أسئلة مشروعة

[raouf]

انا قرات الاسئلة بس للاسف لقيتها صعبة ممكن حد يرد على الكاتبة

كتبتها صافيناز سليمان ونشرها الكاتب الصحفى عمر طاهر

...

...س1: ما معنى أن يطلع فى التليفزيون شخص ما يقول للمصريين إيه دخل ربنا فى السياسة؟

س2: ليه كل وسائل الإعلام مابتستضيفش ذوى الفكر السياسى الدينى إلا علشان تحرجهم وتتصيد لهم الأخطاء؟

س3: إزاى سيدنا محمد بيقول لو أن فاطمة سرقت لقطعت يدها ولسه فيه ناس بتقول حرام عليكم سيبوا حسنى مبارك؟

س4: إذا كانت الدولة الإسلامية دولة فاشلة على مر العصور زى ما بيقول علاء الأسوانى، طيب إيه نموذج الدولة المدنية العلمانية العظيمة اللى هانعمل زيها؟

س5: ليه أيام الاستفتاء كنتوا بتتكلموا عن الديمقراطية وبعد النتيجة كله طلع يقول إن مصر كلها جهلة؟

س6: ليه لما أقول رأيى لازم الأول أحلف إنى مش من الإخوان ولا السلفيين؟

س7 :ليه الإعلام رسخ فى نفوس الأطفال والمراهقين والمسيحيين إنك لو شفت واحد ملتحى ولابس جلابية قصيرة أو واحدة منقبة أجرى (على فكرة أنا مش منقبة)؟

س8: ليه كل أفلام عادل إمام (وهو من له من التكريم أكتر من أى عالم أو مفكر أو رجل دين) لازم بيقى فيها واحد ملتحى أهبل أو حرامى أو متطرف ؟

س9: ليه كل شوية بنشوف كلمة الشيخ الشعراوى الثائر الحق ومش بنشوف وجهة نظره فى العلمانية وهى موجودة ومنتشرة على الإنترنت؟

س10: ليه الخمستاشر عشرين واحد اللى فى كل التليفزيونات والجرايد والندوات بيحاولوا بالعافية يوصلوا إن رأيهم بس هو اللى صح، ومع كده بيقولوا إنهم ضد الديكتاتورية ومع الديمقراطية؟

س11: ليه الإعلام بيرسخ إن الاسلام واللى هما مايعرفوش عنه غير الإخوان والسلفيين معناه قطع اليد؟ هى ليه الناس خايفة من قطع اليد؟ إنت بتسرق؟

س12: ليه واحد نسى يحلق دقنه الصبح ونزل خطف شنطة واحدة ماشية فى الشارع تتكتب بكرة فى الجرنال: سلفى يروع الآمنين فى الشارع؟

س13: ليه من حق شخص أو مجموعة من الأشخاص إنهم يقرروا لنا نعيش إزاى لكن ربنا مش من حقه؟

س14: ليه الناس اللى بتقول قال الله وقال الرسول تبقى مضطهدة فى عصر مبارك وبعد الثورة أيضا؟

س15: ليه الناس خايفة من الدين ومش خايفة من العقل البشرى؟

[raouf]

غريبة 28 مشاهدة وولا حد جاوب على اى سؤال

الظاهر انها فعلا صعبة

[ابو محمود]

عارف لية يا عزيزى ...لانك غير مصنف يعنى لو حد تانى مثلآ كتب ما تم نقلة مثلك لتم الرد وبعدين اصبر يمكن المانع خير ...

ردى بقى هو يتلخص فى كلمتين .. ليس لدينا نخبة حقيقية من المثقفين بل لدينا نخبة من اللصوص والمتكبرين والارزاق على الله ههههههههههههههه قابل ياريس رؤوف