رمضان قرب يجي

[pink rose]

ان شاء الله السنة دي متوقع ان رمضان يكون 1 /8

يعني الحكاية كلها ان شاء الله شهر و نص

هل يا تري حد حاسس زيي ان رمضان ايام ما كنا صغيرين غير رمضان دلوقتي؟

ما بقتش الاقي البهجة و الفرحة في عيون اولادنا زي ما كنت باحسها انا زمان و انا صغيرة

مش هاقعد اسأل ليه و نقعد نتحسر على ايامنا اللي فاتت اللي مش هاترجع تاني

لا التوبيك دا عشان نحاول نجدد بهجة رمضان تاني لينا و اولادنا معانا

مين يشارك معايا بتجديد السنة دي

في شارعنا زمان كان شباب الحي بيزوقوا الشارع كأن في زفة عروسة مش رمضان

كانوا بيعملوا مجسمات مختلفة كل سنة عن التانية

مرة فانوس ملون يجنن

مرة مجسم للكعبة و بيحطوا جواه راديو بيشغلوه وقت قرآن المغرب

و نقف احنا الاطفال في البلكونات عشان نسمع المدفع

كنت بانزل كل سنة في رمضان بالذات عشان مريم تعيش الاحساس دا هناك لكن للاسف لا بقى في زواق في الشوارع و لا مدفع بيتسمع و لا حتى عمو فؤاد و لا جدو عبده و حتى بوجي و طمطم اللي فرحت انا بيه قبل منها كان بايخ مش زي بتاع زمان

المهم السنة دي مش هاننزل مصر فا فكرت اني احاول اعمل حاجه هنا ادخل بيها الفرحة على بنتي و عليا انا كمان في رمضان

احب اسمع اقتراحاتكم ايه

خالونا نعيش في التوبيك دا ايام زمااااااااااااان

ها كنتوا بتعملوا ايه في رمضان

يعني عاوزاكم تقولولي اعمل الزينة ازاي

لو عاوزة اعمل فانوس اعمله ازاي ( غير فانوس البرتقان اللي كتب عنه هنا الغائب الحاضر سنيور سكوب) ربنا يرجعه بالسلامه

هاااااااااااااا قولتوا ايه؟؟؟؟؟؟؟؟؟؟؟؟؟؟؟؟

لو حد هايشترك معليا و نعمل حاجه فعلا لاولادنا نتفق ايه الادوات المطلوبه و لما نكون حاجه نصورها و نرفعها هنا

ورشة عمل عن بعد يعني

ماشي

تم تعديل 11 يونيو 2011 بواسطة pink rose

[pink rose]

جيبت طريقة سهلة

ممكن نجربها

الأدوات

كرتونة كبيرة

ومقص ومسطرة وقلم رصاص

واسكوتش وصمغ قوي

وورق هديا واقلام ملونة

نفتح الكرتونة بالمنظر دا

وبالمسطرة و القلم نقيس ونرسم رسمة الفانوس على الكرتون ونعمل القاعدة عرض 25 سم والقمة 30 سم

و كده بقى عندنا 4 قطع كرتون متساوية بالشكل دا

بعد كده نلزق الاربع قطع بالشكل دا

لقمة الفانوس الهرمية بالكرتون

نقص 4 مثلثات ونلصقهم ببعض بالشكل التالي

نثبت القمة الهرمية على الفانوس

وهيكون عندنا فانوس بالشكل ده

نغلف الفانوس بورق الهديا بالشكل التالي

بواقي الكرتون بعد قص الفانوس تم قصها على اشكال نجوم وهلال وتلوينها تم تعليق النجوم في حواف الفانوس وممكن تعمل منه شريط وتعلقيه حواليه

و ادي الشكل النهائي للفانوس

ادي طريقة لصنع الفانوس سهلة و لطيفة و في المتناول

يعني اي حد ممكن يعمله و طبعا ممكن ندخل اضافات تانية

هاااااااااااااااا حد هايتشجع معايا و نشتغل و لا اوفر على نفسي المنهادة و اعمل لوحدي و اسكت؟؟؟؟؟؟؟؟؟؟؟

[pink rose]

عملت انا و مريم الفانوس دا دلوقتي

ايه رأيكم؟

كانت مجرد تجربة على السريع كده

و ان شاء الله هانجيب كرتون ملون

و نجيب ستيكرز نجوم و نزوقه بيه

مريم طايرة بيه من الفرح

و قاعدة تعمل واحد لوحدها اهي

يالااااااااااااااااا فرحوا العيال

[باهى الطائر الحزين]

فاضلتى : زهرة القرنفل / ان صحت ترجمتى

اسمحى لى ان اسجل اعجابى بالموضوع ، غير انه لا يمكننى الاضافه على طريقتكِ ؟

لكن حابب اقول ان كل الناس فى رمضان بتفطر فى البيت إلا انا

بحب افطر فى احياء القاهره الشعبيه مثل السيده او القلعه او

الحلميه او الحسين والحسنيه وباب الوزير وباب الشعريه وسوق السلاح

كلها اماكن جميله وتشعرين فيها بالحميميه من اهل مصر الطيبين الجمال

وانا ماشى بعربيتى ناس توقف اممها علشان توقفنى بالعافيه وتعزم عليا

بالفطار ولما اصر يعطونى عصائر وسعات وجبات جاهزه ، اد ايه الناس دى جميله

وممكن عربيتى يبقى فيها حاجات كتير بلح وعصير ووجبات،مهو في ناس كتير تانيه

برده بتوقفنى وتدينى، اقوم اروح على اقرب حد بياع او ماسح احذيه او غلبان

اديلو كل الحجات دى،يفضل يدعيلى،اقول له ادعى لاصحابها.

رمضان اللى فات كنت فى السعوديه،وكنت اعرف مطعم تركى،امت صليت المغرب فى الحرم

ولا حد ادانى اي حاجه ؟ غير واحد مصرى من اصحاب مطاعم بيع سندوتشات الطعميه

اللى قدام الحرم،ادانى سندوتشين طعميه بعد الصلى وعلبة عصير،ومبقتش عارف اوديهم فين

المهم رحت على المطعم التركى،واكتشفت انه مابيشتغلش فى رمضان،طيب مش عارف اعمل ايه وافطر فين

مشيت لحد مالقيت مطعم باكستانى،دخلت لقيت زحام شديد ومافيش مكان اجلس فيه،فضلت واقف لحد لما

فضى مكان،بعدين مش عارف اتعامل مع الجرسون كان باكستنانى،شامم ريحة اكل حلو بس مش عارف اسمه

او هو ايه،بالعافيه لما ادرت افهمه انى عايز فراخ،طيب عايز رز وهو مش فاهم،اشاورله وكأنى فى

ايدى معلقه،وهو مش فاهم،علشان هما بيكلوا بأيديهم،المهم كلت وخلاص فراخ بالعيش وحتى مافيش سلطه.

عايز اقول ان مصر ام الدنيا وام الكرم،والفقير فيها فى رمضان بياكل زىه زى الغنى،ويمكن احسن..

ليا مواقف كتير مع رمضانات قضيتها فى دول غير مصر،ممكن احكى لو عندكم صحه تقرؤا ؟؟

[pink rose]

الفاضل طائر الليل الحزين

نورت التوبيك يا فندم

ذكرياتنا في رمضان حاجات ما تتنسيش

و بتفضل في قلوبنا مهما كبرنا

المسحراتي دا كان حاجه كده بنستناها من رمضان لرمضان

و يا سلام لما ينادي عليك بالاسم

بجد و الله مفتقدين رمضان

خالونا نعيش رمضان بذكريات الطفولة

عاوزين نرجع عيااااااال تاني

و نشوف كنا بنعمل ايه و نعمله مع اولادنا

يالا قولنا كنت بتعمل فوانيس كنت بتشترك في تزيين الشوارع

انا عاوزة مهارات يدوية كنا بنعملها عشان نعلمها لعيالنا

بس على فكرة موضوع الفطار في الاحياء القديمة في مصر الحسين و السيدة دي فكرة هايلة بجد الفطار وسط الناس البسيطة روح جميلة منك باحييك عليها

[pink rose]

يعني تحبوا اني ارمي نفسي من فوق برج المملكة عشان تتبسطوا

ايه يا جماعة فينكم

ما كنتوش بتعملوا اي حاجه في رمضان و انتوا صغيرين؟؟؟؟؟؟؟؟؟؟؟؟

و لا انتوا خلاص عجزتوا اوي كده

[Howayda Ismail]

يعني تحبوا اني ارمي نفسي من فوق برج المملكة عشان تتبسطوا

ايه يا جماعة فينكم

ما كنتوش بتعملوا اي حاجه في رمضان و انتوا صغيرين؟؟؟؟؟؟؟؟؟؟؟؟

و لا انتوا خلاص عجزتوا اوي كده

الف بعد الشر عنك ياريمو حبيبتى

تصدقى بقى رمضان كان احلى الف مرة من رمضان الايام دى

يمكن عشان المناطق اللى سكنا فيها غير اللى اتربينا فيها ولا عشان الناس هى اختلفت عن زمان

واحنا صغيرين كنا بنعمل الزينة من ورق سوليفان معين من مطبوعات شعار شركة باتا بالوان زاهية ومختلفة

كنت تلاقى الشارع كله بيبرق ويلمع من ضوء الشمس غير صوته الجميل لما الهوا كان يحركه

ودى اقرب صورة لشكل الورق

وكان شريط لمبات بطول الشارع عشان لعب الكورة من بعد صلاة التراويح لحد الفجر

على حسب عدد الفرق من المناطق التانية

وقتها مكنش فى لافضائية ولازفت وكانت حياتنا حلوة القناة الاولى والتانية وبس

كنا ساعة الفطار لازم نفطر على مسلسلات الشرق الاوسط زى الصبر فى الملاحات وغيرها

واحنا لسة بنشيل الاكل تلاقى عيال الشارع جايين يخبطوا ويغنوا حلو ياحلو

وامى تديهم اى حاجة مرة فلوس او بلح او فاكهة حسب اللى موجود والعيال فرحانة ومبسوطة

كان فى حاجة حلوة بتحصل قبل آذان المغرب كنت تلاقى الناس واقفة فى البلكونات مستنية تسمع

صوت الادان من الجوامع والعيال فى الشارع تفرقع البمب ودقايق و متلاقيش ولا نفر كله راح يفطر

كان قدمنا بيت كله مسحيين كان اولادهم بيلعبوا معانا فى الشارع ويطلعوا وقت مانطلع يقولوا واحنا كمان

رايحين ناكل مكنوش بيتغدوا كان وقت غداهم مع فطارنا وحتى فى العيد كانوا بيعيدوا ويخرجوا معانا

لاعمر حد منعهم من اهاليهم ولاحد منعنا نلعب وناكل معاهم وافتكر مرة واحدة صحبتى مسيحية قالت

لى انا باحب رمضان اوى وباستناه زيكم فى حاجات حلوة كتير كانت الدنيا بتبقى هايصة وفى بهجة كده

غير دلوقت خالص مش عرفة ايه اللى حصل مش بنحس بيه زى زمان

المسحراتى بقى اللى كان بيعدى فى الشارع يصحى الناس رغم الناس مكنتش بتنام وينادى بالاسامى

واكتر حاجة كنت باحبها سيد مكاوى

http://www.youtube.com/watch?v=R_BWH-GNN3c

[لماضة مصرية جدا]

السلام عليكم و رحمة الله و بركاته

ياااااااااااااااااه اخيرا وصلت التوبيك....(مين بقي راح يدفع حساب التاكسي اللي اخدته لف في المواضيع بتاعت سموك)

عجبني التوبيك بتاعك اوي يا بينكي

مش علشان حسيت فيه ب "الروح" الرمضانية الخاصة اللي بنحب نعملها لنفسنا كل ما رمضان يقرب

لا علشان لقيتك مصرة فيه انك تكسري عتمة الغربة و تصنعي بريق بفانوس رمضاني مميز

بصي بقي يا ستي

انا عجبتني فكرة انك تعملي انتي و الكونتيسة مريم الفانوس

بس كمان خينا نفكر في شوية حاجات كده انا عملتها مع "عوكل و نوفل" ولاد اخويا و فيه اللي هسترجعها من ارشيف الزمان...(كح كح...كح...وش حد يبنفض الغبار راح شفطه كله)

1- حلو ان احنا نستعد لرمضان بالفانوس بس كمان ابتدي ازرعي فيها "روح" رمضان نفسه...خليها تفتح دولاب هدومها..(انا عارفة الكونتيسة مريم كويس)....و صندوق اللعب بتاعتها و اكسسوارتها....علميها ان فيه هدوم حلوة و فيه هدوم هتبق يعلي ناس تانية احلي

انتي ممكن تقوليلها ده بشكل مباشر و ممكن تعملي انتي نفسك ده قدامها

الهدوم اللي راح تطلع و متاكدة ان دولايبنا فيها حاجات كتير ممكن تسعد ناس تانية حوالينا....حاجة من اتنين يا تطلعي بيهم علي الهلال الاحمر اللي موجود في البلد اللي انتي عايشة فيه...يا اما انتي و مريم تنزلوا تشتروا شنطة كبيرة او متوسطة و تسموها "شنطة الهدايا" و زي ما بنجيب لاهالينا هدايا...فيه "هدايا" من نوع تاني ممكن نجيبها لناس تانيين منعرفهمشي بس اكيد راح ينبسطوا بيها.

2- شنطة رمضان....حقيقي في مصر بيبقي ليها طعم تاني....بس مش هي عبادة اصلا يبقي العبادة في اي مكان راح توصل لربنا باذن الله...انتي ممكن تخليها تحوش من مصروفها...بس تبقي فاهمة ان التحويشة دي بتاعت "شنطة رمضان" و هي اللي لازم تختار معاكي الاسر اللي راح نبعت ليهم الشنطة...ممكن تكلموهم بالتليفون هينبسطوا اوي...او لما تنزلوا مصر تروحي انتي و هي و تزوروهم فعلا.

3- لو فيه اطفال تاني في سنها في السكن بتاعك او في المدرسة ليه ميتجمعوش مع بعض و يجيبوا كتيبات صغيرة كده فيها ادعية و هما بنفسهم اللي يوزعوها علي باقي سكان العمارة

4- اشتريلها مصلية جديدة صغنتتة و اسدال صلاة جديد...هتفرح بيهم اوي و هيشجعها انها تنتظم في الصلاة...او حتي تصلي اول ركعتين في التراويح معاكي في البيت.

5- معرفشي ايه ظروف المسلسل الجديد "قصص الحيوان في القرآن" بس لغاية ما نشوف ايه المسلسل و محتواه اشتريلها قصص الانبياء او نزليها من ع النت اللي هي كانتب الصلصال...[يحبوها جدا و الاهم...انك دايما تتكلمي معاها و تخليها هي تحكي القصة بدماغها هيو تشوفي فهمت منها ايه

6- مش انتي شاطرة في المطبخ....خليها تبقي المساعدة بتاعتك و اتفقوا كل يوم جمعة راح تعملوا هدية "اكل او تورتة " يعني نصالح بيها حد كنا زعلانين منه.....او عايزين نتقرب منه اكتر....علميها ان قبل ما نعمل اي حاجة ننوي....و نصحي الصبح نجدد النية...و في كل وقت نحكي مع ربنا و نقوله علي النية دي

مش عارفة هيتنفع الحاجات دي و لا ايه

زي ما قولتلك انا جربت البعض منها و البعض الاخر من الذاكرة و يا ريت تقوليلي انتي رايك فيهم ايه

صباحك....مساكي......"قرة أعين" نفسنا انهم يكبروا علي طاعة و يحسوا "روح" رمضان

[Dreamwithme]

الله عليكي يابينك روز وعلي التوبيك الجميل ده

أولا أنا بأعتذر أني مشفتش التوبيك قبل كده ويارب أكون لحقتك قبل ماترمي نفسك من البرج :happy:

ذكرياتي عن رمضان زي ذكرياتكم كلكم وكل الكلام الجميل بتاع زينة الشارع وفانوس رمضان والجو الأسري والجيران والروح الجميلة اللي بتملي المكان

بس في ذكري خاصة ليا مع رمضان وأنا صغيرة كنت بأحب أطفي نور البيت كله وأولع فانوس رمضان وأفتح الشبابيك وأقعد أتفرج علي النجوم في السماء

كانت متعة ما بعدها متعة

برضه حاجة كنت فاكرها من زمان وياريت لو تعودي مريم عليها وهي التراويح

أنا فاكرة كويس كنت بألعب حوالين جدتي وهي بتصلي التراويح وكنت بأصلي معاها ركعتين وكل سنة نزود لغاية مابقيت أصلي معاها التراويح

وحتي بالرغم من أن الواحد كان صغير لكن طول عمري التراويح عندي أهم من الفوازير وأي لعب تاني

ربنا يكرمها جدتي ويجعله في ميزان حسناتها هي اللي عودتني علي كده

[pink rose]

مدام هند لماضة دريمي

شكرا على محاولتكم رفع روحي المعنوية قبل رمضان

و محاولة انقاذي من محاولة القفز من فوق برج المملكة ال 99 دور

الله بارك لنا في شعبان و بلغنا رمضان

موضوع التراويح دا الحمدلله مريم بتروح معايا المسجد من السنة اللي فاتت

كانت بتوقف تصلي شوية و بعدين تقعد تمسك المصحف شوية كده يعني لسا صغننة

السنة دي هي حفظت شوية سور و بقت تصلي معايا في البيت الصلوات العادية الحمدلله طبعا مش صلاة بالمعنى المفهوم لكن بتؤدي جنبي حركات الصلاة و بتقرأ في سرها السور اللي حفظاها

ان شاء الله السنة دي في رمضان اجيبلها اسدال جديد و سجادة صلاة شكرا يا ريهام على الفكرة الجميلة الله يكرمك

اما موضوع شنطة رمضان هنا في السعودية ما فيش لكن فعلا ببعت لماما هي تتصرف في مصر السنة دي بقى ماما هاتقضي رمضان هنا فا شكلي هاتجه لجمعية رسالة بما اني بقيت عضوة فيها و ربنا ييسر الامور

بافكر اني اكفل يتيم السنة دي ابتداءا من اول رمضان ان شاء الله ادعولي ربنا ييسرلي الامر دا و طبعا هافهم مريم و احكي معاها في الموضوع دا و اسيبها هي تختار نجيب ايه للبنوتة اللي هانكفلها ان شاء الله عشان تحس مريم بقيمة اللي بنعمله و افهمها على اد ما اقدر حديث الرسول صلى الله عليه و سلم انا و كافل اليتيم في الجنة كهاتين

اشترينا من اسبوع كده كتاب اسمه قصص القرآن للاطفال من جزئين و طلبت من ماما تجيبلي معاها و هي جاية كتاب قصص الحيوان في القرآن و بعدها اكتشفت ان يحيى الفخراني هايقدمه مسلسل في رمضان

بادعي يكون مسلسل مفيد يربط الاطفال بالقرآن شوية و يديهم معلومة مفيدة زي كا كانت برامج الاطفال زمان بتفيدنا انا فاكرة برنامج ماما نجوى زهور من نور اللي كان كل يوم بيمسك خلق يحكي عنه حكاية و بعدين اغنية بجد و الله كنا بنستفيد

حاليا بقى في تفاوض مع بابا مريم اننا نعمل فانوس خشب و ورق ملون و نحط فيه لمبة و نعلقه في مدخل البيت ايييييييييييه ربنا يسهل و ننفذه

كل سنة و انتم طيبين و ربنا يعود عليكم الايام بالخير