لكلـك ... لكلـك

[ramy basha]

لكلـك ... لكلـك

كلام كلام كلام .... هو فيه إيه ماسورة كلام وإنفجرت في مصر بقينا عاملين

زي تلاميذ الابتدائي لما المدرس يخرج من الفصل كله يبدأ يتكلم بصوت واطي

شوية بعدين يبدأ الصوت يعلي علشان كل واحد عايز يتسمع في وسط الدوشة

والصوت يعلي أكتر لحد ما يوصل لأعلي درجة ساعتها يدخل مدرس الفصل

بسرعة ويرزع بالعصاية علي أول تخته ويقول بصوت قوي جدا ( بس )

مش عايز ولا نفس ،،،

الحقيقة هو ده بالظبط اللي احنا محتاجينه يحصل في مصر محتاجين المخرس

المخلص اللي يقولنا بس سكوت وفي نفس الوقت كلنا نتفق علي طاعته

ونصمت وإحنا في قمة الثقة إنه يقدر يقودنا ولكن يا للأسف والآسي مفيش

واحد لحد دلوقتي علي الأقل محل لهذه الثقة بالإجماع أو بالبلدي الفصيح

مفيش واحد مالي عنينا في الموجودين علي الساحة العامة سواء كان من

أحزاب الوسط أو المعارضة أو أحزاب ( خلينا نسميها ) الموالاه لأي قادم

لو لاحظتوا هتلاقوه في وجه شبه يجمع بين كل الموجودين علي الساحه وهو

أن أصغرهم سننا تخطي الخمسين ( ده أصغرهم ) يعني معظمهم مواليد الحرب

العالمية الثانية يعني مستحيل يفهمونا ،

ده ناهييك بقي عن من يسموهم الحكماء ورؤساء اللجان دول بقي مرضي

بالزهايمر منذ خمسين سنة لأ وكمان في أي مؤتمر تلاقيهم قاعدين علي

المنصة ( من 6 الصبح فاضي بقي ) وواخدين أول عشر صفوف أمام المنصة

وتيجي تدور علينا يا شباب تلاقينا يا إما واقفين في أخر صف لأن مفيش مكان

فاضي لينا أصلا (ودي ليها دلالتها طبعا) يا إما ماشين في الشوارع مانعرفش

حاجة أصلا عن المؤتمر اللي المفروض بيناقش مستقبلنا ،

لأ والمضحك بقي إننا لما قمنا بالثورة كشباب ( إضحك بقي علشان اللي جاي)

تسأل أي جدو من الجدوهات اللي كترو أوي بعد الثورة وتقولوا

......... كنت فين ياجدوا لما جيت أقول لا ..........

يقولك (كنت قاعد أمام التليفزيون بتفرج عليكم وإنتوا بتندهسوا تحت العربيات

وكنت بتصل بالتليفزيون المصري أؤيد الإستقرار وبقاء الحال علي ما هو

عليه لكن بصراحة لما كسبتوا قولت أشجعكم أصلكوا عملتوا ماتش جامد أوي)

طبعا مستحيل حد يقول الكلام ده لكن لسان الحال بيقول كده وكل الشباب

عارفين الكلام ده وكل شاب فينا ناجح أو بيحاول ينجح في دايما عدد واحد

جدو من إياهم واقف في سكته سواء كان في شغله او في التعبير عن رأيه أو

حتي في حياته الشخصيه المهم نرجع لموضوعنا ،

خلي بالك أنا ما بتكلمش عن كبار السن بصفه عامه أنا بتكلم عن من أستطيع

تسمهيتهم بعد الثورة بالمتحشرين الجدد اللي حشروا نفسهم وسط الشباب

وطلعوا علي المسرح ياخدوا تحية الجماهير علي نجاح الثورة وشوية شوية

بدأو يزيحوا الشباب ويظهروا هما فقط وبالتالي لن يظهر سوي فكرهم

وبالتالي فلن نقتنع بفكرهم ( العقيم طبعا ) وبالتالي لن نصمت إحتراما لما

يطرحونه يعني مفيش بس وفيه لكلك لكلك إلي أن يسمع صوتنا وفكرنا

وتتحول افكارنا إلي واقع ساعتها بس إحنا إللي هانقول ( بس ) .

كتبه / سامح عامر

[عادل أبوزيد]

أتفق معك تماما ... كلامك سليم و لا غبار عليه و لكنك كمن يقول "يا ناس هاتولى حبيبى"

ما سبق كان إستهلالا لابد منه

صحيح قام الشباب باثورة و نجح الشباب فى تجميع الشعب كله عن بكرة أبيه و تم إسقاط النظام بل تم إختيار رئيس وزراء من الميدان .... هذا كله جميل بل يوجد الآن ممثلون لشباب الثورة داخل مجلس الوزراء ماذا فعل الشباب بعد ذلك ؟؟؟؟

إقرأ يا سيدى موضوع بعنوان عصام شرف فى الميزات بعد 100 يوم و هو نوع من الكلام

هل تم "الضحك على الشباب" و الثورة إنتهت إلى الوضع الحالى ؟

[ramy basha]

ياريت حضرتك تضع رابط موضوع عصام شرف في الميزان علشان عايز أقرأءه ومتشكر علي مرورك وتعليقك ومشاركتك الايجابية

[عبير يونس]

اتفضل يافندم

http://www.egyptiantalks.org/invb/index.php?showtopic=123068

[ramy basha]

متشكر يا استاذه واتمني ان يفسح المجال للشباب في بلدنا الغالية وان يهذأ الصوت العالي بلا مبرر لأن بجد البلد بقي فيها دوشة