فلنتخلى عن انانيتنا شوية .... مهندسو "محطات الكهرباء" يهددون بـ "إظلام" مصر يوم الثلاثاء

[عطر الجنة]

ايه الحكاية .... هى ماسورة مطالبات و ضربت و لا شوطة جات للبلد كلها و اصبح كل واحد يقول انا و من بعدى الطوفان

مهندسو "محطات الكهرباء" يهددون بـ "إظلام" مصر يوم الثلاثاء

[Diab]

ائتلاف مهندسى الكهرباء

ازاي يعني

انا لو من الحاكم العسكري أحل كل الإئتلافات دي والشرعية الوحيدة هي المؤسسات

ماسورة الإئتلافات اللي بقي كائنات هلامية لا ليها اول من أخر ولا تعرف مين بيتكلم ولا مين مسئول عن مين

كل واحد يتكلم من خلال المؤسسة بتاعته

والمهندسون ملهمش غير النقابة بتاعتهم

واللي مش عجبه يضرب راسه في الحيط

تم تعديل 12 يونيو 2011 بواسطة Diab

[se_ Elsyed]

شيء بشع وفعلاً ناس بتكشف عن وجهها القبيح

ومجرد التهديد بمثل تلك الترهات هو الخيانة بعينها واللي تسحتق أقل عقوبة هي الاعدام ...

أسف جداً إني أقول إنهم بيخلوا البعض يهلفط ويقول " الله يرحمك يا مبارك ياللي كنت كابس على نفسهم "

أنا عن نفسي عُمري ما اقول كده لو هاشحت ... لكن بأستعجب على الناس اللي كانت مكتومة عشرات السنين .. ولما أُطلق سراحها في ثانية بتهيص مع اللي بيهيصوا ويا إما دلوقت يا هاطربقها

أنا شايف الحل في البدء في تكوين نقابات محترمة شفافة وقوية تعبر عن مطالب العاملين وتطالب بحقوقهم بشكل محترم غير كده يبقى بلطجة تستحق تطبيق القانون بقسوة ...

لو تشوفوا المنظر أمبارح على شارع الكورنيش والناس بتوع العشوائيات نايمين في وسط الطريق وبيطالبوا بمساكن مجانية ... وهاجوا أكتر لما الفنادق والمطاعم السياحية المحيطة بماسبيرو رفضت تستقبلهم عشان يستعملوا حماماتهم - وده حقهم - واللي كانوا مبدهلينهم الأسبوعين اللي فاتوا ... وبدءوا من امبارح ما يخلوش حد يقرب منهم .. فواحد نزل يقضي حاجته في النيل فغرق ومات .....

شيء قذر ولوي دراع ولا له أي لازمه .. وأساساً مش معروف مين دول وهما مستحقين لهذا ولا لأ ومش معطيين أي جهة تعمل دراسة ولا تشوف هاتنيلهم فين ....

أنا مع المطالبة بالحقوق وتحقيق العدل ... لكن مش معنى ذلك إني أولع في الدنيا عشان مطالبي

مرة أخرى .. قارنوا بين موقف الدول المحترمة زي اليابان وكوريا وفرنسا وألمانيا اللي خرجت من حروب ساوتها بالأرض وولا موارد ولا يحزنون .... هل حد فيكم سمع عن مواطن ولع في نفسه عشان له طلبات بعد الحرب ويا إما دلوقت يا هاضلمها ؟

معليش طولت عليكم ... نفسي دكتور محترم من اللي رفضوا يستقبلوا المرضى اثناء إضرابهم .... أو مهندس محترم عاوز يضلم مصر أو يخفف الحمل لمدة ساعة بس .. ساعة بس سا جماعة نقطع النور ما فيهاش حاجه .. واي واحد مريض بيعمل عملية يستحمل وينتظر وبطنه تبقى مفتوحة لحد النور ما ييجي ...

نفسي بقى حد من الثورجية دول يسأل نفسه ... هو الجيش والشرطة وحرس الحدود مش بني أدمين ولهم مطالب ؟

طب سألت نفسك ايها المحترم لو سابوا الدنيا كلها وجم وقفوا جنبك أمام مجلس الوزراء وشارع القصر العيني ... بيتك واهلك وعِرضك وشرفك هايحصل لهم إيه ؟

إيه الـ 100 ج زيادة اللي سعادتك بتحارب عشانها دلوقت هاتغنيك عن ده كله ؟

أخص على أي حد يوصف بإنه مصري يعمل كده

إخص على اي حد شاف شهداء رووا ميدانالتحرير بدمهم عشان يطبالبوا بالكرامة والحرية والعدالة وإحنا بنلهث وراء ملاليم وبنلوي دراع أُمنا

[ذهبية]

اقل ما يوصف بية هذا التصرف انة بلطجة

و بصراحة تصرف مرفوض جملة و موضوعاااا

كل حاجة بقت بالدراع و التهديد و الوعيد

هما دول الى هيعدوا بناء مصر

دول ملهمش الا الرفد و الطرد

[Om Zayd]

يا ترى ده بالتنسيق مع الحرامية و البلطجية ام لا؟

عموما حتى لو مش بالتنسيق .. هما خدوا خبر خلاص .. و زمانهم بيستعدوا

بس عايزة اتاكد من الخبر .. اليوم السابع ملهاش مصداقية كبيرة

[Howayda Ismail]

انا مش عارفة الطمع اللى الناس بقت فيه ده ايه وقلة العقل دى

شركات الكهربا بالذات من اكتر الشركات العامة اللى بتحقق ارباح عالية جدا على قفا المواطنين

وده واضح جدا فى اخر شهرين من السنة مع عمل الميزانية الفواتير بتزيد بقدرة قادر

وطبعا عشان صرف الارباح اللى وصل 100% بالاضافة ان مرتباتهم من فترة زادت كتير عن الاول

حتى لو كان لهم مطالب يصبروا شوية مش يهددوا باستغلال سلطتهم لقطع الكهربا وتعطيل مصالح الناس

امال الناس الغلابة تعمل ايه بقى لما الطبقة المتعلمة من دكاترة ومهندسين وموظفين بيعملوا كده

سابوا ايه بقى للبلطجية اللى واخدينها عافية بالدراع

انا جنب سكنى على طول شركة كهربا يوم 28 يناير لما المحكمة والسنترال اتنهبوا وبعد كده ولعوا فيهم

الاهالى وشبان المنطقة لما عرفوا البلطجية ناويين يقطعوا الكهربا وقفوا وقفة راجل واحد وحموا

الموظفين والعمال والشركة 24 ساعة لاكتر من 10 ايام

اظن دلوقت لو الناس دى سمعت الكلام ده اللى ناويين يعملوه هما اللى حيولعوا فيهم مش البلطجية

كلام فارغ ولازمه وقفة من المجلس العسكرى لانه اخرته مزيد من التخريب والخسائر وفى الاخر محتاجين

نصلح اللى اتدمر وادفع ياشعب واربطوا الحزام لحد الناس مابطونها حتفرقع من كتر شده

[se_ Elsyed]

المجلس العسكري إتخذ قرار اليوم بنشر وحدات من الجيش حول محطات توليد الكهربا في مصر

فاصل تكه ونحترم المجلس قوي قوي قوي ونرع له القبعة عشان ما نتهمهوش إنه ني ومش قادر ياخد قرار سليم في موقف سليم

إن أي واحد إيده تتمد ويحاول يضر البلد ويقطع الكهربا .. أقسم بالله سيكون الشعب باجمعه في منتهى السعادة لو قطعوها له أو مسكوا سلك عريان وحطوه في قفاه عشان يعرف إن الله حق

دي مش كهربة بيت والدتك عشان تقطعها أو ترجعها

مش عاجبك الشغل يبقى الباب يفوت 100 .,......... مش هاقول جمل .. لإن الجمل حيوان محترم

كذلك أرجو أ يتخذوا قرار إن أي حد يقطع سكة حديد أو يعطل القطارات .. على طول يترمي تحت أول قطار

عقوبات قد تكون هزلية بالنسبة للبعض ... لكنها رادعة لأي بلطجي فاكر إن دي ممتلكات خاصة يعمل فيها اللي هو عاوزه

[rewsha]

ايه كم الاخبار اللي زي ال......

اللي الواحد بيسمعها كل يوم

الناس اتجننت خلاص :tease:

اصل مافيش بني اْدم عاقل يعمل كده

واخيرا .....احب اساْل سؤال gsp_)

بتوع الميه ناويين يقطعوها امتى همه كمان ؟؟؟؟ mfb:

[rewsha]

المجلس العسكري إتخذ قرار اليوم بنشر وحدات من الجيش حول محطات توليد الكهربا في مصر

ايوه يعني كده الكهرباء مش هاتقطع .

يعني همه واقفين بره المحطات

لو اللي جوه المحطات قطعوا الكهرباء ....التصرف هايكون ازاي؟

هايدخلوا لهم بتوح الجيش ويمنعوهم بالقوه وله ايه؟

[engmido]

ياخواننا مفيش الكلام ده خالص ..ده اليوم السابع ..هو انتو يعنى مش عارفينها؟؟؟؟

ثم حتى لو حصل محدش هيقطع كهربا ولا نيلة ده اعتصام داخل الشغل انما قطع كهربا لا

بالذمة حد يقطع كهربا عن نفسه؟؟؟؟

ماحنا شغالين اهه ومتنيلين....ههههه

ثم انتو متخيلين ان قطع الكهربا سهل كده يعنى تنيم بيوت ومصانع ومحلات وتكييفات وكل ده مرة واحدة

لاااا خالص مفيش الكلام ده ومحدش من مهندسين الكهربا ممكن يعمل كده ابداااا

تم تعديل 12 يونيو 2011 بواسطة engmido

[Om Zayd]

جزاكم الله خيرا انك طمنتنا يا باشمهندس

تأكيدا لكلام الباشمهندس

عضو ائتلاف المهندسين نفى تماااااااااااما الخبر مع القرموطي في مانشيت

تم تعديل 12 يونيو 2011 بواسطة Om Zayd