انا في مشكلة..!

[بنت شعنونة]

سقراط

حمدالله على السلامة وانا افتقدك جدااااااا والله.. مش عارفة فين اراضيك دلوقتي ولا نعرف اخبارك! mc(:

يا شعنونه رجل اكاديمي يعني بتاع زرع وحصد، بالقوه اعرف اغير لمبه محروقه ، انبوبه البوتجاز بتكون احيانا معضله بحته.

ماشي، كلامك ونشاطك عن الشقه وتوضيبها وعمايلها ووووو ...لو كان خطيبك من النوعيه الاكاديميه او اللي ملهاش في الحاجات دي ,,,,,,,اكيد مش هيكون مرتاح داخله لما يسمع الكلام ده .......نشاطك تظهريه يا دكتوره بعد الزواج ، قبل الزواج تكوني دكتوره شاطره وست بيت ماهره. اكتر من ذلك بلاش منه

طب ليه يا سقراط

ايه الغلط في النشاط اللي انت بتقول عليه دا! mfb:

كليو...

انا عارفة انتي تقصدي ايه كويس

وعارفة زيييييييي تماااااام ان اللي اتلسع من الشربة ينفخ في الزبادي..

وكليو حصل معاها موقف زي دا ف بتوعيني

والرأي الأخير ليا

زي ما الكل بيعمل...

" عارفة اني تعباكوا معايا على طووووووووول انما اعمل ايه بقى mc(:

كتر خيركم كلكم بجد "

مسلمة

والله كل كلمة نطقتها هنا قلتهاله

وكل كلمة كان ليها رد عنده..

استاذ بلبل

اييييييييييييه العنف دا بس!!!!!! mc(:

مراتك ليه الجنة والله mfb:

mc(:

[DARWEEN]

شعنونه ... ممكن أتكلم ؟؟ .. انا فضلت ساكت للآخر خالص ومش راضي أنطق ... بس أحلفلك إني كنت متوقع تسلسل الأحداث قبل ماتحصل

ولمن لا يعلم فإن الدكتور شعنونه لها عندي منزلة الإبن تماما ولها في عنقي جمايل كتيرررر ربنا يقدرني وأردها .. في المسرات إنشاء الله

ياشعنونه ... أولا خطيب سعادتك (من وجهة نظري) شايف إن مستواك أعلى كتير من مستواه .. وهذا واضح من تصرفاته وهذه بداية خاطئة لأي علاقة زوجية فهو تارة يحاول أن يظهر بمظهر المكافح المتميز عن باقي أفراد عائلته وتارة يحاول أن يظهر غضبه حتى يداري على شعوره بتميزك عليه ...

ثانيا .. أنا ضد عريس بابا اللي حيجوزه من الألف للياء معلش دي مسألة مبدأ أنا كقتنع به 100 % .. يساعده يجوز لكن يجوزه ... لأ

ثالثا ... في الجواز مفيش حاجه أسمها هي كده وخلاص .. في الجواز كل شيء قابل للتفاهم والنقاش مهما كان كبير أو صغير لكن طريقة لوي الذراع دي ماتنفعش طريقة جواز .. وكتر التنازلات من الطرفين بطريقة ماشي ماشي صدقيني مستقبلا حتكون ضاره جداااااااا

طبعا أنا عارف أني في صفك على طول لحد دلوقتي .. لكن

إسمحي لي الوالد غلطان طبعا أنه يقبل بعريس وخطوبه وشبكه من غير مايشوف ويدقق بنفسه ويشوف الشقه اللي تم الإتفاق عليها وكللللل ده ... ( وإنتي لو تفتكري انا قلتلك الكلام دا قبل كده )

ثم إن الوالد يعرض انه يأجر شقه ويدفع إيجاره .. معلش يبقى الراجل عنده حق لما يستغرب أنتي قبلتي بيه ليه

نقطه أخيره ... لاحظي أنه ممكن يكون قال الكلمه اللي زعلتك دي مجرد بيقيس رد فعلك أو بيشوف حتردي تقولي أيه من جهة انه مش واثق في نفسه كند ليكي من جهه ومن جهة تانيه انتي بتقولي أنه مقفل شويه

وبرضه لازم تحطي في أعتبارك ( ودي نقطه لباقي الأخوه هنا ) أنا عارف يعني أيه واحده ساكنه في كفر عبده ... ونصيحة ليكي ويارب أكون على حق ... فيه حد أدنى من التوافق الإجتماعي لازمممم يكون موجود وإلا فربنا يستر من اللي ممكن يحصل مستقبلا

ياشعنونه بلاش شعننه في مواضيع الجواز الأمور اللي بتتعلق بقرارات مصيريه في حياة الإنسان يجب التمهل فيها

[se_ Elsyed]

وبرضه لازم تحطي في أعتبارك ( ودي نقطه لباقي الأخوه هنا ) أنا عارف يعني أيه واحده ساكنه في كفر عبده ...

انت عارف بس أنا مش عارف !!!

لأ بجد تقصد إيه يا داروين ؟

قصدك يعني إن بنت تكون واخده على مستوى معين وبعيدن تروح تتجوز في منطقة شعبية ؟

وبعدين أساساً فين كفر عبدو دي ... لأ بجد والله ؟

طب يا عم داروين .. إذا كانت البنت طبيبة - زي شعنونة كده - واعتقد إنها قالت لنا إن خطيبها برضوا طبيب ... فلماذا لا يبدأوا في شقة معقولة وبعدين يكافحوا سوياً وكما قالت لنا شعنونة بإنه مرشح للعمل بالخارج .. كما إن عروستنا برضوا هايبقى عندها فرصة للعمل بالخارج أيضاً .. يعني بشوية صبر بكرة نلاقي عندهم شقة عالنيل .. طالما في وفاق وتفاهم بينهم وطالما عندهم هدف في الحياة ؟

انا ما بأقولش الواحدة توافق إنها تسكن في اوضة فوق سطوح او شقة بحمام مشترك ...

لكن هناك مناطق شعبية كتتتتتتتتتتتتتتير جداً - وما تنساش إن مصر اكثرها عشوائيات - ومع ذلك محترمة والعيشة فيها مافيهاش أي عيب يعني .

[Salwa]

ياسى السيد ....كفر عبده ...هى منطقة صغيرة بين رشدى وسموحة كدة يعنى

اغلب سكانها الاسكندرانية القدامى قوى ...وفيها حصلت الحكاية المشهورة عندما ارادوا هدم فيللا معينة لبناء عمارة ووقفت سيدة اجنبية امامهم ....اعتقد الحكاية كانت فى الجرائد ..

وكلمة كفر عبده بتخدع ناس كتير لكن مثلا مثلا ..تلاقى هناك اغنى اغنياء مصر ....وحرس على الفلل وبذخ يعنى لا تتخيله لو دخلت فيللا من دول ....بس برضه اللى اصلهم اسكندرانية .

والآن فيه وافدين كتير .....ممكن يكونوا عايشين بايجار جديد وفيه برضه الأغنياء الجدد ......

وفيه ناس عايشة بايجار قديم يعنى فيه شقق كتير ايجارها لا يتعدى 20 جنيه ....بس الخلاصة يعنى هى مكان محترم ....

اى خدمة ......

[Blue_Lagoon]

اختى الحبيبة شعنونة

اسمحى لى انى اناديكى باختى رغم انى لسه جديدة بس حقيقى حسيت انك اختى وانا بقرا موضوعك

شوفى يا حبيبة قلبى

انا لفت نظرى فى الموضوع كله نقطة يمكن غريبة شوية

انك اما تزعلوا و تتصالحوا مش بتفتحى الموضوع تانى و هو فى الزعل بيجيب لمليون سنة فاتت

على فكرة دا طبع مش حلو و شديد الصعوبة و يتعب الاعصاب

وبما انك من النوع اللى ممكن يكتئب بسرعة فالطبع دا ح يتعبك جدا فوق الوصف.

اما لو جينا لنقطة انه ماجل كل حاجة لشهر 4 بعد ما يخلص امتحاناته فصدقينى كل الرجالة كدا

لما يكون وراهم حاجة تهمهم فى المجال العملى يحطوا اى حاجة تانية على جنب و لو الست اشتكت يقولها هو انا بعمل دا كله لمين ؟ مش ليكى يا ست هانم ( و خطيبك ح يزود و يقول يعنى انتى فاكرة فلوس التوضيب دى ح اسددها ازاى ماهو لو انتى مكنتيش اعترضتى على الشقة كان ممكن اكون بشتغل اقل دلوقتى)

وتبتدى الشكاوى اصل مراتى نكدية و عايزانى افضل جنبها فى البيت و مشتغلش.........

يا شعنونتى علشان تقدرى تعيشى و متتعبيش اوعى تاخدى الامور على اعصابك لانك انتى اللى حتتعبى و هو برضه ح يشتكى

كبرى دماغك فى المشاكل.........اتخانقى بس من غير ما تاخدى الامور على اعصابك

كلمته بتاعة انك قبلتى بيه علشان الجواز مش حلوة لكن رد فعلك كان برضه مش حلو الرجالة يا بنتى عايزين الاعصاب الباااااااااااااااااااااردة علشان تعرفى تتعاملى معاهم و خصوصا فى بداية فترة الجواز

ربنا يسعدك و يهنيكى

[abo_mariam]

ألغيت المداخله بمعرفتي

وعلى العضو تعديل اسلوبه

الأداره

داروين

تم تعديل 17 نوفمبر 2004 بواسطة DARWEEN

[abo_mariam]

ألغيت المداخله بمعرفتي

وعلى العضو تغيير أسلوبه

الأداره

داروين

تم تعديل 17 نوفمبر 2004 بواسطة DARWEEN

[G.G]

و الكلام لك الأن يا شعنونة,,

همسة صغيرة , تعلمت من مداخلاتك أن المداخلات عن الحياة الشخصية ليست مكانها على الإنترنت,,

قد تكون في أحيان سعيدةالحظ بحيث يقرأها من يهمنا أمره فعلا,, فيقدم لنا النصيحة , طوق النجاة الذي نحتاجه للخروج من دائرة الظلام..أو يقرأها من يتقي الله في أنسان أضعفته وطأة المشكلة فينوبه دعاء مخلص من ظاهر الغيب..

و لكن للأسف ليست هذه هي الحال دائما, لذا الضن بنشرها هو الحل الأسلم ,, حياتنا و ألامنا الشخصية تلك بالفعل

هي أغلى بكثير من أن تتعرض لتدخل من لا ناقة له و لا جمل..

أو تتعرض لكل من هب و دب لأن يدلو بدلوه ناصحا أو مرشدا أو جارحا..

أو تتعرض لمصمصة شفاه من يقرأها متشمتا و لا ينوي بأى حال من الأحوال التدخل بالنصيحة..

يا ليت كنا فعلا أسرة واحدة في هذا المنتدى الجميل و لكن للأسف ليست هذه الحقيقة..

وددت أن انقل اليك ما تعلمته و أن اهديك <_< عسى أن تخفف عنك أي تعليقات غير مناسبة قد تكون ترامت إلى مسامعك سابقا.

G.G أختك و "طنطة" من لا طنط له

تم تعديل 17 نوفمبر 2004 بواسطة G.G

[DARWEEN]

العضو أبو مريم

أسلوبك غير مقبول شكلا وموضوعا ونحن هنا نحترم كلا منا الآخر صغيرنا وكبيرنا

هذا إنذار أخير لك

الأداره

[الطاحونة الفكرية]

شعنونة

أزيك الأول

طبعا بالنسبة لموضوعك و مشكلتك انا شايف انها حازت على اهتمام الاعضاء بشكل فظيع

دة دليل على أن الأعضاء ناس محترمة و بتحب تحل مشاكل الناس

بس على فكرة أنا معنديش معلومات كفاية عن طريقة خطبتك

هل هي طريقة صالونات واللا عن حب

؟؟؟؟؟

لو جاوبتيني على السؤال دة هقوللك تعملي ايه

باي vmp: