كرة القدم الأمريكية ...

[kfaya]

بدأ الأسبوع الماضى دورى كرة القدم الأمريكية للمحترفين .... و قد كنت أجهل تلك اللعبة تماما الى أن شرح لى صديق مصرى يعيش فى أمريكا أساسيات و قانون اللعبة , و بمتابعتها وجدتها لا تقل اثارة و متعة عن كرة القدم العادية , و ان تفوقت عليها فى السرعة و القوة ......

حاليا اتابعها على قناة ESPN الرياضية التى تبث عن طريق الأوربت ..

[فــيــروز]

طيب ما تشرح لنا الموضوع .. ليس لانى ساستطيع متابعتها بقوه لكن على الاقل نفهم قواعدها حين تكون موجوده فى سياق احد الافلام .. :D

[kfaya]

أأمرينى يا فيروز هانم ......

الملعب فى كرة القدم الأمريكية عبارة عن مستطيل , طوله 100 ياردة ( الياردة 90 سم ) و عرضة 53.3 ياردة عرض ( شايفين الدقة يعنى بالضبط 160 قدم بالضبط ) ...

كل فريق يتكون من 11 لاعب كما فى كرة القدم العادية , و اللعب يكون بواسطة كرة انسيابية الشكل ( مثل الشمامة ) و هذا ما يشكل الصعوبة و الالأمساك بها ..

طريقة اللعب :

كل فريق له نصف ملعب , و تعتمد اللعبة على الجرى محتضنا الكرة حتى تصل بها الى خط نهاية نصف ملعب الخصم , و على ذلك يكون فريق معه الكرة فى حالة هجوم و الأخر فى حالة دفاع ..... البدء من منتصف الملعب و الفريق فى حالة هجوم ىقف اللعبون ال 11 بطريقة مثلا 8 خط أول خلفهم بثلاث ياردات لاعبان خلفهم لاعب ..... وفى مواجهتهم يقف الفريق الأخر الذى يكزن فى حالة دفاع ..

يبدأ اللعب عندما يمرر احد اللاعبون الثمانية الكرة من بين أرجله للخلف فيلتقطها اللعب الواقف خلفه , و هنا تدور الماكينة , يحاول ذلك اللاعب أن يجرى محتضنا الكرة أكبر مسافة ممكنة , أو يقذف الكرة الى زميل له فى موقع جيد ليقوم بدوره بالتقاط الكرة قبل أن تسقط على الأرض ( و تلك أول صعوبة ) حيث يقوم الفريق المدافع باستعمال كافة السبل لمنع هذا الألتقاط , من دفع و شد و تكتيف لأنه لو لم توقع الخصم بصورة كاملة و استطاع القيام و الأفلات فاءن و صولة الى خط النهاية يصبح مؤكد .... الفريق فى حالة الهجوم لابد أن يقطع 10 ياردة على الأقل فى كل محاولة و له 4 محاولات , لو لم يحققها تنتقل الكرة للفريق الأخر , و على ذلك لو فشل فريق فى تحقيق المعدل المطلوب بدلا من خسارة الكرة بالمجان يقوم بشوطها بالقدم حتى يبعدها أكبر مسافة ممكنه عن مرماه .

وصول اللاعب الى خط نهاية نصف ملعب الخصم حاملا الكرة يعطيه 6 بنط بخلاف بونص شوطه بالقدم لو دخلت الكرة داخل الشوكة العلوية يأخذ بنط أخر ...

بصراحة لعبة مثيرة و سريعة و قوية ..... أسف لو كان فيه غموض فى شرح اللعبة و ممكن حد من الأخوة اللى عايشين فى أميركا يكون عنده اضافات ...

[فــيــروز]

شكرا جزيلا يا كفايه rs: ممكن شوية اسئله؟ انا كتبتها تباعا وانا اقرا المداخله ..

يا ترى مفيش جول و مطلوب احراز فيه زى الكوره العاديه !! :P اقصد ان مجرد الوصول بالكره الى خط النهايه يعتبر احراز هدف؟ وكمان ماذا يحدث لو وقعت الكره من يد اللاعب؟ :P ممكن يلتقطها تانى و يواصل الجرى بها ولا لو وقعت يبقى خلاص تروح للفريق التانى؟

الفريق فى حالة الهجوم لابد أن يقطع 10 ياردة على الأقل فى كل محاولة و له 4 محاولات

المحاوله تحتسب بدءا من التقاط الكره؟ يعنى لو وقعت تبقى المحاوله احتسبت و تبدا محاوله اخرى؟ و المحاولات متتاليه؟ والمحاوله تبدا من منتصف الملعب مره اخرى؟ rs:

بخلاف بونص شوطه بالقدم لو دخلت الكرة داخل الشوكة العلوية يأخذ بنط أخر ...

شوكه علويه؟ اللى هى ايه؟ العارضه يعنى ولا مفيش جول اساسا !! :P

ممكن طيب بالمره تشرح لنا قواعد البيسبول لو تعرفها rs:

هى اللعبه دى اللى اللعيبه فيها بيلبسوا خوذه على راسهم وبيبقى شكل الزى بتاعها شبه زى هركيوليس !! :P دى لعبه عنيفه فعلا :P

تم تعديل 21 سبتمبر 2004 بواسطة فــيــروز

[kfaya]

العزيزة فيروز ...

الصعوبة فى اللعبة دى هو شكل الكرة .... حاجة غريبة مميزة زى كل حاجة أمريكانى , طبعا انتى أكيد شفتيها ؟؟ مش عارف ممكن تتوصف ازاى ... مثلا على شكل قوسين متلاحمين () .... ايوه كدا بالظبط .. صعب جدا الواحد يلتقطها و الأكثر صعوبة حينما تسقط على الأرض , مستحيل تحديد الأتجاه الذى ستسلكه !!! مثلا الكره العاديه ينما تسقط من مكان مرتفع فهى ترتد فى عكس الأتجاة , أى الى أعلى مرة ثانية ..... و لكن تلك الكرة ممكن ترتد لأعلى شمال أو لأعلى يمين أو اى اتجاه غير متوقع بطريقة كوميدية مثيرة ....

يا ترى مفيش جول و مطلوب احراز فيه زى الكوره العاديه !!  اقصد ان مجرد الوصول بالكره الى خط النهايه يعتبر احراز هدف؟

فعلا كلامك صح .... مجرد وصول الكرة بصحبة اللاعب الى خط نهاية الملعب يعتبر بمثابة تسجيل هدف يستحق 6 نقاط ...

وكمان ماذا يحدث لو وقعت الكره من يد اللاعب؟  ممكن يلتقطها تانى و يواصل الجرى بها ولا لو وقعت يبقى خلاص تروح للفريق التانى؟

لو وقعت الكرة من اللاعب أثناء الجرى أو أثناء التقاطها أو بأى طريق و استطاع التقاطها مرة اخرى بسرعة , أى تكون الكرة فى حالة حركة على الأرض , مع مراعاة صعوبة تنطيط الكرة على الأرض كما قلت سابق , مفيش مشكلة و يواصل الجرى مرة أخرى .... و لو تمكن الخصم من التقاطها , تصبح من حقه و يصبح من حقه ان يجرى بها داخل ملعب الخصم محاولا الوصول الى خط النهاية ...

المحاوله تحتسب بدءا من التقاط الكره؟ يعنى لو وقعت تبقى المحاوله احتسبت و تبدا محاوله اخرى؟ و المحاولات متتاليه؟ والمحاوله تبدا من منتصف الملعب مره اخرى؟ 

المحاولة تبدأ بوقوف الفريقين فى حالة ارتكاز مواجهين بعضهم يفصل بينهم عدة ياردات ... فريق معه الكرة ( مهاجم ) .... و الأخر فى مواجهته ( مدافع ) .. تبدأ المحاولة بصفارة الحكم حيث يطارد الفريق المدافع حامل الكرة محاولا الأمساك به و ايقاعه أرضا و منعه من أن يقطع مسافة كبيرة .... بينما الفريق المهاجم ينتشر محاولا فتح طريق لحامل الكرة لكى(1 ) يجرى بنفسه قاطعا أطول مسافه فى اتجاه خط النهاية أو ( 2) يحاول حامل الكرة أن يقذف بها الى زميل له خالى من الرقابة يستطيع أن يلتقطها قبل أن تسقط على الأرض و يجرى بها قاطعا أطول مسافة فى اتجاه خط النهاية .... و تنتهى المحاولة بسقوط اللاعب على الأرض محتضنا الكرة .. مكان سقوط اللاعب محتفظا بالكرة هو بداية المحاولة الجديدة ... وهنا يتم قياس المسافة التى قد تم قطعها , لو كانت أكثر من 10 ياردات ... تتجدد تلقائيا المحاولات الأربع ... و لكن لو تم مثلا قطع 8 ياردات , يكون الفريق قد خسر محاولة و المحاولة التالية تصبح 12 ياردة بدلا من عشرة ..... حساب تراكمى ... فى المحاولة التالية لو قطع أكثر من 12 ياردة .... تتجدد المحاولات الأربع من جديد و يصبح الفريق فى المحاولة الأولى و مطالب ب 10 ياردات ..... و هكذا .

طب أسألينى لو الفريق المهاجم استنفذ المحاولات الأربع ماذا يحدث ؟؟؟؟

تنتقل حيازة الكرة للفريق الأخر من نفس مكان فقد الكرة , و يصبح المهجم مدافع و المدافع مهاجم ...

شوكه علويه؟ اللى هى ايه؟ العارضه يعنى ولا مفيش جول اساسا !!

المرمى فى كرة القدم الأمريكية مختلف الشكل و الوظيفة ....

الشكل على هيئة شوكة أو حرف U مرتفعة عن الأرض بحوالى خمسة أمتار ( مش متأكد ) .... و يوجد مرمى فى كل جانب كما فى كرة القدم العادية ..

الوظيفة :

حينما يستنفذ فريق ثلاث محاولات و هو لا يعتقد بامكانية تحقيق نتيجة جيدة فى المحاولة الرابعة و الأخيرة , فمن حقه أن يستعمل قدمه فى شوط الكرة بحيث لو مرت من داخل زراعى حرف ال U يحتسب للفريق نقطتين

و الوظيفة الأخرى .. حينما يحرز فريق هدف ( أى يصل الى خط النهاية حاملا الكرة كما أتفقنا و الهدف = 6 نقاط ) فأن من حقة شوطة أضافية بالقدم , لو عبرت بين زراعى المرمى , يأخذ نقطة أضافية ...

هذة وظيفى المرمى فى كرة القدم الأمريكية , و طبعا لا يوجد حارس مرمى حيث أن المرمى مرتفع جدا عن الأرض ...

بالأمس كان هناك ماتش ممتع بين فيلاديلفيا ( ايجلز ) و مينيسوتا ( فايكنجز ) انتهى 29/16لصالح الفريق الأول ..... المبارة لمدة ساعة مقسمة على أربعة هاف تايم كل واحد 15 دقيقة ...

حاولت أفهم البيسبول ... لكن للأسف فشلت ... كفاية الفوتبول , احنا هننهب

أى سؤال تانى ؟؟؟؟ احنا فى الخدمة ....

[linux]

http://en.wikipedia.org/wiki/American_football#The_field

http://en.wikipedia.org/wiki/National_Football_League

http://homepages.cae.wisc.edu/~dwilson/rsfc/intro/

تم تعديل 21 سبتمبر 2004 بواسطة linux

[Contra Mundum]

الصعوبة فى اللعبة دى هو شكل الكرة .... حاجة غريبة مميزة زى كل حاجة أمريكانى , طبعا انتى أكيد شفتيها ؟؟ مش عارف ممكن تتوصف ازاى ... مثلا على شكل قوسين متلاحمين

بالضبط كما وصفها الاخ كفاية...وتشبه ايضا فاكهة الشمام ولكن بنهايات مدببة.

الغريب ان هذه اللعبة تلعب بالايدى اكثر من الاقدام ... فصانع اللعب ويسمى Quarterback يقوم بتوزيع الكرة بيده للاعبين الاخرين ...

وهم يتلقفونها ايضا بايديهم من وضع حركة receivers ويحاولون التسجيل بالجرى نحو الzone او قد يتسلمونها ايضا من الQB عند خط الهجوم و يخترقون دفاعات المنافس عدوا (running back) ....

لعب الكرة بالقدم يختصر على محاولة تسجيل نقطة اضافية بعد الtouchdown وعند رد الكرة للمنافس بعد التسجيل او عند استنفاذ اربع (او ثلاث) محاولات للتقدم عشرة ياردات ....

طب ... ليه سموها football ?

لا البتاعة اللى بيلعبوا بها كرة ball ...ولا اللعبة تلعب بالقدم foot ... والغريب ان كرة القدم الحقيقية تنال قدرا من السخرية عند تسميتها بfootball ... حاولت شرح الامر عدة مرات ولم افلح ...

انا عن نفسى ارى فى هذه مبارايات كرة القدم الامريكية مناسبة اجتماعية للالتقاء بالاصدقاء والزملاء ولكن لا استمتع باللعبة لسببين:

1- العنف المقنن بها والذى لم اتعود عليه عند مشاهدة كرة القدم العادية ... يعنى انا لسه فاكر انزعاجى الشديد وكان عندى خمسة سنوات فقط عام 1982 عند مشاهدة شوماخر حارس المانيا "يدهس" باتستون لاعب الوسط الفرنسى فى مباراة اشبيلية التاريخية بكاس العالم فى الدور قبل النهائى ...

"فاول" كهذا عادى جدا بل ليس بفاول اصلا بكرة القدم الامريكية ...

2- كثرة توقف اللعب بين كل down والتالى له ثم استمرار اللعب لثوان قليلة قبل توقفها ثانية ...

بس يعجبنى باللعبة تخطيط المدربين وقيادتهم لفرقهم ومحاولتهم اختراق صفوف المناقس و اعتماد الhead coach على اسطول من المساعدين يمدونه بالمعلومات ... لعبة شطرنج ...

هى طبعا مسالة اذواق ويمكن تعود الواحد على كرة القدم soccer اثرت على الواحد ...

حاولت أفهم البيسبول ... لكن للأسف فشلت ... كفاية الفوتبول , احنا هننهب

انا فهمتها اخيرا بعد محاولات مضنية استمرت ثلاث سنوات و ذهبت لمشاهدة مباراة للبيسبول وكانت فى منتهى الملل .... ذهبت لمباراة اخرى وللاسف كانت perfect game وهو شئ نادر الحدوث و حسيت بملل لا حد له ...

[kfaya]

حبيبى لينوكس ....

حمدلله على السلامة و بلاش تطول الغيبة كده ..... fwrk:

لوحة توزيع اللاعبين و مواقع الفوتبول الأمريكى ده شغل لينوكس أخصائى الكمبيوتر و أستاذ الأساتذة ...

كونترا ... أضافاتك ممتازة و باين عليك فاهم فوتبول , خسارة انك ما حبيتهوش ...

الأمريكى كما تعلم يعتبر نفسة يعيش فى كوكب مختلف عن باقى الكرة الأرضية , و يجب أن يكون له كل أدواته الخاصة به و لا يعنيه من أمر غيره شيئ ... لذا من المستحيل ان تحل كرة القدم العادية succer محل كرة القدم الأمريكية بالرغم من محاولات الفيفا المستميته لتشجيع هذا التوجه ...

على العموم انا حاولت اتعلم قانون كرة القدم الأمريكية و التى تعكس ثقافة التباهى بالقوة الجسمانية و بمرونة الحركة وهى السمات الديناميكية التى تميز المجتمع الأمريكى .... من باب اعرف ماذا يلعب الأخر ...و لكن فى الحقيقة وقعت فى حب هذه اللعبة و اصبحت أتابعها أكثر من الدورى المصرى .....

تقول ايه ..... أزواق بقى ...

[linux]

الأخ العزيز كفاية حرام

أشكرك علي كلماتك الرقيقة ... كفاية حرام لحسن الدمعة ها تفر من عيني fwrk:

زي ماقال الأخ كونتراماندم، حضور مباريات الكرة (و الباسبول) في الملعب شيئ آخر. معظم الناس بتروح للنشاط الأجتماعي في حد نفسه، بالأضافة للكم الهائل من الأكل و البيرة و المشروبات الأخري.

لكن الكورة الأمريكية محتاجة مهارات عالية في بعض الوظائف او الأماكن. مثلا، حدف الكورة مش سهل ابدا و يحتاج مهارة و ساعد قوي. برضه التقاط الكرة أثناء الجري مش سهل أبدا.

أنا ساعات بتفرج علي المبارايات و لعبت علي خفيف مع أصدقاء في الشغل. و أعترف انها كانت تجربة ظريفة.

[hamo90]

بعد أذن الاخوة أنا لي رأي تاني

وهو أن الامريكان حتي في الرياضة الي بيحبوها عندهم نوع من أنواع الهمجية وحب العنف وفلسلفة القوة المفرطة وهزيمة الخصم بأي طريقة حتي لو كانت غير منطقية وغير شريفة

يعني لو نظرنا للرياضات الي بيحبها الامريكان هنلاقي نسبة 90% منها رياضات عنيفة زي كرة القدم الامريكية والبيسبول والملاكمة الحرة والمصارعة الحرة .... والاستثناء الوحيد للقاعدة دي السلة فيها متعة الرياضة بجد

وبصراحة أنا شايف أن مفيش أي متعة في كرة القدم الامريكية

يعني لو قارنها بكرة القدم الاوروبية - soccer- زي ما بيسميها الامريكان هنلاقي التانية تكسب

يعني مش هتلاقي لا غمزة ولا باصة حلوة ولا ترقيصة ولا كرة ثرو خادعة تخليك تنبهر منها ولا أوفر حلو ولا جون بيصد كرة متشالش ولا طبعا هتلاقي أهداف

يعني بصراحة الكرة بتاعتنا تكسب fwrk:

hamo

[KANE]

هي لعبه سهله ولذيذه وصعبه :P وبالعكس هي ممتعه لأن الترقيص فيها اصعب لأن المنافس ممكن يمسكك ويوقعك على الأرض وده غير الكوره العاديه اللي اللمسه فيها ممكن تتحسب فاول

بصراحه ماتش واحد كفايه انك تفهم (تقريباً) اللعبه دي :lol:

وبصراحه ماهياش عنيفه اوي ، حد شاف الرجبي الأوروبيه :blink:

اللعبه اللي نفسي افهمها بجد <_< mfb: :) وحاولت كتير بس فشلت فشل ذريع cr((: هي البيسبول f((:

حد عنه فكره عنها

تم تعديل 26 سبتمبر 2004 بواسطة KANE

[se_ Elsyed]

أنا بقى لو حد دفع لي فلوس عشان افهم الفوتبول الأمريكي او البيسبول ولعبة تاالتة معقداني وبأشوفها هنا وهي الكريكت الهندي .. يبقى يفتح الله ومش عايز فلوووووووووووس.

بس بصراحة اللعبة الممتعة جداص بعد كرة القدم هي كرة السلة الامريكية .. باحس لما بأتفرج علي الـ NBA إن دي حاجة تانية غير السلة اللي نعرفها وبنشوفها عندنا الله يرحمك يا مايكل يا جوردون إنت وماجيك جونسون ...هــــــــــــــــيه دنيا .

[Contra Mundum]

بس بصراحة اللعبة الممتعة جداص بعد كرة القدم هي كرة السلة الامريكية .. باحس لما بأتفرج علي الـ NBA إن دي حاجة تانية غير السلة اللي نعرفها وبنشوفها عندنا الله يرحمك يا مايكل يا جوردون إنت وماجيك جونسون ...هــــــــــــــــيه دنيا .

الNBA مؤسسة ناجحة والدورى الخاص بها على مستوى عال من المنافسة بسبب قواعد وضعها القائمون على ال NBA ومنها الsalary cap والتى تحد مجموع ما تدفعه الاندية للاعبيها -نجوم او مغمورين- بسبعين مليون دولار سنويا وبالتالى لا يستطيع نادى يمتلكه احد الاغنياء شراء كل النجوم او معظمهم مثلما يحدث فى كرة القدم. لهذا السبب بالتحديد الدورى له مذاق خاص من المنافسة و مستوى متقارب جدا.

وحيث ان عامل المادة قد تم تحييده بصورة او باخرى...يصبح دور الادارة و الGM لاى ناد له اهمية قصوى و يصبح تتبع تحركات النجوم و محاولات الاندية لبناء فريق قوى و متابعة لاعبى الجامعات لسد احتياجات فرقهم فى فترة التوقف له متعة خاصة كمن يتابع مباراة شطرنج.

اتمنى تطبيق هذا النظام بمصر .... لعل وعسى ...

[Contra Mundum]

ولعبة تاالتة معقداني وبأشوفها هنا وهي الكريكت الهندي

لعبة مملة للغاية- بالنسبة لى - وقد تستغرق مباراة عدة ايام و هناك مباراة استمرت اسبوع بين الهند و استراليا.

الجو اسرى جدا فى المبارايات وهناك tea breaks :rolleyes: كل فترة للاعبين.

عالم رايقة ...