعني بـلاش إبـن

الضابط يبقي ضابط ولا إبن المستشار يبقي وكيل نيابة وشوفلك حل في دكاترة الجامعة

إللي بيدوا لولادهم إمتياز بمناسبة أو مـن غيـر مناسبة إن شالله حتي تخلي التصحيح

فـي الجامعات مـن خـلال لجـان تصحيح والإمتحان مـن خـلال لجان إمتحان أي حـل تشوفه

يقضي علـي نبات الكوسة اللي أصبـح قـرع ده إحنا مـوافقين عليه بس يكـون حـل مفعل

علي أرض الواقـع كفايـة بقـي خسارة كفاءات وبلاش حكاية تعيين أبناء العاملين دي لأن

إحنا مش أبناء الشغالة لا مؤاخذة من الآخر وبإختصار ركز علي الكفاءات وماترتبطش بأي

علاقات مع أي حد ولا تعمل أي خاطر ولا تخشي أي أحد سوا الله عز وجل ثم ميدان التحرير

أوك فخامتك أشوفك بعد الإنتخابات بقي ........

كتبه / سامح عامر

[Om Zayd]

متفقة معاه في حاجات و مش متفقة في حاجات

بس رسالة معبرة عن ناس كثير

جزاكم الله خيرا

[لونا]

مقال جميل .. بس مين يقرأ و مين يسمع

لكن لم يعجبني ..

الاهتمام بالعلاقات الداخلية دون الخارجية

مصر دولة .. و دولة كبيرة كمان .. لازم يكون لها علاقات مع الجميع

من أول الدول العربية و الإسلامية و طبعًا أمريكا و حتى إسرائيل

إحنا مش عايشين في العالم لوحدنا

و يا ريت نبطل حكاية أصل العرب مش بيحبونا .. أصلهم بيغيروا مننا

لو فيه ناس كدة (و فيه طبعًا ) .. فيه غيرهم بيحبوا المصريين جدًا

و عمومًا معاملتك مع الناس هي اللي بتحدد إزاي هما حيعاملوك

و على مستوى الدول .. اللي بيحدد نوع العلاقة هو المصالح في المقام الأول و ليس المشاعر

غير كدة المقال كله منطقي ..

لكن هل الرئيس القادم سيقرأ ما يريده الشعب و يأخذ العبرة ممن سبقه؟

[ramy basha]

شكرا علي مرورك ومشاركتك الجادة في الموضوع يا لونا بس علي فكرة المقصود مش قطع العلاقات وإنما الاهتمام بالداخلية اكثر شوية من الخارجية لآن للأسف في السنوات اللي فاتت كان الرئيس المخلوع بيقيم آدائه من خلال علاقاته الخارجية بس ولما إستضافوا مدير مكتبه السابق في برنامج الحياة اليومقال إنه كان بيرفض الاطلاع علي تقارير الأحوال الداخلية ولو قرأوه ماكنش بيقرا أكتر من نصف صفحة في حين إنه بيهتم بكل كلمة في تقارير العلاقات الخارجية

أما بالنسبة لإشارتك إن الرئيس القادم يعتبر من سابقه ده لازم إن شاء الله وإلا يبقي الحكم هايطرده بره المباراة خالص

وعلي فكرة مشاركتك أكثر من رائعة وبكرر شكري علي مرورك الطيب

[سميرة ابو السعود]

المقاله مفهوم غرضها ايه

بس الاصح انه اي حكومة او رئيس تهتم بالشأن الداخلي والخارجي

[Abu Reem]

وبلاش وحياة والدك تستخدم

الألفاظ دي ( الأخوة المواطنون ، البنية التحتيه ، عجلة التنمية ، سبل الرخاء ،

تعزيز الديمقراطية ،...،....)

والنبي لو سمحت خليه يضيف على العبارات اللي فوق دي...وبلاش عنق الزجاجة

الله يخرب بيت دي زجاجة اللي كلها عنق...بقالنا فيها 60 سنة

والا اقول لك خليه يكسر الزجاجة ويخليها عنق " الكان" لان الناس بتشرب كانز دلوقت

كفاية بقى زجاج......علشان احنا بقينا في القاع