انا في مشكلة..!

[بنت شعنونة]

مش عارفة اعمل اييييييه

حاسا اني بين مليوووون نار ونار

وكل واحد برأي شكل

لدرجة اني اتبرجلت..

فقلت احكيلكم يمكن تنجدوني قبل ما اتجنن رسمي..

يوم ما خطيبي اتقدم بابا سألهم عندكوا شقة جاوبوا قالوا اه وانها شقة كويسة وواسعة وكذا غرفة وفي منطقة كويسة

وخلص الكلام على كدا

من يومين قررنا اننا نشوف الشقة عاملة ازاي

رحت لقيتها في عمارة قدييييييييمة جدا

لآنها الشقة اللي والده و والدته اتجوزوا فيها من 30 سنة

يعني الله اعلم العمارة مبنية من امتى

وهيا قانون قديم وانا كنت عارفة المعلومة دي..

لكن العمارة مش كويسة فعلا؟

الشارع كله كويس وماليان عمارات جديدة وفلل

والشارع مقسوم تلتين وتلت

التلتين فلل وبيوت حلوة

والتلت الأخير اللي العمارة فيه عبارة عن عمارات اثرية جدا وقديمة قصاد بعض..

مدخل العمارة اثري والحيطان ماليان نشع ميه والسلالم حديد التسليح بتاعها باين من السقف!

الشقة نفسها...

عاوزة توضيييييييييييييييييب مالا يقل عن 30 الف عشان تبقى شقة بني ادمييييييين عاديين

لآنها بلاط " قنالتكس" والدهان كله باااااايظ والغرف خشب بقى لونه اسوووود من القدم!

:P

طبعا كلنا صدمنا بالشقة جدااااااااااا

وكان ردنا الطبيعي الرفض

وانه دور على شقة تانية في حدود امكانياتك ايا ماتكون بقى

المهم انها تكون ادمية شوية وعمارة جديدة شوية؟

انا بقى صدمت برده هوا شخصيا

انه رفضضضضضضضضضضضض تمااااااما اي فكرة

وكل اللي قاله

والله هيا دي مقدرتي وهيا دي الشقة الوحيدة اللي عندي وما اقدرش اجيب غيرها؟؟؟؟

طب نتكلم او نتناقش طيب؟؟؟

انتهى الموضوع بخناقة

وفيييييييييين بعد كام يوم ابتدى انه يتكلم تاني

الشقة مساحتها كويسة

انما تقسيمها تقسيم سخييف جدا

وايجارها ملاليم زي ما هوا قال

ولما اتكلمنا قالي انا موافق

هاتولي شقة "حلووووووووة" زيها وبنفس المساحة و السسسسسسعر وانا مش ها اتخر!!!!!!!!!!! :) :)

قلت طب لو فرضنا وجيت على نفسي ها توضب الشقة ازاي؟

قالي مالكيش دعوة انتي بقى

بابا هايوضبها

!!!!!!!!!!!!!!!!!!!!!!!!!

الله

طب وانا فييييييين؟؟؟

ذوقي فييييييين؟؟؟؟؟

يعني كمان لا تبقى الشقة

زلا توضيبها على مزاجي؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

انا مخوقة جداااااااااااااااااااااااااااا جداااااااااااا

ومش عارفة اعمل ايه

حاسا انه بايعني قصاد شقته التحفة دي

ساعات افكر اجي على نفسي وعلى رايه نكافح واعيش فيها والسلام

بس خايفة تتهد على دماغنا من كتر ماهيا قديمة

واللي تاعبني اكتر انه مش مضمون اني اعملها على مزاجي؟

كل دا عشان باباه اللي ها يوضبها وهوا بيقول انه باباه صرف عليه وكبره ف كفايا عليه كدا مش ها يقدر يقولوا اعملي حاجا

؟

انا احترت قوي؟

طب ما الشقة متبهدلة جدا فعلالا

وفعلا عاوزة "تتفور" من اول وجديد

يعني لو هما ها يوضبوها لنفسهم لازم يعملوا كللللللللل حاجا فيها من اول وجديد

مش عارفا اعمللللللللل ايييييه

واهله لحد دلوقتي ماعرفوش ان انا واهلي رفضنا الشقة

وهوا مش عاوز يقولهم

اخلي بابا يكلم حمايا ونجرب؟

طب ولو كلمه يقوله ايه؟؟؟؟ احسن يفتكرونا ناس طماعه؟

مشششششششششششش عارفة اعمل ايييييييييييييه

[se_ Elsyed]

بصي يا شعنونة .. كلنا بدأنا صغيرين واهالينا برضوا بدأوا بدايات بسيطة وربنا فتحها عليهم وإنتقلوا لشقق ومنازل احسن وأفضل .... لأن هي دي سنة الحياة فمع الكفاح والصبر يصل الإنسان إلى ما يتمناه.. طب إيه رأيك بقى إني نادراً ما أرى احد إتجوز وعاش لحد ما ربنا توفاه في نفس المنزل ... فكلاً منا يتطلع إلى الأفضل ...وصعب جداً جداً في مثل ظروفنا دي إنك تلاقي حد بيبدأ كبير ... فعلشان كده لازم بعض التنازلات المادية في بداية الحياة ... ولا أتصور بإن خطيبك يرضى على نفسه بان يتزوج في شقة بمثل الوصف الذي وصفتيه لنا وبالتأكيد هايوضب فيها على قدر المستطاع .. ولكن لا تضغطي عليه بإن يكون كل شيء 5 نجوم ولا تضعيه في خانة اليك يعني إما تغيير الشقة أو كل واحد يروح لحاله .. لأن في الحالة دي هايروح لحاله بالتاكيد وبدون تفكير ... زي واحد صاحبي إنتي ماتعرفهوش إسمه س س عمل كده برضوا ووقتها إختار الشقة وشاط العروسة اللي كان بينه وبينها قصة حب أفلاطوني ومع ذلك مالقاش حل تاني إلا إنه يفركش المسائل ... لإنه لا يستطيع ان يقدم على شقة من شقق مساكن الإيواء او في جمعية المستقبل بتاعت جمال مبارك اللي الشقة فيها 30 متر .. وكان بالتأكيد ليس في إستطاعته وهو لسه ناشيء إنه يبحث عن شقة آخرى بعد ان صرف اللي حيلته في تجهيز شقته الموجودة والتي لم تعجب العروسة لإنها لم تشرف بنفسها على الديكورات ، وقالت برضوا نفس الكلمتين دول .. فين ذوقي وفين لمستي ( تقولش خلاص هندسة الديكور مقطعة بعضها )

[عوف]

حين تقدمت لزوجتي تم الاتفاق على أن يكون الزواج بعد ستة أشهر حتى اقوم باستكمال تجهيز العفش (كان ناقص سفرة جديدة وانتريه جديد وبعض الرفايع)، وحضرت والدة زوجتي إلى الشقة لتراها لان عندنا في الصعيد ممنوع العروسة تروح الشقة الا يوم الزفاف (يعني لا فيه لمستها ولا ذوقها من الأساس) وعندما شاهدت والدة زوجتي الشقة بما فيها من عفش جديد وقديم قالت بالنص (مافيش داعي تكلف نفسك الشقة كده كويسة واحسن من المطلوب وكفاية انها في بيت ابوك) وبالتالي تم تعجيل الزواج والتخلي عن الجزء المتفق عليه من العفش وتبرع والدة زوجتي باهدائنا انتريه من عنده، الحمد لله في خلال فترة قياسية تركنا الشقة القديمة بكل ما فيها من عفش إلى شقة جديدة في عاصمة المحافظة على النيل وبأثاث جديد كامل وبدون طلب أو ضغط لا من زوجتي ولا من حماتي ولا من حمايا.

عديلي تزوج شقيقة زوجتي وسافروا إلى دولة أوروبية لانه يحضر الدكتوراة، بدون شقة أو عفش أو ما إلى ذلك والأن عنده منزل كبير من ثلاثة أدوار مع حديقة صغيرة.

في رأيي أنها مشكلة بسيطة جدا ولكن الدور هنا هو دور الأهل الذي يفترض أن يهدئ من المشكلة ويخفف منها لا أن يزودها ويكبرها.

والسلام.

[Cleo]

شعنونة...

بكرهك وانتى عارفة طبعا ليه...

عموما... لو حاسة إن هو من الأول مكانش قصده إنه يخدعكم ويحطكم أمام الأمر الواقع والعملية كلها سوء تفاهم... فكرى و استخيرى الله وتوكلى عليه...

أما لو حاسة إنه من الأول كان بيتلاعب عشان ييجى بعد فترة من الخطوبة "يلوى دراعكم"...

قوليله ياخد الباب فى إيده... :o

[حشيش]

من مات مردوماً فهو شهيد stnd:: ..ألا تحبين أن تبدئى حياتك بالشهادة :o...لأ بجد أنا رأيى أن خير الأمور الوسط...يعنى لو الشقة زفت مسيح يبقى لأ طبعاً...هناك حد أدنى لكل شئ...يعنى مثلاً لو خطيبك جاب لك شقة فى المرج أو عزبة القرود مش من المنطق إنك توافقى مهما كانت العواقب...يعنى لا بد أن يكون سكن الزوجية مقبول...لا أقول فاخر أو حتى فوق المتوسط لكن على أقل تقدير ما تستعريش منه لو عزمتى أحداً من أقاربك أو أصدقائك.

[G.G]

بيتهيالي أن حل اللغز يكمن في الجملة دي

يوم ما خطيبي اتقدم بابا سألهم عندكوا شقة جاوبوا قالوا اه وانها شقة كويسة وواسعة وكذا غرفة وفي منطقة كويسة

هذا "العريس" مش دوغري.. و انتهج التدليس كوسيلة للفوز بك..

يعني هو ليس كاذب و لكن مدلس..يتحايل على الحقيقة..يعني أخفى جزء من الحقيقة يعلم جيدا لو كان كشفه لكان أثر على قرارك..

بالنسبة لي القضية مش الشقة ,,لأن الشقة مؤقتة ..لكن الأسلوب شبه دائم , و وارد جدا أنه يستمر معاه في مواقف أخرى جذرية.. fsh::

[بنت شعنونة]

لالالالالالالالالالالا

عشان بس ربنا ما يحاسبنيش دا اولا

و واحدة واحدة يا جي جي دا خطيبي برضة :o mc:

هوا ما حباش حاجا

لآنه للأسف هوا مؤمن فعلا هوا وعيلته ان الشقة هايلة وجمييييييلة جدا كل اللي ناقصها التوضيب!!

ف هما على وصفهم دا ما خبوش حاجا من وجهة نظرهم

هوا ابرأ من انه يكدب على فكرة لآنه طيب جدا

انما المشكلة ان العمارة قدييييييييييمة اوي فعلا

وما اعرفش المستويات اللي ساكنا فيها عاملة ازاي لسه

الموضوع اني اتعودت اعيش في طريقة معينة

ف هل اكون قادرة اني اعيش في مستوى اقل منه شوية؟

ما انا لازم ما اضحكش على نفسي بدعوى اني عاوزة ارتبط وانا جدعه وهوبا اورط نفسي في حاجا انا مش قدها وتبتدى المشاكل وفي الحالة دي ها يبقى هوا مالوش ذنب لآنه ما غشنينش!

وابقى انا كدا اللي غشيته؟

انا بجد مش عارفا انا ها اقدر استحمل والا لا

ومش عارفة اوصل لقرار خالص

كليو

ما تكرهنيش

عشان انا كرهتني خلالالالالالالاص mfb: stnd::

استاذ عوف

والله نفسي اعمل كدا

لكن خايفة اكون اكثر دلعا من اني ابقى قوية كدا واكافح!

يا س س

انت لييييييييييييييه محسسني انك تقرب لخطيبي؟؟؟؟؟؟؟ mf(

يعني ايه اعيش في بيت ما عملتش في اي حاااااااااجاااااااا

امال بقى اسمه بيتي لييييييييييه بقى؟؟؟؟

دا غير انه انا ها اقعد فيه اكتر منه بكتييييييييييير

بحكم اني انا الأنثى وهوا الرجل

دا غير انه شغله يحتم علية بيات برا البيت 3 ايام او اكتر

طب وبعدييييييييييين بقى

انا احترت اكترررررررررررررررررررر :P

[drmsaber]

اولا: إستئذنى خطيبك وعائلته و كلفى مكتب استشارى هندسى او مهندس مدنى من المعارف او الاقارب بتقييم حالة الشقة و العمارة فنياً - بخصوص موضوع الأمن على الحياة -

ثانياً: حاولى إقناع خطيبك ووالده بأن يكون لك رأى فى تجديد الشقة -الالوان و التقسيم و هكذا - و لا أظنهم سيمانعوا.

ثالثاً: إن مرت الخطوتين السابقتين بسلام .. حاولى التعرف على الجيران و بطبيعة الحال ستجدين منهم الكويس و منهم غير ذلك و لن تجدى مكانا مثالياً ابدا مهما كان المستوى الاقتصادى لسكانه فارضى بما كتبه الله عليك لعل الله يبدلك خيرا منها فى المستقبل القريب.

هداك الله سواء السبيل و عجل بزواجك و كل المسلمات.

[G.G]

إذن بما إنك مستبعدة فكرة أنه بيضحك عليكي..

إذن فما هي المشكلة؟

من ناحية الشقة نفسها لوانها متهالكة في القدم..فهو عمليا سهل جدا تشطيبها و ممكن اختيار مواد جيدة جدا و مش غالية ..و الحقيقة أن كل الشقق الخالية قبل ما يسكنها أحد تكون بالحالة دي..بس انت ما بتشوفيهاش غير بعد ما تخلص.. يعني ده عادي جدا..جدا...

أما لو كانت العمارة أثرية بمعنى أنها قديمة فعلا..الحيطان عالية.. و السقف محمول على عروق خشب.. و الشبابيك كبيرة كاروهات..فهذا يكون أفضل!! ..و ما أنواع الدهانات الحديثة زي الpatine الsponge الdelave.... إلا وسائل متنوعة لإضفاء روح القدم على الحوائط أوالأخشاب..

و انت ممكن في الحالة دي تستخدمي ألوان زاهية للحوائط مع أثاث modern مثلا..وتأملي في ذلك أيضا مجلات الديكور الحديثة و ممكن أقول لك على بعض الأماكن و المحلات في مصر تقتبسي منها أفكار حلوة و بسيطة للتعامل مع الأماكن القديمة بالشكل ده..و صدقيني تكون النتيجة مذهلة..

أما مدخل الشقة و السلم المتهالك ممكن الإشتراك مع الجيران لإصلاحه ..و دي حركة عادية جدا برضه ..

انما المشكلة ان العمارة قدييييييييييمة اوي فعلا

وما اعرفش المستويات اللي ساكنا فيها عاملة ازاي لسه

عادة سكان العمارات القديمة يكونوا أصلاء بعكس العمارات الشاهقة ,,بيكون ساعات فيهم محدثي النعمة..ثم انت مالك بيهم :o ..المهم الشقة بتاعتك !

الموضوع اني اتعودت اعيش في طريقة معينة

ف هل اكون قادرة اني اعيش في مستوى اقل منه شوية؟

قدم العمارة ليس له علاقة بمستوى المعيشة..لأن زي ما قلتلك هناك حلول معمارية كثيير و سهلة..مستوى المعيشة اكثر له علاقة بالشخص اللي جوه الشقة! stnd:: متفقين؟ eey:: ؟

[UNTOUCHABLE]

مجرد تعليق حيث انك يادكتوره مع تأكدى بعدم معرفتك بى الا انك فعلا تهمينى حيث انك مثال لكل ماأعرفه عن بنات مصر

-علم

-جدعنه

-تقولين الحق

-ذات خلق

-تعرفين الله

ولتعلمى اننى متابع لكل حرف كتبتيه فى هذا المنتدى.

1- ياأبنتىعن رسول الله صلعم " اذا جاءكم من ترضون دينه وخلقه فزوجوه".

2- ما قيمه الشقة اذا كانت الحياة الزوجية غير مستقره.

3- اذا جاء احدهم ذات يوم الى ابنتى ليتزوجها سوف ابحث فيه عن شيئأ واحدا. (هل هو رجل وقادر على حمايتها عندما تريد حمايته ام لا)

اذا كنت تأتمنين هذا الرجل على نفسك وعرضك فتوكلى على الله.

ارجوا الا اكون متطفلاًََ بهذه الأضافه ولكننى اشعر بواجب تجاه هذه المشكلة الأجتماعية التى تقتل امال وطموحات اغلب شباب هذا الوطن.

واعلمى يأبنتى ان اسمى ما فى الحياة الزوجيه هو الستر.

تمنياتى بالتوفيق

[بنت شعنونة]

دكتر م. صابر

بجد فكرة المهندس دي قووووووووووية جدا وما خطرتش على بالي

انما لو قلت ل عمي ممكن اتقتل فيها

انا ممكن اقول لخطيبي واتكل على الله

ويمكن ربنا يهديه وما يزعلش من الفكرة دي

بس بجد عجبتني جدااااااااااا

نمرة 2... المشكلة في موضوع راي في الشقة دا تكمن في الفلووووووووووووس

خطيبي مش عاوز والده يتكلف مليم واحد

وعاوز يعيش على قده

وانا كمان عاوزة كدا من قلبي

لكن والده متكفل بزواجه زي ما فهمنا لما جم اتقدموا وبعد ما يساعدوا على الجواز يسيبه ينطلق لوحده بقى

المشكلة اني مش عارفة اتكلم في حاجا

لآني لحد دلوقتي مش عارفة والده حاطط ميزانية كااااااااام عشان يوضب الشقة؟

وكلمة توضيب دي تشمل اييييييييه؟

دهان وبس؟

دهان و قنالتكس برضه؟

دهان وسيراميك ومطبخ وحمام والا ايييييييه بالضبط؟

مش عارفة

والدي عرض انه يساعد في توضيب الشقة عشان تبقى على مزاجي وبسعة صدر

وانا كمان كنت محوشة قرشين لوحدي كدا وقلت مش ها اخد من بابا حاجا وها اوضب على قد اللي معايا ومعاه

انما هوا رفض

كرامته ابت عليه انه ياخد مليم مني! mf(

مع اني قلتله طب خدهم سلللللللف حتى mfb:

جي جي

زي ما تكوني قاعدة معايا

انا بقالي 24 ساااااااااااااااعة

فاتحا النت على مواقع ديكوووووووور

وطلعت بمليون فكرة وفكرة

وكلهم اقتصاديييييييييييين جدااااااااا

انما ارجع واقول

انا مش عاااااااااااارفة ميزانيتي كاااااااام لحد دلوقتي mc:

استاذ untouchbel

والله كلامك هداااااااااااااااني جدااااااااا

وشكرا على الأطراء اخجلتم تواضعنا

والله انا ماخدتوش الا عشان الحديث دا

وفعلا عاوزة اكون واحدة زي نساء الصحابة

و والله العظيم بحاول اقاوم شيطاني جداااااااااااا جدااااااا

انما خايفة اووووووي منييييييي

خايفة الجلالة تاخدني ووقت الجد الاقي نفسي مش قادرة اعيش ولا اكمل؟

او واحدة تدخل بيتي وتقولي شقتك حلوة انما العمارة معفنه

ساعتها عارفة رد فعلي كويييييييييييس

اني ها اولع في نفسي وفيه هوا كماااااااااااان

" طبع الأنثى بقىىىىىىىىىىى معلش عدوها :o "

اللي مخوفني اكتر

والدي راجل عصامي

لما اتجوز والدتي ماكنش حلته الا 500 جنيه

ولا شقة ولا عفش ولا يحزنووووون

وهوا انسان بسيط عادي جدا

ومش مدلعنيييييييي كمااااان stnd::

ف لما هوا يدخل الشقة ويقول وحشششششة!!!!!!

دا يخليني اتراجع جدااااااا

مع انه سايب القرار ليا

اعيش فيها او لا

صحيح هوا عرض انه يساعد على قد ما يقدر ويجيبلي اللي اتمناه فيها لو انا وافقت عليها

انما برضه مش عارفة انا واقفة فين لحد دلوقتي :P

[UNTOUCHABLE]

دكتوره شانا انا سعيد لأن تعليقى البسيط كان له هذا التأثير. وبناء عليه احب ان اطمئنك قليلا بنبذه مختصره عن زواجى

عندما تزوجت وهى ايضا بالمناسبه طبيبه لم يكن لدينا مليم واحد. والله العظيم.

انا استلفت ثمن الصالون (لم نجلس عليه فى اخر 15 سنه اكثر من مرتين).

وقمـت بتجديد بعض الأشياء التى تركتها امى الله يرحمها وذلك بعد استذان اخوانى الأكبر.(منها سجاده مزالت موجوده الى الأن)

اشتريت ثلاجه وغساله بالقسط على سنتين.

استعملت التليفزيون الخاص بأخو مراتى لمد سنه بعد الزواج لسفره اللى الخارج وعدم حاجته اليه فى هذه الفتره.

انا مهندس وهى طبيبه كحال 99% من ابنا وطننا. استطيع ان اقول لك انه بالتفاهم (وعدم ادخال اى احد مهما كان بيننا) وايضا الرضا بما قسمه الله. اصبحنا الأن فى حال لم نكن نحلم به وقتها ولم يكن يخطر على بال اى احد.

يأبنتى ان العمل بأخلاص وتفانى وترك الرزق لله هو مفتاح الراحه فى هذه الدنيا.

انا دائما اقول وعن تجربه """ عندما يتخلص الشعب المصرى من التفاخربالنسب والمتلكات والتعالى بسبب اللون او الدين او النسب او مستوى التعليم وحب الظهور بعضهم على البعض الأخر بمظاهر الآثاث والشقق والسيارات سوف نستطيع حل جميع مشكلاتنا""ا

والله معك

[se_ Elsyed]

او  واحدة تدخل بيتي وتقولي شقتك حلوة انما العمارة معفنه

ساعتها عارفة رد فعلي كويييييييييييس

اني ها اولع في نفسي وفيه هوا كماااااااااااان

" طبع الأنثى بقىىىىىىىىىىى معلش عدوها :o "

لأ مش هانعديها طبعاً

يا ست الكل دي حياة زوجية فيها الحلو وفيها المر ... يعني لا تتوقعي أن تعيشي في عش العصفورة المحاط بالحب والحنان والحياة السعيدة .....

لازم تكوني واقعية .. إبعدي عن كلام الناس ... وقت الجد ماحدش هاينفعك ولن تجدي في حياتك إلا زوجك وإنتِ فقط .. وكل واحد قال كلمه سواء حلوه أو وحشه هاتلاقيه وقت الجد متقوقع في حياته ويقولك وأنا مالي إحنا ورانا مسئوليات ... وصدقيني يا شعنونة والله العظيم لو روحتي سكنتي في قصر عالنيل برضوا هاتلاقي المنتقدين واللي يقولك إيه ده ماسكنتيش في هضبة الهرم ليه ؟ هناك الـ View أحلى بكثير .

- إذاً خططي وأبدئي حياتك كما ترينها أنتِ وليس كما يراها الآخرون .

- ما فيش حاجة Perfect في حياة الإنسان ولكنه يسعى دائماً إلى أن تكون جيدة ومقبولة فالكمال لله وحده .

* هأقولك على حاجة ظريفة .. الأسبوع الماضي لقيت اخويا الكبير بيكلمني في التليفون وزعلان وبيقولي خطيب اختك هاياخد شقة في الهرم عشان تبقى جنب شغله وإحنا رفضنا - لأننا ساكنين في شرق القاهرة - وعايزين أختك تبقى جنبنا عشان يبقى سهل نزورها وكده .... شوفتي الهنا اللي إحنا فيه ؟ ، فرديت عليه وقولت له وإنت مالك يسكن في الهرم يسكن في الكيت كات طالما اختك موافقة والشقة كويسه يبقى إحنا مالناش دخل في مواضيع زي دي .. يا أخي فرضاً راح أخد شقة لازقة جنب بيتكم عشان تعرفوا تزوروها وإتجوز وتماما التمام وجه بعد يومين من الجواز راح ناقل في شقة تانية .. هل تقدر تتكلم ساعتها وتفرض عليه شروط وتقوله إسكن هنا وماتسكنش هناك ؟

- وبعدين ما تتحكميش قوي يا شعنونة في حكاية الديكورات دي وخلي رأيك مجرد مشورى مش أمر يجب تنفيذه وحاولي التوصل دائماً إلى حلول وسط وما تحطيش العقدة في المنشار... فأفرضي يا ستي خطيبك ده كان إتقدم لك وهو عنده شقة متشطبة وجاهزة .. وهو إنسان خلوق ومحترم .. هل ساعتها كنتي هاتقولي هد يا جدع الديكورات والتوضيب ده عشان اعمل حاجة على مزاجي ؟

وكويس إن هو إنسان عنده كرامة ورفض تحميل والده فوق طاقته .. ورفض كمان إنك تشاركي في تشطيب الشقة ..

انا عن نفسي مستعد أسكن في شقة على الطوب الأحمر بس ما اخدش مليم من خطيبتي او حتى زوجتي .. بحيث في أي موقف بعد كده ممكن تقولي إنت نسيت إني انا اللي مكلفة السيراميك والبانيو ؟ stnd:: وانا عارف وقت الغضب الستات ممكن تعمل أي حاجة وممكن تجيبلك أحداث تاريخية ما تخطرش على بالك :P

[Cleo]

لآنه للأسف هوا مؤمن فعلا هوا وعيلته ان الشقة هايلة وجمييييييلة جدا كل اللي ناقصها التوضيب!!

بذمتك؟؟؟ stnd::

شعنونة...

كلمة هاقولهالك ورزقى على الله انشالله تكرهينى طول عمرك بعد كدة...

بس أنا حاسة وربنا يكدب ظنى... إن التاريخ بيعيد نفسه وانتى طبعا فاهمة أنا قصدى إيه... :P

وعموما... راجعى الاقتباسات دى وانتى تعرفى ليه باقولك كدة..

أختك كليو.

يوم ما خطيبي اتقدم بابا سألهم عندكوا شقة جاوبوا قالوا اه وانها شقة كويسة وواسعة وكذا غرفة وفي منطقة كويسة

رحت لقيتها في عمارة قدييييييييمة جدا

لكن العمارة مش كويسة فعلا؟

مدخل العمارة اثري والحيطان ماليان نشع ميه والسلالم حديد التسليح بتاعها باين من السقف

الشقة نفسها...

عاوزة توضيييييييييييييييييب مالا يقل عن 30 الف عشان تبقى شقة بني ادمييييييين عاديين

لآنها بلاط " قنالتكس" والدهان كله باااااايظ والغرف خشب بقى لونه اسوووود من القدم

انا بقى صدمت برده هوا شخصيا

انه رفضضضضضضضضضضضض تمااااااما اي فكرة

طب نتكلم او نتناقش طيب؟؟؟

انتهى الموضوع بخناقة

واللي تاعبني اكتر انه مش مضمون اني اعملها على مزاجي؟

هناك حد أدنى لكل شئ.

بالنسبة لي القضية مش الشقة ,,لأن الشقة مؤقتة ..لكن الأسلوب شبه دائم , و وارد جدا أنه يستمر معاه في مواقف أخرى جذرية..

:o

[Abouhemeed]

كل الكلام الذي سبق حلو و جميل ..

و إن شاء الله الأمور تنحل لما يرضي العروسين

و نقول مبروك و عقبال البكاري

و نشرب الشربات ...

قولوا ... آمين

لكن تعرفوا مين المفروس في الموضوع دا ؟

صاحب البيت اللي شقته إيجارها ملاليم !

و عمال يتفرج على الداخلين طالعين و عاوزين يعملوا كيت و كيت

و يمتد العقد جيل ورا جيل و يمكن إبنه موش لاقي شقة و لو جحر في عزبة القرود علشان يتجوز فيها !

لا مؤاخذة يا شنشن ..

طلعنا برا الموضوع ..

و لكن تعتقدي إن صاحب البيت بيدعي إن ربنا يتمم بخير ؟؟

العجيب إن ما حدش يفكر في هذا الموضوع !!

طيب ليه ما تفكروش في شقة إيجار قانون جديد بأجرة معقولة ، أهرام الجمعة مليان مئات من الشقق في كل مناطق القاهرة تناسب كل الإمكانيات ، و مترو الأنفاق قرب البعيد .. و إبدؤا حياتكم بدون ما نزيد حزن صاحب البيت ، أكيد راح يدعي لكم لو تركتوا له الشقة يتجوز فيها إبنه !

[عوف]

بصراحة مش قادر اتخيل ان الموضوع أخد كل هذه المناقشات، ويا عيني جتة الراجل اتهرت من كتر الكلام عليه واللي يقول مش دوغري واللي يقول ملاوع واللي تقول قوليله ياخد الباب معاه، مع أننا جميعا حتى الأن بنسمع من طرف واحد، ويمكن لو جلسنا مع الراجل أو سمعنا منه أو شفنا الشقة نفسها يمكن كل واحد يغير رأيه تماما.

يا جماعة خلونا جميعا نكون محضر خير.

ونصيحتي لكي يا اخت شعنونة استخيري الله وتوكلي عليه وابدئي حياتك بنية صافية وخلال سنة او سنتين هتلاقوا نفسكم عملتوا اشياء لم تكونوا تتخيلوها طالما انتي بتقولي الراجل طيب وبيحبك.

على أي حال هذا الموضوع مفيد جدا لانه يكشف الجانب غيرالظاهر في أسباب النكد العائلي وهو قيام الزوجة بعرض بعض مشكلاتها على الصديقات والأصدقاء وكل واحد برأي كما هو الموقف الذي نحن فيه الآن، وأنا أقول مراتي بتنكد عليا فجأة وأنا مش عارف النكد جاي منين حقيقي اشكرك يا شعنونة نورتيني.

اما أكثر ما جعلني اضحك حتى استلقي في هذا الموضوع حكاية ذوقي ولمستي وان العروسة هي اللي توضب الشقة وتشرف عليها، مع أني شخصيا مرة واحدة قلت لحمايا خلي بنتك تيجي تشوف الشقة بعد ما اتوضبت فضل مخاصمني اسبوعين وكان فعلا عايز يفشكل الجوازة وما أعرفه أن هذه هي التقاليد في مصر كلها العروسة لا ترى الشقة الا وهي داخلة إليها يوم الزفاف.

[بنت شعنونة]

هذا الموضوع مفيد جدا لانه يكشف الجانب غيرالظاهر في أسباب النكد العائلي وهو قيام الزوجة بعرض بعض مشكلاتها على الصديقات والأصدقاء وكل واحد برأي كما هو الموقف الذي نحن فيه الآن، وأنا أقول مراتي بتنكد عليا فجأة وأنا مش عارف النكد جاي منين

طب ليه بس كدا يا استاذ عوف؟

يعني انا ناقصة اكتئاب؟

اهلي معايا على طول الخط

واهله معاه على طول الخط

وانا احترت ومش عاوزة اظلمه

طب اعمل اييييييه يعني؟ اكلم نفسي؟ والا اجي اخد اراء ناس

معظمهم لا يعرفني ولا اعرفه يعني كل واحد بيقول رايه بدون تحيز ليا وانما بتحيز لوجهة نظره الخاصة..

عموما

شكرا...

استاذ ابو حميد

لكن تعتقدي إن صاحب البيت بيدعي إن ربنا يتمم بخير ؟؟

العجيب إن ما حدش يفكر في هذا الموضوع !!

طيب ليه ما تفكروش في شقة إيجار قانون جديد بأجرة معقولة

والله فكرت

خاصة ان والدي عنده شقة زي كدا والناس واخدينها ومش عارفين نوصلها ابدااااااااااااااا ولا بعد مليون سنة

اهه بقى

اظلم الناس شوية

كفايانا نتظلم بس

rs:

القانون الجديد انا اقترحته.. واقترحت يرجع الشقة لصاحبها وياخد بدل التنازل واقترحت يتفق معاه وياجرها بالباطن وبالنص

لكن هوا رافض لآنه الحل مش في ايده

دا غير انه بيحب الشقة دي جدا

ما تنسوش انه اتولد واتربى فيها rs:

كليو

سيبيني مغمضة عيني ومقتنعة انه بريء لكن ضيق ذات اليد

اخر التطورات

كنت اتفقت انا وبابا قبل ما اكتب الموضوع انه يكلم والده ويبين ان الشقة مش عاجبانا ويشوف اييييييه الحلول المتاحة عنده عشان نختار مكان وسط نقف فيه كلنا

وكلمه فعلا

ما اعرفش ايه اللي حصل لسا بس اللي سمعته انه متمسك بالشقة جدا وانه ها يوضبها بس بالمعقول..

مش فاهما كلمة معقول بالنسبه له تعني ايه

بس لما يجي بابا ها احاول افهم ايه اللي اتقال..

عاوزة افضفض لكم بكام كلمة

مش عارفة لازمتهم ايه بصراحا

بس تاعبيني جداااااااااا وها اموت اعيط واقولهم لآي حد

خايفة اقبل باي حاجا يسترخصوني وخاصة ان نفوس الناس بقت مش مضمونة دلوقتي

يعني مادام قبلت بالشقة يبقى ندوس عليها كمان ونفضل ننزل ننزل والله اعلم ها نوصل لحد فين

خايفة ابين اني طيبة وبعدي يقوم يبقى دا الوضع في حياتي كلها اني اتنازل عن اي شيء انا شايفاه حق ليا وابقى ساعتها مجبرة على كل شيء في حياتي

حتى لو كان شيء تافه

طول عمري مجبرة على حاجات كتير

في الشغل او في الحياة ومهربي الوحيد كان بيت اهلي او بيتي الشخصي اقوم يبقى تو ما هايبقالي بيت كمان اكون مغصوبة عليه من كله؟ من جوا البيت ومن براه؟

اي نعم اهله لحد دلوقتي ماشفتش منهم حاجا وحشة والحق يقال

انما برضه لسا خايفة ومتشككة جدا

مش عارفة اتوكل على الله واتساهل في كل شيء زي ما انتوا بتقولوا

والا اقسمها بالنص مثلا

اتربس في حاجات واعدى حاجات اقله احس اني عملت كام حاجا في الشقة على ذوقي

طب اشمعنى احنا لما خطبنا لآخويا عملنالهم كل حاجا؟

اشترينا شقة ملك وفي المكان اللي حددوه هما ولما شافت شقة احسن بعناها وجبنالها التانية ولا اتكلمنا ولا نطقنا؟؟؟؟؟

اشمعنا والدي يعامل الناس بالسهولة دي واحنا ناخد على دماغنا دايما

لييييييييه كداااااا

لييييييييييييه

rs:

[Ahmed Mohsen]

بإختصار ومن الآخر .... (طبعا ده رأيي الشخصي)

إنتي من حقك إن بيتك يكونلك رأي فيه لأن ده بيتك.

أنا شايف إنك ما تعنديش في موضوع العمارة وحالتها ... أكيد هو وأهله خايفين علي حياته برضه

إنما في موضوع توضيب الشقة ده ... لازم يكونلك رأي فيه بس طبعا علي حسب إمكانيات الأب.

يعني مفيش إعتراض علي توضيب الأب للشقة بالمعقول، بس إنتي اللي تختاري نوعية التوضيب.

ده حقك وحق خطيبك .... إن بيتكم يبقي ذوقكم ... ولو هو مستغني عن الحق ده، هو حر ... إنما مش حر يلغي حقك من غير موافقتك.

كل ده طبعا بافتراض حسن النية

ونصيحة برة الموضوع .... حكمي عقلك في كل حاجة وما تصمميش علي التقاليد والأعراف في الزواج .... عشان في حاجات كتير أوي معترف بيها بس مش منطقية.

يا رب يوفقك لكل ما فيه الخير.

ملحوظة: أنا متابع لكل موضوعاتك يا شنا ومعجب بيكي جدا ... معجب باندفاعك في الحق وعدم ترددك في مواجهة الغلط سواء في موضوع شغلك أو موضوع المعاكسات.

ربنا يكرمك بكل ما هو خير في هذه الدنيا فأنت تستاهليه

[عوف]

طب ليه بس كدا يا استاذ عوف؟

يعني انا ناقصة اكتئاب؟

اهلي معايا على طول الخط

واهله معاه على طول الخط

وانا احترت ومش عاوزة اظلمه

طب اعمل اييييييه يعني؟ اكلم نفسي؟ والا اجي اخد اراء ناس

معظمهم لا يعرفني ولا اعرفه يعني كل واحد بيقول رايه بدون تحيز ليا وانما بتحيز لوجهة نظره الخاصة..

عموما

شكرا...

لا لا لا يا شعنونة

ما عاش اللي يخليكي تكتئبي

انا بس حبيت اقولك ان تعدد الاراء بيخلي الانسان يدخل في حيرة

وفي مثل هذه الظروف افضل شيء الاستخارة والأخذ بالاسباب يعني تعمل انتي اللي تقدري عليه ويعمل هو اللي يقدر عليه وتتوكلوا على الله، ولما حد يقولك الشقة فيها كذا أو فيها كذا قولي له ان الامام علي والسيدة فاطمة تزوجوا في غرفة صغيرة وظلوا الايام الثلاثة الأولى من الزواج بلا طعام.

طب اشمعنى احنا لما خطبنا لآخويا عملنالهم كل حاجا؟

اشترينا شقة ملك وفي المكان اللي حددوه هما ولما شافت شقة احسن بعناها وجبنالها التانية ولا اتكلمنا ولا نطقنا؟؟؟؟؟

اشمعنا والدي يعامل الناس بالسهولة دي واحنا ناخد على دماغنا دايما

لييييييييه كداااااا

لييييييييييييه

ببساطة لأنكم ناس طيبين

والطيبة لا تتجزأ

يعني زي ما كنتوا طيبين مع عروسة اخوكي

خليكم طيبين مع عريسك

وبس خلاص

[Cleo]

طيب ليه ما تفكروش في شقة إيجار قانون جديد بأجرة معقولة

إيجار جديد ده لو واحدة متجوزة وسافرت عاشت مع جوزها بره لفترة بدون توفر منزل زوجية فى مصر كحل مؤقت لحين شراءه "منزل زوجية" فلوسه متوفره بالفعل ولكن لم يتم بعد اختياره..

أو أنه يكون حاجز شقة ولسه وقدامها سنتين تلاتة تتشطب برضه كحل مؤقت..

إنما بصراحة انك تبقى عايشة هنا وتبتدى حياتك إيجار جديد بدون توفر بديل.... يبقى إيه التأمين اللى تأمنى بيه نفسك وولادك للمستقبل لو لا قدر الله حصل أى ظرف ؟؟؟

إزاى الراجل يبقى عايز يفتح بيت بس البيت مش موجود؟؟؟ rs:

ثانيا خديها برضه نصيحة مجربين.. rs: عايزة تتنازلى، إتنازلى فى حاجات خفيفة زى فستان الفرح، نتشارك فى الفرح، النجف، السجاد، الستاير... أما الأساسيات زى توفير مسكن زوجية ملائم أو أى من الأساسيات... فالتنازل فيها فى "أغلب" الأحيان ولن أقول كلها يكون بداية لسلسة من التنازلات التى لن تنتهى...

كليو

سيبيني مغمضة عيني ومقتنعة انه بريء لكن ضيق ذات اليد

من كل قلبى أتمنى أن تكونى على حق