أسئلة مشروعة

[MohamedAli]

هذا المقال يحوي اسئلة مهمة لايرد عليها احد وخصوصاً من يسمون النخبة سواء اعلاميين او سياسيين

وهو منشور في المصري اليومي للكاتب عمر طاهر

القارئة صافيناز سليمان تعاملت مع مقال أفكار جروبات التحدى كما لم يتعامل أحد من بقية القراء الذين وصلتهم الرسالة الكامنة فى السطور الساخرة. صافيناز كانت لها رسالة أخرى اختارت الأسلوب نفسه الذى كتبت به هذا المقال، ووجهت أسئلة لا أنشرها لأنها تحدتنى أن أفعل، ولكن أنشرها لأنها صوت يعبر عن طريقة تفكير كثيرين، ولأنها وجهة نظر نادرا ما يتم طرحها ومناقشتها بدون انفعال، ولأن بعض أسئلتها تشغل تفكيرى أنا أيضا وتحتاج إلى إجابة (ربما فى مقال الغد) بينما بعضها يجيب عن نفسه.. أو هكذا أعتقد.

تقول..

تحدانى إنسان طبيعى أن أجمع 100 ألف واحد يفهمنى ما معنى أن يطلع فى التليفزيون شخص ما يقول للمصريين إيه دخل ربنا فى السياسة؟ تحدانى إنسان طبيعى أن أجمع 100 ألف واحد يفهمنى ليه كل وسائل الإعلام مابتستضيفش ذوى الفكر السياسى الدينى إلا علشان تحرجهم وتتصيد لهم الأخطاء؟

تحدانى إنسان طبيعى أن أجمع 100 ألف واحد يفهمنى إزاى سيدنا محمد بيقول لو أن فاطمة سرقت لقطعت يدها ولسه فيه ناس بتقول حرام عليكو سيبوا حسنى مبارك؟ تحدانى إنسان طبيعى أن أجمع 100 ألف واحد يفهمنى إذا كانت الدولة الإسلامية دولة فاشلة على مر العصور زى ما بيقول علاء الأسوانى، طيب إيه نموذج الدولة المدنية العلمانية العظيمة اللى هانعمل زيها؟

تحدانى إنسان طبيعى أن أجمع 100 ألف واحد يفهمنى ليه أيام الاستفتاء كنتوا بتتكلموا عن الديمقراطية وبعد النتيجة كله طلع يقول إن مصر كلها جهلة؟

تحدانى إنسان طبيعى أن أجمع 100 ألف واحد يفهمنى ليه لما أقول رأيى لازم الأول أحلف إنى مش من الإخوان ولا السلفيين؟ (على فكرة أنا لا إخوان ولا سلفيين). تحدانى إنسان طبيعى أن أجمع 100 ألف واحد يفهمنى ليه الإعلام رسخ فى نفوس الأطفال والمراهقين والمسيحيين إنك لو شفت واحد ملتحى ولابس جلابية قصيرة أو واحدة منقبة أجرى (على فكرة أنا مش منقبة)؟ تحدانى إنسان طبيعى أن أجمع 100 ألف واحد يفهمنى ليه كل أفلام عادل إمام (وهو من له من التكريم أكتر من أى عالم أو مفكر أو رجل دين) لازم بيقى فيها واحد ملتحى أهبل أو حرامى؟

تحدانى إنسان طبيعى أن أجمع 100 ألف واحد يفهمنى ليه كل شوية بنشوف كلمة الشيخ الشعراوى الثائر الحق ومش بنشوف وجهة نظره فى العلمانية وهى موجودة ومنتشرة على الإنترنت؟ تحدانى إنسان طبيعى أن أجمع 100 ألف واحد يفهمنى ليه الخمستاشر عشرين واحد اللى فى كل التليفزيونات والجرايد والندوات بيحاولوا بالعافية يوصلوا إن رأيهم بس هو اللى صح، ومع كده بيقولوا إنهم ضد الديكتاتورية ومع الديمقراطية؟ تحدانى إنسان طبيعى أن أجمع 100 ألف واحد يفهمنى ليه الإعلام بيرسخ إن الاسلام واللى هما مايعرفوش عنه غير الإخوان والسلفيين معناه قطع اليد؟ هى ليه الناس خايفة من قطع اليد؟ إنت بتسرق؟ تحدانى إنسان طبيعى أن أجمع 100 ألف واحد يفهمنى ليه واحد نسى يحلق دقنه الصبح ونزل خطف شنطة واحدة ماشية فى الشارع تتكتب بكرة فى الجرنال: سلفى يروع الآمنين فى الشارع؟

تحدانى إنسان طبيعى أن أجمع 100 ألف واحد يفهمنى ليه من حق شخص أو مجموعة من الأشخاص إنهم يقرروا لنا نعيش إزاى لكن ربنا مش من حقه؟ تحدانى إنسان طبيعى أن أجمع 100 ألف شخص يفهمنى ليه الناس اللى بتقول قال الله وقال الرسول تبقى مضطهدة فى عصر مبارك وبعد الثورة أيضا؟ تحدانى شخص أن أجمع 100 واحد يفهمونى ليه الناس خايفة من الدين ومش خايفة من العقل البشرى؟

http://www.almasryalyoum.com/node/465817

[eslam elmasre]

تحدانى شخص أن أجمع 100 واحد يفهمونى ليه الناس خايفة من الدين ومش خايفة من العقل البشرى؟

الناس عمرها ما تخاف من الدين لانها عايشاه وبتمارس شعائره وبتحبه

الناس خايفة من اعتبار الفهم البشري للدين هو الدين وتطبيقه بمفهوم بشري واعتبار هذا الفهم هو الدين

وخايفين من اللي هايحصلهم لو ابدوا معارضة او رفض لهذا الفهم

هو فيه حد بيخاف من اللي بيحبه

[Alshiekh]

لازم وحتما يعني 100 ألف واحد؟

مينفعش يعني يكون واحد مثقف هو اللى يفهمها؟

أصلها كده مش حاتعرف تجيب 100 ألف واحد لانها حتبقى مظاهرة.

وبعدين بدل الأسئلة دي كلها ، ليه ماتقولش رأيها من الآخر وخلاص؟

[MohamedAli]

لازم وحتما يعني 100 ألف واحد؟

مينفعش يعني يكون واحد مثقف هو اللى يفهمها؟

أصلها كده مش حاتعرف تجيب 100 ألف واحد لانها حتبقى مظاهرة.

وبعدين بدل الأسئلة دي كلها ، ليه ماتقولش رأيها من الآخر وخلاص؟

فعلاً انا برده سألت اشمعني 100 الف واحد ؟!!!

علاوة علي ذلك الاسئلة في منها كثير بسيطة واي علماني ولاليبرالي - حتى لو لسه تحت التدريب - يقدر يجاوبها لكن فيها اسئلة مهمة فعلاً مثل

تحدانى إنسان طبيعى أن أجمع 100 ألف واحد يفهمنى ليه كل وسائل الإعلام مابتستضيفش ذوى الفكر السياسى الدينى إلا علشان تحرجهم وتتصيد لهم الأخطاء؟

تحدانى إنسان طبيعى أن أجمع 100 ألف واحد يفهمنى ليه كل أفلام عادل إمام (وهو من له من التكريم أكتر من أى عالم أو مفكر أو رجل دين) لازم بيقى فيها واحد ملتحى أهبل أو حرامى؟

تحدانى إنسان طبيعى أن أجمع 100 ألف واحد يفهمنى ليه الخمستاشر عشرين واحد اللى فى كل التليفزيونات والجرايد والندوات بيحاولوا بالعافية يوصلوا إن رأيهم بس هو اللى صح، ومع كده بيقولوا إنهم ضد الديكتاتورية ومع الديمقراطية؟

تحدانى إنسان طبيعى أن أجمع 100 ألف شخص يفهمنى ليه الناس اللى بتقول قال الله وقال الرسول تبقى مضطهدة فى عصر مبارك وبعد الثورة أيضا؟

تحدانى إنسان طبيعى أن أجمع 100 ألف واحد يفهمنى ليه أيام الاستفتاء كنتوا بتتكلموا عن الديمقراطية وبعد النتيجة كله طلع يقول إن مصر كلها جهلة؟

تم تعديل 8 يونيو 2011 بواسطة MohamedAli

[ذهبية]

اجابة كل السئلة المشروعة دى كلها فى كلمة واحدة

المصلحة

و جملة تانية

الدنيا مصالح

بمعنى اللى يحقق مصلحتى معايا و اللى مش يحقق مصلحتى ضدى و دة معناها انة جاهل و مش بيفهم حاجة يبقى لازم ااقل من قيمتة علشان محدش يصدقة او يمشى وراة يبقى كدة مصلحتى ه هتكسب و اى حد ضدى لازم ادمرة

دة من الان دة قاعدة معروفة و متوراثة على مر الزمن

معروف لية الاعلام بيكرة الناس فى الشيوخ و الذقون لان عارفين كويس ان الاتجاة لو انتشر هيقعدوا فى بيوتهم يبقى لازم الشعب ينتفح كمان و كمان علشان يثبتوا ارجلهم كمان و كمان

و يبقى كل الاجهزة الاعلامية تحقق هذا الهدف بكل وسائل

يبقى المفروض اية كل واحد عقلة فى راسة و يفكر و يبحث بنفسة عن الصح و لا يترك عقلة لغيرة يلعب فية

و لازم الكل يعرف كل واحد بيتكلم من منطلق اية بالضبط مصلحة عامة و لا خاصة

و لازم تسمع كل الاراء من كل الاتجاهات و اعقلها و توكل

[pink rose]

طب انا قنوعة و مش عاوزة 100 الف واحد

اتنين تلاتة كده يجاوبولي على الاسئلة دي كلها

لانها كمان بتدور في دماغي

و عشان الجملة المعتادة تكمل انا لا سلفية و لا اخوان و لا منتقبة

:)

[masraweya]

اعتقد قصدها بال 100 الف .. معجبين بصفحة فيس عليها اجابات ما طرحته

مستنية مقال بكرة

و متفقة مع ذهبية .. المصلحة

لكن برده ممكن يكون فيه البعض هذه قناعاته

سبب التعديل: نسيت اقول اني لا سلفية و لا اخوان و لا منتقبة

تم تعديل 8 يونيو 2011 بواسطة masraweya