تأجيل مباراة القمة الى اجل غير مسمى

[se_ Elsyed]

قرر اتحاد الكرة برئاسة سمير زاهر، تأجيل مباراة القمة بين الزمالك والأهلى فى الأسبوع الـ27 التى كان مقرراً إقامتها مساء اليوم الأربعاء، إلى أجل غير مسمى.

من جانبه، قال سمير زاهر رئيس اتحاد الكرة لـ "اليوم السابع" إن قرار التأجيل جاء بناء على تعليمات أمنية عقب الأحداث التى شهدها ميدان التحرير مساء أمس، والاشتباكات بين الشرطة والمتظاهرين.

وأضاف زاهر أن باقى مباريات الأسبوع الـ27 ستقام فى موعدها اليوم.

[Alattar]

كنت لسه داخل أحط الخبر يا سين سين..لقيتك سبقتني

عموما هي العملية بصراحة ما كانتش ناقصة..أصلا الدنيا والعة بين جماهير الناديين..وما كانتش ناقصة حسام و أخوه يعملوا حاجة استفزازية من بتوعهم النهاردة يولعوا الدنيا أكتر

علاوة علي ذلك الأحداث اللي حصلت امبارح و حالة الفوضي اللي في البلد..كل ده كان ممكن يتسبب في مأساة

[ابراهيم عبد العزيز]

لست مع هذا القرار

فلما نظهر انفسنا امام العالم أننا نفتقد الامن والامان لدرجة اننا غير قادرين على اقامة مباراة دربي !!

فكيف يستوي هذا القرار مع رغبتنا فى تنشيط السياحة لمصر ؟؟

وكلنا رأينا أن تونس منذ ايام أقامت مباراة الدربي فيها دون اى مشكلة وهى تعاني من نفس ظروفنا وهناك انفلات امني واشتباكات كما يحدث فى مصر

كان يمكننا أن نقوم بالتأمين الجيد للمباراة وتفتيش دقيق لكل الداخلين للاستاد ووقتها لم يكن ليحدث ما يعكر صفوها

[ZAINSALEM]

انا من رأيى ان التأجيل فى مصلحةالوطن و الاهلى والزمالك

1- مصلحة الوطن فى تأمين البلاد امنيا لأن الاجواء غير مستقرة وخاصة فى ميدان التحرير

2-مصلحة الاهلى لكى يتمكن من الحصول على راحة كافية بعد المجهود المبذول فى مباريات الدورى وخاصة اخر لقائين مع ابنى ولاسماعيلى

3-مصلحة الزمالك لكى يتمكن من معالجة لاعيبه النفسية وفترة لرجوع المصابين

وتحياتى للجميع

[الغريب]

القناة الأولى تعلن الآن أن الماتش هيتلعب في موعده اليوم

[لماضة مصرية جدا]

السلام عليكم و رحمة الله و بركاته

طب معلشي استحملوني شوية

يعني هو ايه لزمت الدوري اصلا من اساسه دلوقتي؟؟؟

مش لما نعرف راسنا من رجلينا؟؟

يا خوفي الفتنة اللي جاية تبقي اهلي و زمالك....!!!

[MZohairy]

كده الواحد عمال يفهم شويه شويه

او مايفهمش شويه شويه

صاحب القرار في مصر (الله اعلم هو مين دلوقتي) قالك نلغي الماتش علشان التجمعات ما تعملش مشاكل تزود الطينه بله ..و طلع قرار بالغاء الماتش

راح رادد عليه واحد من مساعديه و قال له بالعكس...ده احنا نخلي الماتش النهارده علشان ياخد الانتباه و الموضوع يخف شويه و الناس تنسى...راح مطلع قرار باقامة الماتش في موعده

[لماضة مصرية جدا]

كده الواحد عمال يفهم شويه شويه

او مايفهمش شويه شويه

صاحب القرار في مصر (الله اعلم هو مين دلوقتي) قالك نلغي الماتش علشان التجمعات ما تعملش مشاكل تزود الطينه بله ..و طلع قرار بالغاء الماتش

راح رادد عليه واحد من مساعديه و قال له بالعكس...ده احنا نخلي الماتش النهارده علشان ياخد الانتباه و الموضوع يخف شويه و الناس تنسى...راح مطلع قرار باقامة الماتش في موعده

و الله يا استاذ زوهيري ده بيفكرني باعلان

ركبوا الشيفروليه

و احنا قاعدين

ساقوا الشيفروليه

و احنا قاعدين

باعوا الشيفروليه برضه

و احنا قاعدين

انا هتنقط انهم بيتعاملوا معانا بسذاجة متناهية و بناء عليه

هرد عليهم و اقول

هي الكورة فييييييييييين...(وش سمير غانم و هو ماسك ايد الكبشة و عاملها مكرفون)

[أبو يمنى]

يعني هو ايه لزمت الدوري اصلا من اساسه دلوقتي؟؟؟

أوافقكي الرأي أختنا .

أنا أتعجب من بعض زملائي في العمل ، يسيطر على تفكيرهم الدوري ومبارة اليوم بشكل غريب ، حتى أن أحداث الأمس المريرة لم تكن لديهم على نفس الدرجة من الاهتمام .

المرحلة الانتقالية التي تمر بها مصر على درجة عالية من الخطورة ، والمتربصون بأمن ومصالح بلادنا كثيرون ، ولا بد أن نكون أكثر يقظة وأن نعيد ترتيب أولوياتنا .

نسأل الله أن يحفظ بلادنا من كيد الكائدين .

[pink rose]

كل شوية برأي مش صاحب القرار بس

احنا كمان بنغير رأينا لما بتوصلنا معلومات جديدة بنرجع نبني عليها قرار جديد

عن نفسي مش شايفه اهمية اصلا لاقامة الدوري من اساسه و كنت ضد استكماله من الاصل

لكن تم استكماله

بالنسبة لماتش النهاردة كنت مع عدم التأجل عشان ما توصلش فكرة ان حال البلد باظ من تاني و دا تأثيره زفت على كل حاجه و خبر نزول مؤشر البورصة على الصبح كده يسد النفس

و كمان قولت اهو الناس تسيب الميدان و تروح الماتش و الوضع يخف و يتم وقتها احكام اغلاق الميدان و عدم تزويد الاعداد فيه

لكن لما لقيت في مصيبة متجهزة لمصر بان المشجعين رايحين و ناويين يقلبوا الدنيا و دا كله هايبقى على عينك يا تاجر و مذاع على الفضائيات رجعت اقول يا رب يلغوه

عشان يفوتوا الفرصة على دعاة الفوضى و التخريب و دعاة فضح مصر من الداخل للاسف

[ابراهيم عبد العزيز]

نقلا عن اليوم السابع

بى بى سى : "سمعة مصر" وراء إقامة لقاء القمة

أثار قرار المجلس العسكرى بضرورة إقامة مباراة القمة بين فريقى الزمالك والأهلى ضمن مباريات الأسبوع الـ 27 من مسابقة الدورى العام فى موعدها اليوم ، ردود أفعال واسعة فى مختلف وسائل الإعلام العالمية.

ذكرت هيئة الأذاعة البريطانية "بى بى سى" ، أن الحفاظ على سمعة مصر أمام العالم ، وراء إصرار المجلس العسكرى على إقامة المباراة التى تحظى بإهتمام دولى فى موعدها ، لما يتمتع به الناديان من شعبية واسعة فى مختلف دول العالم .

كانت صحيفة "الجارديان" البريطانية ، قد وصفت المباراة فى وقت سابق ، بأنها من أهم وأقوى مباريات الديربى على مستوى العالم .

يذكر أن الأهلى يتصدر مسابقة الدورى العام بفارق خمس نقاط عن غريمه التقليدى الزمالك .

[pink rose]

الحمدلله الشوط الاول عدى على خير

يا رب كملها على خير

نيجي بى للماتش

يااااااااه بقالي كتير ما اتفرجتش على ماتشات

بداية ما شاء الله ارض الملعب شكلها جامد عاجبني اوي

الحكم بيفكرني بواثق الخطوة يمشي ملكا

بصراحة الحكم حاكم الماتش تمام و حازم في قراراته و دا اعتقد بيكون عامل مهم في انضباط اللاعيبه

الجمهور لحد دلوقتي قمة في الاحترام يا رب يفضل كده طول الماتش

الماتش عموما كويس و لعب مفتوح يليق بلقاء قمة

كملها يا رب للاخر مش عاوزين نشمت فينا الاعادي

تم تعديل 29 يونيو 2011 بواسطة pink rose

[شرف الدين]

يا فرحة ما تمت يا بينكي

[شرف الدين]

الحمد لله الماتش خلص على خير

صحيح في اشتباكات حصلت في الملعب .. واشتباكات بعد الماتش برضه ... لكن أهم حاجة أن الأمور لا تتطور وتوصل للجماهير...

يا خسارة عليكم يا لعيبة مصر ... كنت فاكركم أكبر وأعقل من كده ... ربنا يهديكم

حقا تغير النظام . فمتى يتغير الشعب ؟

( على فكرة ده أول ماتش اتابعه من ساعة الثورة )

ربنا يستر والأمور ما تتطورش وتخرج بره الملعب ....

تم تعديل 29 يونيو 2011 بواسطة شرف الدين

[ريمون]

يا فرحة ما تمت يا بينكي

يا راجل قول الحمد لله

حبت العك دول هزار عيال ميستاهلوش تزعل نفسك

الحمد لله انها مقلبتش مجزره و الا حاجه. الواحد كان حاطط ايده على قلبه

[capitshino]

الحمد لله انتهى الماتش على خير "حتى الان"

اما بمناسبة المشكلة اللى حصلت .. فكتير حصلت مشاكل زى دى فى الدورى المصرى

يعنى مش لازم نربط كل شئ بالاوضاع اللى فى البلد

رغم انى كنت عاوز اللعبيين تحس بالمسئولية .

[pink rose]

الحمد لله يا رب اليوم يكمل للاخر على خير

نفسي الناس تطلع تروح بيوتها و ما يطلعوش على التحرير

يا رب يروحوا

يا رب يروحوا

[Alattar]

الحمد لله يا رب اليوم يكمل للاخر على خير

نفسي الناس تطلع تروح بيوتها و ما يطلعوش على التحرير

يا رب يروحوا

يا رب يروحوا

وايه اللي هيطلعهم علي التحرير ان شاء الله يا أم مريم.؟هي العملية ناقصة

و الأخ حسام حسن رايح يتخانق مع جوزيه عشان الأهلي جاب جون و فيه لعيبة بتمثل عندهم كل شوية..

حد خد باله من شيكابالا لما أحمد السيد راح يقومه عشان يخرج بسرعه و ما يضيعش وقت.؟..بيتخانق معاه عشان بيقومه و بيطلب منه انه يخرج بسرعه

يعني العملية واضحة أساسا من بدري انه عاوزين يضيوا وقت بأي طريقة و خلاص

أنا بصراحة كنت متوقع انه هينسحب من الماتش بعد الجون التاني عشان يعيش أكتر في دور المظلوم..أتمني من جماهير الزمالك الواعية انها ما تمشيش ورا الحركات دي و تعرف كويس ان ناديها هو اللي ضيع نفسه بنفسه

[عنبو]

الله يخرب بيت ... يا حوسام

ايه القرف ده هى الناس دى مش بتحس باى مسؤليه خالص اتجاه البلد

بس هنقول ايه العيبه لو طلعت من اهل العيب متبقاش عيبه

هو يعنى حوسام كان من امتى وظنى ولا بيخاف على البلد علشان نطالبه بانه يعمل حاجه زى دى

تحياتى

عنبو

[doctor ayman]

الله يخرب بيت ... يا حوسام

ايه القرف ده هى الناس دى مش بتحس باى مسؤليه خالص اتجاه البلد

بس هنقول ايه العيبه لو طلعت من اهل العيب متبقاش عيبه

هو يعنى حوسام كان من امتى وظنى ولا بيخاف على البلد علشان نطالبه بانه يعمل حاجه زى دى

تحياتى

عنبو

عندك حق يااستاذ عنبو

انا كنت خايف جدا من حسام وابراهيم

دول اكبر بلطجيه في عالم كره الفدم

اول مره اشوف مدرب رايح يتخانق مع مدرب

وكانه بيقول للاعيبه بتوعه بوظو الماتش

المهم الماتش عدي علي خير

يارب الازمه اللي في ميدان التحرير اللي محدش عارف اصلا ايه سببها تخلص بأه

الواحد اعصابه تعبت وربنا يهده اخوانا بتوع 6 ابريل قبل مايولعوا في البلد وهم يظنون انهم يحسنون صنعا

والناس اللي عاوزه تعيش دور الثوره عرض مستمر من صحفيين ومذيعين يرحمونا ويرحموا البلد