الى كل العاملين بالسعودية ... شاهد نطاق شركتك بنفسك

[mustafagamiel]

طب أنا شركتي طلعت أصفر..ده معناه ايه يا عم رؤوف..؟

ياراجل ده من ساعة ما عرفت و أنا عمال أسأل علي الأماكن اللي بتبيع الأجهزة الكهرمانية عشان أشتري المروحة و الفيتيون..و الكاسيت أبو بابين..و أم ناجي كانت موصياني علي تفاح أمريكاني..يعني أشتري ولا لأ؟؟

أهو انت من ساعة ماعملت موضوع عفريت الاسفلت وكأنك قلبت علينا وزير العمل

درش طيب خلينا نجرب اتنازل عن الرخصة واعمل موضوع انفي موضوع السيارة والرخصة ويمكن المية ترجع لمجاريها

[shawshank]

..و أم ناجي كانت موصياني علي تفاح أمريكاني..

أحمر؟

بهزر مع حضرتك بالتوفيق للجميع، والأرزاق عمومًا على الله، والرزق جاي جاي لا محااااااااااااالة.

[raouf]

طب أنا شركتي طلعت أصفر..ده معناه ايه يا عم رؤوف..؟

ياراجل ده من ساعة ما عرفت و أنا عمال أسأل علي الأماكن اللي بتبيع الأجهزة الكهرمانية عشان أشتري المروحة و الفيتيون..و الكاسيت أبو بابين..و أم ناجي كانت موصياني علي تفاح أمريكاني..يعني أشتري ولا لأ؟؟

الاصفر وضعه مش وحش جدا زى الناس ما متصوره

هو هايتمنع عنه الاستقدام ونقل الكفالات عليه فقط لاغير

وبسهوله هيدخل النظاق الاخضر

وبعدين ياعم انت مش جبت المروحة والكاسيت وطلعت الرخصة كمان عايز ايه تانى

[ramy basha]

احمر يا بطيخ ...... جيالك ياغالية ... جايلك يامصر

[se_ Elsyed]

احمر

واعتقد دى حاجة كويسة وانى اقدر انقل كفالة بدون اذن الشركة المحمرة

أنا دايماً واقعي حتى لو كلامي كان صادم

موضوع إن الشركة الحمرا موظفينها يقوموا ناقلين منها من غير إحم ولا دستور ... ده هايبقى ولا في الأحلام

أقول لكم ليه ؟

لأن المشكلة ليست في القوانين .. ولكنها في العقول .. يعني غير العقول وبعدين غير القوانين ...

هاشرح زيادة

فاكرين من 5 سنوات تقريباً طلع قانون رسمي بيقول إن الشركة أو المؤسسة التي تمتنع - عمداً أو نتيجة تعثر مش مشكلتنا - عن دفع مرتب موظف لمدة 3 شهور متتالية فللموظف الحق في نقل كفالته بدون الرجوع إلى الشركة ؟

أتحدى حد يشاور لي على حالة واحدة تمت ..

--------------

أستمعت إلى تصريح لوكيل وزارة العمل السعودي كان بيتكلم من سويسرا أمس وقال إن قانون النطاقات سيتم تطبيقة إعتباراً من اا سبتمبر

ههههههههههههه حتى التاريخ تاريخ مميز وبيفكرنا بالأبراج وبغزوة نيويورك ...

على الجانب الأخر .. وزير العمل كان في سويسرا برضوا وأختص المصريين بتعليق المفروض إنه متفائل ومبشر وقال إننا لا نفكر على الإطلاق في عدم تجديد تصاريح عمل المصريين ...

طب هي مش بالكلام وبس ... لإن إيه هاتطلع للمصريين قانون خاص يعني يستثنيهم ؟

الموضوع مش سهل وهايعمل مشاكل كتيرة جداً ...

بس بأمانة ربنا .... عندهم حق في حاجات كتيرة جداً ...

اللي عايش في الرياض عارف يعني إيه منطقة البطحا وإن كتيررررررر وأنا منهم بيتحاشى يهوب هناك من زحام الهنود والبنغال الررررررررررررهيب

المهم كان معايا إبني عُمر وساقتني الأقدار أعدي من هناك وركنت العربية ونزلنا نمشي شوية للجهة اللي إحنا رايحين لها ....

إيه كمية البشر المتلطعين من غير شغل دول الااااااااااااااااااف ؟ خلوا بالكم إن في الخميس والجمعة العدد بيزيد لعشرة أضعاف

وإيه كمية القذارة دي وكأنهم في بومباي ولا في حي من أحياء الهند الفقيرة

ومين دول وإيه اللي جابهم ؟

أنا أفهم إن شركة محتاجة ناس من الهند بقى ولا من السند مافيش مشكلة ... لكن شركة تجيب الاف على كفالتها وتسرحهم في الشوارع كده مقابل إتاوات شهرية تُدفع لها ... فده غير مقبول من الجمع بالتأكيد

[mustafagamiel]

والله الاي اكتشفته في السعودية ان كل شيء بتمشي حسب المزاج حتى لو مطبقين ايه

يعني لي واحد صاحبي مهنته فني شبكات مش عارف يعمل استقدام ممنوع ياسيد مع ان واحد تاني بنفس المهنة عملها ايه ياعم قالك حسب دماغ الموظف

وفي مواقف كتيرة اوي زي كده

امس رايح افتح حساب في بنك الرياض لقيته بيقولي شركتة مش مشتركة هنا ياعم ازاي قالي لا جبت له رقم الحساب اهو يقولي قضي الامر

لقيته بيقولي روح اعمل في الراجحي قولت له انت بتهذر ولا بتكلم جد قالي والله جد قولت وينفع كده اجيلك بنك الرياض تقولي روح بنك الراجحي سكت

واحد صاحبي فتح الحساب من غير حتى سلاموا عليكم

قولت في سري ياسلام على نظام السعودة دا العملية هتبقة فلة شمعة منورا

بصراحة حزنت والله ومشيت وقولت والله ما فاتح في بنك الرياض وياخسارة عليهم الملاليم الاي ضاعت منهم

[se_ Elsyed]

امس رايح افتح حساب في بنك الرياض لقيته بيقولي شركتة مش مشتركة هنا ياعم ازاي قالي لا جبت له رقم الحساب اهو يقولي قضي الامر

لقيته بيقولي روح اعمل في الراجحي قولت له انت بتهذر ولا بتكلم جد قالي والله جد قولت وينفع كده اجيلك بنك الرياض تقولي روح بنك الراجحي سكت

الكلام ده كنت تقبلة لو كنت رايح تفتح حساب في بقالة السيد والده

لكن كان لازم تطالب بحقك ..

حصلت معايا من حوالي سنة في البنك الفرنسي ولقيت موظف خدمات العُملاء بيقول لي : إحنا بنك مُتعب وأحسن لك تروح تفتح حساب في بنك تاني ... ( ملحوظة لي حساب معاهم من زممممممممممان وكنت رايح أدي له صورة الإقامة بعد تجديدها لتنشيط الحساب وضيعوها مرتين )

فروحت راجع مكتبي عامل سيرش على جوجل وجايب رقم فاكس مكتب رئيس مجلس إدارة البنك السعودي الفرنسي وكاتب له القصة بتفاصيلها وإسم الموظف ... ما فيش ساعة ولقيت مدير مكتبه بيتصل بي وكذلك مدير خدمات العملاء في البنك الرئسي وقلبت الدنيا عليهم رأساً على عقب .

[mekkawy]

شرحه حصل معايا أول ما جيت في بنك الراجحي .. قلتله فعلاً عندك حق .. و سحبت نفسي على مدير الفرع و دخلت راجل في منتهى الاحترام سمع مني و قالي مين الموظف قلتله اللي في قسم المبيعات قالي احنا اسفين يا فندم شرفني بكرة استلم تفاصيل حسابك و كروت الفيزا بتاعتك.

العنصرية دي بتصدر من الموظفين الصغيرين اللي شايفين الأجنبي مالوش حق يفتح حساب و ازاي يبقى زيي زيه مش فاهمين ان فيه أجانب أحسن منهم في الوظايف و دخولهم أكبر منهم و عملهم أهم منهم

[akramgroup]

طيب معلش انا دخلت رقم الاقامه

كتبلى اسمى وخلاص على كده ولا شايف اى تقييم لاى حاجه

ودخلت على تقييم الشركات قالى لازم تكون مفوض

الطريقه ايه؟؟؟

[الباشمهندس]

احمر يا ورد الجناين ....بس يا جماعه في حاجه انا مش فاهمها الكلام قبل كده ان نسبة الشركات الحمرا لا تتعدى 20% بس الواضح ان معظم الشركات حمرا .....عموما على راي ابراهيم عيسى حممممرا

[Alattar]

طب أنا شركتي طلعت أصفر..ده معناه ايه يا عم رؤوف..؟

ياراجل ده من ساعة ما عرفت و أنا عمال أسأل علي الأماكن اللي بتبيع الأجهزة الكهرمانية عشان أشتري المروحة و الفيتيون..و الكاسيت أبو بابين..و أم ناجي كانت موصياني علي تفاح أمريكاني..يعني أشتري ولا لأ؟؟

أهو انت من ساعة ماعملت موضوع عفريت الاسفلت وكأنك قلبت علينا وزير العمل

درش طيب خلينا نجرب اتنازل عن الرخصة واعمل موضوع انفي موضوع السيارة والرخصة ويمكن المية ترجع لمجاريها

مستحيل يا درش..لا تراجع ولا استسلام..مش أنا اللي أستستلم بالسهولة دي

بس تفتكر الموضوع فعلا له علاقة..كل ما أمشي شوية في موضوع العربية..تنزل حاجة جديدة..عموما أنا ممكن أضحي عشان اخواننا المصريين المغتربين...و دي حاجة مش جديدة عليا..أنا طول عمري

شمعة..بتولع في الآخرين

[ozoozo]

لغايه النهارده الصبح كنت احمر دلوقتي مش لاقي اي تقييم جنب المنشأه

ياتري عندي انا بس اللي اختفي التقييم ولا حد تاني

ممكن يكونوا حسوا انه عمل بلبله فاخفوا التقييم من الموقع

[Alattar]

طب أنا شركتي طلعت أصفر..ده معناه ايه يا عم رؤوف..؟

ياراجل ده من ساعة ما عرفت و أنا عمال أسأل علي الأماكن اللي بتبيع الأجهزة الكهرمانية عشان أشتري المروحة و الفيتيون..و الكاسيت أبو بابين..و أم ناجي كانت موصياني علي تفاح أمريكاني..يعني أشتري ولا لأ؟؟

الاصفر وضعه مش وحش جدا زى الناس ما متصوره

هو هايتمنع عنه الاستقدام ونقل الكفالات عليه فقط لاغير

وبسهوله هيدخل النظاق الاخضر

وبعدين ياعم انت مش جبت المروحة والكاسيت وطلعت الرخصة كمان عايز ايه تانى

يا عم رؤوف أنا مش بسأل يعني ايه نطاق أصفر..أنا بقوللك كده لأنك بتقول ان كل الشركات هتطلع أحمر لأن مافيش شركة سجلت نفسها لحد دلوقتي..فأنا بقوللك ان شركتي شكلها ولا مسجلة ولا حاجة..و طلعت أصفر..وواحد زميلي هنا في المكتب خد رقم اقامة واحد صاحبه و دخلها...طلع نطاق ممتاز...تقريبا مافيش حد في الشركة غيره..و شكله هو كمان سعودي

و بالنسبة للمروحة و الكاسيت أبو بابين..لو ما نزلتش ممكن يقدموا شوية..و أنا بحب دايما أستخدم حاجات موديل السنة

[mekkawy]

واضح ان فعلاً الأمر عمل بلبلة فوقفوا ظهور التقييم لأني تقييمي اختفى بعد ما كان منور ع الشاشة أحمرررررررر

[MohamedAwadh]

أحمر

أحمر

أحمر

يعني م الآخر انا جيت من 6شهور و هأروح بعد 6 شهور

في حد أخضر عايز يبعت حاجة معايا؟

[الفقير الى الله]

معلشي ان كنت هعكنن عليكم المزاج

يلا كده قيم شركتك وشوف انت واقع فين

أحمر

أخضر

واصفر

http://www.mol.gov.s...EmpInquiry.aspx

كل واحد يحط النتيجة الاي طلعت

موفقين

[الفقير الى الله]

طيب انا دخلت رقم الاقامة بتاعى ظهرلى اسمى الرباعى بس ومكتوب جنبة رقم الموظف اعمل اية بعدها عشان اعرف نطاق الشركة

[elrasy]

طيب انا دخلت رقم الاقامة بتاعى ظهرلى اسمى الرباعى بس ومكتوب جنبة رقم الموظف اعمل اية بعدها عشان اعرف نطاق الشركة

خلاص شالوا الخاصية دى لما لقوا الناس عرفت