استفتاء حول افلام خالد يوسف

[م تيمور المراغي]

تاني بقول دي مش دعوه للانحلال لكنها دعوة لعدم ( فرض ) ثقافة معينه على كل الشعب بالقوة الجبرية !

خللي الناس هيا اللي تختار تحول الريموت على خالد يوسف ولا ابو اسحاق الحويني ما تخطفش الريموت من ايد الشعب وتفرجهم حضرتك على مزاجك انت ,,

وضحت الفكره !

خير الامور الوسط يعنى يااما يتفرض علينا الحوينى ويعقوب يااما خالد يوسف وغادة عبد الرازق

يااما افكار متشددة ونحرم كل حاجة ونسود عيشتنا تحت قال الله وقال الرسول

يااما نفتحها على البحرى ونقول حرية الفن واللى مش عجبه يغير المحطة

متفقين ,,

نترك الساحه لجميع التيارات الثقافية

هو ده الثراء الفكري والثقافي اللي بيتقاس بمدى تنوع المادة الفنية فيه ومقدار المسافة بين اقصى اليمين واقصى اليسار

اقصى اليمين حنراقبه عشان ما يبقاش فيه تطرف او دعوات للعنف او التشدد

واقصى اليسار حنراقبه عشان مايبقاش فيه دعوه للرزيله او مشاهد اباحية صرفه او افكار الحاديه و هدامة ,,

يعني زي ماقلت في صدر الموضوع يبقى الحال على ماهو عليه مع شويه ارشاد ,,

حلو الكلام ؟ :happy:

[Howayda Ismail]

السلام عليكم

أنا طبعا يمكن ماعنديش فكرة عن المخرج او المنتج اللى بتتكلموا عليه

ربما اكون شاهدت له فيلم او لم اشاهد لاني في الغالب استمع اكير مما اشاهد ولااعرف الأسماء .

لكن ،

وآه من لكن

افلام خالد يوسف دى مش بتنزل من الحنفية ، حتى لو بتنزل من الحنفية ، اشتروا زجاجات مياه.

علشان تتفرجوا على افلامه لازم تروحوا السينيما

ولو بيتعرض في التليفزيون ، انتوا اللي بتفتحوا التليفزيون وبتنقلوا على القناة اللى بتعرض الفيلم ، ليه بتختاروا القناة دى من وسط 100 قناة؟ او حتى من وسط 5 قنوات؟

انا بقول الكلام ده لان واضح ان كل اللى بينتقدوه شافوا افلامه ، لايلدغ مؤمن من جحر مرتين ، انتوا ليه مصرين تتلدغوا من نفس الجحر مع كل فيلم جديد؟

البقال اللى بيبيع بضاعة فاسدة ماتشتريش من عنده.

قليل مننا اللى بيتفرج على النوعيات دى يااستاذ محمد

لكن تفاجئ وانت بتتفرج على فيلم عادى او برنامج مقطع لاعلان لفيلم خالد يوسف واشبهاه

والله العظيم انا كبيرة اهو باخجل وسط اولادى من الالفاظ اللى بتتقال والمشاهد المعروضة ومن غير

مااتكلم الاولاد بيغيروا القناة

الفكرة ان الشباب الصغير دلوقت عنده حرية مطلقة يروح السينما وبقت بالعشرات فى منطقة واحدة غير ايامنا

سينما او اتنين ومعروف تجمعهم دلوقت السينمات بقت جنب البيوت وروادها كتير من السن الصغير

بدون اهل ولارقيب حتى نوعية الافلام مفروض للكبار فقط بيدخلها الحدث اقل من 15 سنة

كم ام بتشتغل دلوقت وتسيب اولادها فى البيت بالساعات لوحدهم محدش عاد بيربى يااستاذ محمد

الناس اتلهت فى توفير لقمة العيش اب وام والتلفزيون والنت بقى مصدر المعلومات لكتير من الشباب

يبقى يتقوا ربنا فى نوعية الافلام اللى بتتقدم عشان نبنى جيل اخلاقه كويسة

نحد فيه من انتشار الرذيلة والعنف والبلطجة

للاسف كتير من الشباب مفتقد القدوة والمعلومة الصح وده مردوده سئ جدا على المجتمع ككل

[م تيمور المراغي]

ولو بيتعرض في التليفزيون ، انتوا اللي بتفتحوا التليفزيون وبتنقلوا على القناة اللى بتعرض الفيلم ، ليه بتختاروا القناة دى من وسط 100 قناة؟ او حتى من وسط 5 قنوات؟

مع احترامى لسيادتك الكلام ده مش مقنع

لان قصة الريموت فى ايدك والكلام ده مش حل ...الحل ان كل واحد يحترم نفسه وما نعملش البوظان ده من الاساس

لان هناك من ذوى النفوس الضعيفة وهناك الاطفال والمراهقين واحنا مش قاعدين لهم عساكر...ههههه

احنا بنقول كل واحد يتقى الله فيما يقدمه ...فيها حاجة دى

حضرتك بكلامك ده كده معلشى كاننا مثلا فيه واحدة ماشية فى الشارع عريانة ...نقولها كده عيب وميصحش .. تقول وايه يعنى محدش يبص

وشكراا لك

ميرسي يا ميدو على ردك الهادي ..

انا مش بقول نسيب الباب مفتوح على البحري

يعني احنا طول السنين اللي فاتت دي كنا ماشيين عريانين !

لا كان المجتمع ماشي وتمام وحصل التوازن بين اليمين واليسار ووصلنا لنقطه في منتصف الطريق

زي ماقلت لهند من شويه لا افراط ولاتفريط مع ترك حرية التعبير والابداع الفني كماهي بدون تضييق يعني شوية نصائح خفيفه كده وخلاص

انما الرقابه الفنيه تفضل زي ماهي قبل الثورة بدون تشدد او فرض رؤية تيار ثقافي معين عليها

لو سبنا الموضوع كده حنوصل ان ممنوع ستات ينزلوا الشارع من اساسه

وزميلاتنا اللي بيكلمونا دول يبقوا هما كمان وقعوا في الاثم عشان بيكلموا رجاله اغراب عنهم !!

اعوذ بالله من دي ثقافات ,,

انا خابرزهم وعاجنهم وعارفهم لاني كنت في فتره من حياتي مقتنع بمبدأهم ,,

[tarek hassan]

لو سبنا الموضوع كده حنوصل ان ممنوع ستات ينزلوا الشارع من اساسه

وزميلاتنا اللي بيكلمونا دول يبقوا هما كمان وقعوا في الاثم عشان بيكلموا رجاله اغراب عنهم !!

اعوذ بالله من دي ثقافات ,,

انا خابزهم وعاجنهم وعارفهم لاني كنت في فتره من حياتي مقتنع بمبدأهم ,,

اعوذ بالله من دي ثقافات فعلا

أنت خايف على زميلاتك في المنتدى وهن من قمن بفتح الموضوع أعتراضا على ما تدافع عنه

وهل أصبحت وصيا عليهم وعلينا تسمح لتلك الثقافة ولا تسمح لللأخرى قال لو سيبنا

لو فيه فكرة خطأ لابد وأن تواجه بفكره صح مش تواجه بنشر الفواحش والشذوذ بين الناس وكمان عامل حجة الثورة

وعاجن إيه وخابز أيه

روح يا شيخ

الله يصلح حالك

تم تعديل 10 يونيو 2011 بواسطة tarek hassan

[engmido]

إذا كان الفن يحاكي الواقع كما يقولون فالحقيقة أن الأفلام من النوعية اللي يقدمها خالد يوسف ليست هي واقعنا ولا تقدم صورة حقيقية لمجتمعنا أمام الدول الأخرى وخاصة العربية

أذكر أنه بعد أن قامت الثورة في ليبيا قامت محافظة مطروح بواجبها تجاه الأشقاء في ليبيا وأرسلت العديد من القوافل في وقت المحنة واستقبل المطروحيون آلاف من النازحيين الليبين في مساكنهم دون مقابل فما كان من بعض الأشقاء في ليبيا إلا أن تصرفوا وفقا لفكرتهم السيئة عن مصر من خلال تلك الأفلام الرديئة وقد حكي لي عن أعمال خمر وتحرش وغيره ولم أصدق حتى رأيت بنفسي أمثلة

وحدثت مشاكل كثيرة بسبب التباين بين الفكرة الواقعية لنا والفكرة التي في الأفلام ( والتي تزعم أنها تحاكي الواقع ) وهي بعيدة كل البعد عن واقع شعب مصر المتدين العفيف

المفروض أن ينقل الفن الصورة الصالحة للبلاد ويكون عنوانا طيبا للمصري والمصرية لا مشوها لهما

ولا أظن أن أحدا منا سيقول أن خالد يوسف يحاكي واقع بيئته ولذلك يجب يعبر الفن عنا أو يدفعنا لواقع أفضل مما نحن فيه

يا سلااااااااااااام يا طارق

لا فض فوك ..اهو كده .... يعنى هو ده فعلا محاكاة الواقع ؟؟؟؟؟ لا والله

ده اذا كان كده فعلااااا...فاحان ما بناخدش العظة والعبرة ولكن بننقى الوحش من الفيلم ونقلده من مواقف وافيهات سافلة...الى اخره

والمفروض فعلا ...عرض الوجه المشرق للبلد

[MohamedAli]

هو احنا بنتكلم في ايه ؟!!!

افلام من نوعية افلام خالد يوسف بالطبع افلام مرفوضة

واي فيلم تخجل من ان تشاهده مع اسرتك واطفالك هو فيلم مرفوض ويجب ان يمنع

ومن يحدد المرفوض من غير المرفوض هو التيار العام في المجتمع وليس الشيخ ابو اسحاق او علي الطرف الاخر امثال خالد يوسف ويوسف شاهين

علاوة على ذلك هذه الافلام تشوة صورة المصريين في الخارج وتجعل منهم مطمع لك من في قلبه مرض لأنه يظن كل المصريين من هذه النوعيات التي تظهر في هذه الافلام

اعلم طبعاً ان هناك ثقافات xxxx في مصر تحب مشاهدة هذه الافلام وتدافع عنها لكن هؤلاء ليسوا الاغلبية بل هم تيار صغير وليس من حقهم الوصاية علي المصريين

تم تعديل 10 يونيو 2011 بواسطة Mohammad
حذف كلمة غير لائقة

[مغتربة]

معرفتش اشارك فى الاستفتاء الى انت عملاه يا بينك لانى لقيت الخيارات الى انت عملاها مفيهاش الاختيارات الى عايزه احطها

علشان كدا خلينى احطها هنا بلون مختلف

تصويت استفتاء حول افلام خالد يوسف

هل توافق على مشاهدة اولادك لافلام خالد يوسف

نعم

لا

الموضوع بالنسبه لى مش نعم بالمطلق و لا لا بالمطلق اولا مش كل افلام خالد يوسف تحتوى على جرعه مشاهد جريئه و ثانيا ان الافلام الى ممكن يعتبر فيها جرعه زايده من الحريه يعنى للكبار فقط اكيد لو اولادى صغار هتكون مش مناسبه لفئتهم العمريه اما لو هما فى السن المناسب فلازم هما بنفسهم الى يقرروا

ماذا تعتبر افلام خالد يوسف

تدعو للرزيلة

تعرض الواقع

بالنسبه لى اختيارى هو بتعرض الواقع رغم تحفظى انا الشخصى على الطريقه الى بتعرض بيها الواقع من حيث انها سوداويه اوى يمكن دى مدرسته الفكريه ان التصادم مع الشيىء اقوى وسيله لتسليط الضوء عليها لكن انا مش برتاح معاها لكن فى نفس الوقت ملياش انى احجر على رؤيته و بالنسبه لفكره ان دا مش واقعنا فهو واقع شريحه مننا كبرت او صغرت و محدش هيقدر ينكر دا اما بقى ليه التركيز على الواقع من الزاويه دى بس و عدم عرض باقى الاشياء الايجابيه او الاقل قسوه فى واقعنا بنفس التركيز فاعتقد انا دا مش شرط نحمله ليه لانه مش مسئوليته هو حب يتخصص فى عرض الواقع الى من الزاويه دى مش ذنبه ان محدش على الساحه حب ان يتخصص فى الزاويه التانيه من الصوره علشان يحصل التوازن دى مسئوليه غيره مش مسئوليته

لماذا تزداد ايرادات افلام خالد يوما فيلما بعد فيلم على حسب قوله

انجذاب الجمهور لاسقاطاته السياسية

انجذاب الجمهور لما تتضمنه افلامه من مشاهد مثيرة للغرائز

لان افلامه تقدم فن جيد

كنت افضل ان يكون فى اختيار رابع اسمه جميع ما سبق

لان فعلا مشاهدى افلام خالد يوسف مش شريحه واحده و لا بيدخلوها بغرض واحد

يعنى اكيد فى مراهقين بيدخلوا علشان يتفرجوا بس على المشاهد الجرئيه محدش يقدر ينكر دا

لكن برضه فى شريحه من الى بيدخلوا افلامه بيدخلوها لانهم عارفين انه مخرج متمكن مش هيستخف بعقولهم و لانه فعلا بيناقش قضايا مهمه حتى لو اختلافنا او اتفقنا حول طريقه المناقشه مش افيهين على سيناريو مهلهل و خلاص

ناس كتير بتدخل افلامه بحثا عن الفكره و بتخرج و هى يمكن مختلفه مع اكثر الاسقاطات السياسيه الى بيحشو بها الفكره لانه ناصرى شديد الناصريه لكن عموما بيكون كل ما فى الفيلم قابل للتناقش و الاختلاف حوله و اكيد على مستوى النقد

الخلاصه بالنسبه لى بالرغم من احتواء افلامه على جرعه من المشاهد الجرئيه الى برفضها و بالرغم من اختلافى مع توجهاته السياسيه و طريقه تناوله للافكار الى بيطرحها الفيلم لكن مينفعش اقلل من قيمته كمخرج متمكن من ادواته و انه فعلا بيقدم افلام بتناقش قضايا سواء اتفقنا او اختلفنا معاه فى طريقه المناقشه و انه مش من المخرجين الى هدفهم تجارى بشكل خالص حتى لو ادى دا لتخريب الذوق العام بافلام سطحيه لا تقدم شيىء على الاطلاق

[engmido]

انما الرقابه الفنيه تفضل زي ماهي قبل الثورة بدون تشدد او فرض رؤية تيار ثقافي معين عليها

طب ايه الاضافة اللى اضفناها كده

لما يبقى الحال كما هو عليه...يعنى احنا بنقول نتحشم ونحترم نفسنا ونتقى الله فيما نعرضه لابنائنا ولنفسنا ياسيدى لان لا كبير ولا صغير معصوم من الخطأ

تقوم انت تقول اصل احنا خايفين نوصل ان مفيش ستات تخرج من البيت وخلى الرقابة زى ما هي ...ايش جاب ده لده

عموما الكلام واضح ....اخنا نحارب كل رذيلة وكل ما يدعو اليها بس كده

----

دلوقتى حد يطلع يقولى نتفق بقى ...ايه هى الرذيلة والغلط والاعراف وان ده مش رذيلة ..لا ده فن...ونختلف حتى فى المسلمات و العرف الذى يتفق عليه المسلمون وغير المسلمون

واى شخص لديه فطرة سليمة

وشكراااا

[pink rose]

معلش انا اسفة حطيت الموضوع و مشيت

للاسف مش هاقدر ارد على كل الردود دلوقتي لاني عندي ضيوف

بس على السريع كده و مؤقتا هارد على اجزاء من مداخلة حبيبة قلبي مغتربة و ارجع بالليل ارد على باقي المداخلات بالتفصيل

بصي يا مغتربة

حطيت الاسئلة دي بالشكل دا لانها جت زي ما هي كده على لسانه في حلقة امبارح مع عمرو خالد في بكرة احلى

و هو من طلب عمل الاستفتاء للتأكد من الناس كلها بتحترمه و بتحترم فكره و افلامه و انه نفسه بيعمل الاستفتاء دا لان منهجه علمي على حسب قوله و يقوم بعمل الاستفتاءات دي على مشاهدي افلامه

ثانيا انا قولت في مداخلة هنا ليا

اننا ما نقدرش ننكر انه مخرج بارع و متمكن من عمله بس للاسف مش بيستغل موهبته دي في الاتجاه الصحيح

يعني انا ما اغفلتش موهبة الرجل

معلش باعتذر منكم اني ارد علي مداخلاتكم بالليل

و ان شاء الله تكون الحلقة نزلت على اليوتيوب و احطها هنا و نتناقش فيها

تم تعديل 10 يونيو 2011 بواسطة pink rose

[tarek hassan]

افلام خالد يوسف دى مش بتنزل من الحنفية ، حتى لو بتنزل من الحنفية ، اشتروا زجاجات مياه.

يا أستاذ : محمد صحيح أفلام خالد يوسف وأمثاله مش بتنزل من الحنفية ولكنها بتنزل من الدش ( بكسر الدال )

وكمان حضرتك رسالة +18 ليست مانعة لمن هم أقل ولكنه شيء روتيني فقط بل تنبيهي وتشجيعي لرؤية ما هو ممنوع والتطلع إليه

وكمان بعض المشاهد في نوعية الإفلام فيها ضرر كبير على الصغار والكبار

[engmido]

مدام مغتربة ..قلما اختلف معكى ولكن للاسف المرة دى اعتقد خانك التوفيق

معلشى مختلف معك تماما

[مغتربة]

مدام مغتربة ..قلما اختلف معكى ولكن للاسف المرة دى اعتقد خانك التوفيق

معلشى مختلف معك تماما

و لا يهمك استاذ ميدو

ما هى سنه الحياه الاخلاف بين البشر للتكامل

و دا بالتاكيد لا يؤثر على التقدير و الاحترام المتبادل

تحياتى

[pink rose]

http://www.youtube.com/watch?v=Vva6px3YruQ

لقيت الحلقة نزلت اهي

اتفرجوا عليها و نكمل نقاش

[tarek hassan]

مع احترامي للأستاذة مغتربة إلا أنني مختلف أيضا معها في بعض الأشياء منها

- عدم تعاطيها مع صيغة الاستفتاء كما هو إذ هو حق لصاحبة الموضوع

- استعملها لمصطلح تجميلي ( مشاهد جريئة ) بدلا من المسمى الحقيقي للمشاهد

- حصر المشكلة - كما فهمت في ( الفئات العمرية ) وجعل للصغار الحق في رؤية المشاهد إذا هم قررورا فقط وكأنه ليس هناك سقف من حلال أو حرام

- وأختلف في إنه بيناقش قضايا وظني لو دي قضية مش لازم تتناقش صوت وصورة والحلال بين والحرام بين

تحياتي

[عطر الجنة]

انا جارتى الانسة / لبنى محسن و هى اعلامية ناشئة بتعد رسالة ماجستير من ضمنها افلام خالد يوسف و فيها بتقول ان ممكن اللقطات الاباحية فى افلامه يستغنى عنها بمدلولات تؤدى نفس الغرض دون التاثير على الخط الدرامى للعمل

و حدعوها هنا للكتابة و الافصاح اكثر

تحياتى

[أثر الطائر]

موضوع مهم ومستفز..وجرئ

وبعيدا عن الطرح أو الجدل الفني..فإن كل جرأة مستفزة..

الجرأة قوة..والقوة تستفز الضعفاء..

الجرأة صراحة..والصراحة تهدد الزيف بالكشف..

جرأة خالد يوسف في الطرح هي جرأة مقصودة من قبل فنان يشخص أمراض مجتمعه ويلخصها في..الضعف

الضعف إزاء مواجهة الذات ومواجهة الواقع

الضعف إزاء مواجهة الغرائز وعدم القدرة على التحكم فيها

مجتمع يستسهل إلغاء الجسد وإخفاؤه بدلا من مواجهة غرائز الضعف أمامه

أتعاطف جدا..وللنهاية مع أفلام خالد يوسف وجرأته..

وأعتبرها طريقا يفتحه الفنان لمجتمعه نحو ذاته ونحو المستقبل

تحية تقدير للموضوع وصاحبه واحتراما مؤكدا لكل مختلف

[م تيمور المراغي]

موضوع مهم ومستفز..وجرئ

وبعيدا عن الطرح أو الجدل الفني..فإن كل جرأة مستفزة..

الجرأة قوة..والقوة تستفز الضعفاء..

الجرأة صراحة..والصراحة تهدد الزيف بالكشف..

جرأة خالد يوسف في الطرح هي جرأة مقصودة من قبل فنان يشخص أمراض مجتمعه ويلخصها في..الضعف

الضعف إزاء مواجهة الذات ومواجهة الواقع

الضعف إزاء مواجهة الغرائز وعدم القدرة على التحكم فيها

مجتمع يستسهل إلغاء الجسد وإخفاؤه بدلا من مواجهة غرائز الضعف أمامه

أتعاطف جدا..وللنهاية مع أفلام خالد يوسف وجرأته..

وأعتبرها طريقا يفتحه الفنان لمجتمعه نحو ذاته ونحو المستقبل

تحية تقدير للموضوع وصاحبه واحتراما مؤكدا لكل مختلف

لو خالد ماكانش قال احسن من كده :happy:

[Alshiekh]

افلام خالد يوسف دى مش بتنزل من الحنفية ، حتى لو بتنزل من الحنفية ، اشتروا زجاجات مياه.

يا أستاذ : محمد صحيح أفلام خالد يوسف وأمثاله مش بتنزل من الحنفية ولكنها بتنزل من الدش ( بكسر الدال )

وكمان حضرتك رسالة +18 ليست مانعة لمن هم أقل ولكنه شيء روتيني فقط بل تنبيهي وتشجيعي لرؤية ما هو ممنوع والتطلع إليه

وكمان بعض المشاهد في نوعية الإفلام فيها ضرر كبير على الصغار والكبار

ماقصدته من كلامي هو انه يجب على كل منا تحمل مسئوليته ، أو كما قال رسول الله صلى الله عليه وسلم ( كلكم راع ... ) إلى آخر الحديث

من كان له اولاد فليتعلم كيف يربيهم وكيف تكون كلمته نافذة عليهم، ليس بالقهر ولكن بالتوجيه وغرس الخلق القويم.

الاسرة التي تدفع مبلغ وقدره لتركيب دش وريسيفر يستقبل كل القنوات العالمية مسئولة أمام الله انها لم تحجب القنوات المخلة عن ابنائها

الاسرة التي تترك اطفالها يسهرون طوال الليل أما التليفزيون ويدخلون هم للنوم مسئولة أما الله عن إهمالها .

بدلا من المناداة بالمنع فلنقم بحملة توعية لتعريف الأسرة بمسئوليتها تجاه تربية الابناء.

لو كانت المشكلة هي أفلام خالد يوسف ، فلنعدمه في ميدان عام ، ولكن هناك آلاف من القنوات الفضائية المجانية ، هناك القنوات اللبنانية العربية التي تفوقت علي القنوات الاباحية الأوربية والامريكية. علما بأن القنوات الاباحية الاوربية والامريكية يتم مشاهدتها باشتراك ، يعنى اللي عايز يتفرج على فيلم بيدفع حق مشاهدته

لكن إحنا ملوك الفهلوة بنفك شفرة القنوات دى وبنسيب عيالنا تتفرج عليها.

أتذكر ان جيراني هنا في أمريكا تركوا ابنهم معي ذات مساء البالغ من العمر 10 سنوات لانهم كانوا معزومين في حفلة ، وحدث أنني كنت أشاهد " مصارعة المحترفين " فوجدت الولد يسألني إن كان ممكن ينقل القناة ، وعندما سألته إن كان لايحب المصارعة ، فقال أنه غير مسموح له ان يشاهد حلقات المصارعة لانه مازال صغيرا ، احترمت رغبته وتركته ينقل القناة ، لبنتقل إلى قناة من قنوات الإطفال.

لم تترك الاسرة ابنها وحده بالمنزل ، لانه ممنوع ترك أطفال دون سن الحادية عشر وحدهم دون جليس ،

ولم يسمح الولد لنفسه بأن يخالف تعليمات والديه بالرغم من غيابهم وبالرغم من انه ضيف عندي

وفي نفس الوقت فهو يعترض على والديه لو فعلوا أشياء يعتبرها انه من حقه.

زرت تلك الاسرة في مرة فوجدته جالسا في ركن خرفة المعيشة ووجه للحائط ، وعلمت انه " متذنب " لان مدرسته بالمدرسة اشتكت منه .

ماقصدته انه لايجب علينا ان نلقي على الدولة ماهو من صميم مسئوليتنا ، ويوم نستمر في مطالبة الدولة بأن تحمينا من إهمالنا وتقصيرنا في حق أنفسنا وفي حق ربنا ، فغدا ستقوم الدولة من تلقاء نفسها بحبسنا لاننا قلنا كلاما في حق الحاكم يعتبر خروجا عليه ومن خرج على الحاكم فقد كفر.

مش عايزين نسلم دقننا للحكومة وبعد كده نقعد سنين علشان نعمل ثورة تخلصنا من جبروت الحاكم وفرعنته.

لاتخلقوا الفرعون وتحملوا انتم مسئولياتكم.

[tarek hassan]

موضوع مهم ومستفز..وجرئ

وبعيدا عن الطرح أو الجدل الفني..فإن كل جرأة مستفزة..

الجرأة قوة..والقوة تستفز الضعفاء..

الجرأة صراحة..والصراحة تهدد الزيف بالكشف..

جرأة خالد يوسف في الطرح هي جرأة مقصودة من قبل فنان يشخص أمراض مجتمعه ويلخصها في..الضعف

الضعف إزاء مواجهة الذات ومواجهة الواقع

الضعف إزاء مواجهة الغرائز وعدم القدرة على التحكم فيها

مجتمع يستسهل إلغاء الجسد وإخفاؤه بدلا من مواجهة غرائز الضعف أمامه

مع احترامي

حتى نكون واضحين وصرحاء لابد وأن نسمي الأشياء بمسمياتها حتى لا ينخدع العامة بهذا المنطق

بداية

الجرأة ليس تعريفها إظهار المشاهد الإباحية أو عرض الشذوذ أو خدش الحياء

وشتان بين الصراحة والوقاحة

وشتان بين العفة والحشمة والوقار والتدين وبين إلغاء الجسد

ولا يستوي عند الأسوياء الإخفاء مع الإلغاء فستر الجسد لا يكون إلغاء له

ولا يمكن أن يؤمن أحد بأن ستر العورات ضعف وأن الحرام قوة

ولا يمكن أن أقتنع أن العفة تزييف للواقع والستر تزوير والفحش والتفحش مواجهة وصراحة

هل أنا فعلا فهمت الكلام غلط كعادتي

[مغتربة]

مع احترامي للأستاذة مغتربة إلا أنني مختلف أيضا معها في بعض الأشياء منها

- عدم تعاطيها مع صيغة الاستفتاء كما هو إذ هو حق لصاحبة الموضوع

- استعملها لمصطلح تجميلي ( مشاهد جريئة ) بدلا من المسمى الحقيقي للمشاهد

- حصر المشكلة - كما فهمت في ( الفئات العمرية ) وجعل للصغار الحق في رؤية المشاهد إذا هم قررورا فقط وكأنه ليس هناك سقف من حلال أو حرام

- وأختلف في إنه بيناقش قضايا وظني لو دي قضية مش لازم تتناقش صوت وصورة والحلال بين والحرام بين

تحياتي

اهلا استاذ طارق

بالنسبه لعدم التعاطى مع صيغه الاستفتاء كما هى بالتاكيد ان الغرض من اى استفتاء هو استبيان وجهه نظر المشاركين فيه و بالتالى اذا رايت اننى غير قادره على ايصال رايى بشكل كامل بحيث يفهم تماما كما اريده بالضبط بالاختيارات المتاحه فمن حقى انا ايضا ان استعرض وجهه نظرى بشكل متوسع لايصال الفكره كامله فنحن لسنا فى امتحان علينا التقيد بما ذكر فى ورقه الاسئله و لكن نحن نستطلع اراء بعض فى جو تحاورى و لا اعتبر هذا انتقاصا من حق واضع الاستفتاء لاننى اعلم انه غرضه منه هو استطلاع اراء الاخرين بشكل واف لا لبس فيه و بالتالى الهدف الرئيسى له ليس الاستفتاء ذاته و انما الحصول على المعلومه بشكل لا لبس فيه و بالتاكيد صاحبه الموضوع تفهمت هذا و لم تثير هذه النقطه مما يبين انه لا غضاضه لديها

استخدام مصطلح مشاهد جريئه ليس بغرض التجميل و لا اعلم ما دافعك للحكم بذلك و لكنه من ضمن مصطلحات كثيره تطلق على ذات الفعل و المفاضله بين هذا المصطلح او ذاك تعود لحريه المستخدم له دون الدخول فى نواياه او الحكم عليها فهناك من يعتاد استخدام مصطلح دون غيره و هناك من تابى عليه اخلاقيات معينه استخدام مصطلح معين فيستعيض عنه باخر لذات الشيىء و هناك من يرى فى مصطلح انه الاقدر على التعبير عن الذات الذى يطلق عليه فيستخدمه و هكذا

بالتاكيد ان كلامى واضح و انه لا يعنى باى حال من الاحوال حصر المشكله فى الفئات العمريه و لا ان نجعل للصغار حق الرؤيه اذا قرورا ذلك بل اننى قلت العكس تماما اما موضوع ان هناك سقف من الحلال و الحرام فبالتاكيد موجود و لكن نحن هنا لا اتكلم عن حليه او حرمانيه المشاهده لانها جزئيه اخرى يمكن ان يفتح لها موضوع مستقل و لكن الحديث عن السماح او المنع بمعنى اخر قبول التعديده الثقافيه رغم اختلافنا مع محتويات بعض ما تقدمه ام الاتغلاق الثقافى و اعتماد رؤيه واحده مما يمهد الطريق للديكتاتوريه الفكريه

اما موضوع انه يناقش قضايا ام لا فهذه وجهه نظرك و بالتاكيد ليس مطلوبا ان تتفق الناس جميعها على شخص واحد و انما تعدد الرؤى افضل و لو رجعت لكلامى سترانى اقول اننى ايضا غير متفقه مع طريقه المعالجه التى يقدمها و لكن فى النهايه هذه رؤيته و على من يعترض عليها ان يحاول ان يقدم هو المعالجه التى يراها تتفق مع رؤيته

تحياتى